ໃນອາທິດຜ່ານມາ, ພາກພາສາ ລາວ, ລະບົບກະຈາຍສຽງພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງ ຫວຽດນາມ ໄດ້ຮັບ ໂທລະສັບ, ອີແມວ, ຈົດໝາຍ 211 ສະບັບ ຈາກຜູ້ຟັງຝາກມາ ທີ່ອວຍພອນບັນດາເຫດການສຳຄັນໃນເດືອນ 12 ຄື: 72 ປີແຫ່ງວັນມູນເຊື້ອກອງທັບປະຊາຊົນ ຫວຽດນາມ ແລະ 70 ປີແຫ່ງວັນທົ່ວປະເທດທຳການຕໍ່ຕ້ານ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີບາງເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ. ເຊີນທ່ານຕິດຕາມຮັບຟັງ.
(ພາບປະກອບ)
ລຸງ ບູນທະ ຈັນທະວົງ ຢູ່ແຂວງ ວຽງຈັນ (ລາວ) ເປັນນັກຮົບເກົ່າ ລາວ ໂທລະສັບມາລາຍການດ້ວຍເນື້ອໃນວ່າ: ເນື່ອງໃນໂອກາດສະເຫຼີມສະຫຼອງ 72 ປີແຫ່ງວັນມູນເຊື້ອກອງທັບປະຊາຊົນ ຫວຽດນາມ (22/12/1944 – 22/12/2016). ຂ້າພະເຈົ້າຂໍສົ່ງຄຳອວຍພອນອັນດີງາມທີ່ສຸດເຖິງບັນດານັກຮົບກຳລັງປະກອບອາວຸດກອງທັບປະຊາຊົນ ຫວຽດນາມ ເວົ້າລວມ ແລະ ບັນດານັກຮົບເກົ່າທະຫານອາສາສະໝັກ ຫວຽດນາມ ເວົ້າສະເພາະ ອວຍພອນໃຫ້ນ້ຳໃຈສາມັກຄີມິດຕະພາບແບບພິເສດ, ການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດເວົ້າລວມກໍ່ຄືກອງທັບ 2 ປະເທດເວົ້າສະເພາະນັບມື້ນັບພັດທະນາຂຶ້ນສູ່ລະດັບສູງໃໝ່. ບັນດານັກຮົບປະເທດ ລາວ ກໍ່ຄືປະຊາຊົນ ລາວ ຍາມໃດກໍ່ຈົດຈຳບຸນຄຸນອັນໃຫຍ່ຫລວງຂອງບັນດານັກຮົບອາສາສະໜັກ ຫວຽດນາມ ເຊິ່ງໄດ້ຮຽງບ່າຮຽງໄຫລ່, ສະໜັບສະໜູນ, ຊ່ວຍເຫຼືອກອງທັບ ແລະ ປະຊາຊົນ ລາວ ໃນຊຸມວັນເດືອນສົງຄາມຢ່າງດຸເດືອດ. ພວກຂ້າພະເຈົ້າຈະເຮັດຈົນສຸດຄວາມສາມາດຂອງຕົນໃນການສຶກສາໂຄສະນາ ເພື່ອໃຫ້ບັນດາລຸ້ນຫລັງເຂົ້າໃຈແຈ້ງກ່ວາ ກ່ຽວກັບການພົວພັນແບບພິເສດ, ປະກອບສ່ວນເພີ່ມພູນຄູນສ້າງການພົວພັນມິດຕະພາບ ລາວ - ຫວຽດນາມ ໃຫ້ນັບມື້ນັບໝັ້ນຄົງ.
*****
ເພື່ອນ ເບີນ ພິມມະສອນ ຢູ່ນະຄອນຫລວງ ວຽງຈັນ ໄດ້ສົ່ງອີແມວມາຍັງ ລາຍການດ້ວຍເນື້ອໃນວ່າ: ໃນອາທິດຜ່ານມາ, ສື່ມວນຊົນຂອງ ຫວຽດນາມ ໃຫ້ຂ່າວຢ່າງຫລວງຫລາຍກ່ຽວກັບບັນເຄື່ອນໄຫວສະເຫຼີມສະຫຼອງ 70 ປີແຫ່ງວັນທົ່ວປະເທດທຳການຕໍ່ຕ້ານ, ພິເສດແມ່ນໃນເວັນໄຊ vovworld.vn ຂອງ VOV. ຜ່ານທາງລາຍການ ຂ້າພະເຈົ້າຢາກຮູ້ຕື່ມອີກກ່ຽນກັບຄວາມໝາຍປະຫວັດສາດຂອງວັນທົ່ວປະເທດທຳການຕໍ່ຕ້ານ ?
