(vovworld) - ໄຕທຽນ, ເຊິ່ງແມ່ນດິນແດນແຫ່ງພະພຸດທະເຈົ້າ, ແມ່ນບ້ານເກີດຂອງ ດ້າວເມົ໋າ (ເຈົ້າແມ່) ຕັ້ງຢູ່ເມືອງຕາມດາວ, ແຂວງວິ້ງຟຸກ. ນັບແຕ່ດົນນານມາແລ້ວ, ໄຕທຽນ ໄດ້ກາຍເປັນທີ່ຮູ້ຈັກຂອງຊາວຫວຽດນາມຫຼາຍລຸ້ນຄົນ. ໃນເມື່ອກ່ອນ, ເສັ້ນທາງໄປຍັງໄຕທຽນແມ່ນທຸລະກັນດານຫຼາຍ, ຕ້ອງຂ້າມພູສູງ, ຄ້ອຍຊັນ, ເຫວເລິກ. ແຕ່ປະຈຸບັນ, ເສັ້ນທາງໄປຍັງຈອມພູໄຕທຽນມີຄວາມສະດວກສະບາຍກວ່າ ຍ້ອນມີລະບົບກະເຊົ້າຂົນສົ່ງແຂກທ່ອງທ່ຽວ. ເມື່ອໄດ້ເຫັນຄວາມງາມຢູ່ທີ່ນີ້, ຜູ້ໄປນະມັດສະການຈະຮູ້ສຶກມີຄວາມສະຫວາດສະເຫວີຍ. ໃນລາຍການປະເທດຊາດ ແລະ ຊາວຫວຽດນາມ ພາກນີ້, ພວກເຮົາຂໍແນະນຳທັດສະນີຍະພາບທີ່ສວຍງາມຂອງໄຕທຽນ.
ທັດສະນີຍະພາບທີ່ສວຍງາມຢູ່ດິນແດນແຫ່ງພະພຸດທະເຈົ້າໄຕທຽນ
(ພາບ: ອິນເຕີແນດ)
ນັບແຕ່ດົນນານມາແລ້ວ, ຍາມໃດໄຕທຽນ ກໍ່ແມ່ນແຫ່ງທີ່ດຶງດູດຜູ້ໄປນະມັດສະການຈາກທຸກສາລະທິດມາດິນແດນແຫ່ງພະພຸດທະເຈົ້າເປັນຈຳນວນຫຼວງຫຼາຍ. ໄຕທຽນ ແມ່ນເຂດພູຜາປ່າໄມ້ທີ່ສວຍງາມ ແມ່ນແຫ່ງປະສົມປະສານລະຫວ່າງວັດທະນະທຳເຊື່ອຖືພະພຸດທະເຈົ້າ ກັບຄວາມນັບຖືເຈົ້າແມ່ຂອງຊາວຫວຽດນາມ. ເຖິງວ່າຜ່ານການເວລານັບຫຼາຍສະຕະວັດແລ້ວກໍ່ຕາມ, ແຕ່ໄຕທຽນ ຍັງຄົງຮັກສາທິວທັດທຳມະຊາດອັນມະຫັດສະຈັນ ແລະ ສວຍງາມໄວ້ໄດ້. ມາແຫ່ງນີ້, ນັກທ່ອງທ່ຽວສາມາດຍ່າງລຽບຕາມຫ້ວຍນ້ຳທີ່ສົດໃສເພື່ອໄປເຖິງສະຖານທີ່ທ່ອງທ່ຽວທີ່ມີຊື່ສຽງມາແຕ່ດົນນານຄື: ຫາດຫີນລ່ຽນ (ຫາດຫີນຕິດກັນ), ຫ້ວຍ ໂຕ໋ຍ (ຫ້ວຍມືດມົວ), ຕາດຈ່ອຍແຈ (ຕາດຕູບໄຜ່), ຕາກບາກ (ຕາກເງິນ) 5 ຊັ້ນ, ຫ້ວຍບາກ (ຫ້ວຍເງິນ), ຫ້ວຍຫວ່າງ (ຫ້ວຍຄຳ), ຫ້ວຍຢາຍອວານ (ຫ້ວຍແກ້ຄວາມອະຍຸຕິທຳ), ວິຫານໂກ (ວິຫານສາວ), ວິຫານເກົ້າ (ວິຫານບ່າວ), ວິຫານເທື້ອງໄຕທຽນ… ໃນນັ້ນສະຖານທີ່ຕົ້ນຕໍ່ນັ້ນແມ່ນວິຫານບູຊາ “ໄຕທຽນກວົກເມົ໋າ (ເຈົ້າແມ່ໄຕທຽນ)” ນັງທິຕຽວ. ຕາມເລື່ອງລາວທີ່ເລົ່າຂານກັນມາແລ້ວ, ພະນາງໄດ້ຮັບການກຳເນີດຈາກພູຜາປ່າໄມ້ຕາມດາວ. ພະນາງແມ່ນຄົນທີ່ສວຍງາມ ແລະ ມີຄວາມເກັ່ງກ້າສາມາດ, ດັ່ງນັ້ນຈື່ງຊ່ວຍໃຫ້ເຈົ້າຊີວິດຮຸ່ງ ຕີສັດຕູຜູ້ຮຸກຮານຮັກສາປະເທດຊາດ. ຍ້ອນມີບຸນຄູນຕໍ່ປະເທດຊາດ, ປະຊາຊົນຈຶ່ງຕັ້ງວິຫານເພື່ອບູຊາພະນາງ. ປະຈຸບັນ, ເຂດປູຊະນີຍະສະຖານວິຫານບູຊາ ເຈົ້າແມ່ໄຕທຽນ ແມ່ນສັນຍາລັກຫ່ງການເຫຼື້ອມໃສບູຊາເຈົ້າແມ່ຂອງຊາວຫວຽດນາມບູຮານ. ວິຫານຕັ້ງຢູ່ເທິງຈອມພູແທກບ່ານ, ຂຶ້ນກັບສາຍພູຕາມດາວ; ຫາກໍ່ໄດ້ຮັບການກໍ່ສ້າງຄືນໃໝ່ເທິງພື້ນທີ່ຍັງເຫຼືອຂອງວິຫານໃຫຍ່ 5 ແຫ່ງ ທີ່ໄດ້ຮັບການກໍ່ສ້າງຂຶ້ນແຕ່ສະໄໝລາຊະວົງ ເລ (ສະຕະວັດ 16 – 17). ສາດສະດາຈານ, ດຣ. ໂງດຶກທິ້ງ, ອະດີດ ຫົວໜ້າສະຖາບັນຄົ້ນຄ້ວາວັດທະນະທຳພື້ນເມືອງຫວຽດນາມ, ໃຫ້ຮູ້ວ່າ:
“ໃນການຄົ້ນຄ້ວາ, ເຂົາເຈົ້າກຳນົດໄດ້ສາຍພົວພັນລະຫວ່າງການນັບຖືທຳມະຊາດ ແລະ ນັບຖືເທວະທິດາ. ເທວະດາເປັນເຈົ້າຢູ່ໄຕທຽນ ແມ່ນ ເຈົ້າແມ່ໄຕທຽນ. ປະຊາຊົນຖືເຈົ້າແມ່ໄຕທຽນ ນັງທິຕຽວ ເປັນຊາດຄົນ, ທີ່ມີວັນ, ເດືອນ, ປີເກີດ, ຊ້ຳບໍ່ໜຳມີທັງຊື່ພໍ່ ແລະ ແມ່ອີກ. ແຕ່ເຈົ້າແມ່ໄຕທຽນ ພັດມີພະລັງແຮງນອກເໜືອມະນຸດ”.
ວິຫານເຈົ້າແມ່ໄຕທຽນ
(ພາບ: ອິນເຕີແນດ)
ສິ່ງທີ່ມີສັກສິດທີ່ສຸດສຳລັບຜູ້ໄປນະມັດສະການແຕ່ລະຄົນ, ນັ້ນແມ່ນໄດ້ຊົມເຫັນ ແລະ ໄຫວ້ບູຊາ “ເຈົ້າແມ່ໄຕທຽນ”. ເອື້ອຍມິງຮ່າ ມາຈາກຮ່າໂນ້ຍ, ແບ່ງປັນວ່າ:
“ໄຕທຽນ ແມ່ນແຫ່ງທີ່ຂ້າພະເຈົ້າຢາກມາຢາມນັບແຕ່ເວລາຍັງເປັນນັກສຶກສາ. ມາໄຕທຽນ ຂ້າພະເຈົ້າຮູ້ສຶກແປກປະຫຼາດໃຈຍ້ອນຄວາມສັກສິດຢູ່ທີນີ້. ໄຕທຽນມີວິຫານ ແລະ ວັດວາອາຮາມຫຼາຍແຫ່ງ. ພິເສດແມ່ນມີວິຫານເຈົ້າແມ່ໄຕທຽນ. ຂ້າພະເຈົ້າຮູ້ສືກໂຊກດີຫຼາຍ, ເມື່ອໄດ້ມາດິນແດນແຫ່ງພະພຸດທະເຈົ້າ ແລະ ວິຫານບູຊາເຈົ້າແມ່ໄຕທຽນ ໃນຕົ້ນປີເພື່ອພາວະນາຂໍໃຫ້ປີໃໝ່ມີຄວາມຜາສຸກ ແລະໂຊກດີ ”
ເຈົ້າແມ່ໄຕທຽນ
