ໂດຍຕັ້ງຢູ່ຫ່າງຈາກນະຄອນຫຼວງຮ່າໂນ້ຍໄປທາງທິດຕາເວັນຕົກສ່ຽງໃຕ້ກວ່າ 300 ກິໂລແມັດ, ຊຸມປີມໍ່ໆມານີ້, ນະຄອນເຊີນລາໄດ້ຮັບການເລືອກເຟັ້ນແມ່ນຈຸດນັດພົບໃນປີຂອງແຂກທ່ອງທ່ຽວ. ເຊີນລາແມ່ນດິນແດນເຕົ້າໂຮມຫຼາຍຊົນເຜົ່າອ້າຍນ້ອງ, ມີຫຼາຍງານບຸນອັນເປັນເອກະລັກສະເພາະ, ບັນດາປູຊະນີຍະສະຖານປະຫວັດສາດ ແລະ ທິວທັດທຳມະຊາດທີ່ເປັນໜ້າຈັບອົກຈັບໃຈ. ລະດູບານໃໝ່ປີນີ້, ໄປເຊີນລາຢ້ຽມຢາມບັນດາ ປູຊະນີຍະສະຖານປະຫວັດສາດເຊັ່ນ: ຄຸກເຊີນລາ, ຫໍພິພິທະພັນ ເຊີນລາ, ກິດຈະກຳເຂື່ອນໄຟຟ້ານ້ຳຕົກເຊີນລາ ຫຼືໄດ້ອາບນ້ຳແຮ່ທາດອຸ່ນຢູ່ບ້ານມ່ອງໃນທ່າມກາງມວນມາລານາໆຊະນິດພວມບານສະພັ່ງຫຼາກຫຼາຍສີ ຈະເຮັດໃຫ້ແຂກທ່ອງທ່ຽວຫຼົງໄຫຼ ປຽບເໝືອນໄດ້ເຊື່ອມຕົວເຂົ້າກັບທິວທັດທຳມະຊາດ.
ເຂື່ອນໄຟຟ້ານ້ຳຕົກເຊີນລາ
|
ປະຈຸບັນຢູ່ເຊີນລາ, ຍັງມີປູຊະນີຍະສະຖານປະຫວັດສາດ ແລະ ຮ່ອງຮອຍບູຮານຄະດີກວ່າ 100 ແຫ່ງໄດ້ຮັບການຮັກສາໄວ້. ເມື່ອລົງຢ້ຽມຢາມ ນະຄອນເຊີນລາ, ກຸ່ມປູຊະນີຍະສະຖານ, ຫໍພິພິທະພັນເຊີນລາ ແມ່ນບັນດາສະຖານທີ່ທຳອິດທີ່ແຂກທ່ອງທ່ຽວຢາກມາຢ້ຽມຢາມ, ທັດສະນະສຶກສາ. ຄຸກເຊີນລາ ຊຶ່ງແມ່ນປູຊະນີຍະສະຖານປະຕິວັດຖືກຈັດອັນດັບເປັນ ປູຊະນີຍະສະຖານລະດັບຊາດເມື່ອປີ 1962, ຖືກປຸກສ້າງຢູ່ຈອມໂນນເຄົາກາ, ໂດຍພວກລ່າເມືອງຂຶ້ນຝະລັ່ງດຳເນີນການກໍ່ສ້າງເມື່ອປີ 1908 ດ້ວຍເນື້ອທີ່ເບື້ອງຕົ້ນແມ່ນ 500 ຕາແມັດ. ຄຸກແຫ່ງນີ້ຖືກປຸກສ້າງແບບຖາວອນ, ຝາຖືກກໍ່ດ້ວຍຫີນ ແລະ ດິນຈີ່, ຫຼັງຄາຖືກມຸງດ້ວຍສັງກະສີ, ບໍ່ມີເພດານ, ສຳລັບຕຽງນອນໃຫ້ນັກໂທດນັ້ນ ຖືກກໍ່ດ້ວຍຫີນ ແລະ ໂບກດ້ວຍຊີມັງ, ມີລະບົບລ່າມຂານັກໂທດ. ເຖິງວ່າຖືກພວກລ່າເມືອງຂຶ້ນຝະລັ່ງກັກຂັງ ແລະ ທຸບຕີທໍລະມານຢ່າງປ່າເຖື່ອນກໍ່ຕາມ ແຕ່ບັນດານັກກອມມູນິດຫວຽດນາມໄດ້ຫັນຄຸກຂອງພວກເຂົາກາຍເປັນໂຮງຮຽນປະຕິວັດ, ເປັນແຫ່ງກໍ່ສ້າງນັກປະຕິວັດເພື່ອໃຫ້ຂະບວນການປະຕິວັດຢູ່ໄຕບັກ-ເຂດທາງທິດຕາເວັນຕົກສ່ຽງເໜືອຫວຽດນາມ ແຕກດອກອອກຜົນໃນພາຍພາກໜ້າ. ແຕ່ລະປີ, ຄຸກເຊີນລາໄດ້ຕ້ອນຮັບແຂກທ່ອງທ່ຽວນັບແສນເທື່ອຄົນມາຢ້ຽມຊົມ, ທັດສະນະສຶກສາ, ຄົ້ນຄ້ວາ, ຮ່ຳຮຽນ ແລະ ຫວນຄືນສົງຄາມໃນອະດີດຕະການ.
