(vovworld) - ໃນອາທິດ, ມີຜູ້ຟັງ, ຜູ້ອ່ານຫຼາຍທ່ານ ໄດ້ຝາກຄຳອວຍພອນ, ບັດອວຍພອນປີໃໝ່ມາຍັງພາກພາສາລາວ, ວິທະຍຸກະຈາຍສຽງ ຫວຽດນາມ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ, ອີແມວທີ່ທ່ານຜູ້ຟັງ, ຜູ້ອ່ານຝາກມາລາຍການ.
 |
ໃນອາທິດ, ເພື່ອນ ດາລີວອນ, ວຽງໄຊ, ຢູ່ນະຄອນຫຼວງ ວຽງຈັນ; ທ່ານ ເພັດສະຫວັນ ສີສະນົນ, ແຂວງ ອັດຕະປື; ທ່ານ ຊາຕີ, ແຂວງ ບໍ່ແກ້ວ; ທ່ານ ບຸນເຮືອງ, ແຂວງ ຫົວພັນ… ໄດ້ຝາກອີແມວ, ບັດອວຍພອນເອເລັກໂຕນິກມາຍັງລາຍການ, ໃນນັ້ນ ທ່ານບຸນເຮືອງ ໄດ້ຂຽນວ່າ: “ປີໃໝ່, ລະດູບານໃໝ່ໄດ້ວຽນມາແລ້ວ. ໂດຍເປັນຜູ້ອ່ານຂອງແວບໄຊ vovworld.vn, ຂ້າພະເຈົ້າຂໍອວຍພອນໃຫ້ບັນດາບັນນາທິການພາກພາສາລາວເວົ້າສະເພາະ ແລະ ບັນນາທິການ VOV ເວົ້າລວມ ຈົ່ງມີສຸຂະພາບເຂັ້ມແຂງ, ປະສົບຜົນສຳເລັດໃນວຽກງານທີ່ໄດ້ຮັບມອບໝາຍຢ່າງຈົບງາມ. ຫວັງວ່າ, ພວກເພື່ອນຈະຈັດບັນດາລາຍການກະຈາຍສຽງທັງມ່ວນ, ທັງມີເນື້ອໃນອຸດົມສົມບູນ, ສ້າງຄວາມດຶງດູດໃຫ້ແກ່ຜູ້ຟັງ, ຜູ້ອ່ານບໍ່ພຽງແຕ່ແມ່ນຄົນລາວເທົ່ານັ້ນ ຫາກຍັງແມ່ນຄົນຮູ້ພາສາລາວໃນທົ່ວໂລກອີກດ້ວຍ.”
ຂໍຂອບໃຈບັນດາຄຳອວຍພອນ, ບັດອວຍພອນປີໃໝ່ທີ່ທ່ານຜູ້ຟັງ, ຜູ້ອ່ານຝາກມາຍັງລາຍການ. ບັນດາຄຳອວຍພອນ ແລະ ຄຳເຫັນປະກອບທີ່ທ່ານຜູ້ຟັງ, ຜູ້ອ່ານໄດ້ຝາກມາລາຍການຈະເປັນກຳລັງໜູນເພື່ອຊ່ວຍໃຫ້ພວກຂ້າພະເຈົ້າຜະລິດບັນດາລາຍການກະຈາຍສຽງທີ່ມ່ວນກວ່າເພື່ອຮັບໃຊ້ໃຫ້ແກ່ຜູ້ຟັງ, ຜູ້ອ່ານໃຫ້ດີກວ່າ. ທ່ານຜູ້ຟັງ, ຜູ້ອ່ານທີ່ເຄົາລົບ, ນັບແຕ່ເດືອນ 1/2017 ເປັນຕົ້ນໄປ, ພວກຂ້າພະເຈົ້າຈະມີຄໍລຳໃໝ່ທີ່ມີຊື່ວ່າ “ເລື່ອງລາວຂອງໝູ່ບ້ານ”, ແທນໃຫ້ຄໍລຳ “ຊົນນະບົດໃໝ່” ທີ່ໄດ້ອອກອາກາດ, ອັບເດັດໃນແວບໄຊ vovworld.vn ໃນວັນສຸກແຕ່ລະອາທິດ. ຈຸດທີ່ຄ້າຍຄືກັນລະຫວ່າງ 2 ຄໍລຳດັ່ງກ່າວນັ້ນແມ່ນລ້ວນແຕ່ຂຽນກ່ຽວກັບເຂດຊົນນະບົດ ຫວຽດນາມ, ແຕ່ແທນທີ່ບັນດາບົດຂຽນກ່ຽວກັບຮູບແບບກໍ່ສ້າງຊົນນະບົດໃໝ່ນັ້ນ ແມ່ນບັນດາບົດຂຽນກ່ຽວກັບວັດທະນະທຳ, ໝູ່ບ້ານອາຊີບ, ບັນດາຈຸດທີ່ເປັນເອກະລັກສະເພາະຂອງເຂດບ້ານນາ ຫວຽດນາມ… ຫວັງວ່າ, ບັນດາບົດຂຽນໃນຄໍລຳ “ເລື່ອງລາວຂອງໝູ່ບ້ານ” ນີ້ຈະສ້າງບັນຍາກາດໃໝ່ ແລະ ຜ່ານນັ້ນຜູ້ຟັງ, ຜູ້ອ່ານຈະມີຄວາມເຂົ້າໃຈຕື່ມອີກກ່ຽວກັບບ້ານນາ ຫວຽດນາມ. ຫວັງວ່າ, ຜູ້ຟັງ, ຜູ້ອ່ານຈະຮັບຟັງບັນດາຄໍລຳດັ່ງກ່າວ ແລະ ປະກອບຄຳເຫັນເພື່ອໃຫ້ ພາກພາສາລາວຂອງພວກເຮົານັບມື້ນັບຕອບສະໜອງຄວາມຮຽກຮ້ອງຕ້ອງການຂອງທ່ານຜູ້ຟັງ, ຜູ້ອ່ານກວ່າອີກ.
ເຂດໂງ່ນຫີນ ຢູ່ແຂວງຟູ໋ອຽນ
|
ອາທິດຜ່ານມາ, ເພື່ອນ ແສງສະຫວ່າງ, ຢູ່ແຂວງ ວຽງຈັນ ໄດ້ຝາກອີແມວມາຍັງລາຍການດ້ວຍເນື້ອໃນວ່າ: “ໃນພາບສາລະຄະດີຫວ່າງແລ້ວນີ້, ໄດ້ແນະນຳກ່ຽວກັບບັນດາສະຖານທີ່ທ່ອງທ່ຽວດຶງດູດໃນລະດູບານໃໝ່. ນອກຈາກບັນດາສະຖານທີ່ທ່ອງທ່ຽວຄື: ຊາປາ, ດາລາດ ດ້ວຍຕົ້ນໄມ້ໃບຫຍ້າສວຍສົດງົດງາມ ແລະ ອາກາດເຢັນສະບາຍ, ເໝາະສົມກັບລາຍການທ່ອງທ່ຽວທີ່ຂ້າພະເຈົ້າມີໂອກາດມາຢ້ຽມຢາມຫວ່າງແລ້ວນີ້, ຂ້າພະເຈົ້າຍັງມີຄວາມສົນໃຈພິເສດເຖິງ ຟູ໋ອຽນ, ເຊິ່ງແມ່ນສະຖານທີ່ທ່ອງທ່ຽວຂ້າພະເຂົ້າໄດ້ຮັບຟັງເປັນຄັ້ງທຳອິດ. ຂ້າພະເຈົ້າຢາກຮູ້ຂໍ້ມູນຂ່າວກ່ຽວກັບເຂດທ່ອງທ່ຽວນີ້ຕື່ມອີກໄດ້ບໍ່?”
ເພື່ອນ ແສງສະຫວ່າງ ທີ່ຮັກແພງ, ຟູ໋ອຽນ ແມ່ນແຂວງແຄມທະເລທາງທິດໃຕ້ພາກກາງ ຫວຽດນາມ. ທັງ 3 ທິດຖືກອ້ອມຮອບດ້ວຍພູ, ທິດເໜືອ ມີກິ່ວ ກູ່ມົງ, ທິດໃຕ້ແມ່ນກິ່ວກາ, ທິດຕາເວັນຕົກແມ່ນສາຍເຈື່ອງເຊີນ ສ່ວນທິດຕາເວັນອອກແມ່ນທະເລຕາເວັນອອກ. ຟູ໋ອຽນ ມີອາກາດເຂດຮ້ອນ ແລະ ມໍລະສຸມ. ຢູ່ທີ່ນີ້ມີ 2 ລະດູ, ໃນນັ້ນລະດູຝົນເລີ່ມແຕ່ເດືອນ 9 ຫາເດືອນ 12 ແລະ ລະດູຮ້ອນແຕ່ເດືອນ 1 ຫາເດືອນ 8. ແຂວງ ຟູ໋ອຽນ ມີບັນດາສະຖານທີ່ທ່ອງທ່ຽວພົ້ນເດັ່ນຄື: ວືກຟູນ, ຫວູງໂຣ, ຮ່ອນເນືອ, ປະພາຄານ ດ້າຍແຫຼງ - ບ່ອນໄດ້ຮັບແສງອະລຸນທຳອິດຢູ່ດິນຕໍ່ແຜ່ນ, ເກາະ ຮ່ອນຈົ່ວ, ພູພຽງ ເວີນຮ່ວາ, ຖ້ຳກອບ, ບຶງໂອລວານ, ໂງ່ນຫີນດ໋າເດ້ຍ, ອ່າວ ຊວນດ່າຍ. ໃນບັນດາສະຖານທີ່ທ່ອງທ່ຽວທີ່ກ່າວມາຂ້າງເທິງນັ້ນ, ໂງ່ນຫີນດ໋າເດ້ຍ ແມ່ນສະຖານທີ່ທ່ອງທ່ຽວທີ່ເປັນເອກະລັກສະເພາະທີ່ສຸດ, ດ້ວຍເນື້ອທີ່ປະມານ 2 ຕາລາງກິໂລເເມດ. ເມື່ອສັງເກດຈາກທາງໄກກໍ່ເຫັນວ່າ, ໂງ່ນຫີນຄືດັ່ງຈານຫຼາຍໃບຖືກຈັດກ່າຍກອງກັນໂປໂລອອກສູ່ທະເລ. ພາຍຫລັງໄດ້ລະຫຼິ້ນ, ຊົມເບິ່ງທິວທັດທຳມະຊາດສວຍງາມຢູ່ເຂດຝັ່ງທະເລທີ່ມີຄວາມຍາວ 3 ກມ ຫວັງວ່ານັກທ່ອງທ່ຽວຈະຮູ້ສຶກມີຄວາມສະຫວາດສະເຫວີຍ. ນອກຈາກນັ້ນ, ສຳລັບເພື່ອນໜຸ່ມຜູ້ທີ່ຢາກ check in facebook, ປະພາຄານ ດ້າຍແຫຼງ (ຫຼືຍັງເອີ້ນວ່າ ແຫຼມດ້ຽນ) ຈະແມ່ນສະຖານທີ່ສ້າງຄວາມປະທັບໃຈ, ຍ້ອນວ່າຢູ່ທີ່ນີ້ເພື່ອນອາດຈະເປັນຜູ້ທຳອິດໄດ້ເຫັນແສງອະລຸນໃນເຂດດິນຕໍ່ແຜ່ນຂອງຫວຽດນາມ… ນອກຈາກບັນດາສະຖານທີ່ທ່ອງທ່ຽວທີ່ສ້າງຄວາມປະທັບໃຈນັ້ນ, ແຂວງ ຟູ໋ອຽນ ຍັງມີອາຫານຫຼາຍເຍື່ອງຄືເຂົ້າໜົມ, ອາຫານທະເລ... ຫວັງວ່າພາຍຫຼັງໄປຢ້ຽມຢາມຟູ໋ອຽນແລ້ວ, ເພື່ອນ ແສງສະຫວ່າງ ແລະ ບັນດາຜູ້ຟັງ, ຜູ້ອ່ານຢ່າລື່ມຈະແບ່ງປັນຄວາມຮູ້ສຶກຂອງຕົນກ່ຽວກັບສະຖານທີ່ທ່ອງທ່ຽວແຫ່ງນີ້ໃຫ້ພວກຂ້າພະເຈົ້າໄດ້ຮັບຊາບແດ່ເດີ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວ laovov5@gmail.com.