(vovworld) - ເກາະຫຼີເຊີນ ຍັງເອີ້ນວ່າກູ່ລາວແຣ່, ແມ່ນເມືອງເກາະທີ່ແຍກອອກຈາກເມືອງບິ່ນເຊີນ ເມື່ອປີ 1992 ແລະ ກາຍເປັນເມືອງເກາະປ້ອມໜ້າຂອງແຂວງກວາງຫງາຍ. ເກາະຫຼີເຊີນ ຕັ້ງຢູ່ໃກ້ກັບຝັ່ງທະເລ, ມີມູນເຊື້ອວັດທະນະທຳທີ່ມີມາແຕ່ດົນນານ, ມີປູຊະນີຍະສະຖານປະຫວັດສາດ ແລະ ທັດສະນີຍະພາບທີ່ສວຍງາມຫຼາຍແຫ່ງ, ດັ່ງນັ້ນຫຼີເຊີນ ຈຶ່ງມີຄວາມສາມາດບົ່ມຊ້ອນຢ່າງໃຫຍ່ຫຼວງໃນການພັດທະນາການທ່ອງທ່ຽວ.
ເກາະຫຼີເຊີນແຂວງກວາງຫງາຍ
(ພາບ: ອິນເຕີແນດ)
ເກາະຫຼີເຊີນ ແມ່ນຮ່ອງຮອຍທີ່ຍັງເຫຼືອຂອງພູໄຟ, ເຊິ່ງມີມາກ່ອນນີ້ນັບພັນປີ, ມີເນື້ອທີ່ປະມານ 10 ຕາລາງກິໂລແມັດ, ພົນລະເມືອງມີກວ່າ 20.000 ຄົນ. ຜ່ານຜົນແຫ່ງການຂຸດຄົ້ນບູຮານຫວ່າງແລ້ວນີ້ໃຫ້ເຫັນວ່າ, ກ່ອນນີ້ແຕ່ 2.500-3.000 ປີ ໄດ້ມີປະຊາຊົນດຳລົງຊີວິດຢູ່ເກາະນີ້ແລ້ວ. ໃນເກາະມີປູຊະນີຍະສະຖານລະດັບຊາດ 2 ແຫ່ງນັ້ນແມ່ນສາລາບ້ານອານຫາຍ, ທີ່ກ່ຽວຂ້ອງເຖິງກອງທະຫານເຮືອຮ່ວາງຊາ ແລະ ວັດຮາງ. ບັນດາຮ່ອງຮອຍວັດທະນະທຳຊາຮວີ່ນ ກໍ່ໄດ້ຊອກເຫັນຢູ່ທີ່ນີ້ຄື: ຫ້ວຍຈິ່ງ, ບ້ານອົກ, ພິເສດແມ່ນຮ່ອງຮອຍຂອງວັດທະນະທຳຈຳປາ. ໃນເກາະຍັງມີວັດ, ຫໍບູຊາ 24 ແຫ່ງ, ໃນນັ້ນພົ້ນເດັ່ນແມ່ນວັດ ເອີມລິງຕື້ (Am Linh Tu), ເຊິ່ງແມ່ນແຫ່ງບູຊາບັນດານັກຮົບຂອງກອງທະຫານເຮືອຮ່ວາງຊາ ໃນເມື່ອກ່ອນ. ພໍ່ຕູ້ ຫວໍຮ່ຽນດາດ, ຜູ້ໄດ້ຮັບຖືວ່າແມ່ນສາງປະຫວັດສາດທີ່ມີຊີວິດຂອງເກາະ, ໃຫ້ຮູ້ວ່າ, ວັດເອີມລິງຕື້ (Am Linh Tu) ແມ່ນແຫ່ງທີ່ນັກທ່ອງທ່ຽວທັງຫຼາຍຢາກມາຢາມ.
