(vovworld) – ເວທີປາໄສ Fullerton ຄັ້ງທີ 4, ຖືກດຳເນີນໃນລະຫວ່າງວັນທີ 24 – 26/01, ຢູ່ສິງກະໂປ, ໂດຍສະຖາບັນຄົ້ນຄວ້າຍຸດທະສາດສາກົນ (IISS) ຈັດຕັ້ງ, ແມ່ນການເພີ່ມເຕີມ ແລະ ກະກຽມໃຫ້ເວທີປາໄສເຈລະຈາ Shangri – La ຖືກຈັດຂຶ້ນປະຈຳປີ. ປີນີ້, ເວທີປາໄສໄດ້ສຸມໃສ່ປຶກສາຫາລືກ່ຽວກັບວິວັດການຮັບປະກັນຄວາມໝັ້ນຄົງໃນການພົວພັນລະຫວ່າງບັນດາປະເທດໃຫຍ່ຢູ່ອາຊີ - ປາຊີຟິກ, ບັນດາໄພນາບຂູ່ດ້ານປ້ອງກັນຄວາມສະຫງົບຫາກໍ່ພົ້ນເດັ່ນຂຶ້ນຄື: ການປ້ອງກັນຄວາມປອດໄພດ້ານເຄືອຂ່າຍອີນເຕີແນດ ແລະ ກໍ່ການຮ້າຍ, ກໍຄືຄວບຄຸມການປະທະກັນໃນພາກພື້ນ.
ຄະນະຜູ້ແທນຫວຽດນາມ ໂດຍພົນຕີ, ປະລິຍາເອກ ຫງວຽນດຶກຫາຍ, ຫົວໜ້າສະຖາບັນຍຸດທະສາດປ້ອງກັນຊາດ ນຳໜ້າເຂົ້າຮ່ວມກອງປະຊຸມ.