(vovworld)- ຮ່ອມພູ ເມືອງຮວາ ຫ່າງຈາກເທດສະບານ ຊາປາ ທາງທິດຕາເວັນອອກສ່ຽງໃຕ້ ກວ່າ 10 ກິໂລແມັດ ແມ່ນສະຖານທີ່ທ່ອງທ່ຽວດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍຍ້ອນຄວາມງາມດັ່ງໃນຝັນໂດຍທຳມະຊາດດົນບັນດານໃຫ້. ຮ່ອມພູ ເມື່ອງຮວາ ແມ່ນສະຖານທີ່ມີຄວາມງາມແບບຮົກເຮື້ອເປົ່າຫວ່າງ ແລະ ແມ່ນແຫ່ງທີ່ມີຫລາຍຊົນເຜົ່າດຳລົງຊີວິດຢູ່ຮ່ວມກັນ.
ຮ່ອມພູເມືອງຮວາ
ພາບ:internet
|
ຈາກເທດສະບານເມືອງ ຊາປາ, ໄປຕາມເສັ້ນທາງທຸລະກັນດານຜ່ານກີ່ວແຫ່ງຫນຶ່ງ ແລະ ໄປລຽບຕາມສາຍພູສູງສຸດແມ່ນຮອດຮ່ອມພູເມືອງຮວາ. ຮ່ອມພູແຫ່ງນີ້ມີລວງກວ້າງປະມານ 8 ກິໂລຕາແມັດ, ມີຄວາມສູງປະມານ 1.000 ແມັດ ເມື່ອທຽບໃສ່ລະດັບນ້ຳທະເລ, ຂຶ້ນກັບ 6 ຕາແສງຄື: ລາວຈ໋າຍ, ຕ໋າວານ, ເຮົ່າທາວ, ສືປາ, ຕາຝີ່ນ ແລະ ບ້ານໂຮ່, ຕັ້ງຢູ່ໃຈກາງສາຍພູຮ່ວາງລຽນເຊີນ. ເພື່ອໄປຢ້ຽມຢາມສະຖານທີ່ທ່ອງທ່ຽວດູດດື່ມນີ້, ຜູ້ເມົາມົວກັບການຖ່າຍຮູບ ແລະ ມັກຄົ້ນຫາຄວາມງາມທຳມະຊາດເຄີຍເລືອກເຟັ້ນຍານພາຫະນະແມ່ນລົດຈັກ. ເສັ້ນທາງຈາກເທດສະບານເມືອງ ຊາປາ ໄປເຖິງຮ່ອມພູເມືອງຮວາ ມີຄວາມຍາວກວ່າ 10 ກິໂລແມັດ, ແຕ່ເພື່ອໄປຮອດໃຈກາງຮ່ອມພູຕ້ອງໄປອີກ 2,3 ກິໂລແມັດ. ຢູ່ຮ່ອມພູ ເມື່ອງຮວາ ມີນາຂັ້ນໄດຫລາຍແຫ່ງທີ່ງາມກວ່າໝູ່ຢູ່ ຊາປາ ແລະ ນາຂັ້ນໄດຢູ່ທີ່ນີ້ ໄດ້ຮັບການຮັບຮອງຈາກອົງການສະຖິຕິຫວຽດນາມວ່າ ແມ່ນເຂດນາຂັ້ນໄດໃຫຍ່ກວ່າໝູ່ຢູ່ຫວຽດນາມ. ນາຂັ້ນໄດຢູ່ລຽບຕາມເນີນພູກາຍເປັນຜະລິດຕະພັນສິລະປະທີ່ສວຍງາມ. ໃນຊຸມປີມໍ່ໆມານີ້, ສອງປີເທື່ອຫນຶ່ງ ອ້າຍ ຫງວຽນຈ້ອງແທ່ງ ພ້ອມກັບໝູ່ເພື່ອນ ພາກັນໄປຢ້ຽມຢາມເມື່ອງຮວາ ເພື່ອຖ່າຍຮູບນາຂັ້ນໄດ. ອ້າຍ ຫງວຽນຈ້ອງແທ່ງ ໃຫ້ຮູ້ວ່າ:
“ພວກຂ້າພະເຈົ້າມັກຖ່າຍຮູບທີ່ສຸດແມ່ນຍາມລະດູເຂົ້າສຸກເຫລືອງເຕັມທົ່ງນາ, ລະຫວ່າງເດືອນ 8, ເດືອນ 9. ຢູ່ທີ່ນີ້ ບັນດາເນີນພູກາຍເປັນຮູບພາບທີ່ສວຍງາມຄືດັ່ງພາບແຕ້ມ. ຂ້າພະເຈົ້າ ມັກທີ່ສຸດ ແມ່ນຮູບຖ່າຍທັງມີເຂົ້າສຸກເຫຼືອງອາຮາມ, ທັງມີສາຍພູ ແລະ ແສງແດດ. ນອກນັ້ນນາຂັ້ນໄດຍາມນ້ຳຖ້ວມກໍ່ສ້າງເປັນຮູບພາບງາມຫລາຍ.”