“ເອີມລິງຕື້ ມີມາແຕ່ດົນນານແລ້ວ, ບໍ່ຈັກວ່າບັນພະບຸລຸດໄດ້ກໍ່ສ້າງຂຶ້ນແຕ່ປີໃດ. ຂ້າພະເຈົ້າພຽງແຕ່ຮູ້ວ່າມັນໄດ້ມີມາກ່ອນນີ້ 4 ລຸ້ນຄົນແລ້ວ. ໃນສະໄໝຫົວເມືອງຂຶ້ນຝລັ່ງ, ເອີມລິງຕື້ ຖືກລະເບີດທຳລາຍ, ຮອດປີ 2008, ລັດໄດ້ລົງທຶນກໍ່ສ້າງຄືນໃໝ່ ແລະ ປະຈຸບັນມັນໄດ້ກາຍເປັນເຂດປູຊະນີຍະສະຖານ“.
ເອີມລິງຕື້ຢູ່ເກາະຫຼີເຊີນແຂວງກວາງຫງາຍ
(ພາບ: ອິນເຕີແນດ)
ອາດຈະບໍ່ມີບ່ອນໃດໃນທົ່ວປະເທດຫວຽດນາມ ພັດມີສາຍພົວພັນອັນສະໜິດແໜ້ນກັບໝູ່ເກາະຮ່ວາງຊາ ຄືເກາະຫຼີເຊີນ. ນັບແຕ່ດົນນານມາແລ້ວ, ໃນປະຫວັດສາດ, ໝູ່ເກາະຮ່ວາງຊາ ເວົ້າສະເພາະ ແລະ ເຂດທະເລຮ່ວາງຊາ ເວົ້າລວມ ໄດ້ກາຍເປັນບ່ອນຫາປາຂອງຊາວປະມົງໃນເກາະ. ນັບແຕ່ສະຕະວັດທີ 17, ຊາວຫຼີເຊີນ ຫຼາຍເຊັ່ນຄົນໄດ້ສືບທອດກັນກາຍເປັນນັກຮົບໃນກອງທະຫານເຮືອ, ອອກສູ່ເກາະຮ່ວາງຊາ ເພື່ອວັດແທກ, ແຕ້ມແຜນທີ່ທະເລ, ຂຸດຄົ້ນສິນທະເລ, ກໍ່ສ້າງວັດ, ຫໍບູຊາ, ປັກສີລາຢັ້ງຢືນອະທິປະໄຕຕາມຄຳສັ່ງຂອງເຈົ້າຊີວິດ ຫງວຽນ. ຍ້ອນເຫດນັ້ນ, ຫຼີເຊີນ ຈຶ່ງເປັນເຂດທີ່ມີປູຊະນີຍະສະຖານປະຫວັດສາດ - ວັດທະນະທຳຫຼາຍແຫ່ງ ກ່ຽວກັບຮ່ວາງຊາ - ເຈື່ອງຊາ. ຢູ່ຫຼີເຊີນ ຍັງມີບັນດາງານບຸນທີ່ເປັນເອກະລັກສະເພາະຕິດພັນກັບວັດທະນະທຳທະເລ ແລະ ອະທິປະໄຕທະເລໝູ່ເກາະຄື: ບຸນຊ່ວງເຮືອ, ບຸນບູຊາສາລາບ້ານອານຫາຍ, ງານບຸນຮູ້ບຸນຄູນຕໍ່ບັນດານັກຮົບໃນກອງທະຫານເຮືອຮ່ວາງຊາ...
