(vovworld)- ໝູ່ບ້ານບູຮານ ເຟືອກຕີກ ຫ່າງຈາກ ໃຈກາງນະຄອນ ເຫ້ວ ໄປທາງທິດເຫນືອ ປະມານ 40 ກິໂລແມັດ ແລະ ຖືກຕັ້ງຢູ່ແຄມແມ່ນ້ຳ ໂອເລົາທີ່ສວຍງາມດ້ວຍນ້ຳຂຽວຕະຫລອດປີ. ຈາກ ທາງຫລວງ 1 A ບໍ່ທັນຮອດ 1 ກິໂລແມັດ ເຂົ້າໝູ່ບ້ານ ເຟືອກຕີກ ທ່ານຈະເຫັນໝູ່ບ້ານແຫ່ງຫນຶ່ງທີ່ເກົ່າແກ່ ແລະ ສະຫງົບງຽບ. ພິເສດເມື່ອຍ່າງໄປຕາມເສັ້ນທາງທີ່ປູດ້ວຍດິນຈີ່ທ່ານຈະຮູ້ສຶກໄດ້ບັນຍາກາດຢູ່ເຂດບ້ານນານີ້ແມ່ນສະຫງົບສຸກທີ່ສຸດ. ບົດຂຽນຂອງນັກຂ່າວ ລານແອງ.
ເມື່ອເຂົ້າມາຢ້ຽມຢາມ ເຟືອກຕິກ, ນັກທ່ອງທ່ຽວໄດ້ພົບເຫັນຕົ້ນໄມ້ຂຽວອຸ່ມທຸ່ມທີ່ມີອາຍຸຫລາຍຮ້ອຍປີ. ຢູ່ປະຕູເຂົ້າບ້ານ ມີຕົ້ນໝາກຈັນໃຫຍ່ ອາຍຸກວ່າ 500 ປີ. ນອກນັ້ນ ຍັງມີດອກໄມ້ ເຊິ່ງມີອາຍຸ 100 ປີ ໄດ້ເບັ່ງບານຕາມລະດູອັນໄດ້ສົ່ງກີນຫອມຫວນປົກຄຸມໄປທົ່ວບ້ານ, ພ້ອມກັນນັ້ນແມ່ນຕົ້ນໄມ້ຫລາຍຊະນິດທີ່ມີອາຍຸຫລາຍຮ້ອຍປີ ຍັງຄົງໄດ້ຮັບການຮັກສາໄວ້ຈາກປະຊາຊົນ ຄືດັ່ງຊັບສົມບັດອັນລ້ຳຄ່າຂອງ ເຂດຊຸມຊົນ ເຟືອກຕີກ. ທ່ານນາງ ບູ່ຍທິຫາຍກວຽນ, ພະນັກງານບໍລິສັດທ່ອງທ່ຽວ ເກວເຮືອງໃຫ້ຮູ້ວ່າ:
“ເມື່ອມາຢ້ຽມຢາມເຟືອກຕີກ, ກ່ອນອື່ນ ນັກທ່ອງທ່ຽວໄດ້ຍ່າງຫລິ້ນອ້ອມຮອບໝູ່ບ້ານ ເພື່ອຊົມທິວທັດທີ່ສວຍງາມຂອງເຂດບ້ານນາ. ເປັນຕົ້ນແມ່ນບັນດາຫລັງເຮືອນບູຮານ ດ້ວຍສະຖາປັດຕະຍະກຳທີ່ເປັນເອກະລັກສະເພາະ ກໍຄືທ່ານຈະເຫັນປະຈັກຕາຊີວິດການເປັນຢູ່ທີ່ສະຫງົບສຸກຂອງປະຊາຊົນຢູ່ທີ່ນີ້. ນອກນັ້ນ ນັກທ່ອງທ່ຽວຍັງໄດ້ໄປຢ້ຽມຢາມສະຖານທີ່ຜະລິດເຄື່ອງປັ້ນດິນເຜົາ, ຫລືໄດ້ຮັບປະທານອາຫານພິເສດໂດຍຊາວທ້ອງຖິ່ນປຸງແຕ່ງ.”
