(vovworld)- Surabaya ພາກຕາເວັນອອກ Java ປະເທດ ອິນໂດເນເຊຍ ແມ່ນຫນຶ່ງໃນບັນດານະຄອນນຳຫນ້າໃນການຫັນບັນດາບໍລິການສາທາລະນະເປັນທັນສະໄຫມເພື່ອຮັບໃຊ້ຄວາມຕ້ອງການຂອງປະຊາຊົນ. ແຕ່ປີ 2012, ອຳນາດການປົກຄອງນະຄອນ Surabaya ໄດ້ສະຫນອງບໍລິການເຄືອຂ່າຍອິນເຕີແນດ wifi ໂດຍບໍ່ເກັບຄ່າໃນຕະຫລອດ 24 ຊົ່ວໂມງຢູ່ບັນດາສະຖານທີ່ສາທາລະນະໃນນະຄອນ, ພິເສດ ແມ່ນຢູ່ບັນດາສວນສາທາລະນະ. ສິ່ງດັ່ງກ່າວໄດ້ປະກອບສ່ວນດຶງດູດຊາວຫນຸ່ມ, ນັກຮຽນ, ນັບທັງພະນັກງານລັດຖະກອນອີກ, ປະກອບສ່ວນນຳ Surabaya ກາຍເປັນນະຄອນອຶກກະທຶກຄືກໂຄມ ແລະ ທັນສະໄຫມກວ່າ.
ທິວທັດທຳມະຊາດຢູ່ສວນສັດທີ່ນະຄອນSurabaya
ພາບ:internet
|
Surabaya ແມ່ນນະຄອນມີສວນສາທາລະນະຫລາຍສຸດຢູ່ ອິນໂດເນເຊຍ. ພິເສດ ປີ 2012, Surabaya ໄດ້ຮັບການຮັບຮອງວ່າແມ່ນນະຄອນມີສວນສາທາລະນະງາມກວ່າໝູ່ຢູ່ ອິນໂດເນເຊຍ. ຍ້ອນ Surabaya ບໍ່ພຽງແຕ່ມີທິວທັດທຳມະຊາດສວຍງາມເທົ່ານັ້ນ ຫາກນີ້ຍັງແມ່ນແຫ່ງທີ່ມີປະຊາຊົນມາຢ້ຽມຊົມເປັນຈຳນວນຫລວງຫລາຍອີກດ້ວຍ.
ໃນ 2 ປີມໍ່ໆມານີ້, ບັນດາສວນສາທາລະນະຢູ່ Surabaya ບໍ່ພຽງແຕ່ແມ່ນສະຖານທີ່ຢ່ອນອາລົມ, ລະຫລິ້ນ, ເຂົ້າຮ່ວມບັນດາການເຄື່ອນໄຫວກິລາກາຍະກຳຫລືບ່ອນພົບປະຂອງເພື່ອນຫນຸ່ມເທົ່ານັ້ນ, ຫາກເມື່ອມາບັນດາສວນສາທາລະນະຄື: Bungkul, Pelangi, Apsari….ພວກເຮົາຍັງພົບເຫັນບັນດາຫນ່ວຍນັກສຶກສາ, ພະນັກງານລັດຖະກອນທັງນັ່ງເທິງຕັ່ງຫີນຫລືເທິງສວນຫຍ້າ ທັງຕັ້ງໃຈເຮັດບົດເຝີກ, ເຮັດວຽກ ຫຼືແລກປ່ຽນຄຳເຫັນກັບໝູ່ເພື່ອນ, ຜູ້ຮ່ວມງານຂອງຕົນ.
ເພື່ອນ Husei Chairudin, ນັກສຶກສາຢູ່ Surabaya ໃຫ້ຮູ້ວ່າ: ແຕ່ລະມື້ ພາຍຫລັງເລິກຮຽນ, ອ້າຍພ້ອມກັບໝູ່ເພື່ອນກໍ່ມາສວນສາທາລະນະນີ້ ເພື່ອພັກຜ່ອນຢ່ອນອາລົມ ແລະ ສູບອາກາດປອດໂປ່ງ ຫຼືພ້ອມກັບໝູ່ເພື່ອນເຮັດບົດເຝິກຫັດ, ແລກປ່ຽນຄຳເຫັນ. Husei Chairudin ເວົ້າວ່າ ເລື່ອງສະຫນອງເຄືອຂ່າຍອິນເຕີແນັດ Wifi ໂດຍບໍ່ເກັບຄ່າ ແມ່ນສ້າງເງື່ອນໄຂສະດວກທີ່ສຸດໃຫ້ແກ່ ອ້າຍກໍຄືໝູ່ເພື່ອນເພື່ອຊອກຫາຂໍ້ມູນຂ່າວສານ.
