ເຂດປ່າສະຫງວນແຫ່ງຊາດບາເບຂຶ້ນກັບແຂວງບັກກ້ານຊຶ່ງແມ່ນແຂວງເຂດພູດອຍທາງທິດເໜືອຫວຽດນາມ, ເຂດປ່າສະຫງວນບາເບແມ່ນນອນໃນບໍລິເວນ 5 ຕາແສງ: ນາມເມົ້າ, ຄາງນິງ, ກາວເທື້ອງ, ກວາງເຄ ແລະ ກາວຈີ້ ຂຶ້ນກັບເມືອງບາເບ. ເຂດປ່າສະຫງວນແຫ່ງຊາດບາເບແມ່ນສາຖານທີ່ທ່ອງທ່ຽວທຳມະຊາດທີ່ຈັບໃຈດ້ວຍທິວທັດທຳມະຊາດທີ່ສວຍສົດງົດງາມ ແລະ ແມ່ນເຂດຊີວະນາໆພັນ, ອັນໄດ້ດຶງດູດໃຈແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ.
ນ້ຳຕົກຕາດເດົາດັງໃນເຂດປ່າສະຫງວນແຫ່ງຊາດບາເບ |
ເຂດປ່າສະຫງວນແຫ່ງຊາດບາເບມີເນື້ອທີ່ 7.610 ແຮັກຕາ, ໃນນັ້ນມີເນື້ອນທີ່ 3.226 ແຮັກຕາແມ່ນໄດ້ຮັບການປົກປັກຮັກສາຢ່າງເຄັ່ງຄັດ. ນີ້ ແມ່ນເຂດຊີວະນາໆພັນ, ມີຫຼາຍຈຸດເປັນເອກະລັກສະເພາະຂອງລະບົບຊີວະພາບ ຊຶ່ງພົ້ນເດັ່ນແມ່ນປ່າແປກຂຽວອຸ່ມທຸ່ມເທິ່ງພູຫີນປູນ ແລະ ໜອງເທິ່ງພູ. ປີ 2004, ເຂດປ່າສະຫງວນແຫ່ງຊາດບາເບໄດ້ຮັບການຮັບຮອງແມ່ນມໍລະດົກທຳມະຊາດຂອງອາຊຽນ. ທ່ານຝ້າມວັນຈີ້ ຮອງຜູ້ອຳນວຍການ ເຂດປ່າສະຫງວນບາເບໃຫ້ຮູ້ວ່າ :
“ ປີ 2011, ເຂດປ່າສະຫງວນແຫ່ງຊາດບາເບໄດ້ຮັບການຮັບຮອງແມ່ນເຂດດິນນ້ຳຖ້ວມ ມີຄວາມສຳຄັນສາກົນ, ຖືກຈັດອັນດັບທີ 3 ຂອງຫວຽດນາມ ແລະ 1938 ໃນໂລກ. ດ້ວຍຄວາມສາມາດບົ່ມຊ້ອນພິເສດເຊັນນີ້, ໃນແຕ່ລະປີ, ຈຳນວນແຂກທ່ອງທ່ຽວມາທ່ອງທ່ຽວຢູ່ ເຂດປ່າສະຫງວນແຫ່ງຊາດບາເບນັບມື້ນັບຫຼາຍຂຶ້ນ. ເພື່ອເສີມຂະຫຍາຍທ່າໄດ້ປຽບ, ເຂດປ່າສະຫງວນແຫ່ງຊາດບາເບໄດ້ສ້າງເງື່ອນໄຂ ແລະ ປະຕິບັດບັນດາຂໍ້ກຳນົດ, ຮ່ວມທຸລະກິດ, ເປີດກ້ວາງບໍລິເວນເຄຶ່ອນໄຫວ ອັນໄດ້ນຳມາເຊິ່ງປະສິດທິຜົນໃນການພັດທະນາການທ່ອງທ່ຽວ ”
ຍານພາຫະນະເພື່ອໄປທ່ອງທ່ຽວໃນ ເຂດປ່າສະຫງວນແຫ່ງຊາດບາເບ ຕົ້ນຕໍແມ່ນລົດຈັກ. ເສັ້ນທາງເບຕົງຄົດລ້ຽວ, ຕອນຂຶ້ນ ຕອນລົງຄ້ອຍອັນໄດ້ສ້າງຄວາມປະທັບໃຈແກ່ແຂກທ່ອງທ່ຽວ. ຈາກປະຕູໂຂງເຂົ້າໄປໃນເຂດປ່າສະຫງວນ, ແລ່ນຜ່ານເສັ້ນທາງກໍຈະຮອດໜອງບາເບ ຊຶ່ງແມ່ນໜອງນ້ຳຈືດໃຫຍ່ກ່ວາໝູ່ຢູ່ຫວຽດນາມ. ທ່ານ ກາວມິນຫາຍ ປະທານຄະນະກຳມະການປະຊາຊົນເມືອງບາເບໃຫ້ຮູ້ວ່າ :