(ພາບປະກອບ)
ເພື່ອນ ເບີນ ພິມມະສອນ ທີ່ຮັກແພງ! ວັນທີ 19/12/1946 ແມ່ນວັນທົ່ວປະເທດທຳການຕໍ່ຕ້ານ, ອັນໄດ້ສ້າງເປັນຂີດໝາຍອັນຮຸ່ງເຮືອງເຫຼືອງເຫຼື້ຶອມໃນປະຫວັດສາດແຫ່ງການຕໍ່ສູ້ສ້າງສາ ແລະ ປົກປັກຮັກສາປະເທດຊາດຂອງ ຫວຽດນາມ ແລະ ຕິດພັນກັບວິລະກຳອັນພິລະອາດຫານຂອງກອງທັບ ແລະ ປະຊາຊົນ ຮ່າໂນ້ຍ ໃນຊຸມວັນຕົ້ນແຫ່ງການຕໍ່ສູ້ຕ້ານລ່າເມືອງຂຶ້ນ ຝະລັ່ງ. ວັນທີ 19/12/1946 ປະທານ ໂຮ່ຈີມິນ ໄດ້ຮຽກຮ້ອງທົ່ວປະເທດທຳການຕໍ່ຕ້ານ. ຜ່ານ 9 ປີແຫ່ງການຕໍ່ສູ້ຍືດເຍືອຍາວນານ, ທົ່ວພັກ, ທົ່ວກອງທັບ ແລະ ທົ່ວປະຊາຊົນ ຫວຽດນາມ ພາຍໃຕ້ການຊີ້ນຳນຳພາອັນສະຫລາດສ່ອງໃສ ແລະ ປີຊາສາມາດ ຂອງພັກກອມມູນິດ ຫວຽດນາມ ແລະ ປະທານ ໂຮ່ຈີມິນຜູ້ຍິ່ງໃຫຍ່ ໄດ້ພາບແພ້ລັດທິລ່າເມືອງຂຶ້ນ ຝະລັ່ງ ເຊິ່ງຈຸດສູງແມ່ນ “ໄຊຊະນະປະຫວັດສາດ ດ້ຽນບຽນຟູ ທີ່ມີຊື່ສຽງໃນທົ່ວທະວີບ ແລະ ດັງກ້ອງກັງວານໄປທົ່ວໂລກ ”, ອັນໄດ້ບັງຄັບໃຫ້ລ່າເມືອງຂຶ້ນ ຝະລັ່ງ ຕ້ອງເຊັນສັນຍາ ເຊີແນວ ໃຫ້ຄຳໝັ້ນສັນຍາເຄົາລົບເອກະລາດ, ອະທິປະໄຕຂອງ 3 ປະເທດ ຫວຽດນາມ - ລາວ - ກຳປູເຈຍ. ຜົນສຳເລັດຂອງການຕໍ່ສູ້ຕ້ານລ່າເມືອງຂຶ້ນ ຝະລັ່ງ ໄດ້ສ້າງປະຖົມປັດໃຈໃຫ້ແກ່ໄຊຊະນະອັນຍິ່ງໃຫຍ່ຂອງການຕໍ່ສູ້ຕ້ານຈັກກະພັດ ອາເມລິກາ ກູ້ຊາດ, ຍາດເອົາເອກະລາດ, ທ້ອນໂຮມປະເທດຊາດເປັນເອກະພາບ, ສິ້ນສຸດ 30 ປີແຫ່ງ ການຕໍ່ສູ້ອັນຍືດເຍືອຍາວນານຂອງກອງທັບ ແລະ ປະຊາຊົນ ຫວຽດນາມ ພາຍໃຕ້ການຊີ້ນຳນຳພາຂອງພັກ ດ້ວຍມະຫາໄຊລະດູບານໃໝ່ປີ 1975
*****
ເພື່ອນ ວິໄລສະຫວັນ ແກ້ວພິລາຫວັນ ແລະ ເພື່ອນ ວົງໄຊ ທິບປາວົງ ຢູ່ແຂວງ ຫົວ ພັນ ສົ່ງອີແມວມາລາຍການດ້ວຍເນື້ອໃນວ່າ: ບໍ່ເຄີຍມີປະເທດໃດໃນໂລກ ຖືກຮັບຜົນຮ້າຍຢ້ອນຫລັງຈາກທາດພິດສີສົ້ມ/ດີໂອຊິນ ໂດຍຈັກກະພັດ ອາເມລິກາ ນຳໃຊ້ໃນສົງຄາມຢ່າງໜັກໜ່ວງຄືຢູ່ ຫວຽດນາມ. ຜົນຮ້າຍຢ້ອນຫລັງຂອງມັນ ບໍ່ພຽງແຕ່ສົ່ງຜົນສະທ້ອນເຖິງລຸ້ນໜຶ່ງດຽວເທົ່ານັ້ນ ຫາກຍັງສົ່ງຜົນສະທ້ອນເຖິງຫລາຍຄົນລຸ້ນຫລັງອີກດ້ວຍ. ຜ່ານທາງລາຍການ, ພວກຂ້າພະເຈົ້າຢາກຮູ້ຕື່ມກ່ຽວກັບບັນດານະໂຍບາຍ, ກໍ່ຄືການເຄື່ອນໄຫວແທດຈິງເພື່ອແນໃສ່ຊ່ວຍເຫຼືອໃຫ້ຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ຢູ່ ຫວຽດນາມ.