(ພາບ: ອິນເຕີແນດ)
ເມື່ອໄປນະມັດສະການໄຕທຽນ ພຸດທະສາສະນີກະຊົນບໍ່ພຽງແຕ່ໄດ້ຈູດທູບທຽນໄຫວ້ບູຊາເຈົ້າແມ່ໄຕທຽນ ເທົ່ານັ້ນ, ຫາກຍັງມີໂອກາດໄດ້ໄປ ທ່ຽນວ້ຽນຈຸກເລິມໄຕທຽນ, ເຊິ່ງແມ່ນໜຶ່ງໃນໂຮງຮຽນສົງ 3 ແຫ່ງໃຫຍ່ທີ່ສຸດຂອງຫວຽດນາມອີກດ້ວຍ. ປະຈຸບັນ, ທ່ຽນວ້ຽນຈຸກເລີມໄຕທຽນ ໄດ້ຮັບການກໍ່ສ້າງຂຶ້ນເທິງພື້ນຂອງວັດທຽນເອິນ ບູຮານ ດ້ວຍຫຼາຍກິດຈະກຳທີ່ໃຫຍ່ໂຕ ແລະ ສວຍງາມຢູ່ກາງປ່າຕາມດາວ, ເຊິ່ງໄດ້ຮັບການກໍ່ສ້າງຕາມສະຖາປັດຕະຍະກຳບູຊາພະພຸດທະເຈົ້າຂອງອາຊີຕາເວັນອອກ. ນັບແຕ່ເມື່ອລະບົບກະເຊົ້າຂົນສົ່ງແຂກຖືກນຳເຂົ້າໃຊ້ການ, ນັກທ່ອງທ່ຽວໄປນະມັດສະການໄຕທຽນນັບມື້ນັບຫຼາຍ. ທ່ານດິງວັນຕ໋ວນ, ຮອງຫົວໜ້າຄະນະຄຸ້ມຄອງທັດສະນີຍະພາບໄຕທຽນ, ໃຫ້ຮູ້ວ່າ:
“ໃນໂອກາດງານບຸນເຈົ້າແມ່ໄຕທຽນ ໃນວັນທີ 15/2 ໄລ່ຕາມຈັນທະປະຕິທິນເທົ່າ ແລະ ໃນຊຸມວັນຕົ້ນລະດູບານໃໝ່, ຈຳນວນນັກທ່ອງທ່ຽວໄປເທດສະການໄຕທຽນ ແມ່ນຫຼາຍທີ່ສຸດ. ປະຈຸບັນ, ຄະນະກຳມະການປະຊາຊົນແຂວງວິ້ງຟຸກ ໄດ້ລົງທຶນກໍ່ສ້າງພື້ນຖານໂຄງລ່າງ, ສ້າງເງື່ອນໄຂສະດວກໃຫ້ຜູ້ໄປນະມັດສະການ. ຈາກວິຫານຖ້ອງ (Thõng) ຂຶນວິຫານເທື້ອງ ໄດ້ມີລະບົບກະເຊົ້າຂົນສົ່ງຜູ້ໄປນະມັດສະການແລ້ວ, ດັ່ງນັ້ນໄດ້ປະກອບສ່ວນຫຼຸດຜ່ອນເວລາເດີນທາງລົງ”.
ລະບົບກະເຊົ້າຂົນສົ່ງແຂກໄປນະມັດສະການຢູ່ໄຕທຽນ
(ພາບ: ອິນເຕີແນດ)
ຜ່ານການເວລາຫຼາຍສະຕະວັດ, ມີປູຊະນີຍະສະຖານຫຼາຍແຫ່ງບໍ່ສາມາດຮັກສາໄວ້ໄດ້, ເສັ້ນທາງໄປນະມັດສະການໃນເມື່ອກ່ອນທຸລະກັນດານຫຼາຍ ດ້ວຍພູສູງ, ຄ້ອຍຊັນ, ເຫວເລິກ, ເຊິ່ງເຄີຍເປັນການທົດສອບບັນດາພຸດທະສາສະນີກະຊົນ ແລະ ຜູ້ໄປນະມັດສະການ. ແຕ່ປະຈຸບັນ, ທາງໄປຍັງດິນແດນແຫ່ງພະພຸດທະເຈົ້າພັດສະດວກສະບາຍຫຼາຍ. ຍ້ອນມີບັນດາພາຫະນະທີ່ທັນສະໄໝນັ້ນ, ບັນດາຄູນຄ່າດ້ານຈິດວີນຍານ, ວັດທະນະທຳຂອງຊາດສືບຕໍ່ໄດ້ຮັບການຍືນຍົງຄົງຕົວ ແລະ ເຜີຍແຜ່ພ້ອມກັບການເວລາ.