ຫໍພິພິທະພັນເຊີນລາຖືກຕັ້ງຢູ່ໃນບໍລິເວນປູຊະນີຍະສະຖານປະຫວັດສາດຫໍພິພິທະພັນ ແລະ ຄຸກເຊີນລາ. ຫໍພິພິທະພັນແມ່ນບ່ອນເກັບຮັກສາບັນດາຈຸດວັດທະນະທຳທີ່ເປັນເອກະລັກສະເພາະຂອງ 12 ຊົນເຜົ່າອ້າຍນ້ອງພວມດຳລົງຊີວິດຢູ່ເຊີນລາດ້ວຍວັດຖຸບູຮານນັບພັນຢ່າງທີ່ມີມາແຕ່ສະໄໝປະຖົມບູຮານ ຖືກຊອກເຫັນຢູ່ທ້ອງຖິ່ນ. ພິເສດຢູ່ແຫ່ງນີ້, ຍັງເກັບຮັກສາຊຸດປຶ້ມວັນນະຄະດີ, ກາບກອນ, ເລື່ອງພື້ນເມືອງເກືອບ 1000 ຫົວຂອງຊາວເຜົ່າຜູ້ໄທ, ເຜົ່າຢ້າວ. ນາງຫງວຽນຫາຍເຢືອງ ຜູ້ນຳທ່ຽວຊົມຢູ່ ຫໍພິພິທະພັນເຊີນລາ ເວົ້າວ່າ :
“ ນີ້ແມ່ນບ່ອນວາງສະແດງກ່ຽວກັບຮູບພາບຂອງ ບໍລິເວນແຂວງເຊີນລາ. ເຊີນລາແມ່ນແຂວງເຂດພູດອຍທາງທິດຕາເວັນຕົກສ່ຽງເໜືອຂອງຫວຽດນາມ, ມີເນື້ອທີ່ກວ່າ 14 ລ້ານຕາລາງກິໂລແມັດ. ໃນຈຳນວນ 12 ຊົນເຜົ່າອ້າຍນ້ອງພວມດຳລົງຊີວິດຢູ່ເຊີນລານັ້ນ, ຊົນເຜົ່າຜູ້ໄທກວມເຖິງ 55% ຈຳນວນປະຊາກອນ, ຖັດມາແມ່ນເຜົ່າກິງ, ເຜົ່າມົ້ງ…ນີ້ແມ່ນຊຸດປື້ມບູຮານຂອງເຜົ່າຜູ້ໄທຢູ່ເຊີນລາ. ຊົນເຜົ່າຜູ້ໄທຮູ້ວິທີຜະລິດເຈ້ຍມາແຕ່ດົນນານແລ້ວ. ເຂົາເຈົ້າຜະລິດເຈ້ຍຈາກຕົ້ນສາ, ໄມ້ໄຜ່ອ່ອນ. ປຶ້ມຂອງເຂົາເຈົ້າຖືກຈັດແບ່ງເປັນ 3 ປະເພດເຊັ່ນ: ປຶ້ມວັນນະຄະດີ, ປຶ້ມສາດສະໜາ, ປຶ້ມກ່ຽວກັບປະຫວັດສາດ ”
ໂຮງງານໄຟຟ້ານ້ຳຕົກເຊີນລາ ຊຶ່ງແມ່ນກິດຈະກຳເຂື່ອນໄຟຟ້ານ້ຳຕົກໃຫຍ່ກວ່າຫມູ່ຢູ່ອາຊີຕາເວັນອອກສ່ຽງໃຕ້ ບໍ່ພຽງແຕ່ປະກອບສ່ວນພະລັງງານໄຟຟ້າກວ່າ 10 ຕື້ ກິໂລວັດໃນແຕ່ລະປີໃຫ້ແກ່ປະເທດຊາດເທົ່ານັ້ນ, ຫາກຍັງແມ່ນສະຖານທີ່ດູດດື່ມສຳລັບແຂກທ່ອງທ່ຽວເມື່ອມາຢ້ຽມຢາມເຊີນລາອີກດ້ວຍ. ຈາກນະຄອນເຊີນລາ, ຂີ່ລົດເປັນເວລາກວ່າຊົ່ວໂມງ, ໂດຍແລ່ນຜ່ານສາຍທາງຕ່າງໆຊຶ່ງລຽບຕາມ 2 ຟາກທາງແມ່ນພູຜາປ່າໄມ້ທີ່ກ້ວາງໃຫຍ່ໄພສານ, ກໍຈະຮອດຕາແສງ ອິດອ່ອງ ເມືອງ ເມືອ່ງລາ, ແຂກທ່ອງທ່ຽວຈະຖືກຫຼົງໄຫຼຕໍ່ໜ້າສີຂຽວທີ່ກ້ວາງໃຫຍ່ຈົນສຸດສາຍຕາຂອງທິວທັດອ່າງເກັບນ້ຳເຂື່ອນໄຟຟ້ານ້ຳຕົກເຊີນລາ. ໂດຍບໍ່ສະຫງົບງຽບຄືດັ່ງໜອງ ດ້າຍຫຼາຍ ຢູ່ແຂວງວິ້ງຟຸກ ຫຼື ໜອງບາເບຢູ່ແຂວງບັກກ້ານ, ອ່າງເກັບນ້ຳເຂື່ອນໄຟຟ້ານ້ຳຕົກເຊີນລາ ໄດ້ສ້າງຄວາມປະທັບໃຈໃຫ້ແຂກທ່ອງທ່ຽວທັງຫຼາຍຍ້ອນກະແສນ້ຳທີ່ກ້ວາງໃຫຍ່ໃນທ່າມກາງດິນຟ້າທຳມະຊາດດ້ວຍຄວາມງາມແບບຮົກເຮື້ອເປົ່າຫວ່າງ. ນາງ ຮ່ວາງລານ ແຂກທ່ອງທ່ຽວແຂວງບັກຢາງ ໃຫ້ຮູ້ວ່າ :
“ ນີ້ເປັນຄັ້ງທຳອິດທີ່ຂ້າພະເຈົ້າໄປຢ້ຽມຊົມ ທັດສະນະສຶກສາຢູ່ອ່າງເກັບນ້ຳເຂື່ອນໄຟຟ້ານ້ຳຕົກເຊີນລາ. ຜ່ານການຢ້ຽມຊົມເປັນເວລາ 1 ວັນ, ຂ້າພະເຈົ້າໄດ້ເຫັນຄວາມງາມ ແລະ ຄວາມໃຫຍ່ໂຕມະໂຫຖານຂອງທັດສະນີຍະພາບຢູ່ແຫ່ງນີ້. ຂ້າພະເຈົ້າຫວັງວ່າ ພາຍຫຼັງການຢ້ຽມຢາມເທື່ອນີ້, ຈະໄດ້ກັບຄືນຢ້ຽມຢາມໃນຄັ້ງໜ້າເພື່ອຊອກຮູ້ກ່ຽວກັບຊີວິດການເປັນຢູ່ຂອງປະຊາຊົນຢູ່ແຫ່ງນີ້ຕື່ມອີກ ”
ມີສະຖານທີ່ທ່ອງທ່ຽວອີກແຫ່ງໜຶ່ງ ທີ່ແຂກທ່ອງທ່ຽວຢ່າພາດໂອກາດໄປຢ້ຽມຢາມ, ນັ້ນແມ່ນບ້ານມ່ອງຊຶ່ງແມ່ນແຫ່ງມີທັດສະນີຍະພາບທີ່ໃຫຍ່ໂຕມະໂຫຖານດ້ວຍສາຍພູສະຫຼັບຊັບຊ້ອນ ປຽບເໝືອນມັງກອນພວມບິນລອຍອ້ອມໝູ່ບ້ານ. ທ່ານ ຫງວຽນຮົ່ວທັ້ງ ຜູ້ອຳນວຍການບໍລິສັດທ່ອງທ່ຽວແຫ່ງໜຶ່ງຢູ່ຮ່າໂນ້ຍ ໃຫ້ຮູ້ວ່າ :
“ ເມື່ອແຂກທ່ອງທ່ຽວມາຢ້ຽມຢາມບ້ານມ່ອງ, ທຸກໆຄົນຈະໄດ້ອາບນ້ຳແຮ່ທາດອຸ່ນ, ໄດ້ພັກຜ່ອນ ແລະ ຮັບປະທານບັນດາເຍື່ອງອາຫານພື້ນເມືອງຂອງຊາວເຜົ່າຜູ້ໄທ. ສິ່ງທີ່ແຕກຕ່າງກັນກັບແຫ່ງອື່ນໆ, ນັ້ນແມ່ນຢູ່ບ້ານມ່ອງມີນ້ຳແຮ່ທາດອຸ່ນ, ມາອາບນ້ຳແມ່ນເພື່ອປິ່ນປົວພະຍາດ, ຫຼືໃຊ້ນ້ຳແຮ່ທາດເພື່ອດື່ມ”
ຖ້າມີໂອກາດມາຢ້ຽມຢາມຫວຽດນາມ, ພວກເພື່ອນຢາລືມໄປຢ້ຽມຢາມແຂວງເຊີນລາ ເພື່ອຢ້ຽມຊົມອ່າງເກັບນ້ຳເຂື່ອນໄຟຟ້ານ້ຳຕົກເຊີນລາ , ໄປອາບນ້ຳແຮ່ທາດອຸ່ນ ແລະ ຮັບປະທານອາຫານພື້ນເມືອງຂອງຊາວເຜົ່າຜູ້ໄທຢູ່ບ້ານມ່ອງ. ແນ່ນອນວ່າ ເມື່ອມາຢ້ຽມຢາມແລ້ວ, ພວກເພື່ອນຈະຢາກກັບຄືນມາຢ້ຽມຢາມອີກ.