ລະຫວ່າງຮ່ອມພູເມື່ອງຮວາ ມີຫ້ວຍໃຫຍ່ລຳຫນຶ່ງ ມີຊື່ວ່າ ຫ້ວຍຮວາ, ມີຄວາມຍາວປະມານ 15 ກິໂລແມັດ. ຫ້ວຍລຳນີ້ພ້ອມກັບນາຂັ້ນໄດຍິ່ງເຮັດໃຫ້ຮ່ອມພູເມື່ອງ ຮວາສວຍງາມທີ່ສຸດ.
ນອກນັ້ນ, ຮ່ອມພູ ເມື່ອງຮວາຍັງມີເຂດຫີນແກະຄວັດສະຫລັກຕົວຫນັງສື ດ້ວຍລວດລາຍບູຮານດູດດື່ມ ບໍ່ພຽງແຕ່ດຶງດູດນັກທ່ອງທ່ຽວເທົ່ານັ້ນ ຫາກນັບທັງນັກຄົ້ນ ຄ້ວາ, ນັກບູຮານຄະດີພາຍໃນປະເທດ ແລະ ສາກົນອີກດ້ວຍ. ໃນຮ່ອມພູ, ມີໂງ່ນຫີນໃຫຍ່, ນ້ອຍເກືອບ 200 ໂງ່ນ ຕັ້ງຢູ່ເດີນຫຍ້າ, ທົ່ງໄຮ່ ດ້ວຍບັນດາຮູບຄວັດແກະສະຫລັກທີ່ເລິກລັບ. ປະຈຸບັນ, ເຂດຫີນແກະຄວັດສະຫລັກບູຮານນີ້ ຖືກຈັດເຂົ້າບັນຊີລາຍຊື່ເຂດປູຊະນີຍະສະຖານແຫ່ງຊາດ, ແມ່ນມໍລະດົກທີ່ເປັນເອກະລັກສະເພາະຂອງຊາວຫວຽດ ບູຮານ. ເອື້ອຍ ດາວຖູຍຍູງ, ຜູ້ນຳທ່ຽວ ໃຫ້ຮູ້ວ່າ:
“ໂງ່ນຫີນຕັ້ງກະແຈກກະຈາຍຢູ່ຫລາຍບ່ອນ. ເຂດຫີນໃຫຍ່ສຸດແມ່ນຕັ້ງຢູ່ບ້ານ ພໍ. ນີ້ແມ່ນບໍລິເວນຂອງຊາວເຜົ່າມົ້ງ ຢູ່ຕອນທ້າຍຫ້ວຍຮວາ. ຢູ່ທີ່ນີ້ ໂງ່ນຫີນຫລາຍພໍສົມຄວນ, ໃນນັ້ນ ມີ ໂງ່ນຫີນໃຫຍ່ຫລາຍໂງ່ນ. ບາງໂງ່ນດ້ານຫນ້າກວ້າງ12 ແມັດ. ບາງໂງ່ນມີຮູບແກະຄວັດສະຫລັກຫລາຍທີ່ສຸດ ແລະ ເປັນຫລາຍຮູບຫລາຍແບບ. ເຂດຫີນແຫ່ງທີສອງ ແມ່ນຕັ້ງຢູ່ເຂດຕິດກັບຕາແສງ ເຮົ່າທາວ ແລະ ລາຍຈາຍ. ເຂດຫີນນີ້ມີໂງ່ນຫີນກວ່າ 100 ໂງ່ນ ແລະ ກໍ່ແມ່ນເຂດຫີນກວ້າງທີ່ສຸດ. ບັນດາຮູບແກະຄວັດສະຫລັກເທິງໂງ່ນຫີນແມ່ນແຕກຕ່າງກັນ.”
