(vovworld)- ໂດຍຕັ້ງຢູ່ເຂດໃຈກາງນະຄອນ, ຕະຫລາດເບນແທງ ບໍ່ພຽງແຕ່ມີຊື່ສຽງ ແມ່ນສະຖານທີ່ຄ້າຂາຍທີ່ຄຶກໂຄມຫນາແຫນ້ນເທົ່ານັ້ນ ຫາກຍັງແມ່ນກິດຈະກຳ ສະຖາປັດຕະຍະກຳທີ່ພົ້ນເດັ່ນຂອງນະຄອນໂຮ່ຈິມີນອີກດ້ວຍ. ຜ່ານກວ່າສັດຕະວັດຫນຶ່ງ, ຕະຫລາດເບນແທງຍັງຄົງຕົວໃນນະຄອນໂຮ່ຈິມີນທີ່ມີການປ່ຽນແປງຫລາຍຢ່າງ ແລະ ກໍແມ່ນນະຄອນທີ່ມີການພັດທະນາດ້ານການຄ້າໃຫຍ່ສຸດໃນທົ່ວປະເທດ. ຕະຫລາດເບນແທງ ປະຈຸບັນ ແມ່ນສະຖານທີ່ທ່ອງທ່ຽວດູດດື່ມສຳລັບນັກທ່ອງທ່ຽວພາຍໃນ ແລະ ຕ່າງປະເທດ, ເພາະວ່າ ນີ້ແມ່ນກິດຈະກຳສະຖາປັດຕະຍະກຳດ້ານການຄ້າ, ສະແດງໃຫ້ເຫັນຄວາມກົມກຽວລະຫວ່າງ ໄຊງ່ອນໃນເມື່ອກ່ອນ ແລະ ນະຄອນໂຮ່ຈິມີນປະຈຸບັນ. ບົດຂຽນຂອງນັກຂ່າວໂຕຕວນ ດ້ວຍຫົວຂໍ້ວ່າ: “ຕະຫລາດເບນແທງ, ນະຄອນໂຮ່ຈິມີນ”.
ຕະຫລາດເບນແທງໃນເມື່ອກ່ອນ
ພາບເອກະສານ
|
ຕາມໄລຍະປະຫວັດສາດ, ຕະຫລາດເບນແທງ ໃນເມື່ອກ່ອນມີພຽງແຕ່ ເຮືອນກໍ່ສ້າງດ້ວຍໄມ້, ມຸງຫຍ້າຄາສອງສາມຫລັງ ຢູ່ແຄມແມ່ນ້ຳ ເບນແງ ຢູ່ຂ້າງກຳແພງ ຢາດີ້ງ. ປີ 1859, ລ່າເມືອງຂຶ້ນຝລັ່ງ ຕີຢືດຄອງກຳແພງ ຢາດີ້ງ ແລະ ຕະຫລາດແຫ່ງນີ້ກໍຖືກຈູດເຜົາທຳລາຍ, ຊາວຝລັ່ງອະນຸຍາດໃຫ້ກໍ່ສ້າງຕະຫລາດແຫ່ງຫນຶ່ງຊື່ງລວມມີ ບັນດາເຮືອນບໍ່ມີຝາ, ມຸ່ງດິນຂໍ. ດຣ ຮ່າມີງຮົ່ງ, ພະແນກປະຫວັດສາດມະຫາວິທະຍາໄລວິທະຍາສາດສັງຄົມ ແລະ ມະນຸດສາດ ນະຄອນໂຮ່ຈິມີນ ໃຫ້ຮູ້ວ່າ:
“ຕົ້ນສັດຕະວັດທີ 19 ໄດ້ມີຕະຫລາດເກົ່າແຫ່ງຫນຶ່ງທີ່ມີຊື່ວ່າ ເບນແທງ, ຕະຫລາດຖືກກໍໍ່ສ້າງຢູ່ແຄມແມ່ນ້ຳ ຢູ່ຂ້າງກຳແພງ(ພາສາຫວຽດເອີ້ນວ່າແທ່ງ) ສະນັ້ນ ມີຊື່ວ່າເບນແທ່ງ. ຕະຫລາດແຫ່ງນີ້ຖືກຈູດເຜົາຫ້ອງຫນຶ່ງ, ຫລັງຈາກນັ້ນຖືກກໍ່ສ້າງຄືນໃຫມ່ດ້ວຍ 5 ຫ້ອງທີ່ກວ້າງໃຫຍ່.”
