ເມືອງຊີ່ນໂຮ່, ແຂວງ ລາຍເຈົາ ເບິ່ງຄືວ່າແມ່ນຊື່ທີ່ບໍ່ລຶ້ງແກວນກັບແຂກທ່ອງທ່ຽວຍ້ອນຖືກຕັ້ງຢູ່ເຂດຫ່າງໄກສອກຫຼີກດ້ວຍບັນດາເສັ້ນທາງລະອິດລະອ້ຽວ. ແຕ່ເມື່ອມາຮອດແຫ່ງນີ້, ແຂກທ່ອງທ່ຽວອາດຈະຫຼົງລືມຄວາມອິດເມື່ອຍ ແລະ ລຳບາກໃນການເດີນທາງເພື່ອຄົ້ນຫາບັນດາທິວທັດທຳມະຊາດ, ຈຸດວັດທະນະທຳຂອງວົງຄະນະຍາດບັນດາເຜົ່າບົນເຂດພູພຽງຊ່ີນໂຮ່.
ເມືອງຊີ່ນໂຮ່ຫ່າງຈາກໃຈກາງແຂວງລາຍເຈົາກວ່າ 60 ກມ |
ເມືອງຊີ່ນໂຮ່ຫ່າງຈາກໃຈກາງແຂວງລາຍເຈົາກວ່າ 60 ກມໄປທາງທິດຕາເວັນຕົກ. ທາງທິດເໜືອ, ເມືອງຊີ່ນໂຮ່ຕິດກັບແຂວງຢຸ່ນໜານຂອງຈີນ, ທາງທິດໃຕ້, ຕິດກັບເມືອງຕົວຈົວ, ທາງທິດຕາເວັນອອກ ແມ່ນຕິດກັບເມືອງຟອງໂຖ, ສ່ວນທາງທິດຕາເວັນອອກ ຕິດກັບເມືອງເມື່ອງແຕ. ຈາກເທດສະບານລາຍເຈົາ, ເສັ້ນທາງໄປ ເມືອງຊີ່ນໂຮ່ຕ້ອງຜ່ານເຂດປ່າດົງດິບຫຼາຍແຫ່ງດ້ວຍບັນດາຫ້ວຍນ້ຳ, ຮອມພູພ້ອມກັບລະບົບຖ້ຳທີ່ອຸດົມສົມບູນ. ຈາກດ້ຽນບຽນ, ແຂກທ່ອງທ່ຽວສາມາດເດີນຕາມທາງຫຼວງ 12 ໄປເມືອງໄລ, ຮອດສາມແຍກຈັນເນືອ, ແລ້ວລ້ຽວເຂົ້າທາງແຂວງ 128, ແຂກທ່ອງທ່ຽວຈະໂອກາດໄປລຽບຕາມແມ່ນ້ຳດາ, ແລ້ວຕ້ອງຜ່ານກີ່ວມາທີ່ໂຮ່ຂຶ້ນກັບເມືອງເມືອ່ງໄລ ແລະ ກີ່ວຈັນເນືອທີ່ຂຶ້ນກັບເມືອງຊີ່ນໂຮ່ຊຶ່ງມີກຸ່ມເມກປົກຫຸ້ມຕະຫຼອດປີ. ເຖິງວ່າຈະໄປຕາມທາງໃດກໍຕາມ, ແຂກທ່ອງທ່ຽວກໍສາມາດໄດ້ຮັບຊົມຄວາມງາມແບບຮົກເຮືອພ້ອມກັບຄວາມຮູ້ສຶກເປັນໜ້າຈັບໃຈເມື່ອຂຶ້ນລົງຄ້ອຍ ແລະ ຜ່ານເສັ້ນທາງທີ່ຄົດລ້ຽວ. ເມືອງຊີ່ນໂຮ່ນອນຢູ່ທີ່ຈຸດສູງສຸດຂອງແຂວງລາຍເຈົາ. ອ້າຍ ຫງວຽນແທ່ງຈຸງ ຊາວເມືອງຊີ່ນໂຮ່ ໃຫ້ຮູ້ວ່່າ:
