(vovworld)- ມາຢ້ຽມຢາມ ມົກເຈົາ ນອກຈາກໄດ້ໄປຊົມທັດສະນີຍະພາບທີ່ສວຍງາມແລ້ວ ນັກທ່ອງທ່ຽວຍັງໄດ້ໄປຢ້ຽມຢາມບ້ານຂອງຊາວເຜົ່າມົ້ງ, ເຜົ່າຜູ້ໄທອີກດ້ວຍ. ເສັ້ນທາງເຂົ້າບ້ານຈຽງດີ, ຕາແສງ ຈຽງອຽນ ເມືອງ ເວີນໂຮ່ ແມ່ນຄັບແຄບ ແຕ່ພັດມີຄວາມປະທັບໃຈທີ່ສຸດ ເພາະ ບັນດາສວນດອກຄາຍຢູ່ທີ່ນີ້ເລີ່ມເບັ່ງບານ ພ້ອມດ້ວຍເຮືອນຮ້ານທີ່ເປັນເອກະລັກສະເພາະຂອງຊາວຊົນເຜົ່າທີ່ເກົ່າແກ່ຫລາຍຫລັງ.
ຊາວບ້ານ ຈຽງດີ ເຊີນແຂກທ່ອງທ່ຽວຊີມອາຫານພິເສດຂອງຊົນເຜົ່າຕົນ
ພາບ:vov
|
ເສັ້ນທາງເຂົ້າໄປບ້ານ ຈຽງດີ ແມ່ນເສັ້ນທາງນ້ອຍ ດັ່ງນັ້ນ ລົດໂອໂຕບໍ່ສາມາດເຂົ້າໄປໄດ້. ຫາກຕ້ອງຈອດຢູ່ຫົວບ້ານ, ສ່ວນນັກທ່ອງທ່ຽວຈະຕ້ອງຍ່າງຜ່ານທາງນ້ອຍຈຶ່ງເຂົ້າບ້ານໄດ້ຢູ່ລຽບຕາມສອງຟາກທາງ ແມ່ນສວນດອກຄາຍເລີ່ມເບັ່ງບານ ນີ້ແມ່ນສັນຍານທີ່ສະແດງໃຫ້ເຫັນວ່າ ລະດູບານໃຫມ່ວຽນມາແລ້ວ. ເອື້ອຍ ຫວູຖູຍ, ນັກທ່ອງທ່ຽວມາຈາກ ຮ່າໂນ້ຍ ແບ່ງປັນວ່າ:
“ໄລຍະທາງຈາກຮ່າໂນ້ຍໄປເຖິງ ມົກເຈົາ ບໍ່ໄກປານໃດ. ບ້ານຂອງຊາວຊົນເຜົ່າຢູ່ທີ່ນີ້ ຍັງຄົງຮັກສາສະພາບດັ້ງເດີມໄວ້ໄດ້. ມາຢ້ຽມຢາມບ້ານນັກທ່ອງທ່ຽວ ຮູ້ສຶກປະທັບໃຈທີ່ສຸດເມື່ອໄດ້ເຫັນປະຈັກຕາຊີວິດການເປັນຢູ່ຂອງຊາວຊົນເຜົ່າ.”
ມາຢ້ຽມຢາມບ້ານ ຈຽງດີ ເມື່ອນັກທ່ອງທ່ຽວ ແວ່ຢາມບໍ່ວ່າຄອບຄົວໃດກໍ່ໄດ້ ລ້ວນແຕ່ໄດ້ຮັບການຕ້ອນຮັບຢ່າງສະຫນິດສະຫນົມຈາກຊາວບ້ານ. ໃນນັ້ນ ເຮືອນຂອງ ທ່ານ ຫວ່າງອາຈູ, ນາຍບ້ານ ຈຽງດີ ແມ່ນສະຖານທີ່ຊື່ງນັກທ່ອງທ່ຽວເຂົ້າຢ້ຽມຢາມຫລາຍກວ່າໝູ່. ຢູ່ເຮືອນຮ້ານ ຂອງຄອບຄົວ ທ່ານ ຫວ່າງອາຈູ, ນັກທ່ອງທ່ຽວຈະໄດ້ຮັບຟັງການແນະນຳກ່ຽວກັບຊີວິດປະຈຳວັນຂອງຊາວເຜົ່າມົ້ງ, ແລະ ໄດ້ຮັບປະທານ ອາຫານພື້ນເມືອງຫລາຍເຍື່ອງຂອງຊາວຊົນເຜົ່າ.
