ແຂວງຫວີງຟຸກສົ່ງເສີມການລົງທຶນເຂົ້າສ.ເຊັກໂກ
ກອງປະຊຸມສຳມະນາແນະນຳຄວາມສາມາດບົ່ມຊ້ອນ ແລະ ກາລະໂອກາດລົງທຶນເຂົ້າແຂວງຫວີງຟຸກ
(vovworld) – ວັນທີ 1/8, ຢູ່ນະຄອນຫຼວງ ປຣາຮາ ຂອງ ສ. ເຊັກໂກ, ຄະນະກຳມະການປະຊາຊົນແຂວງ ຫວີງຟຸກ ໄດ້ຈັດຕັ້ງກອງປະຊຸມສຳມະນາແນະນຳຄວາມສາມາດບົ່ມຊ້ອນ ແລະ ກາລະໂອກາດລົງທຶນເຂົ້າແຂວງ. ການນຳແຂວງໄດ້ແນະນຳລາຍຊື່ 42 ໂຄງການຮຽກຮ້ອງການລົງທຶນເຂົ້າຫຼາຍຂົງເຂດຕາມບັນດາຮູບຄືການລົງທຶນນຳໃຊ້ແຫຼ່ງທຶນໜູນຊ່ວຍພັດທະນາ (ODA), 100% ຈຳນວນທຶນຈາກຕ່າງປະເທດ (FDI) ຫຼື ການຮ່ວມມືພາກລັດ - ເອກະຊົນ (PPP). ແຂວງໃຫ້ຄຳໝັ້ນສັນຍາສ້າງເງື່ອນໄຂອຳນວຍຄວາມສະດວກທີ່ສຸດໃຫ້ແກ່ບັນດາວິສາຫະກິດຕ່າງປະເທດ, ໃນນັ້ນມີບັນດາວິສາຫະກິດມາຈາກ ສ. ເຊັກໂກ, ລົງທຶນ ແລະ ທຳມາຫາກິນຢ່າງມີປະສິດທິຜົນເຂົ້າທ້ອງຖິ່ນ. ເມື່ອແລກປ່ຽນກັບນັກຂ່າວ VOV ປະຈຳ ເຊັກໂກ, ທ່ານ ຫງວຽນກິມຂາຍ, ຮອງປະທານສະພາປະຊາຊົນແຂວງ ຫວີງຟຸກ, ໃຫ້ຮູ້ວ່າ:
“ການໄປປະຕິບັດງານຂອງຄະນະຜູ້ແທນແຂວງ ຫວີງຟຸກ ສ. ເຊັກໂກໄດ້ດຶງດູດການລົງທຶນເຂົ້າບາງຂົງເຂດ, ໃນນັ້ນມີກົນຈັກປະດິດສ້າງ, ອຸດສາຫະກຳເອເລັກໂຕນິກ, ສາທາລະນະສຸກ ແລະ ການສຶກສາບຳລຸງສ້າງ, ພິເສດແມ່ນການບຳລຸງສ້າງວິຊາຊີບ. ຫວີງຟຸກ ແມ່ນຈຸດສຸມປະກອບລົດໂອໂຕ ແລະ ລົດຈັກ ສະນັ້ນຂະແໜງອຸດສາຫະກຳສຳຮອງແມ່ນສຳຄັນທີ່ສຸດ. ດັ່ງນັ້ນ, ພວກຂ້າພະເຈົ້າ, ປາດຖະໜາຢາກຮຽກຮ້ອງໃຫ້ບັນດານັກລົງທຶນຂອງ ເຊັກໂກ ລົງທຶນເຂົ້າຂະແໜງອຸດສາຫະກຳສຳຮອງໃຫ້ແກ່ຂະແໜງປະກອບລົດໂອໂຕ, ລົດຈັກ. ນອກຈາກນັ້ນ, ພວກຂ້າພະເຈົ້າກໍ່ປາດຖະໜາຢາກສ້າງສູນບຳລຸງສ້າງວິຊາຊີບສະໜອງແຮງງານໃຫ້ແກ່ແຂວງ ຫວີງຟຸກ ແລະ ບັນດາແຂວງໃກ້ຄຽງ.”