(vovworld)- ບໍລິສັດການບິນແຫ່ງຊາດ ກຳປູເຈຍ(Cambodia Angkor Air), ຊື່ງແມ່ນບໍລິສັດຮ່ວມທຸລະກິດລະຫວ່າງກຳປູເຈຍ ແລະ ຫວຽດນາມ ໄດ້ເປີດສາຍການບິນໂດຍກົງລະຫວ່າງພະນົມເປັນ - ຮ່າໂນ້ຍ. ນີ້ແມ່ນສາຍການບິນໂດຍກົງທຳອິດເຊື່ອມຕໍ່ນະຄອນຫລວງຂອງສອງປະເທດ, ຕອບສະຫນອງຄວາມຕ້ອງການໄປມາກໍຄືການພັດທະນາເສດຖະກິດລະຫວ່າງ ກຳປູເຈຍ ແລະ ຫວຽດນາມ.
Cambodia Angkor Air ພວມປັບປຸງລະບົບຂາຍປີ້ຍົນເພື່ອສ້າງເງື່ອນໄຂສະດວກທີ່ສຸດໃຫ້ແກ່ ນັກທ່ອງທ່ຽວ.
|
ກຳປູເຈຍແມ່ນປະເທດຊື່ງແຂກຄົນທັງຫລາຍຮູ້ຈັກກັນດີຍ້ອນມີບັນດາສະຖານທີ່ທ່ອງທ່ຽວອັນດູດດື່ມຢູ່ ອາຊີ ດ້ວຍຫລາຍຮູບການທ່ອງທ່ຽວຄື: ທ່ອງທ່ຽວຊີວະພາບ, ທ່ອງທ່ຽວວັດທະນະທຳ ແລະ ມີວັດວາອາຮາມໃຫຍ່ນັບພັນແຫ່ງໃນທົ່ວປະເທດ. ພິເສດກຸ່ມປູຊະນີຍະສະຖານ ອັງກໍ ຢູ່ແຂວງ ຊຽມຣຽບ, ເຂດແຄມທະເລດ້ວຍບັນດາຫາຍຊາຍທະເລທີ່ສວຍງາມຢູ່ນະຄອນ Sihanoukville ແລະ ບັນດາແຂວງ KohKong, Kampot, ບັນດາຖ້ຳຢູ່ເຂດຕາເວັນອອກສຽງເຫນືອ ຊື່ງລວມມີ: ແຂວງ Ratankiri, Mondonkiri, Strung Treng ແລະ Kratie… ອັນໄດ້ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ເຖິງວ່າ ຄວາມສາມາດບົ່ມຊ້ອນດ້ານການທ່ອງທ່ຽວທີ່ອຸດົມສົມບູນ, ມີຫລາຍຮູບຫລາຍແບບຄືແນວນັ້ນກໍຕາມ ແຕ່ພື້ນຖານໂຄງລ່າງການທ່ອງທ່ຽວ, ເປັນຕົ້ນແມ່ນຍານພາຫະນະ, ພິເສດແມ່ນການຂົນສົ່ງທາງອາກາດຂອງກຳປູເຈຍແມ່ນຍັງບໍ່ທັນສາມາດຕອບສະຫນອງຄວາມຕ້ອງການຂອງນັກທ່ອງທ່ຽວໄດ້ເທື່ອ.