“ສິ່ງດັ່ງກ່າວແມ່ນດີທີ່ສຸດ. ເມື່ອມີເຄືອຂ່າຍ wifi, ນັກສຶກສາຄືພວກນ້ອງສາມາດເຮັດບົດເຝິກຫັດ ແລະ ອ່ານຂ່າວໃນຫນ້າເວັບຕ່າງໆໄດ້. ສ່ວນພະນັກງານລັດຖະກອນ, ເຂົາເຈົ້າສາມາດສົ່ງເອກະສານໃຫ້ອົງການຂອງຕົນໄດ້. ພວກຂ້າພະເຈົ້າປາດຖະຫນາວ່າ Surabaya ກໍຄື ອິນໂດເນເຊຍ ນັບມື້ນັບພັດທະນາ ແລະ ເຄືອຂ່າຍອິນເຕີແນັດ wfi ນັບມື້ນັບຂະຫຍາຍຢ່າງກວ້າງຂວາງກວ່າ ດ້ວຍຄຸນນະພາບດີກວ່າ.”
ເລື່ອງສະຫນອງເຄືອຂ່າຍອິນເຕີແນັດ wifi ໄດ້ຮັບການຊົມເຊີຍຈາກປະຊາຊົນເປັນຈຳນວນຫລວງຫລາຍ. ຈຳນວນປະຊາຊົນມາສວນສາທາລະນະນັບມື້ນັບຫລາຍກວ່າ, ພິເສດແມ່ນເພື່ອນຫນຸ່ມ ແລະ ພະນັກງານລັດຖະກອນ. ແຕ່ເຖິງຢ່າງໃດກໍຕາມ, ຍ້ອນຈຳນວນຜູ້ນຳໃຊ້ອິນເຕັດແນດຫລາຍໂພດ, ສະນັ້ນ ຄຸນນະພາບກໍບໍ່ໄດ້ດີປານໃດ. ນາງ Atika Nabila, ພະນັກງານຜູ້ຫນຶ່ງແບ່ງປັນວ່າ.
“ຂ້າພະເຈົ້າຕ້ອງການນຳໃຊ້ອິນເຕີແນັດທີ່ສຸດ ແຕ່ບາງເທື່ອເຂົ້າບໍ່ໄດ້, ຄຸນນະພາບບໍ່ດີ. ຫວັງວ່າໄລຍະຈະມາເຖິງ ທຸກຄົນຈະໄດ້ນຳໃຊ້ບໍລິການອິນເຕີແນດຢູ່ທີ່ນີ້ດີກວ່າ.”
ເຖິງວ່າ ຄຸນນະພາບຂອງເຄືອຂ່າຍອິນເຕີແນັດຍັງຈຳກັດຢູ່, ແຕ່ຈຳນວນປະຊາຊົນມາສວນສາທາລະນະນັບມື້ນັບຫລາຍ ຍ້ອນຄວາມສະດວກ ແລະ ອາກາດຢູ່ທີ່ນີ້ປອດໂປ່ງ ເຮັດໃຫ້ເຂົາເຈົ້າຮູ້ສຶກສະຫວາດສະເຫວີຍ. ທ່ານນາງ Antiek Sugiharti, ຫົວຫນ້າພະແນກສື່ສານ ແລະ ຄອມພິວເຕີ Surabaya ໃຫ້ຮູ້ວ່າ: ເພື່ອຜັນຂະຫຍາຍ ແລະ ຮັກສາການສະຫນອງເຄືອຂ່າຍອິນເຕີແນັດ wifi ເປັນປະຈຳ ບໍ່ແມ່ນເລື່ອງງ່າຍ.
“ພວກຂ້າພະເຈົ້າພວມທຳການກວດກາບໍລິການສະຫນອງ ເຄືອຂ່າຍອິນເຕີແນັດ wifi. ຍ້ອນຈຳນວນຜູ້ນຳໃຊ້ຫລາຍເກີນໄປ, ສະນັ້ນຄຸນນະພາບບໍ່ດີປານໃດ. ພວກຂ້າພະເຈົ້າຈະກວດກາເປັນປະຈຳ ແລະ ຈະປັບປຸງຄຸນນະພາບໃຫ້ດີກວ່າເພື່ອຮັບໃຊ້ຄວາມຕ້ອງການຂອງປະຊາຊົນ.”
ແຕ່ລະປີ, ອຳນາດການປົກຄອງນະຄອນ Surabaya ໄດ້ເບີກຈ່າຍຈຳນວນເງິນກວ່າ 40.000 USD ເພື່ອຊຳລະໃຫ້ແກ່ບໍລິການອິນເຕີແນັດ. ສິ່ງດັ່ງກ່າວສະແດງໃຫ້ເຫັນວ່າ ຄວາມມານະພະຍາຍາມຂອງນະຄອນນີ້ໄດ້ປະກອບສ່ວນຊຸກຍູ້ລັກສະນະຂະຫຍັນຂັນເຄື່ອນ ແລະ ຮັກສາສຸຂະພາບຂອງປະຊາຊົນນະຄອນນີ້. ຕາມແຜນການ ອຳນາດການປົກຄອງ Surabaya ຈະສືບຕໍ່ເປີດກວ້າງເຄືອຂ່າຍອິນເຕີແນັດ wifi ຢູ່ສະຖານທີ່ສາທາລະນະຫລາຍແຫ່ງຄື: ສູນການຄ້າ, ສະຖານທີ່ອາຫານການກິນ ແລະ ບັນດາສະຖານທີ່ທ່ອງທ່ຽວອື່ນໃນນະຄອນ.