ລະຫວ່າງປີ 1911, ຕະຫລາດມີຄວາມສ່ຽງຈະພັງຖະຫລົ່ມ, ຊາວຝລັ່ງ ໄດ້ເລືອກເຟັ້ນບ່ອນອື່ນເພື່ອກໍ່ສ້າງຕະຫລາດແຫ່ງໃຫມ່, ໃຫຍ່ກວ່າ ເພື່ອຮັບໃຊ້ຄວາມຕ້ອງການຄ້າຂາຍທີ່ຄຶກໂຄມຫນາແຫນ້ນ ແລະ ນັບມື້ນັບພັດທະນາ. ສະຖານທີ່ໄດ້ຮັບການຄັດເລືອກ ແມ່ນມໍ່ກັບສະຖານີລົດໄຟ ໝີທໍ ເບື້ອງຫລັງແມ່ນ ສະຖານີລົດເມ ໄຊງ່ອນ(ນັ້ນແມ່ນຕະຫລາດເບນແທງ ປະຈຸບັນ). ຕະຫລາດເບນແທງ ປະຈຸບັນ ມີ 4 ປະຕູ, ຕະຫລາດແຫ່ງນີ້ກາຍເປັນກິດຈະກຳສະຖາປັດຕະຍະກຳທີ່ມີລັກສະນະປະຫວັດສາດ ເພາະວ່າ ມັນຄົງຕົວກວ່າ 100 ປີມານີ້, ແຕ່ຍັງຄົງຮັກສາສະຖາປັດຕະຍະກຳແບບເອີລົບ, ແລະ ມີຄວາມກົມກຽວກັບບັນດາກິດຈະກຳສະຖາປັດຕະຍະກຳທີ່ທັນສະໄຫມຢູ່ໃຈກາງນະຄອນ. ທ່ານເຄືອງວັນເມື່ອຍ, ນັກສະຖາປານິກ, ສະມາຊິກສະມາຄົມນັກສະຖາປານິກ ນະຄອນໂຮ່ຈິມີນ ໃຫ້ຮູ້ວ່າ:
“ຕະຫລາດເບນແທງ ແມ່ນກິດຈະກຳສະຖາປັດຕະຍະກຳທີ່ເປັນເອກະລັກສະເພາະ, ໃນນັ້ນ ທາດທີ່ຕິດຕັ້ງໂມງທັງ 3 ຫນ້າ ແມ່ນສະແດງໃຫ້ເຫັນວ່າ ເມື່ອເວົ້າເຖິງຕະຫລາດເບນແທງ ແມ່ນຄິດເຖິງໄຊງ່ອນ, ນະຄອນ ໂຮ່ຈິມີນ. ຢູ່ອ້ອມແອ້ມຕະຫລາດ ມີລະບຽງທີ່ປູດ້ວຍເບຕົງເພື່ອໃຫ້ປະຊາຊົນໄປຊື້ເຄື່ອງຂອງບໍ່ຖືກແດດຮ້ອນຫລືຝົນຕົກ. ນີ້ກໍແມ່ນການອອກແບບສຳລັບເຂດຮ້ອນ ໂດຍ ຄົນຝລັ່ງ ປະຕິບັດສຳເລັດຜົນ ແລະ ເໝາະສົມກັບອາກາດ ຢູ່ເຂດອາຊີ ຕາເວັນອອກ.”