ສຳລັບນັກທ່ອງທ່ຽວ ຜູ້ມາຢ້ຽມຢາມໝູ່ບ້ານ ເຟືອກຕິກ ໃນຄັ້ງທຳອິດ ກໍລ້ວນແຕ່ຮູ້ສຶກແປກປະຫລາດເມື່ອໄດ້ເຫັນບ້ານບູຮານແຫ່ງຫນຶ່ງ, ຊື່ງແມ່ນບ່ອນເຕົ້າໂຮມເຮືອນເຣື່ອງບູຮານ ສີບໆຫລັງ ຊື່ງໄດ້ຮັບການຮັກສາໄວ້ເໝືອນເດີມ, ໃນນັ້ນ ມີເຮືອນເຣື່ອງ 30 ຫລັງ ອາຍຸກວ່າ ຮ້ອຍປີ. ທ່ານ ເລຈ້ອງເຫງ໋ຍ, ເຈົ້າຂອງເຮືອນບູຮານຫລັງຫນຶ່ງໃຫ້ຮູ້ວ່າ: ສິ່ງທີ່ເປັນເອກະລັກສະເພາະຂອງເຮືອນບູຮານຫລັງຫນຶ່ງ ບໍ່ພຽງແຕ່ດ້ານສະຖາປັດຕະຍະກຳ ເທົ່ານັ້ນ ຫາກບັນດາເຂດສວນກໍແມ່ນສິ່ງດຶງດູດນັກທ່ອງທ່ຽວ.
“ຊາວບ້ານ ເຟືອກຕີກ ແມ່ນຜູ້ຮັກແພງແຂກຄົນ ແລະເຂົາເຈົ້າຢາກໂຄສະນາໃຫ້ທຸກຄົນສິ່ງທີ່ໝູ່ບ້ານອື່ນບໍ່ມີ. ບໍ່ພຽງແຕ່ເຄື່ອງປັ້ນດິນເຜົາເທົ່ານັ້ນ ຫາກເຂດສວນ, ຕົ້ນໄມ້, ແບບແຜນການດຳລົງຊີວິດຂອງຊາວ ເຟືອກຕີກ ກໍແຕກຕ່າງ ຊື່ງປະຊາຊົນຢາກໂຄສະນາບ້ານເຟືອກຕິກເຖິງນັກທ່ອງທ່ຽວ. ນັ້ນແມ່ນ ຄວາມມຸ້ງມາດປາດຖະຫນາຂອງພວກຂ້າພະເຈົ້າ.”
ເຮືອນເຣື່ອງຢູ່ບ້ານ ເຟືອກຕີກ
|
ມາຢ້ຽມຢາມ ເຟືອກຕີກ, ນັກທ່ອງທ່ຽວ ຍັງໄດ້ຮັບຊົມບັນດານັກສິລະປະການ ຜະລິດເຄື່ອງປັ້ນດິນເຜົາ. ອາຊີບເຄື່ອງປັ້ນດິນເຜົາຢູ່ ເຟືອກຕີກ ຍັງຄົງໄດ້ສືບທອດໃຫ້ລູກຫລານ ແລະ ແນະນຳໃຫ້ນັກທ່ອງທ່ຽວ. ຊາວ ບ້ານເຟືອກຕີກ ຍາມໃດກໍເຄົາລົບ ຮັກສາຮ່ອງຮອຍຂອງບັນດາເຕົາຜະລິດເຄືື່ອງປັ້ນດິນເຜົາໃນເມື່ອກ່ອນ. ເຂົາເຈົ້າສະຫງວນຫາດດິນ ມີຊື່ວ່າຫາດແຈ່ງ ເພື່ອຮັກສາບັນດາຕອນເຄື່ອງປັ້ນດິນເຜົາບູຮານ ຄືດັ່ງຫໍພິພິດທະພັນທີ່ເປັນມູນເຊື້ອຂອງໝູ່ບ້ານ. ແມ່ຕູ້ ເລືອງທິເບ, ຊື່ງແມ່ນຫນຶ່ງໃນບັນດາຊ່າງປັ້ນດິນເຜົາອາຍຸສູງ ທີ່ຍັງເຫລືອຂອງໝູ່ບ້ານໃຫ້ຮູ້ວ່າ:
“ກ່ອນນີ້ ພວກຂ້າພະເຈົ້າຜະລິດເຄື່ອງປັ້ນດິນເຜົາຫລາຍປະເພດ ແລະ ລາຄາຂາຍກໍແພງ. ແຕ່ຊຸມປີ 1940 ຊາວບ້ານ ເຟືອກຕິກ ຜະລິດເຄື່ອງປັ້ນດິນເຜົາແລ້ວ. ແລະໄລຍະນັ້ນ ລາຍຈ່າຍໃນການປຸກສ້າງເຮືອນເຣື່ອງ ເຮືອນບູຮານ ກໍລ້ວນແຕ່ເອົາມາຈາກການຂາຍເຄື່ອງປັ້ນດິນເຜົາ.”