ໃນເຮືອນຂອງຊາວເຜົ່າມົ້ງຢູ່ ບ້ານຈຽງດີ, ຫລັງໃດກໍລ້ວນແຕ່ມີໂມ້ສາລີ
ພາບ:vov
|
ໃນເຮືອນທີ່ປຸກສ້າງດ້ວຍໄມ້, ເຖິງວ່າ ອຸປະກອນການຜະລິດ, ເຄື່ອງໃຊ້ສອຍໃນຄອບຄົວຂອງຊາວຊົນເຜົ່າບໍ່ທັນສະໄຫມຄືຢູ່ເຂດຕົວເມືອງກໍຕາມ ແຕ່ພັດແມ່ນສິ່ງທີ່ແປກປະຫລາດສຳລັບນັກທ່ອງທ່ຽວຫລາຍຄົນ. ພິເສດ ເມື່ອເຫັນປະຈັກຕາການດຳລົງຊີວິດທີ່ລຽບງ່າຍ ແຕ່ເຕັມໄປດ້ວຍຄວາມສະຫນິດສະຫນົມ ແລະ ຮັກແພງແຂກຄົນຂອງຊາວເຜົ່າຢູ່ທີ່ນີ້. ເອື້ອຍ ຫວູຖູຍ ໃຫ້ຮູ້ວ່າ:
“ຂ້າພະເຈົ້າມັກໄປຢ້ຽມຢາມບັນດາຄອບຄົວຂອງຊາວຊົນເຜົ່າ ເພາະວ່າ ມານີ້ຂ້າພະເຈົ້າໄດ້ມີຄວາມເຂົ້າໃຈຫລາຍສິ່ງຫລາຍຢ່າງກ່ຽວກັບຊີວິດປະຈຳວັນຂອງຊາວຊົນເຜົ່າ, ພິເສດ ແມ່ນການເຮັດໄຮ່ເຮັດນາ, ວິທີປຸງແຕ່ງອາຫານ, ຮີດຄອງປະເພນີ.”
ໃນເຮືອນຂອງຊາວເຜົ່າມົ້ງຢູ່ ບ້ານຈຽງດີ, ຫລັງໃດກໍລ້ວນແຕ່ມີໂມ້ສາລີ. ກ່ອນນີ້ ສາລີ ແມ່ນສະບຽງອາຫານຕົ້ນຕໍຂອງຊາວເຜົ່າມົ້ງ. ພິເສດ ແມ່ນເຍື່ອງອາຫານທີ່ມີຊື່ວ່າ: ແມ່ນແມນ(mèn mén) ຊື່ງແມ່ນອາຫານທີ່ເຮັດດ້ວຍແປ້ງສາລີ… ກ່ອນນີ້ ຊາວເຜົ່າມົ້ງ ຂາດແຄນເຂົ້າສານ ສະນັ້ນ “ແມ່ນແມນ” ຊື່ງແມ່ນອາຫານຕົ້ນຕໍຂອງຊາວຊົນເຜົ່າຢູ່. ປະຈຸບັນ ເມື່ອມີນັກທ່ອງທ່ຽວມາຢ້ຽມຢາມ, ຊາວເຜົ່າມົ້ງ ພັດປຸງແຕ່ງເຍື່ອງອາຫານ ແມ່ນແມນນີ້ ເພື່ອຕ້ອນຮັບນັກທ່ອງທ່ຽວ. ຜ່ານ ເຍື່ອງອາຫານນີ້ ຊາວເຜົ່າມົ້ງ ຢາກແນະນຳກ່ຽວກັບສີສັນວັດທະນະທຳຂອງຊົນເຜົ່າຕົນເຖິງນັກທ່ອງທ່ຽວ. ເຖິງວ່າ ແມ່ນແມນ ມີລົດຊາດບໍ່ແຊບປານໃດກໍຕາມ ແຕ່ນັກທ່ອງທ່ຽວຜູ້ໃດກໍຢາກຊີມ. ອ້າຍ ໂດເຟືອງ ນັກທ່ອງທ່ຽວມາຈາກ ຮ່າໂນ້ຍ ແບ່ງປັນວ່າ:
“ ຂ້າພະເຈົ້າໄດ້ຍິນກ່ຽວກັບ ອາຫານເຍື່ອງນີ້ມາຫລາຍເທື່ອແລ້ວ ແຕ່ນີ້ເປັນຄັ້ງທຳອິດຂ້າພະເຈົ້າໄດ້ກິນ. ອາຫານເຍື່ອງນີ້ ເຖິງວ່າກິນບໍ່ແຊບ ແຕ່ພວກເຮົາກໍ່ຕ້ອງກິນ ເພື່ອແບ່ງປັນຄວາມຫຍຸ້ງຍາກທີ່ຊາວຊົນເຜົ່າຢູ່ທີ່ນີ້ໄດ້ຜ່ານຜ່າ.”
ສິ້ນສຸດລາຍການທ່ອງທ່ຽວ ບ້ານຈຽງດີ, ນັກທ່ອງທ່ຽວຜູ້ໃດກໍຮູ້ສຶກມີຈິດໃຈສະຫວາດສະເຫວີຍກວ່າ ຍ້ອນອາລົມຈິດ, ຄວາມຮັກແພງແຂກຄົນ ຂອງຊາວຊົນເຜົ່າຢູ່ທີ່ນີ້.ນອກນັ້ນ ອາຫານພື້ນເມືອງ, ຮີດຄອງປະເພນີທີ່ເປັນເອກະລັກສະເພາະຂອງຊາວຊົນເຜົ່າ ກໍຄືທິວທັດທຳມະຊາດທີ່ສວຍສົດງົດງາມຢູ່ເຂດພູສູງທາງພາກເຫນືອ ຫວຽດນາມ ກໍເປັນສິ່ງທີ່ເຮັດໃຫ້ນັກທ່ອງທ່ຽວບໍ່ອາດຫລົງລືມໄດ້.