(vovworld)- ເສັ້ນທາງໄປຢ້ຽມຢາມ ໝູ່ບ້ານ ແທງຕວານ ໄດ້ຮັບຖືວ່າ ແມ່ນຫນຶ່ງໃນບັນດາເສັ້ນທາງທີ່ງາມກວ່າໝູ່ຂອງເຂດບ້ານນາ ຢູ່ນະຄອນເຫ້ວ. ສອງຟາກທາງ ແມ່ນທົ່ງນາຂຽວອຸ່ມທຸ່ມທີ່ກວ້າງໃຫຍ່ແລະ ສວຍງາມ, ສວນໝາກໄມ້ຫລາຍປະເພດ. ເມື່ອທ່ານຂີ່ລົດຖີບບົນເສັ້ນທາງນີ້ ກີ່ນຫອມຫວນຂອງຕົ້ນເຂົ້າ ແລະ ໝາກໄມ້ ຈະເຮັດໃຫ້ຄວາມຮ້ອນເອົ້າກໍຄືຄວາມອິດເມື່ອຍຂອງທ່ານຫາຍໄປ. ຢູ່ໝູ່ບ້ານ ແທງຕວານ ມີຂົວມຸ່ງດິນຂໍພິເສດແຫ່ງຫນຶ່ງ ໄດ້ກາຍເປັນຈຸດນັດພົບທີ່ຂາດບໍ່ໄດ້ໃນລາຍການທ່ອງທ່ຽວ ຢ້ຽມຢາມນະຄອນເຫ້ວ. ບົດຂຽນຂອງນັກຂ່າວ ລານແອງ ທີ່ມີຫົວຂໍ້ວ່າ: ໄປຢ້ຽມຢາມ ຂົວດິນຂໍ ແທງຕວານ ຢູ່ ນະຄອນເຫ້ວ.
 |
ຈາກໃຈກາງນະຄອນ ເຫ້ວ ໄປທາງທິດຕາເວັນອອກປະມານ 8 ກິໂລແມັດ, ທ່ານຈະມີຫນ້າຢູ່ໝູ່ບ້ານ ແທງຕວານ, ຊື່ງແມ່ນສະຖານທີ່ມີຂົວດິນຂໍແຫ່ງຫນຶ່ງຕັ້ງຂ້າມຄອງເໝືອງຂອງໝູ່ບ້ານ ແທງຖູຍ ຕາແສງ ຖູຍແທງ ເມືອງເຮືອງຖູຍ. ຍ້ອນໄລຍະທາງບໍ່ໄກປານໃດ ສະນັ້ນ ນັກທ່ອງທ່ຽວຕ່າງປະເທດຫລາຍຄົນເຄີຍເລືອກວິທີຂີ່ລົດຖີບໄປຢ້ຽມຢາມ ແທງຕວານເພື່ອຢ້ຽມຊົມຂົວດິນຂໍພິເສດ. ອ້າຍ ຫງວຽນແທ່ງຈູງ, ຜູ້ເຮັດບໍລິການທ່ອງທ່ຽວຢູ່ ເຫ້ວ ໃຫ້ຮູ້ວ່າ: ເຂດບ້ານນາ ແທງຕວານ ບໍ່ພຽງແຕ່ດຶງດູດນັກທ່ອງທ່ຽວ ດ້ວຍທິວທັດທຳມະຊາດສວຍງາມ ແລະ ຄວາມເປັນເອກະລັກສະເພາະຂອງຂົວໄມ້ມຸ້ງດ້ວຍດິນຂໍ, ສາລາບ້ານຫລາຍແຫ່ງ, ບັນດາຫໍບູຊາວົງຕະກຸນເທົ່ານັ້ນ ຫາກ ຍັງມີ ຄຸນຄ່າດ້ານທ່ອງທ່ຽວຫລາຍຢ່າງຄວນໄດ້ຮັບການຂຸດຄົ້ນ ແລະ ຄົ້ນຫາຄື: ງານບຸນປະເພນີ, ການຜະລິດກະສິກຳ, ຊີວິດການເປັນຢູ່ຂອງປະຊາຊົນຢູ່ເຂດບ້ານນາ.
“ໄລຍະທາງຈາກໃຈກາງນະຄອນເຖິງເຂດບ້ານນາບໍ່ໄກປານໃດ ສະນັ້ນມັນແມ່ນເໝາະສົມກັບທຸກຄົນ. ເມື່ອເດີນທາງບົນເສັ້ນທາງນີ້ ທ່ານຈະພົບເຫັນຮູບພາບເຂດທົ່ງນາທີ່ຂຽວງາມ ແລະ ທິວທັດຂອງເຂດບ້ານນາທີ່ປະທັບໃຈ,ທພິເສດ ຮູບພາບຊາວທ້ອງຖິ່ນພວມກ່ຽວເຂົ້າ, ລ້ຽງເປັດ.”
ສິ່ງທີ່ດຶງດູດນັກທ່ອງທ່ຽວມາຢ້ຽມຢາມໝູ່ບ້ານ ແທງຕວານ ນັບມື້ນັບຫລາຍ ນັ້ນແມ່ນຂົວໄມ້ມີຫລັງຄາມຸ້ງດ້ວຍດິນຂໍແຫ່ງຫນຶ່ງມີຄວາມຍາວ 17 ແມັດ ແລະ ລວງກວ້າງ 4 ແມັດ, ສອງຟາກຂົວລ້ວນແຕ່ມີຖານໄມ້ເພື່ອໃຫ້ນັກທ່ອງທ່ຽວ ຫລືຜູ້ຜ່ານທາງນັ່ງພັກຜ່ອນ. ຂົວແຫ່ງນີ້ ມີຫລັງຄາມຸ້ງດ້ວຍດິນຂໍ, ຢູ່ເທິງມີຮູບມັງກອນ 2 ໂຕພວມມຸ່ງຫນ້າສູ່ທ້ອງຟ້າ. ທ່ານ ຫງວຽນວັນແທງ, ດຳລົງຊີວິດຢູ່ ນະຄອນ ເຫ້ວ ແນະນຳບາງຈຸດກ່ຽວກັບຂົວແຫ່ງນີ້ວ່າ:
“ຂົວດິນຂໍ ແທງຕວານໄດ້ຮັບການກໍ່ສ້າງແຕ່ສະໄຫມລາດຊະວົງ ເລ ເມື່ອປີ 1776 .ຈາກແນວຄວາມຄິດຂອງພະມະເຫສີ ເຈີນທິດ໋າວ, ຊື່ງແມ່ນພັນລະຍາ ຂອງເຈົ້າຊີວິດ ເລ. ເມື່ອເຫັນວ່າ ປະຊາຊົນຂ້າມຄອງເໝືອງແມ່ນຫຍຸ້ງຍາກຫລາຍ, ສະນັ້ນ ພະນາງຈຶ່ງສະເຫນີໃຫ້ກໍ່ສ້າງຂົວແຫ່ງນີ້. ເພື່ອສະແດງຄວາມຮູ້ບຸນຄຸນຕໍ່ພະນາງ ເຈີນທິດ໋າວ, ປະຊາຊົນໄດ້ປຸກສ້າງສານບູຊາ ຢູ່ກາງຂົວ ເພື່ອອາໄລຫາພະນາງ. ນີ້ແມ່ນຂົວເກົ່າແກ່ແຕ່ມີຄຸນຄ່າດ້ານສິລະປະສະຖາປັດຕະຍະກຳສູງ.”
 |
ຄຽງຂ້າງຂົວແຫ່ງນີ້ ແມ່ນຕະຫລາດເຂດບ້ານນາ. ບັນຍາກາດຢູ່ຕະຫລາດນີ້ບໍ່ຄັບຄາຫນາແຫນ້ນຄືຢູ່ຕະຫລາດແຫ່ງອື່ນ ແຕ່ນັກທ່ອງທ່ຽວມານີ້ລ້ວນແຕ່ເຫັນໄດ້ຊີວິດການເປັນຢູ່ທີ່ລຽບງ່າຍຂອງປະຊາຊົນຢູ່ເຂດບ້ານນາ. ເຂົ້າໄປຕະຫລາດ ທ່ານຈະເຫັນຮ້ານຂາຍເຄື່ອງນ້ອຍໆຫລາຍຮ້ານ ແລະ ຜູ້ຂາຍເຄື່ອງຢູ່ຕະຫລາດນີ້ສ່ວນຫລາຍແມ່ນແມ່ຍິງ. ພາຍຫລັງຊື້ເຄື່ອງແລ້ວ, ທ່ານສາມາດແວ່ຮ້ານອາຫານ ເພື່ອຮັບປະທານບັນດາເຍື່ອງອາຫານພິເສດຂອງເຂດບ້ານນາແຕ່ເຕັມໄປດ້ວຍລົດຊາດຂອງ ເຫ້ວ ໂດຍຊາວທ້ອງຖິ່ນປຸງແຕ່ງ.
