ໃນອາທິດຜ່ານມາ, ລາຍການກະຈາຍສຽງພາກພາສາລາວ ໄດ້ຮັບຈົດໝາຍ email ຫລາຍສະບັບ, ແລະ ໂທລະສັບຈາກທ່ານຜູ້ຟັງລາວຫລາຍຄົນ. ເຖິງວ່າ ຂ້ອງຄາກັບວຽກງານຫຼາຍກໍຕາມ ແຕ່ ບັນດາ ທ່ານຜູ້ຟັງໄດ້ຍາດເວລາເພື່ອສົ່ງຈົດໝາຍເຖິງລາຍການ ເພື່ອປະກອບຄຳຄິດຄຳເຫັນ ແລະ ສະແດງຄວາມຮູ້ສຶກເມື່ອໄດ້ຮັບຟັງແຕ່ລະລາຍການ ກໍ່ຄືຕັ້ງຄຳຖາມກ່ຽວກັບບາງບັນຫາ ຊື່ງທ່ານຜູ້ຟັງມີຄວາມສົນໃຈ. ໃນລາຍການພາກນີ້, ພວກຂ້າພະເຈົ້າ ຂໍຄັດສະເຫນີເນື້ອໃນຂອງຈົດໝາຍບາງສະບັບທີ່ທ່ານຜູ້ຟັງຝາກມາຍັງລາຍການ ພ້ອມທັງຕອບບາງຄຳຖາມຊື່ງທ່ານຜູ້ຟັງມີຄວາມສົນໃຈ.
ໃນຈົດໝາຍຝາກມາລາຍການ, ເພື່ອນບູນທັນ ຢູ່ ແຂວງ ອຸດົມໄຊ ຊຶ່ງແມ່ນຜູ້ຕິດຕາມລາຍການພາກພາສາລາວ ເປັນປະຈຳ ໄດ້ເວົ້າວ່າ: ໃນອາທິດຜ່ານມາ ຂ້າພະເຈົ້າໄດ້ຕິດຕາມຮັບຟັງ ແລະ ຊົມລາຍການຕ່າງໆຂອງ VOV5, ດັ່ງນັ້ນຈຶ່ງຮູ້ເຖິງບັນຍາກາດຟົດຟື້ນມ່ວນຊຶ່ນ ໃນການກະກຽມຕ້ອນຮັບບຸນປີໃຫມ່ປະຈຳຊາດຂອງ ຊາວຫວຽດນາມ ທັງຢູ່ພາຍໃນ ແລະ ຕ່າງປະເທດ. ຜ່ານລາຍການ ຂ້າພະເຈົ້າເຂົ້າໃຈໄດ້ວ່າ ບຸນປີໃຫມ່ປະຈຳຊາດ ຫວຽດນາມ ແມ່ນສິ່ງທີ່ສັກກະລະບູຊາສຳລັບຊາວຫວຽດນາມ ທຸກຄົນ, ເຖິງວ່າ ຈະຢູ່ຫ່າງໄກຈາກຄອບຄົວ, ບ້ານເກີດເມືອງນອນກໍຕາມ ແຕ່ຮອດບຸນເຕັດ ເຂົາເຈົ້າກໍຊັບຊ້ອນວຽກງານ, ຍາດເວລາເພື່ອກັບຄືນເມືອເຕົ້າໂຮມກັບຄອບຄົວ.
ເພື່ອນ ສົມເພັດ ຢູ່ ແຂວງ ສະຫວັນນະເຂດ ໄດ້ຝາກຈົດໝາຍມາລາຍການໂດຍເວົ້າວ່າ: ຂ້າພະເຈົ້າມັກຮັບຟັງລາຍການ “ວັດທະນະທຳຫວຽດນາມ ຂອງ VOV5” ຫຼາຍ. ຜ່ານລາຍການນີ້ ຂ້າພະເຈົ້າມີຄວາມເຂົ້າໃຈໄດ້ຮີດຄອງປະເພນີຂອງບັນດາເຂດ, ພາກຂອງຫວຽດນາມ, ພິເສດໃນໂອກາດບຸນປີໃຫມ່ປະຈຳຊາດ. ແລະ ໃນອາທິດຜ່ານມາ, ພາກພາສາລາວ ໄດ້ອອກອາກາດບົດທີ່ມີຫົວຂໍ້ວ່າ: ປະເພນີຫໍ່ເຂົ້າຕົ້ມຖະຫວາຍບູຊາຜູ້ກໍ່ຕັ້ງໝູ່ບ້ານ” ອັນໄດ້ສ້າງຄວາມປະທັບໃຈໃຫ້ແກ່ຂ້າພະເຈົ້າຫລາຍ. ເຂົ້າຕົ້ມຊຶ່ງປະຊາຊົນຢູ່ ຕາແສງ ເຍີນຈີງ ເມືອງ ແທນຊວນ ຮ່າໂນ້ຍ ຖະຫວາຍບູຊາຜູ້ກໍ່ຕັ້ງໝູ່ບ້ານ ບໍ່ແມ່ນເຂົ້າຕົ້ມທຳມະດາຄືຄວາມຮູ້ສຶກຂອງຂ້າພະເຈົ້າ, ຫາກແມ່ນເຂົ້າຕົ້ມຫວານຂະຫນາດໃຫຍ່ ແລະ ຂັ້ນຕອນຫໍ່ເຂົ້າຕົ້ມກໍ່ລະອຽດລະອໍທີ່ສຸດ.
ທ່ານຜູ້ຟັງທີ່ເຄົາລົບ! ທີ່ທ່ານຫາກໍຮັບຟັງຜ່ານໄປແລ້ວນັ້ນ ແມ່ນເນື້ອໃນຈົດໝາຍບາງສະບັບທີ່ທ່ານຜູ້ຟັງໄດ້ຝາກມາລາຍການໃນອາທິດຜ່ານມາ. ຕໍ່ໄປນີ້ ພວກເຮົາຂໍຕອບຄຳຖາມຂອງເພື່ອນສົມຫວັງ ຢູ່ ແຂວງວຽງຈັນ ທີ່ຢາກຊອກຮູ້ກ່ຽວກັບ ບ້ານໂດນ ແຂວງ ດັກລັກ (ຫວຽດນາມ).
ຮູບພາບກ່ຽວກັບບ້ານໂດນ
ພາບ:internet
|
ເພື່ອນສົມຫວັງທີ່ຮັກແພງ! ບ້ານໂດນ ແມ່ນສະຖານທີທີ່ລືຊື່ຂອງຫວຽດນາມ ແລະ ນັກທ່ອງທ່ຽວຕ່າງປະເທດຫລາຍຄົນກໍ່ຮູ້ຈັກເຖິງ ແມ່ນເຂດທີ່ມີມູນເຊື້ອລ່າເນື້ອ ແລະຄ້ອງຊ້າງໃນປ່າ. ປະຈຸບັນ, ບ້ານໂດນ ມີ ຫລາຍຊົນເຜົ່າດຳລົງຊີວິດຢູ່ຮ່ວມກັນ, ໃນນັ້ນ ມີ 3 ຊົນເຜົ່າຕົ້ນຕໍນັ້ນແມ່ນ ຊົນເຜົ່າລາວ, E de ແລະ Mnong. ບ້ານໂດນ ເອີ້ນຕາມພາສາລາວ ແມ່ນບ້ານດອນ , ຊື່ງແມ່ນໝູ່ບ້ານແຫ່ງຫນື່ງທີ່ໄດ້ຮັບການກໍ່ສ້າງໃນເຂດດອນກາງແມ່ນ້ຳ Serepok, ສ່ວນຊາວ E de ແລະ Mnong ເອີ້ນວ່າ ບວນໂດນ. ບ້ານໂດນ ແຕ່ກ່ອນແມ່ນແຫ່ງແລກປ່ຽນຄ້າຂາຍສຳຄັນລະຫວ່າງສາມປະເທດອີນດູຈີນ ທາງນ້ຳ. ຄົນເຜົ່າລາວໃນຄາວນັ້ນ, ເມື່ອລ່ອງແມ່ນ້ຳຄ້າຂາຍສິນຄ້າ ເຂົາເຈົ້າໄດ້ພົບເຫັນເຂດດິນແດນທີ່ສວຍງາມແຫ່ງນີ້ ແລະ ຕັດສິນໃຈດຳລົງຊີວິດຢູ່ທີ່ນີ້ພ້ອມກັບຊາວ E de ປະຈຳຖິ່ນ ແລະ ພ້ອມກັນກໍ່ສ້າງໝູ່ບ້ານຫນື່ງທີ່ຫນາແຫນ້ນ, ອຸດົມສົມບູນ ແລະ ເຕັມໄປດ້ວຍສີສັນຊົນເຜ່ົາ. ບ້ານໂດນ ກ່ອນນີ້ ແມ່ນເມືອງເອກຂອງແຂວງ ດັກລັກ. ປະຈຸບັນ, ບ້ານໂດນ ແມ່ນສະຖານທີ່ທ່ອງທ່ຽວທີ່ຂຶ້ນກັບຕາແສງ Ea Wer, ເມືອງບວນໂດນ, ແຂວງ ດັກລັກ, ຫ່າງຈາກ ບວນມາທວດ ທາງທິດຕາເວັນຕົກສຽງເຫນືອປະມານ 40 Km. ບ້ານໂດນ ແມ່ນຊື່ເອີ້ນລວມເພື່ອເວົ້າເຖິງກຸ່ມປູຊະນີຍະສະຖານທ່ອງທ່ຽວຂອງເມືອງ ບວນໂດນ. ຢູ່ ບ້ານໂດນ ມີເຂດທ່ອງທ່ຽວຫລາຍແຫ່ງທີ່ສວຍງາມຄື: ນ້ຳຕົກຕາດ ໄບແຍນ (Bảy Nhánh), ຫນອງ ດືກມິນ, ເຮືອນຮ້ານທີ່ເກົ່າແກ່, ທາດຈຳ Yang Prong Ea Sup, ປ່າສະຫງວນແຫ່ງຊາດ Yok don ທີ່ລືຊື່ ຊື່ງແມ່ນປ່າສະຫງວນທີ່ກວ້າງໃຫຍ່ທີ່ສຸດຢູ່ ຫວຽດນາມ ແລະ ພິເສດແມ່ນສີສັນຊົນເຜົ່າຂອງບັນດາໝູ່ບ້ານ ດ້ວຍທ່ານ້ຳຕ່າງໆທີ່ຍັງຄົງຮັກສາຄວາມດັ້ງເດີມ ແລະ ເທບນິຍາຍກ່ຽວກັບເຈົ້າພະຍາຊ້າງ.
ງານບຸນຢູ່ບ້ານໂດນ
ພາບ:internet
|
ທ່ານຜູ້ຟັງທີ່ເຄົາລົບ! ພວກຂ້າພະເຈົ້າຂອບໃຈທ່ານຜູ້ຟັງທີ່ໄດ້ຮັບຟັງລາຍຂອງພາກພາສາລາວເປັນປະຈຳ ແລະ ປະກອບຄຳຄິດຄຳເຫັນໃຫ້ລາຍການ. ຍ້ອນເວລາຖືກຈຳກັດ, ສະນັ້ນພວກຂ້າພະເຈົ້າບໍ່ສາມາດຕອບຄຳຖາມທັງໝົດຂອງທ່ານຜູ້ຟັງໄດ້. ໃນໄລຍະຈະມາເຖິງ ພວກຂ້າພະເຈົ້າຈະພະຍາຍາມຕອບຄຳຖາມທັງໝົດຊື່ງທ່ານຜູ້ຟັງມີຄວາສົນໃຈ ແລະ ທ່ານຢ່າລືມຂຽນຈົດໝາຍຝາກມາລາຍການຂອງພວກເຮົາແດ່ເດີ! ໂດຍຈ່າຫນ້າຊອງວ່າ: ວິທະຍຸກະຈາຍສຽງຫວຽດນາມ ພາກພາສາລາວ ເຮືອນເລກທີ 45 ຖະຫນົນ Ba Trieu Ha Noi, ໂທລະສັບ 0084-4-38256631. email: laovov@yahoo.com. ຂໍຂອບໃຈຫລ່ວງຫນ້າ.
ທ່ານສາມາດຮັບຟັງຫລືເຂົ້າອ່ານລາຍການຂອງພວກເຮົາຜ່ານຫນ້າເວັບ: vovworld.vn ຫລື vov5.vn
ສຸດທ້າຍ, ພວກຂ້າພະເຈົ້າ ຂໍອວຍພອນໃຫ້ທ່ານຜູ້ຟັງຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດໃນວຽກງານຂອງຕົນ.