(vovworld)- ດ້ວຍຫົວຂໍ້ “ທະເລຕາເວັນອອກ: ການຮ່ວມມືເພື່ອຄວາມໝັ້ນຄົງ ແລະ ການພັດທະນາໃນພາກພື້ນ”, ກອງປະຊຸມສຳມະນາວິທະຍາສາດສາກົນ ແລະ ທະເລຕາເວັນອອກ ຄັ້ງທີ 7 ຖືກໄຂຂຶ້ນໃນຕອນເຊົ້າວັນທີ 23/11 ຢູ່່ ນະຄອນ ຫວູງເຕົາ. ມີ ຜູ້ຊ່ຽວຊານ, ນັກຮຽນຮູ້ຢູ່ພາຍໃນ ແລະ ຕ່າງປະເທດ ກວ່າ 200 ຄົນ ເຂົ້າຮ່ວມກອງປະຊຸມສຳມະນາເພື່ອປະກອບສ່ວນແກ້ໄຂການຂັດແຍ້ງໂດຍສັນຕິ, ຮັກສາສັນຕິພາບ ແລະ ສະຖຽນລະພາບໃນພາກພື້ນ. ກອງປະຊຸມສຳມະນາ ໂດຍສະຖາບັນການທູດ, ກອງທຶນຫນູນຊ່ວຍຄົ້ນຄ້ວາທະເລຕາເວັນອອກ ແລະ ສະມາຄົມທະນາຍຄວາມຫວຽດນາມສົມທົບກັນຈັດຕັ້ງ. ກ່າວຄຳເຫັນໄຂກອງປະຊຸມສຳມະນາ, ທ່ານ ດັ້ງດີງກູຍ, ຜູ້ອຳນວຍການສະຖາບັນການທູດຫວຽດນາມ ໃຫ້ຮູ້ວ່າ:
“ສິ່ງສຳຄັນທີ່ສຸດແມ່ນເຕົ້າໂຮມບັນດາຜູ້ຊ່ຽວຊານຊັ້ນນຳໃນການຄົ້ນຄ້ວາກ່ຽວກັບທະເລຕາເວັນອອກ ເພື່ອຕີລາຄາ, ໄຈ້ແຍກບັນດາເຫດການທີ່ເກີດຂຶ້ນຢູ່ທະເລຕາເວັນອອກໃນໄລຍະມໍ່ໆມານີ້. ແບ່ງປັນບັນດາໝາກຜົນຄົ້ນຄ້ວາຂອງເຂົາເຈົ້າໃນ 1 ປີຜ່ານມາ. ພ້ອມທັງ ປຶກສາຫາລືບັນດາຂໍ້ສະເຫນີເພື່ອຊ່ວຍໃຫ້ລັດຖະບານບັນດາຝ່າຍກ່ຽວຂ້ອງ, ບັນດາປະເທດໄດ້ຮັບຜົນປະໂຫຍດຈາກທະເລຕາເວັນອອກ ເພື່ອແກ້ໄຂສະພາບການຢູ່ທະເລຕາເວັນອອກ.”