“ ເຂດພູພຽງຊີ່ນໂຮ່ໄດ້ຮັບຖືວ່າ ແມ່ນຫຼັງຄ່າເຮືອນຂອງແຂວງລາຍເຈົາ. ອາກາດຢູ່ນີ້ປຽບເໝືອນກັບເທດສະບານເມືອງຊາປາໃນແຂວງລາວກາຍທີ່ມີອາກາດເຢັນສະບາຍຕະຫຼອດປີ ແລະ ມີໝາກໄມ້, ດອກໄມ້ຫຼາຍຊະນິດພິເສດເຊັ່ນ: ໝາກຄາຍ, ໝາກໝັ້ນ…ຢູ່ທີ່ຊີ່ນໂຮ່ມີທິວທັດທີ່ສວຍງາມຫຼາຍແຫ່ງຄື : ປະຕູຂຶ້ນສະຫວັນ, ພູຕຽນອົງ, ພູໂອດາ ແລະ ຮອມພູຕ່າງໆດ້ວຍນາຂັ້ນໄດ. ພິເສດຢູ່ແຫ່ງນີ້ ຍັງມີເຂດປ່າດົງດິບຫຼາຍແຫ່ງ ”
ເມື່ອໄປຄົ້ນຫາເຂດພູພຽງຊີ່ນໂຮ່ບົນເສັ້ນທາງຄົດງໍໃນທ່າມກາງເຂດພູຜາປ່າໄມ້, ແຂກທ່ອງທ່ຽວຈະຕົກສະເງີ້ຕໍ່ໜ້າຈອມພູສູງຊັນຖືກປົກຫຸ້ມໄປດ້ວຍກຸ່ມເມກຫຼືຈະເຫັນປະຈັກຕາບັນດາຮອມພູ, ເນື້ອທີ່ນາສຸກເຫຼືອງອາຮາມໃນທ່າມກາງແສງແດດອັນອົບອຸ່ນ. ເຂົ້າໄປເລິກໃນຫມູ່ບ້ານປູດາວ, ຕາເກັງ, ຮ່ວາງໂຮ່, ຕາຟິ່ນ, ຟັງໂຊລິນຂອງພໍ່ແມ່ປະຊາຊົນເຜົ່າມົ້ງ, ຢ້າວ, ແຂກທ່ອງທ່ຽວຈະໄດ້ເຫັນປະຈັກຕາຄວາມງາມຂອງບັນດາຫຼັງຄາເຮືອນຮ້ານທີ່ພວມຊ້ອນຕົວໃນທ່າມກາງສີຂຽວຂອງເຂດພູຜາປ່າໄມ້ທີ່ກ້ວາງໃຫຍ່ໄພສານ. ຕາມບັນດາເສັ້ນທາງນ້ອຍລົງໄປບັນດາໝູ່ບ້ານ, ກໍປະກົດມີບັນດາຜູ້ຄົນພວມເປ້ສາລີຫຼືນ້ຳເມືອເຮືອນ, ພວກເດັກນ້ອຍໄຮ້ດຽງສາດ້ວຍໃບໜ້າສີຕາຍິ້ມແຍ້ມແຈ່ມໃສພວມຢອກໄຍກັນ. ຫ່າງຈາກເທດສະບານເມືອງຊີ່ນໂຮ່ບໍ່ໄກປານໃດແມ່ນມີຫມູ່ບ້ານປູດາວຂອງຊາວເຜົ່າມົ້ງຊຶ່ງເຄີຍໄດ້ຮັບການເລືອກເຟັ້ນຈາກບໍລິສັດທ່ອງທ່ຽວ Gecko Travel ຂອງອັງກິດວ່າ ແມ່ນສະຖານທີ່ທ່ອງທ່ຽວສວຍງາມກ່ວາໝູ່ຢູ່ອາຊີຕາເວັນອອກສ່ຽງໃຕ້. ດ້ວຍທັດສະນີຍະພາບທີ່ສະຫງົບສຸກ ແລະ ລຽບງ່າຍ ອັນໄດ້ເຮັດໃຫ້ແຂກທ່ອງທ່ຽວເພີ່ມຄວາມຊົມຊອບ ແລະ ຄິດຮອດຄິດເຖິງດິນແດນແຫ່ງນີ້. ນາງ ຫງວຽນຖີ່ລິງ ແຂກທ່ອງທ່ຽວມາຈາກຮ່າໂນ້ຍເປີດເຜີຍວ່າ :
“ ໄປຮອດຊີ່ນໂຮ່, ໄດ້ຄົ້ນຫາດິນແດນແຫ່ງນີ້ ຈຶ່ງຈະເຫັນວ່າ ການເດີນທາງຂອງຕົນແມ່ນມີຄວາມໝາຍ. ທິວທັດທຳມະຊາດຢູ່ນີ້ສວຍສົດງົດງາມ ແລະ ສະຫງົບສຸກທີ່ສຸດ. ຊີ່ນໂຮ່ຍັງແມ່ນເຂດດິນຮົກເຮື້ອ ຊຶ່ງໄດ້ກາຍເປັນສິ່ງທີ່ແຂກທ່ອງທ່ຽວມັກຄົ້ນຫາ. ອາຫານຢູ່ນີ້ມີຫຼາຍເຍື່ອງພິເສດ. ສິ່ງທີ່ຈັບໃຈທີ່ສຸດ ແມ່ນເມື່ອມາຮອດຊີ່ນໂຮ່, ແຂກທ່ອງທ່ຽວຈະໄດ້ກິນປາໄຊມອນໂດຍຊາວທ້ອງຖິ່ນລ້ຽງເອງ ”