ຜ່ານຂົວແຫ່ງນີ້ ແມ່ນ ຫໍວາງສະແດງຂອງຕາແສງ ຖູຍແທງ. ຢູ່ທີ່ນີ້ ແມ່ນ ວາງສະແດງວັດຖຸພັນນັບຮ້ອຍໆຢ່າງ ຊື່ງລວມມີ: ອຸປະກອນຮັບໃຊ້ກະສິກຳ ແລະ ການເຄື່ອນໄຫວຂອງອະລິຍະທຳການປູກເຂົ້ານາທາມ ຄື: ຈົກ, ກ່ຽວ, ຄັນໄຖ…. ນອກນັ້ນ ຍັງມີບັນດາອຸປະກອນຫາສັດນ້ຳ…. ພ້ອມກັບເຄື່ອງທີ່ເປັນລະນຶກເຮັດດ້ວຍໄມ້ໄຜ່ , ເຄື່ອງຈັກສານ. ອ້າຍ ຫງວຽນແທ່ງຈູງ ແບ່ງປັນວ່າ:
“ມາຢ້ຽມຢາມຫໍວາງສະແດງນີ້ ພວກເຮົາຈະເຫັນປະຈັກຕາບັນດາຂັ້ນຕອນເຮັດນາ ຈາກການຕົກກ້າຕະຫລອດຮອດການເກັບກ່ຽວ, ປຸງແຕ່ງ, ສີເຂົ້າຄືແນວໃດ.. ພິເສດ ແມ່ນພວກນ້ອງນ້ອຍມັກການເຄື່ອນໄຫວນີ້ທີ່ສຸດ. ເມື່ອມານີ້ ຜູ້ໃຫຍ່ບໍ່ພຽງແຕ່ໄດ້ຮັບປະທານບັນດາເຍື່ອງອາຫານທີ່ແຊບນົວຂອງໝູ່ບ້ານ ເທົ່ານັ້ນ ຫາກເດັກນ້ອຍຍັງໄດ້ເຂົ້າຮ່ວມບັນດາການເຄື່ອນໄຫວໃນຊີວິດປະຈຳວັນຂອງປະຊາຊົນຢູ່ທີ່ນີ້.”
ພະນັກງານຢູ່ຫ້ອງວາງສະແດງລ້ວນແຕ່ແມ່ນແມ່ຍິງເຮັດກະສິກຳ. ຍ້ອນມີຄວາມເຂົ້າໃຈກ່ຽວກັບອາຊີບເຮັດກະສິກຳ, ບັນດາແມ່ຍິງຢູ່ໝູ່ບ້ານ ແທງຕວານ ຈະຊ່ວຍໃຫ້ນັກທ່ອງທ່ຽວເຂົ້າໃຈກ່ຽວກັບວັດທະນະທຳກະສິກຳຢູ່ຫວຽດນາມ ກວ່າ. ດ້ວຍຮູບພາບທີ່ສວຍງາມຂອງເຂດບ້ານນາຢູ່ ເຫ້ວ ພ້ອມກັບບັນດາທຳນອງເພງພື້ນເມືອງທີ່ອ່ອນຊອນ, ເຍື່ອງອາຫານພິເສດທີ່ແຊບນົວ ພ້ອມດ້ວຍຄວາມຮັກແພງແຂກຄົນຂອງຊາວ ທ້ອງຖິ່ນ ຍາມໃດກໍເປັນສິ່ງດຶງດູດນັກທ່ອງທ່ຽວມາຢ້ຽມຢາມ ນະຄອນ ເຫ້ວ ນັບມື້ນັບຫລາຍຂຶ້ນ.