ຕາມຕົວເລກສະຖິຕິຂອງກະຊວງທ່ອງທ່ຽວກຳປູເຈຍແລ້ວ, ປີ 2012 ມີນັກທ່ອງທ່ຽວຕ່າງປະເທດມາຢ້ຽມຢາມ ກຳປູເຈຍ 3,6 ລ້ານເທ່ືອຄົນ, ໃນນັ້ນ 2 ລ້ານກວ່າເທື່ອຄົນໄປຢ້ຽມຢາມ ວັດອັງກໍ. ເປັນຕົ້ນແມ່ນນັກທ່ອງທ່ຽວມາຈາກ ຫວຽດນາມ, ຈີນ, ໄທ, ສເກົາຫລີ ແລະ ຍີ່ປຸ່ນ. ເຖິງຢ່າງໃດກໍຕາມ, ກວ່າເຄິ່ງຫນຶ່ງໃນຈຳນວນນັກທ່ອງທ່ຽວມາຢ້ຽມຢາມ ກຳປູເຈຍ ດ້ວຍທາງອາກາດ ແລະ ທາງນ້ຳ. ລັດຖະບານ ກຳປູເຈຍ ປາດຖະຫນາວ່າ ແຕ່ປີ 2013, ຈຳນວນນັກທ່ອງທ່ຽວຕ່າງປະເທດມາຢ້ຽມຢາມ ກຳປູເຈຍດ້ວຍທາງອາກາດຈະເພີ່ມຂຶ້ນສູງ ຜ່ານບັນດາສາຍການບິນທີ່ສະດວກ, ວ່ອງໄວ ຂອງບໍລິສັດການບິນແຫ່ງຊາດ Angkor Air. ທ່ານ Sok Ran ນັກວິຊາການ Marketing ສັງກັດບໍລິສັດ Cambodia Angkor Air ປະຈຳກຳປູເຈຍ ໃຫ້ຮູ້ວ່າ:
“ບໍລິສັດການບິນແຫ່ງຊາດກຳປູເຈຍເປັນຄັ້ງທຳອິດເປີດສາຍການບິນລະຫວ່າງ ກຳປູເຈຍ ແລະ ຫວຽດນາມ, ລະຫວ່າງນະຄອນຫລວງ ພະນົມເປັນ ແລະ ນະຄອນຫລວງຮ່າໂນ້ຍ, ນະຄອນ ຊຽມຣຽບ ແລະ ນະຄອນຮ່າໂນ້ຍ ກໍຄືຈາກນະຄອນໂຮ່ຈິມີນເຖິງພະນົມເປັນ, ນະຄອນ ໂຮ່ຈິມີນໄປຍັງນະຄອນ ຊຽມຣຽບ. ບໍລິສັດການບິນແຫ່ງຊາດ ກຳປູເຈຍ ຈະປະກອບສ່ວນຊຸກຍູ້ຂະແຫນງທ່ອງທ່ຽວລະຫວ່າງ ກຳປູເຈຍ ແລະ ຫວຽດນາມ. ເລື່ອງບໍລິສັດການບິນແຫ່ງຊາດ ກຳປູເຈຍ ເປີດສາຍການບິນໂດຍກົງກໍເປັນການເປີດຊ່ອງທາງພັດທະນາການຮ່ວມມືທ່ອງທ່ຽວລະຫວ່າງສອງປະເທດ ກຳປູເຈຍ ແລະ ຫວຽດນາມ.”
ປະຈຸບັນ ບັນດາສາຍການບິນສາກົນຈາກພະນົມເປັນ ແລະ ຊຽມຣຽບ ລ້ວນແຕ່ເຊື່ອມຕໍ່ກັບບັນດາສາຍການບິນພາຍໃນກຳປູເຈຍ. ບັນດາສາຍການບິນພາຍໃນຂອງ Cambodia Angkor Air ໄດ້ສ້າງເງ່ືອນໄຂສະດວກເພື່ອໃຫ້ນັກທ່ອງທ່ຽວໄດ້ໄປຄົ້ນຫາສະຖານທີ່ທ່ອງທ່ຽວສາມແຫ່ງໃນໄລຍະທາງຫນຶ່ງ: ນັ້ນແມ່ນນະຄອນ ພະນົມເປັນທີ່ທັນສະໄຫມ, ນະຄອນ ຊຽມຣຽບດ້ວຍພື້ນຖານວັດທະນະທຳບູຮານ ແລະ Sihanoukvile ດ້ວຍບັນດາຫາດຊາຍທະເລສວຍງາມ. ນາງ ເຈີນທິທູຈາງ, ຜູ້ຕາງຫນ້າ Cambodia Angkor Air ປະຈຳຮ່າໂນ້ຍ ໃຫ້ຮູ້ວ່າ:
“Cambodia Angkor Air ແມ່ນບໍລິສັດການບິນຮ່ວມທຸລະກິດລະຫວ່າງ ຫວຽດນາມ ແລະ ລາຊະອານາຈັກ ກຳປູເຈຍ ສະນັ້ນ ຕະຫລາດທຳອິດທີ່ກຳປູເຈຍ ສົນໃຈ ນັ້ນແມ່ນຫວຽດນາມ. ຖັດຈາກຫວຽດນາມ, Cambodia Angkor Air ຫັນໄປຍັງຕະຫລາດທີ 2 ແມ່ນ ບາງກອກ ແລະ ໄດ້ດຶງດູດນັກທ່ອງທ່ຽວເປັນຈຳນວນຫລາຍ, ພິເສດແມ່ນນັກທ່ອງທ່ຽວມາຈາກຝ່າຍຕາເວັນຕົກ. ປະຈຸບັນ, ແຕ່ລະມື້ Cambodia Angkor Air ຂົນສົ່ງຜູ້ໂດຍສານຈາກຮ່າໂນ້ຍປະມານ 200 ຄົນ, ສ່ວນຢູ່ນະຄອນໂຮ່ຈິມີນປະມານ 400 ຄົນ/ມື້.”