ເມືອງຊີ່ນໂຮ່ມີ 15 ຊົນເຜົ່າດຳລົງຊີວິດຢູ່ຮ່ວມກັນ, ໃນນັ້ນ ຫຼາຍກ່ວາໝູ່ແມ່ນເຜົ່າມົ້ງ, ຜູ້ໄທ, ແລະ ເຜົ່າຢ້າວ. ເພາະສະນັ້ນ, ເມື່ອມາຢ້ຽມຢາມດິນແດນແຫ່ງນີ້, ແຂກທ່ອງທ່ຽວຈະບໍ່ພາດໂອກາດໄປຕະຫຼາດນັດທີ່ມີຂື້ນໃນ 2 ມື້ທ້າຍອາທິດ. ຕະຫຼາດນັດເລີ່ມຂຶ້ນນັບແຕ່ເຊົ້າວັນເສົາ, ຮອດວັນທິດຈຶ່ງມີຜູ້ຄົນມາຊຶື້ຂາຍເຄື່ອງຢ່າງໜາແໜ້ນ. ຕະຫຼາດນັດຊີ່ນໂຮ່ຍັແມ່ນຈຸນັດພົບຂອງບັນດາຄູ່ບາວສາວຊາວເຜົ່າສ່ວນໜ້ອຍ. ຜ່ານສຽງແຄນ, ສຽງຂຸ່ຍ, ຜ່ານການດື່ມເຫຼົ້າເປັນຖ້ວຍດ້ວຍ ຄວາມອົບອຸ່ນ, ຜ່ານການດື່ມນ້ຳຊາທີ່ມີກິ່ນຫອມຫວນ, ມີບາວສາວຫຼາຍຄູ່ໄດ້ກາຍເປັນຄູ່ຜົວເມຍຂອງກັນ. ນາງ ຮ່ວາງທິຫງອກ ແຂກທ່ອງທ່ຽວມາຈາກນະຄອນໂຮ່ຈິມິນ ໃຫ້ຮູ້ວ່າ :
“ ບັນຍາກາດຢູ່ຕະຫຼາດແຫ່ງນີ້ຟົດຟື້ນທີ່ສຸດ, ມີສິນພິເສດຄົບທຸກຊະນິດໃນເຂດທາງທິດຕາເວັນຕົກພາກເໜືອ. ຂ້າພະເຈົ້າໄດ້ໄປຕະຫຼາດບັກຮ່າຢູ່ລາວກາຍ, ຕະຫຼາດດົງວັນຢູ່ຮ່າຢາງແລ້ວ, ແຕ່ຍັງເຫັນວ່າ ຕະຫຼາດຊີ່ນໂຮ່ຍັງຄົງສາມາດຮັກສາຈຸດພິເສດສະເພາະ ແລະ ມີສິນຄ້າອຸດົມສົມບຸນຫຼາຍກ່ວາ ”
ອາກາດຢູ່ເມືອງຊີ່ນໂຮ່ເຢັນສະບາຍຕະຫຼອດປີ, ຍ້ອນເຫດນີ້ເອງ, ແຂກທ່ອງທ່ຽວສາມາດມາທ່ອງທ່ຽວຢູ່ແຫ່ງນີ້ໃນທຸກໆເວລາໃນປີ. ແຕ່ສຳລັບບັນດາຜູ້ຄົນມັກຄົ້ນຫານັ້ນ, ຊີ່ນໂຮ່ງາມທີ່ສຸດແມ່ນໃນຍາມລະດູບານໃໝ່, ເຂດພູຜາປ່າໄມ້ໃນຊ່ວງເວລານີ້, ດອກໄມ້ນາໆຊະນິດພາກັນບານສະພັ່ງເອ້ຄວາມງາມດ້ວຍສີຫຼາກຫຼາກ. ທັງນີ້ກໍເປັນການບັນເທົ່າຄວາມອິດເມືອ່ຍເມື່ອແຂກທ່ອງທ່ຽວຕ້ອງຜ່ານໄລຍະທາງທີ່ຍາວໄກເພື່ອຫຼົງໄຫຼໃນສີສັນຫຼາກຫຼາຍຂອງມວນມາລາໃນທ່າມກາງເຂດພູຜາປ່າໄມ້ທີ່ກ້ວາງໃຫຍ່ໄພສານ.