“ ທຳມະຊາດໄດ້ດົນບັນດານໃຫ້ເມືອງບາເບມີໜອງບາເບ ແມ່ນປູຊະນີຍະສະຖານແຫ່ງຊາດພະເສດ. ດ້ວຍເນື້ອທີ່ໜ້ານ້ຳຂອງໜອງປະມານ 450 ແຮັກຕານັ້ນ, ນີ້ແມ່ນທ່າໄດ້ປຽບ, ທ່າແຮງບົ່ມຊ້ອນພັດທະນາຂອງ ໜອງບາເບກໍຄືຂອງແຂວງບັກກ້ານ. ພ້ອມກັບຄວາມສາມາດບົ່ມຊ້ອນໃນລະບົບຖ້ຳ, ກຸ່ມປູຊະນີຍະສະຖານມີຖ້ຳສວຍງາມຫຼາຍແຫ່ງເພື່ອພັດທະນາການທ່ອງທ່ຽວຕາມທິດຄົ້ນຫາ ”
ບາເບໄດ້ຮັບການຮັບຮອງ ແມ່ນໜຶ່ງໃນຈຳນວນ 100 ໜອງນ້ຳຈືດໃຫຍ່ທີ່ສຸດໃນໂລກ. ປີ 1995, ຢູ່ອາເມລິກາ, ກອງປະຊຸມກ່ຽວກັບໜອງນ້ຳຈືດໂລກໄດ້ຮັບຮອງໜອງບາເບແມ່ນໜຶ່ງໃນຈຳນວນໜອງນ້ຳຈືດພິເສດ 20 ແຫ່ງຂອງມວນມະນຸດ ຄວນໄດ້ຮັບການຮັກສາຢ່າງເຄັ່ງຄັດ. ໃຈກາງຂອງ ເຂດປ່າສະຫງວນແຫ່ງຊາດບາເບແມ່ນ ໜອງບາເບ. ໜອງ ບາເບຍັງແມ່ນທີ່ຢູ່ອາໄສຂອງປານ້ຳຈືດປະມານ 106 ປະເພດ, ໃນນັ້ນມີປະເພດທີ່ມີຄ່າຫາຍາກ ພ້ອມກັບພຶກສາຊາດທີ່ມີຄ່າຫາຍາກມີຊື່ໃນປຶ້ມແດງຫວຽດນາມ. ໜອງບາເບຍັງແມ່ນແຫຼ່ງນ້ຳຈືດທີ່ສຳຄັນຂອງປະຊາຊົນທີ່ດຳລົງຊີວິດຢູ່ອ້ອມຂ້າງເຂດນີ້.
ໃນທ່າມກາງບັນຍາກາດທີ່ມິດງຽບ, ເຢັນສະບາຍ, ນັ່ງໃຕ້ຮົ່ມເຢັນຂອງຕົ້ນໄມ້ໃຫຍ່, ໄດ້ຊົມຄວາມງາມຢູ່ໜ້ານ້ຳໃນໜອງ ແລະ ໄດ້ຟັງສຽງພິນຕິ້ງຂອງເຈົ້າຂອງຮ້ານ, ຜູ້ຄົນທັງຫຼາຍຕ່າງກໍຮູ້ສຶກສະບາຍໃຈ. ໜອງບາເບແມ່ນແຫ່ງມີຄວາມປອງດອງຂອງປ່າໄມ້, ແມ່ນ້ຳລຳເຊ ພ້ອມກັບອາກາດເຢັນສະບາຍຢູ່ເຂດພູດອຍ. ຈຸດເວລາທີ່ງາມກວ່າໝູ່ໃນປີ ແມ່ນໃນຍາມລະດູຮ້ອນ, ຕົ້ນລະດູໃບໄມ້ຫຼົ່ນຫຼືລະດູບານໃໝ່. ຄວາມງາມຂອງໜອງບາເບຍັງໄດ້ຕິດພັນກັບເຮືອໄມ້ຊຶ່ງເປັນສິ່ງໜຶ່ງທີ່ຂາດບໍ່ໄດ້ສຳລັບໜອງ ບາເບ. ຢູ່ໜ້າໜອງ ບາເບ ທີ່ມິດງຽບ, ບໍ່ເກີດມີຄື້ນແຕ່ຢ່າງໃດ, ຮູບພາບເຮືອໄມ້ຄ່ອຍແລ່ນເທິ່ງໜ້ານ້ຳ, ໄດ້ເຮັດໃຫ້ແຂກທ່ອງທ່ຽວມີຄວາມປະທັບໃຈຕໍ່ໜ້າຄວາມງາມດັ່ງໃນຝັນຂອງທິວທັດທຳມະຊາດຢູ່ແຫ່ງນີ້.