ຕະຫລາດເບນແທງປະຈຸບັນ
ພາບ:bookin.vn
|
ສຳລັບຫລາຍຄົນ, ພິເສດ ແມ່ນປະຊາຊົນນະຄອນ ໂຮ່ຈິມີນ, ເບນແທງ ແມ່ນຕະຫລາດແຫ່ງທີ່ຄຸ້ນເຄີຍ ແຕ່ສິ່ງທີ່ສ້າງຄວາມປະທັບໃຈກ່ຽວກັບຕະຫລາດແຫ່ງນີ້ບໍ່ແມ່ນຜູ້ໃດກໍຮູ້ຈັກເຖິງ. ການເຄື່ອນໄຫວຢູ່ຕະຫລາດທຸກມື້ນີ້ ຍັງຮັກສາຈຸດວັດທະນະທຳທີ່ເປັນເອກະລັກຫລາຍຢ່າງ. ພິເສດ ຢູ່ ທາດໂມງຕໍ່ຫນ້າປະຕູເຂົ້າຂອງຕະຫລາດ ຍັງຮັກສາຮ້ານບູຊາເຈົ້າຖິ່ນເຈົ້າຖານຕະຫລາດ. ແຕ່ລະມື້ ບັນດາພໍ່ຄ້າຊາຍຂາຍຢູ່ຕະຫລາດແຫ່ງນີ້ ຍັງມານີ້ເພື່ອຖະຫວາຍທູບທຽນ ຄືດັ່ງການເຄື່ອນໄຫວດ້ານຈິດວິນຍານ ເພື່ອພາວະນາໃຫ້ຊື້ໄດ້ຂາຍຫມານ. ປະຈຸບັນ ຢູ່ ຕໍ່ຫນ້າປະຕູໂຂງ ຍັງມີບັນດາຮູບແກະສະຫລັກຮູບໄກ່, ຮູບເປັດ ຫລື ຮູບປາ, ຊື່ງຕາມນັ້ນແລ້ວ ຜູ້ໄປຕະຫລາດຖ້າໄດ້ເບິ່ງຮູບນັ້ນແມ່ນສາມາດຊອກໄດ້ບ່ອນຊື້ເຄື່ອງຂອງທີ່ຕົນເອງຕ້ອງການ.
ບັນຍາກາດຢູ່ຕະຫລາດເບນແທງ ແມ່ນຄຶກຄື້ນທັງເວັນ ແລະ ຄືນ, ປະຈຸບັນ ຕະຫລາດແຫ່ງນີ້ ມີເກືອບ 1500 ຮ້ານ ແມ່ນບ່ອນຄ້າຂາຍຂອງພໍ່ຄ້າເກືອບ 6000 ຄົນ ແລະ ແຕ່ລະມື້ດຶງດູດແຂກມາຊື້ຂາຍເຄື່ອງ, ຢ້ຽມຊົມ ປະມານ 8-10.000 ເທື່ອຄົນ. ຢູ່ ຕະຫລາດເບນແທງ, ນັກທ່ອງທ່ຽວ ສາມາດຊອກຊື້ເຄື່ອງຂອງທຸກປະເພດ ນັບແຕ່ເຄື່ອງໃຊ້ໃນເຮືອນ, ອາຫານສົດ ຕະຫລອດຮອດເຄື່ອງໄຟຟ້າ, ເອເລັກໂຕນິກ…ພິເສດ ຕະຫລາດເບນແທງ ແຕ່ດົນນານມາແລ້ວ ມີຊື່ສຽງຍ້ອນມີໝາກໄມ້ທຸກປະເພດທີ່ ສົດ, ແຊບມາຈາກທຸກເຂດພາກເມື່ອທຽບໃສ່ຕະຫລາດແຫ່ງອື່ນໃນນະຄອນ. ໄປຢ້ຽມຊົມ, ຊື້ເຄື່ອງຂອງ, ຄົ້ນຫາຕະຫລາດເບນແທງ ແຕ່ດົນນານແລ້ວໄດ້ກາຍເປັນສ່ວນຫນຶ່ງທີ່ຂາດບໍ່ໄດ້ໃນບັນດາລາຍການທ່ອງທ່ຽວໄຊງ່ອນ, ນະຄອນໂຮ່ຈິມີນ.