ເພື່ອນ ວິໄລສະຫວັນ ແກ້ວພິລາຫວັນ ແລະ ເພື່ອນ ວົງໄຊ ທິບປາວົງ ທີ່ຮັກແພງ! ໃນຊຸມປີມໍ່ໆມານີ້, ບັນດາການເຄື່ອນໄຫວທີ່ມຸ່ງໄປເຖິງຜູ້ປະສົບເຄາະຮ້າຍຈາກທາດພິດສີສົ້ມ ນັບມື້ນັບໄດ້ຮັບການຈັດຕັ້ງດ້ວຍຂະໜາດໃຫຍ່ ແລະ ແທດຈິງ. ພ້ອມກັບບັນດາແຜນນະໂຍບາຍ, ນະໂຍບາຍຂອງພັກ, ລັດ, ລັດຖະບານທີ່ສະຫງວນໃຫ້ແກ່ບັນດາຜູ້ປະສົບເຄາະ ຮ້າຍຈາກທາດພິດສີສົ້ມ, ການເຄື່ອນໄຫວຂອງສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ນັບແຕ່ຂັ້ນສູງກາງລົງຮອດຂັ້ນທ້ອງຖິ່ນນັບມື້ນັບມີປະສິດທິຜົນ. ນອກຈາກວຽກງານຊ່ວຍເຫຼືອບັນດາຄອບຄົວທີ່ມີຄົນຕິດທາດພິດສີສົ້ມ ໃຫ້ບືນຕົວຂຶ້ນໃນຊີວິດການເປັນຢູ່, ສ້າງຊີວິດເສດຖະກິດເປັນປົກກະຕິ ແລະ ວຽກງານສົ່ງເສີມສຸຂະພາບກໍ່ແມ່ນໜຶ່ງໃນບັນດາໜ້າທີ່ຈຸດສຸມເຊິ່ງໄດ້ຮັບຄວາມເອົາໃຈໃສ່ເປັນພິເສດຈາກສະມາ ຄົມທຸກຂັ້ນ. ປະຈຸບັນ ທົ່ວປະເທດມີຜູ້ປະສົບເຄາະຮ້າຍຈາກທາດພິດສີສົ້ມ / ດີໂອຊີນ ກ່ວາ 4,8 ລ້ານຄົນ ສ່ວນຫລາຍເຂົາເຈົ້າປະສົບກັບຄວາມຫຍຸ້ງຍາກທາງດ້ານເສດຖະກິດທີ່ສຸດ. ດ້ວຍການຊ່ວຍເຫຼືອຈາກຫລາຍປະເທດໃນໂລກ, ອົງການກຸສົນ ແລະ ບໍ່ຂຶ້ນກັບລັດຖະບານ, ໃນນັ້ນ ມີຫລາຍອົງການ ແລະ ສ່ວນບຸກຄົນຂອງ ອາເມລິກາ, ວຽກງານແກ້ໄຂຜົນຮ້າຍຢ້ອນຫລັງຈາກທາດພິດສີສົ້ມ / ດີໂອຊິນ ໄດ້ ແລະ ພວມມີຄວາມຄືບໜ້າຢ່າງແນ່ນອນ.
*****
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວ laovov5@gmail.com. ທ່ານຜູ້ຟັງກໍ່ສາມາດ Comment ໃນເວັບໄຊ vovworld.vn ຂອງພວກເຮົາ.