(vovworld) - ໃນອາທິດຜ່ານມາ, ລາຍການພາກພາສາລາວ, ວິທະຍຸກະຈາຍສຽງຫວຽດນາມ, ໄດ້ຮັບໂທລະສັບ, ອີແມວ, ຈົດໝາຍຈາກຜູ້ຟັງລາວ ທີ່ສົ່ງມາລາຍການ. ໃນລາຍການໂອ້ລົມກັບເພື່ອນລາວ ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ.
ໃນອາທິດຜ່ານມາ, ເພື່ອນ ດວງມາລາ, ຢູ່ແຂວງ ຈຳປາສັກ ໄດ້ໂທລະສັບມາຫາລາຍການໂດຍໃຫ້ຮູ້ວ່າ: ໃນອາທິດຜ່ານມາ, ແມ່ນກົງກັບໂອກາດບຸນປີໃໝ່ປະເພນີຂອງລາວ, ເຖິງວ່າແມ່ນບຸນປີໃໝ່ກໍ່ຕາມ ແຕ່ຂ້າພະເຈົ້າຍັງຕິດຕາມຮັບຟັງບັນດາລາຍການກະຈາຍສຽງພາກພາສາລາວ, VOV. ຢູ່ໃນລາຍການເພງ, ຂ້າພະເຈົ້າໄດ້ຮັບຟັງລາຍບົດເພງກ່ຽວກັບບຸນປີໃໝ່ຂອງລາວ. ຂໍຂອບໃຈພວກເພື່ອນທີ່ໄດ້ມອບບັນດາບົດເພງນັ້ນໃຫ້ທຸກຄົນ.
ປະທານໂຮ່ຈິມິນ
(ພາບເອກະສານ: TTXVN)
ໃນອາທິດຜ່ານມາ, ເພື່ອນ ທິດາ ກິດຈະເລີນ, ພວມດຳລົງຊີວິດຢູ່ແຂວງຄຳມ່ວນ, ໄດ້ຝາກຈົດໝາຍມາຍັງລາຍການໂດຍເວົ້າວ່າ: ຂ້າພະເຈົ້າຮູ້ວ່າ ວັນຄ້າຍວັນເກີດຂອງປະທານໂຮ່ຈິມິນ ແມ່ນໃນເດືອນ 5 ຈະມາເຖິງ, ແຕ່ບໍ່ຮູ້ວ່າແມ່ນມື້ໃດ? ທ່ານປະທານໂຮ່ຈິມິນ ຍັງມີຊື່ໃດອີກບໍ່? ແລະ ຂ້າພະເຈົ້າໄດ້ຍິນວ່າມີຫຼາຍບົດເພງມ່ວນໆ ກ່ຽວກັບທ່ານປະທານໂຮ່ຈິມິນ, ດັ່ງນັ້ນຂໍ້ໃຫ້ທາງວິທະຍຸກະຈາຍສຽງແນະນຳຊື່ຂອງບາງບົດເພງທີ່ໄດ້ສ້າງຄວາມປະທັບໃຈໃຫ້ທ່ານຜູ້ຟັງເປັນຈຳນວນຫຼວງຫຼາຍ.
ເພື່ອນ ທິດາ ກິດຈະເລີນ ທີ່ຮັກແພງ, ປະທານໂຮ່ຈິມິນ (ເວລາຍັງນ້ອຍເພີ່ນມີຊື່ວ່າ ຫງວຽນຊິງກຸງ, ເມື່ອໄປຮຽນມີຊື່ວ່າ ຫງວຽນເຕີດແທ່ງ, ເວລາເຄື່ອນໄຫວປະຕິວັດເພີ່ນໄດ້ໃສ່ຊື່ວ່າ ຫງວຽນອ໋າຍກ໋ວກ (ໝາຍຄວາມວ່າຮັກຊາດ), ເພີ່ນເກີດເມື່ອວັນທີ 19/05/1890, ຢູ່ບ້ານກິນລຽນ, ເມືອງນາມດ່ານ, ແຂວງ ເຫງະອານ ແລະ ເພີ່ນເຖິງແກ່ມໍລະນະກຳໃນວັນທີ 02/09/1969 ຢູ່ຮ່າໂນ້ຍ. ໂດຍໄດ້ຮັບການກຳເນີດໃນຄວບຄົວຮັກຊາດ ແລະ ເຕີບໃຫຍ່ຢູ່ທ້ອງຖິ່ນທີ່ມີມູນເຊື້ອປະຕິວັດຕ້ານສັດຕູຜູ້ຮຸກຮານ, ຍ້ອນດຳລົງຊີວິດໃນສະພາບປະເທດຊາດພວມຕົກຢູ່ໃຕ້ແອກປົກຄອງຂອງລ່າເມືອງຂຶ້ນຝລັ່ງ, ເພີ່ນໄດ້ເຫັນປະຈັກຕາຄວາມລຳບາກກາກກຳຂອງປະຊາຊົນ ແລະ ບັນດາຂະບວນການຕໍ່ສູ້ຕ້ານລ່າເມືອງຂຶ້ນ. ສິ່ງດັ່ງໄດ້ກ່າວພາໃຫ້ເພີ່ນມີຄວາມຕັດສິນໃຈຕໍ່ສູ້ຕ້ານພວກລ່າເມືອງຂຶ້ນ, ຍາດເອົາເອກະລາດມາໃຫ້ປະເທດຊາດ ນຳມາເຊິ່ງຄວາມເສລີພາບ, ຄວາມຜາສຸກໃຫ້ແກ່ປະຊາຊົນ. ປະທານໂຮ່ຈິມິນ ແມ່ນນັກກອມມູນິດຜູ້ຍິ່ງໃຫຍ່, ເປັນນັກວິລະຊົນທີ່ດີເລີດຂອງຊາດ, ເປັນນັກຮົບສາກົນທີ່ປີຊາສາມາດ, ເພີ່ນໄດ້ຕໍ່ສູ້ຢ່າງບໍ່ຮູ້ອິດບໍ່ຮູ້ເມື່ອຍ ແລະ ອຸທິດຕະຫຼອດຊີວິດຂອງຕົນເພື່ອປະເທດຊາດ, ເພື່ອປະຊາຊົນ, ເພື່ອອຸດົມຄະຕິກອມມູນິດ, ເພື່ອຄວາມເອກະລາດ, ອິດສະລະພາບຂອງປະເທດຊາດ, ເພື່ອສັນຕິພາບ ແລະ ຄວາມຍຸດຕິທຳໃນໂລກ. ປີ 2016 ແມ່ນປີສະເຫຼີມສະຫຼອງ 126 ປີແຫ່ງວັນຄ້າຍວັນເກີດຂອງເພີ່ນ. ຢູ່ຫວຽດນາມ ເກືອບຄືວ່ານັກດົນຕີຜູ້ໃດກໍແຕ່ງບົດເພງກ່ຽວກັບເພີ່ນ, ບັນດາບົດເພງເຫຼົ່ານັ້ນລ້ວນແຕ່ມ່ວນ ແລະ ສ້າງຄວາມສະເທືອນໃຈໃຫ້ແກ່ຜູ້ຟັງທີ່ສຸດຄືບົດເພງ: ລຸງໂຮ່ຄວາມຮັກທີ່ກວ້າງໃຫຍ່ໄພສານ, ຈາກບ້ານແຊນ, ພາກກາງຄິດຮອດລຸງໂຮ່...
ງານຕະຫຼາດນັດທ່ອງທ່ຽວສາກົນຫວຽດນາມ - VITM 2016
(ພາບ: baomoi)
ເພື່ອນ ບົວລີ ແສງຄຳ, ຢູ່ແຂວງຫົວພັນ ໄດ້ສົ່ງຂໍຄວາມໃຫ້ຮູ້ວ່າ: ຂ້າພະເຈົ້າໄດ້ຮູ້ວ່າ, ຫວຽດນາມ ຫາກໍຈັດງານຕະຫຼາດບັດທ່ອງທ່ຽວສາກົນ - ຮ່າໂນ້ຍ 2016 (VITM 2016) ສຳເລັດຜົນ. ຜ່ານລາຍການ, ຂ້າພະເຈົ້າຢາກຮູ້ບາງຂໍ້ມູນພື້ນຖານກ່ຽວກັບງານຕະຫຼາດນັດຄັ້ງນີ້ໄດ້ບໍ່?