ນອກຈາກໜອງບາເບແລ້ວ, ເຂດປ່າສະຫງວນແຫ່ງຊາດບາເບຍັງມີທິວທັດທຳມະຊາດທີ່ງົດງາມພິເສດເຊັ່ນ: ຖ້ຳປວງ, ນ້ຳຕົກຕາດ ເດົາດັງ…ເຂດປ່າສະຫງວນບາເບຍັງມີພຶກສາຊາດ 25 ປະເພດທີ່ມີຊື່ໃນປຶ້ມແດງຂອງໂລກ. ທ່ານຝ້າມວັນຈີ້ ຮອງຜູ້ອຳນວຍການ ເຂດປ່າສະຫງວນບາເບໃຫ້ຮູ້ວ່າ :
“ ເພື່ອເສີມຂະຫຍາຍປະສິດທິຜົນ, ເຂດປ່າສະຫງວນແຫ່ງຊາດບາເບໄດ້ມີຫຼາຍມາດຕະການເພື່ອຮັກສາບັນດາລະບົບຊີວະພາບປ່າພິເສດສະເພາະ. ພິເສດແມ່ນປ່າເທິ່ງພູຫີນປູນ, ລະບົບຊີວະພາບດິນນ້ຳຖ້ວມ ແລະ ສິ່ງພົ້ນເດັ່ນໃນ ເຂດປ່າສະຫງວນແຫ່ງຊາດບາເບ ແມ່ນໜອງບາເບ. ເພື່ອປະຕິບັດຕາມຫຼັກອະນາໄມສິ່ງແວດລ້ອມ, ເຂດປ່າສະຫງວນແຫ່ງຊາດບາເບໄດ້ຈັດການເຄື່ອນໄຫວຫຼາຍຢ່າງເຊັ່ນ: ແຕ້ມພາບໂຄສະນາໃນບັນບຸນຕ່າງໆ, ນົກຮຽນທຸກໆຄົນຢູ່ໂຮງຮຽນຕ່າງໆຕັ້ງໃນບໍລິເວນອ້ອມແອ້ມ ເຂດປ່າສະຫງວນແຫ່ງຊາດບາເບໄດ້ແຕ້ມພາບເພື່ອເພີ່ມຄວາມເຂົ້າໃຈ ແລະ ຄວາມຮັບຮູ້ກ່ຽວກັບສິ່ງແວດລ້ອມ ”
ເຂດປ່າສະຫງວນແຫ່ງຊາດບາເບພວມໄດ້ຮັບການກໍ່ສ້າງໃຫ້ກາຍເປັນສະຖານທີ່ທ່ອງທ່ຽວທຳມະຊາດທີ່ດູດດື່ມແຖວໜ້າຂອງຫວຽດນາມ. ດ້ວຍທິວທັດທຳມະຊາດທີ່ງົດງາມດັ່ງໃນຝັນ, ບັນດາຄຸນຄ່າດ້ານຊີວະພາບທີ່ເປັນເອກະລັກສະເພາະພ້ອມກັບສິນພິເສດຫຼາຍຢ່າງຂອງທ້ອງຖິ່ນ, ອັນໄດ້ນຳເຂດປ່າສະຫງວນແຫ່ງຊາດບາເບກາຍເປັນສະຖານທີ່ທ່ອງທ່ຽວອັນດູດດື່ມສຳລັບແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ.