ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງກ່າວຄຳເຫັນທີ່ພິທີອັດກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13 (ພາບ: na.gov.vn)
|
(vovworld)- ກ່າວຄຳເຫັນທີ່ພິທີອັດກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໃຫ້ຮູ້ວ່າ ທີ່ກອງປະຊຸມເທື່ອນີ້, ສະພາແຫ່ງຊາດຫວຽດນາມໄດ້ຮັບຮອງເອົາລັດຖະທຳມະນູນສະບັບປັບປຸງ, ຕົກລົງໜ້າທີ່ເສດຖະກິດ-ສັງຄົມ, ງົບປະມານແຫ່ງລັດປີ 2014, ຊຸມປີທີ່ຍັງເຫຼືອຂອງແຜນການ 5 ປີ, ບັນດາເນື້ອໃນກ່ຽວກັບວຽກງານສ້າງກົດໝາຍ, ຕິດຕາມກວດກາສູງສຸດ, ບັນດາບັນຫາ ທີ່ສຳຄັນຂອງປະເທດຊາດ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໃຫ້ຮູ້ວ່າ:
“ ຕໍ່ໜ້າຄວາມຮຽກຮ້ອງຕ້ອງການຂອງການດຳລົງຊີວິດ ແລະ ການພັດທະນາຂອງປະເທດຊາດ, ບັນດາ ສສຊ ໄດ້ໄຈ້ແຍກ, ຕີລາຄາຢ່າງພາວະວິໄສ, ຮອບດ້ານກ່ຽວກັບບັນດາດ້ານດີ ແລະ ຂໍ້ຈຳກັດ, ອ່ອນດ້ອຍໃນການ ປະຕິບັດແຕ່ລະຈຸດໝາຍ, ຄາດໝາຍເສດຖະກິດສັງຄົມ ເພື່ອວາງຈຸດໝາຍ, ໜ້າທີ່ ແລະ ວິທີການແກ້ໄຂຕົ້ນຕໍໃຫ້ປີ 2014 ແລະ ຊຸມປີຕໍ່ໍ່ໆໄປ ”
ເມື່ອເຕື້ອງເຖິງ ລັດຖະທຳມະນູນສະບັບປັບປຸງ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ຢືນຢັນວ່າ ສສຊ ແຕ່ລະທ່ານໄດ້ເຮັດວຽກຈົນສຸດ ຄວາມສາມາດຂອງຕົນດ້ວຍຈິດໃຈວິທະຍາສາດ, ຮັບຟັງຄຳເຫັນ, ໂຮມຍອດຍິ່ງສະຕິປັນຍາຂອງທ່ົວປວງຊົນ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ຢືນຢັນວ່າ :
“ລັດຖະທຳມະນູນຂອງປະເທດ ສ.ສຫວຽດນາມ ສະບັບປັບປຸງຄັ້ງນີ້ ໄດ້ສະແດງໃຫ້ເຫັນເຈດຈຳນົງຂອງພັກ ແລະ ຈິດໃຈຂອງປະຊາຊົນ. ອາດຈະເວົ້າວ່າ ນີ້ແມ່ນລັດຖະທຳມະນູນຂຊອງໄລຍະປ່ຽນໃໝ່ຢ່າງຮອບດ້ານ, ຄົບຊຸດທາງກ້ານເສດຖະກິດ ແລະການເມືອງ, ຕອບສະໜອງຄວາມຮຽກຮ້ອງຕ້ອງການຂອງພາລະກິດສ້າງສາ, ປົກປັກຮັກສາປະເທດຊາດ ແລະ ເຊື່ອມໂຍງເຂົ້າກັບສາກົນ” ພ້ອມກັບການຮັບຮອງເອົາ ລັດຖະທຳມະນູນສະບັບປັບປຸງ, ທີ່ກອງປະຊຸມເທື່ອນີ້, ສະພາແຫ່ງຊາດຫວຽດນາມ ໄດ້ຮັບຮອງເອົາກົດໝາຍ 8 ສະບັບ ແລະ ໃຫ້ຄຳເຫັນໃສ່ຮ່າງກົດໝາຍອື່ນ 10 ສະບັບ ພ້ອມກັບມະຕິສຳຄັນຫຼາຍສະບັບ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ເນັ້ນໜັກວ່າ :