ມາຢ້ຽມຢາມໝູ່ບ້ານ ບູຮານ ເຟືອກຕີກ, ນັກທ່ອງທ່ຽວ ຍັງໄດ້ຮັບຊົມສີມືອັນຄ່ອງແຄ້ວຂອງບັນດານັກສິລະປະການໃນບ້ານ ແລະ ໄດ້ຮັບປະທານບັນດາເຍື່ອງອາຫານພິເສດໂດຍຊາວທ້ອງຖິ່ນປຸງແຕ່ງ. ທ່ານນາງ ຫງວຽນທິຖູ່ຍ ໃຫ້ຮູ້ວ່າ: ແມ່ຍິງໃນບ້ານ ໄດ້ສ້າງຕັ້ງສະໂມສອນອາຫານການກິນ ເພື່ອປຸງແຕ່ງອາຫານຮັບໃຊ້ນັກທ່ອງທ່ຽວມາຢ້ຽມຢາມ.
“ ຢູ່ທີ່ນີ້ ມີເຂົ້າຫນົມ ແລະ ອາຫານພິເສດ ຂອງເຫ້ວ ຫລາຍປະເພດ. ສະມາຄົມແມ່ຍິງ ມີກວ່າ 70 ຄົນ, ໃນນັ້ນສະໂມສອນອາຫານການກິນ ມີ 16 ຄົນ. ທຸກຄົນພ້ອມກັນປຸ້ງແຕ່ງອາຫານຫລາຍເຍື່ອງເພື່ອຮັບໃຊ້ນັກທ່ອງທ່ຽວ. ການສ້າງຕັ້ງສະໂມສອນອາຫານການກິນ ບໍ່ພຽງແຕ່ຮັບໃຊ້ນັກທ່ອງທ່ຽວເທົ່ານັ້ນ ຫາກຍັງແມ່ນການສ້າງວຽກເຮັດງານທຳໃຫ້ເອື້ອຍນ້ອງໃນໝູ່ບ້ານອີກດ້ວຍ.”
ເພື່ອປຸງແຕ່ງບັນດາເຍື່ອງອາຫານພື້ນເມືອງຂອງໝູ່ບ້ານ ເອື້ອຍນ້ອງແມ່ຍິງ ຍັງໄດ້ຮັບການແນະນຳ ແລະ ເຄັດລັບປຸງແຕ່ງອາຫານແຊບ ຈາກຜູ້ອາຍຸສູງໃນບ້ານ.ບັນດາເຍື່ອງອາຫານໂດຍເອື້ອຍນ້ອງໃນໝູ່ບ້ານບູຮານ ປຸງແຕ່ງບໍ່ພຽງແຕ່ເຮັດໃຫ້ນັກທ່ອງທ່ຽວຮູ້ສຶກໄດ້ສິ່ງເປັນເອກະລັກສະເພາະຂອງອາຫານການກິນຢູ່ເຫ້ວ ເທົ່ານັ້ນ ຫາກເຂົາເຈົ້າຈະບໍ່ອາດຫລົງລືມທຸກສິ່ງທຸກຢ່າງຢູ່ເຂດບ້ານນານຂອງຫວຽດນາມ ໃນເມື່ອກ່ອນອີກດ້ວຍ.