ນອກຈາກບັນດາປູຊະນີຍະສະຖານປະຫວັດສາດທີ່ພິສູດໃຫ້ເຫັນພື້ນຖານວັດທະນະທຳທີ່ມີມາແຕ່ບູຮານແລ້ວ, ເກາະຫຼີເຊີນ ຍັງແມ່ນແຫ່ງທີ່ມີທັດສະນີຍະພາບສວຍງາມຫຼາຍແຫ່ງ. ຢູ່ອ້ອມຮອບເກາະແມ່ນທະເລທີ່ຂຽວສະອາດ ແລະມີຊີວະຊາດທີ່ອຸດົມສົມບຸນຄຶ: ສິນທະເລ, ຫີນປະກາລັງ... ໃນເກາະຍັງມີຖ້ຳທຳມະຊາດຫຼາຍແຫ່ງຄື: ຖ້ຳເກົາ (ຕຶກປາ), ຖ້ຳກໍ່ (ນົກຍາງ), ຖ້ຳໂຈນສະລັກ... ທ່ານ ເຈິ່ນງອກງວຽນ, ປະທານຄະນະກຳມະການປະຊາຊົນເມືອງເກາະຫຼີເຊີນ, ໃຫ້ຮູ້ວ່າຄະນະກຳມະການປະຊາຊົນເມືອງຫຼີເຊີນ ແລະ ພະແນກວັດທະນະທຳ, ກິລາ ແລະ ທ່ອງທ່ຽວແຂວງກວາງຫງາຍ ໄດ້ນຳທ່າແຮງທັງໝົດເຂົ້າແຜນກຳນົດພັດທະນາການທ່ອງທ່ຽວໃນເກາະ. ແຕ່ເພື່ອດຶງດູດນັກທ່ອງທ່ຽວຕ່າງປະເທດມາຢາມ, ຫຼີເຊີນ ຕ້ອງດຶງດູດການລົງທຶນ ແລະ ພັດທະນາພັດຕະຄານ, ໂຮງແຮມ, ລະບົບທາງຄົມມະນາຄົມ ແລະ ລະບົບສະໜອງພະລັງໄຟຟ້າ. ພິເສດແມ່ນຕ້ອງບຸລະນະບັນດາປູຊະນີຍະສະຖານປະຫວັດສາດ ແລະ ໂຄສະນາຄວາມສາມາດບົ່ມຊ້ອນດ້ານການທ່ອງທ່ຽວຂອງເກາະຢ່າງກວ້າງຂວາງ. ທ່ານ ເຈິ່ນງອກງວຽນ, ໃຫ້ຮູ້ວ່າ:
“ທາງເມືອງໄດ້ໂຄສະນາ, ຮຽກຮ້ອງບໍລິສັດຈຳນວນໜຶ່ງລົງທຶນເປີດກວ້າງເຂດຊີວະພາບຫິນປະກາລັງ. ທາງແຂວງກໍ່ໄດ້ຊີ້ນຳໃຫ້ເມືອງ ແລະ ຂະແໜງວັດທະນະທຳທ່ອງທ່ຽວວາງແຜນພັດທະນາການທ່ອງທ່ຽວ. ລົງທຶນກໍ່ສ້າງພື້ນຖານໂຄງລ່າງຄົມມະນາຄົມ, ບຸລະນະບັນດາປູຊະນີຍະສະຖານຢ່າງທັນການເພື່ອຮັບໃຊ້ໃຫ້ແຂກທ່ອງທ່ຽວ“.
ທ່ອງທ່ຽວຢູ່ເກາະຫຼີເຊີນແຂວງກວາງຫງາຍ
(ພາບ: ອິນເຕີແນດ)
ໃນຊຸມປີມໍ່ໆມານີ້, ຍ້ອນທາງຄົມມະນາຄົມທີ່ເຊື່ອມຕໍ່ກັບເຂດດິນຕໍ່ແຜ່ນສະດວກສະບາຍ, ດັ່ງນັ້ນການເຄືອນໄຫວທັງໝົດຂອງຫຼີເຊີນ ມີຄວາມຟົດຟື້ນກວ່າອີກ. ຄວາມສາມາດບົ່ມຊ້ອນດ້ານການທ່ອງທ່ຽວຂອງຫຼີເຊີນ ພວມໄດ້ຮັບການຂຸດຄົ້ນເພື່ອພັດທະນາ