“ ພາຍຫຼັງກອງປະຊຸມເທື່ອນີ້, ລັດຖະບານ, ບັນດາຂະແໜງການຂັ້ນຕ່າງໆຈົ່ງຮີບເຮັ່ງຈັດຕັ້ງຜັນຂະຫຍາຍປະຕິບັດບັນດາກົດໝາຍ, ມະຕິທີ່ສະພາແຫ່ງຊາດຫາກໍຮັບຮອງເອົາ, ປະກາດໃຊ້ເອກະສານແນະນຳການປະຕິບັດ, ຍູ້ແຮງວຽກງານໂຄສະນາ, ເຜີຍແຜ່, ສຶກສາອົບຮົມເພື່ອໃຫ້ກົດໝາຍເຂົ້າສູ່ຊີວິດຕົວຈິງໂດຍໄວ ”
ສຳລັບຮ່າງກົດໝາຍວ່າດ້ວຍທີ່ດິນສະບັບປັບປຸງລວມມີ 14 ພາກ, 212 ມາດຕາ ໄດ້ຮັບການຮັບຮອງເອົາຈາກສະພາແຫ່ງຊາດໃນຕອນເຊົ້າວັນທີ 29/11 ດ້ວຍຄະແນນສຽງເຫັນດີ 86,96%. ກົດໝາຍໄດ້ຢືນຢັນວ່າ ທີ່ດິນແມ່ນຂຶ້ນກັບກຳມະສິດຂອງທົ່ວປວງຊົນໂດຍລັດເປັນຜູ້ຕາງໜ້າເຈົ້າຂອງກຳມະສິດ ແລະ ເປັນເອກະພາບກັນໃນການຄຸ້ມຄອງ. ລັດມອບສິດນຳໃຊ້ທີ່ດິນໃຫ້ແກ່ຜູ້ນຳໃຊ້ທີ່ດິນຕາມລະບຽບ ກົດໝາຍ. ລັດຕົກລົງຖອນທີ່ດິນຄືນສຳລັບບັນດາກໍລະນີຄື: ຖອນທີ່ດິນຄືນເພື່ອ ຈຸດປະສົງປ້ອງກັນຊາດປ້ອງກັນຄວາມສະຫງົບ; ພັດທະນາເສດຖະກິດ-ສັງຄົມເພື່ອຜົນປະໂຫຍດແຫ່ງຊາດ, ວົງຄະນະຍາດ; ການຖອນ ທີ່ດິນຄືນຍ້ອນການລະເມີດ ກົດໝາຍວ່າດ້ວຍທີ່ດິນ; ການຖອນ ທີ່ດິນຄືນ ຍ້ອນຢຸດຕິການ ນຳໃຊ້ທີ່ດິນຕາມກົດໝາຍ, ຄວາມສະໝັກໃຈ, ເປັນໄພອັນຕະລາຍນາບຂູ່ຊີວິດມະນຸດ. ການຊົດເຊີຍເມື່ອລັດ ຖອນທີ່ດິນຄືນ ແມ່ນໄດ້ຮັບການປະຕິບັດດ້ວຍການມອບດິນທີ່ມີຈຸດປະສົງນຳໃຊ້ອັນດຽວກັນສຳລັບປະເພດທີ່ດິນຖືກຖອນຄືນ, ຖ້າຫາກບໍ່ມີດິນເພື່ອຊົດເຊີຍນັ້ນ ກໍຈະໄດ້ຮັບການຊົດເຊີຍດ້ວຍເງິນຕາມລາຄາດິນລະອຽດຂອງ ປະເພດທີ່ດິນຖືກຖອນຄືນໂດຍຄະນະກຳມະການປະຊາຊົນຂັ້ນແຂວງ, ນະຄອນ ຕົກລົງໃນຈຸດເວລາດຳເນີນຖອນທີ່ດິນຄືນ. ລັດຍັງກຳນົດຫຼັກການ,ວິທີການກຳນົດລາຄາທີ່ດິນ, ປະກາດໃຊ້ສາລາບານລາຄາທີ່ດິນ ແລະ ກຳນົດລາຄາທີ່ດິນລະອຽດ. ບັນດາການປ່ຽນໃໝ່ໃນກົດໝາຍວ່າດ້ວຍທີ່ດິນສະບັບປັບປຸງ ແມ່ນໄດ້ຮັບຄວາມເຫັນດີຈາກຜູ້ມີສິດເລືອກຕັ້ງໃນທົ່ວປະເທດ. ລຸງ ບຸຍດຶກຈຽນ ຜູ້ມີສິດເລືອກຕັ້ງ ຢູ່ນະຄອນຫາຍຟ່ອງ ໃຫ້ຮູ້ວ່າ :
“ກົດໝາຍວ່າດ້ວຍທີ່ດິນສະບັບປັບປຸງຄັ້ງນີ້, ໄດ້ເຮັດໃຫ້ປະຊາຊົນພາກພູມໃຈທີ່ສຸດ, ພິເສດແມ່ນສອດຄ່ອງກັບຄວາມມຸ່ງມາດປາຖະໜາຂອງປະຊາຊົນ. ເລື່ອງລັດຖອນທີ່ດິນຄືນແມ່ນມີການຊົດເຊີຍຢ່າງເໝາະສົມ. ລະຫວ່າງລັດ ແລະ ປະຊາຊົນນັ້ນ, ຕາມຂ້າພະເຈົ້າແລ້ວ, ຕ້ອງມີການກຳນັດລາຄາຢ່າງເປັນເອກະພາບ, ຫຼີກລ້ຽງສະພາບການຖອນທີ່ດິນຄືນແບບກະແຈກກະຈາຍ, ຕ້ອງຮັບປະກັນສິດຜົນປະໂຫຍດຂອງປະຊາຊົນ”