ຖ້ຽວບິນທຳອິດເຊື່ອມຕໍ່ນະຄອນຫລວງສອງປະເທດ
ຫວຽດນາມ ແລະ ກຳປູເຈຍ
ພາບ:internet
|
ບໍລິສັດການບິນແຫ່ງຊາດກຳປູເຈຍ Angkor Air ໄດ້ເປີດສາຍການບິນໂດຍກົງເປັນຄັ້ງທຳອິດຈາກ ຮ່າໂນ້ຍໄປພະນົມເປັນໃນຕົ້ນປີ 2013. ປະຈຸບັນ Cambodia Angkor Air ພວມປັບປຸງລະບົບຂາຍປີ້ຍົນເພື່ອສ້າງເງື່ອນໄຂສະດວກທີ່ສຸດໃຫ້ແກ່ນັກທ່ອງທ່ຽວ. ທ່ານ Sok Ran ນັກວິຊາການ Marketing ຂອງ Cambodia Angkor Air ປະຈຳກຳປູເຈຍ ໃຫ້ຮູ້ວ່າ:
“ Angkor Air ອະນຸຍາດໃຫ້ສອງ ສາຂາ ເພື່ອສ້າງເງື່ອນໄຂສະດວກໃຫ້ລູກຄ້າໃນການຊື້ປີ້ຍົນ. ຢູ່ນະຄອນ ຮ່າໂນ້ຍ ແມ່ນສາຂາ Blue ແລະ ສ່ວນຢູ່ນະຄອນ ໂຮ່ຈິມີນແມ່ນສາຂາ ເຮືອງຢາງ.”
ຄາດວ່າໃນປີນີ້, Cambodia Angkor Air ຈະສຳເລັດການນຳເຂົ້າຂຸດຄົ້ນທັງໝົດ 11 ສາຍການບິນ, ໃນນັ້ນ ມີ 8 ສາຍການບິນສາກົນ ແລະ 3 ສາຍການບິນພາຍໃນ, ຂົນສົ່ງແຂກທ່ອງທ່ຽວສາກົນໄປຢ້ຽມຢາມ ກຳປູເຈຍ ກໍຄືສ້າງຂົວເຊື່ອມຕໍ່ ແລະ ສ້າງຄວາມສະດວກລະຫວ່າງບັນດາຈຸດນັດພົບທີ່ລືຊື່ຂອງກຳປູເຈຍຄືນະຄອນຫລວງພະນົມເປັນ, ນະຄອນ ຊຽມຣຽບ ດ້ວຍບັນດາກຸ່ມວັດ ອັງກໍ ແລະ ນະຄອນ ທະເລ Sihanoukville. ນອກຈາກບັນດາສາຍການບິນໂດຍກົງຈາກ ຫວຽດນາມ, Cambodia Angkor Air ຈະມີສາຍການບິນໂດຍກົງຈາກບັນດາປະເທດທີ່ມີນັກທ່ອງທ່ຽວມາຢ້ຽມຢາມ ກຳປູເຈຍເປັນຈຳນວນຫລວງຫລາຍຄື: ຈີນ, ຍີ່ປຸ່ນ, ສເກົາຫລີ, ໄທ, ສິງກະໂປ.