ຮູບແກະຄວັດສະຫລັກເທິງໂງ່ນຫີນແມ່ນແຕກຕ່າງກັນ
ພາບ:dulich.com
|
ສຳລັບຊາວທ້ອງຖິ່ນແລ້ວ, ກຸ່ມເຂດຫີນບູຮານ ຢູ່ ຊາປາ ຄືດັ່ງຫໍສະໝຸດສະຫວັນ, ແມ່ນປື້ມໃຫຍ່ກວ່າໝູ່ທີ່ບັນພະບຸລຸດປະໄວ້ໃຫ້ເຂດຫີນແຫ່ງນີ້ຖືກຈັດເຂົ້າບັນຊີລາຍຊື່ເຂດປູຊະນີຍະສະຖານແຫ່ງຊາດ ແລະ ໄດ້ຮັບຖືວ່າແມ່ນມໍລະດົກທີ່ເປັນເອກະລັກສະເພາະຂອງຊາວຫວຽດບູຮານ.
ພາຍຫລັງຊົມທິວທັດທຳມະຊາດສວຍງາມແລ້ວ, ນັກທ່ອງທ່ຽວສາມາດລົງຮ່ອມພູໄປຕາມເສັ້ນທາງນ້ອຍ, ຜ່ານຂົວແຫ່ງຫນຶ່ງເຂົ້າຢ້ຽມຢາມ ບ້ານກາດກາດ ຊື່ງແມ່ນໝູ່ບ້ານອາຊີບຕ່ຳແຜ່ນຕັດຫຍິບ ແລະ ຍ້ອມແພໄຫມພື້ນເມືອງຂອງຊາວເຜົ່າມົ້ງ, ແລະ ຢ້ຽມຢາມ ບ້ານ ຕາວານ ຂອງຊາວເຜົ່າໄຢ, ພົບປະ, ໂອ້ລົມກັບຊາວຊົນເຜົ່າຢູ່ທີ່ນີ້ ເພື່ອຊອກຮູ້ຄວາມແຕກຕ່າງກັນກ່ຽວກັບຮີດຄອງປະເພນີຂອງສອງຊົນເຜົ່າ. ນອກນັ້ນ ນັກທ່ອງທ່ຽວສາມາດພັກຜ່ອນຢູ່ເຮືອນຂອງຊາວເຜົ່າ ເພື່ອເຫັນປະຈັກຕາການດຳລົງຊີວິດປະຈຳວັນຂອງເຂົາເຈົ້າ. ອ້າຍ ຮ່າອາເຕີຍ ໃຫ້ຮູ້ວ່າ:
“ສຳລັບນັກທ່ອງທ່ຽວມັກຊົມທິວທັດທຳມະຊາດ ເຂົາເຈົ້າເຄີຍພ້ອມກັບຊາວເຜົ່າໃນບ້ານຂຶ້ນພູ, ເຂົ້າປ່າ. ຊາວທ້ອງຖິ່ນ ແມ່ນຜູ້ພາທາງ. ໂນນພູຢູ່ທີ່ນີ້ບໍ່ສູງປານໃດ ສະນັ້ນ ເມື່ອໄປລຽບຕາມເສັ້ນທາງອ້ອມແອ້ມພູຄືດັ່ງວິທີຫັດກາຍເທົ່ານັ້ນ.”
ຮ່ອມພູ ເມື່ອງຮວາ ຍາມໃດກໍແມ່ນຊື່ເອີ້ນຊື່ງນັກທ່ອງທ່ຽວຢູ່ພາຍໃນ ແລະ ຕ່າງປະເທດ ເຕື້ອງເຖິງ ເມື່ອເລືອກເຟັ້ນບັນດາສະຖານທີ່ທ່ອງທ່ຽວຢູ່ ຊາປາ. ຖ້ານັກທ່ອງທ່ຽວມາຢ້ຽມຢາມຮ່ອມພູນີ້ຄັ້ງຫນຶ່ງ ລ້ວນແຕ່ບໍ່ອາດຫລົງລືມຄວາມງາມຂອງຮ່ອມພູທີ່ມີຄວາມງາມດັ່ງໃນຝັນນີ້ໄດ້.