ເພື່ອນ ບົວລີ ແສງຄຳ ທີ່ຮັກແພງ, ງານຕະຫຼາດນັດທ່ອງທ່ຽວສາກົນຫວຽດນາມ - VITM 2016 ຖືກດຳເນີນຢູ່ຮ່າໂນ້ຍ ໃນລະຫວ່າງວັນທີ 14 – 17/04. ງານຕະຫຼາດນັດ VITM 2016 ມີຫົວຂໍ້ວ່າ “ຫວຽດນາມ - ແດນສະຫວັນການທ່ອງທ່ຽວທະເລ, ໝູ່ເກາະ” ເຊິ່ງໄດ້ຮັບການຕີລາຄາວ່າ ແມ່ນງານຕະຫຼາດນັດລະດັບພາກພື້ນ. VITM 2016 ມີການເຂົ້າຮ່ວມຂອງບັນດາວິສາຫະກິດທີ່ມາຈາກ 24 ປະເທດ ແລະ ເຂດແຄ້ວນ ແລະ 60 ອົງການສົ່ງເສີມການທ່ອງທ່ຽວ. ຈຸດໃໝ່ຂອງ VITM 2016 ແມ່ນສ້າງສະຖານທີ່ທ່ອງທ່ຽວຫວຽດນາມ ປີ 2016, ນັ້ນແມ່ນ ເຂດ ໄຕບັກ (ເຂດຕາເວັນຕົກສ່ຽງເໜືອ) ແລະ ໄຕງວຽນ - ທິດໃຕ້ພາກກາງ. ຄຽງຂ້າງນັ້ນ, VITM 2016 ຍັງຈັດກອງປະຊຸມສຳມະນາ 7 ຄັ້ງ ແລະ ການປະຊຸມຂ່າວເປັນ 10 ຄັ້ງເພື່ອໂຄສະນາຜະລິດຕະພັນ. ມີບັນດາກອງປະຊຸມສຳມະນາໃຫຍ່ຄື “ການພັດທະນາການທ່ອງທ່ຽວເຂດຕາເວັນຕົກສ່ຽງເໜືອ” ດ້ວຍການເຂົ້າຮ່ວມຂອງວິສາຫະກິດນັບຮ້ອຍແຫ່ງ, ການນຳຂອງ 14 ແຂວງ ແລະ ບັນດາການນຳຂັ້ນສູງຫຼາຍທ່ານໄດ້ເຂົ້າຮ່ວມ. ສິ່ງດັ່ງກ່າວໄດ້ຊີ້ໃຫ້ເຫັນວ່າ VITM ແມ່ນເວທີປາໄສການທ່ອງທ່ຽວອັນດັບໜຶ່ງ. ພ້ອມກັບການໂຄສະນາກ່ຽວກັບການທ່ອງທ່ຽວເຂດທະເລ, ໝູ່ເກາະ, VITM ຍັງປະກອບສ່ວນຍົກສູງຄວາມເປັນເອກະລັກສະເພາະ, ລັກສະນະແກ່ງແຍ້ງຂອງບັນດາຜະລິດຕະພັນທ່ອງທ່ຽວ ຫວຽດນາມ, ປະກອບສ່ວນດຶງດູດແຂກທ່ອງທ່ຽວມາຢ້ຽມຢາມຫວຽດນາມ ນັບມື້ນັບຫຼາຍ.
ເພື່ອນ ລັດດາພອນ ພົມມາຈັນ, ແຂວງວຽງຈັນ ໄດ້ສົ່ງຈົດໝາຍມາຍັງລາຍການໂດຍຖາມວ່າ. ຂ້າພະເຈົ້າໄດ້ຮັບຂ່າວວ່າ ວິທະຍຸກະຈາຍສຽງຫວຽດນາມ ໄດ້ມອບຂອງຂວັນໃຫ້ຜູ້ທີ່ຮັບຟັງລາຍການເປັນປະຈຳ. ຢາກໄດ້ຮັບລາງວັນນັ້ນຜູ້ຟັງຕ້ອງມີເງື່ອນໄຂຄືແນວໃດ?
ກ່ອນອື່ນໝົດພວກຂ້າພະເຈົ້າຂໍຂອບໃຈເພື່ອນ ລັດດາພອນ ພົມມາຈັນ ທີ່ໄດ້ມີຄວາມສົນໃຈ ແລະ ຕິດຕາມຮັບຟັງລາຍການຂອງພວກຂ້າພະເຈົ້າໃນຕະຫຼອດໄລຍະຜ່ານມາ. ເພື່ອນ ລັດດາພອນ ທີ່ຮັກແພງ, ແຕ່ລະປີ ລະບົບກະຈາຍສຽງພາກພາສາຕ່າງປະເທດ (VOV5) ເຄີຍມອບໃບຢັ້ງຢືນ ແລະ ຂອງຂວັນໃຫ້ຜູ້ຟັງວິທະຍຸເປັນປະຈຳ ໄລຍະ 3 ປີ, 5 ປີ ແລະ 10 ປີ. ດັ່ງນັ້ນ, ຫວັງວ່າໃນໄລຍະຈະມາເຖິງ ເພື່ອນຈະສືບຕໍ່ຮັບຟັງລາຍການຂອງ VOV 5 ທາງວິທະຍຸກະຈາຍສຽງ ຫຼື ອິນເຕີແນດ ແລະ ສົ່ງຈົດໝາຍ, ໂທລະສັບ ມາຍັງລາຍການເປັນປະຈຳ, ເພື່ອໄດ້ຮັບຂອງຂວັນເປັນທີ່ລະນຶກຂອງວິທະຍຸກະຈາຍສຽງພາກພາສາຕ່າງປະເທດ VOV5.
ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນຂອງທ່ານຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຝັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມືມັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊ່ອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov5@gmail.com.