(vovworld)- ການເຫລື້ອມໃສບູຊາພະແມ່ 3 ພະນາງ ຂອງຊາວຫວຽດນາມ ແມ່ນຮູບການບູຊາພະແມ່ທີ່ມີມາແຕ່ສັດຕະວັດທີ 16. ພ້ອມກັບ 10 ມໍລະດົກວັດທະນະທຳບໍ່ມີຮູບຮ່າງອື່ນຂອງຫວຽດນາມ, ການເຫລື້ອມໃສບູຊາ ພະແມ່ 3 ພະນາງໄດ້ຮັບການຮັບຮອງຈາກ ອົງການສຶກສາ, ວິທະຍາສາດ ແລະ ວັດທະນະທຳ ສປຊ (UNESCO) ເມື່ອວັນທີ 11/12/2016 ບໍ່ພຽງແຕ່ນຳມາເຊິ່ງຄວາມເອກອ້າງທະນົງໃຈໃຫ້ແກ່ດ້ານວັດທະນະທຳຂອງຊາດເທົ່ານັ້ນ ຫາກຍັງຢັ້ງຢືນພະລັງຊີວິດ ແລະ ຄຸນຄ່າຢ່າງໝັ້ນຄົງຂອງຮູບການເຊື່ອຖືທີ່ປະກົດຕົວມາແຕ່ດົນນານໃນຊີວິດດ້ານວັດທະນະທຳຂອງຊາວຫວຽດນາມອີກດ້ວຍ. ບົດຂຽນຂອງນັກຂ່າວ ລານແອງ
ການເຫລື້ອມໃສບູຊາພະແມ່ ມີມາແຕ່ສັດຕະວັດທີ 16
ພາບ:dulichvietnam
|
ສຽງຂອງພິທີເຂົ້າຊົງແມ່ນຟົດຟື້ນທີ່ສຸດ ແລະ ຄວາມອ່ອນຊ້ອຍຂອງທ້າວທຽມນາງທຽມໄດ້ເຮັດໃຫ້ພິທີເຂົ້າຊົງເພີ່ມຄວາມສັກສິດແລະ ມີຄວາມດູດດື່ມ. ສາດສະດາຈານ ໂງດືກທິ້ງ, ຊື່ງແມ່ນຜູ້ຊ່ຽວຊານແຖວຫນ້າກ່ຽວກັບການບູຊາພະແມ່ ຖືວ່າ : ເຂົ້າຊົງແມ່ນການພົບປະແລກປ່ຽນລະຫວ່າງບັນດາພະອໍລະຫັນ ແລະ ຄົນທຳມະດາ ຊື່ງທ້າວທຽມ ນາງທຽມ ເປັນຄົນກາງເຮັດສິ່ງນັ້ນ. ສະນັ້ນ ພິທີເຂົ້າຊົງແມ່ນສຳຄັນທີ່ສຸດ, ແມ່ນພິທີການດ້ານວັດທະນະທຳ ມີຄຸນຄ່າສູງ.
“ໃນເດືອນ 3 ແລະ ເດືອນ 8, ມີພິທີເຂົ້າຊົງ. ນັ້ນແມ່ນບັນດາພະອໍລະຫັນຂອງພະແມ່ໄດ້ເຊື່ອມຈິດວິນຍານເຂົ້າບັນດາທ້າວທຽມ ນາງທຽມ ໃນສະພາບຂອງພິທີເຂົ້າຊົງ, ມີສຽງດົນຕີ, ການເຕັ້ນ, ການຟ້ອນ, ຮູບການນີ້ ເອີ້ນວ່າວິນຍານເຂົ້າສິງໃນພິທີເຂົ້າຊົງເທື່ອຫນຶ່ງອາດຈະມີພະອໍລະຫັນ 36 ອົງ.”
ຕາມບັນດາເອກະສານຄົ້ນຄ້ວາແລ້ວ, ການເຫລື້ອມໃສບູຊາພະແມ່ 3 ພະນາງ ນັ້ນແມ່ນ: ພະແມ່ ຫລຽວແຫ້ງ (ຊື່ງແມ່ນພະແມ່ຄຸ້ມຄອງເຂດນ່ານຟ້າ), ພະແມ່ ເທື້ອງງ່ານ (ຊື່ງແມ່ນພະແມ່ຄຸ້ມຄອງພູຜາປ່າໄມ້), ພະແມ່ນ ຖວ໋າຍ (ຊື່ງແມ່ນພະແມ່ຄຸ້ມຄອງເຂດແມ່ນ້ຳລຳເຊ), ນັ້ນຍັງແມ່ນບັນດາຜູ້ມີຊື່ສຽງໃນປະຫວັດສາດ ຫລື ເທບນິຍາຍທີ່ມີຄຸນງາມຄວາມດີຕໍ່ປະເທດຊາດ, ຕໍ່ປະຊາຊົນ. ການເຫລື້ອມໃສບູຊາພະແມ່ 3 ພະນາງ ແມ່ນການເຄົາລົບສາສະຫນາຂອງຊາວທ້ອງຖິ່ນຫວຽດນາມ ແລະ ແມ່ນປັດໄຈຂອງສາສະຫນາທີ່ເຊື່ອມເຂົ້າຫວຽດນາມ ຄື: ສາສະຫນາພຸດ, ສາສະຫນາກາໂຕລິກ. ບັນດາພະແມ່, ພະອໍລະຫັນໃນຫໍໂຮງລ້ວນແຕ່ມີຕົ້ນກຳເນີດບໍ່ພຽງແຕ່ແມ່ນຂອງຊາວເຜົ່າກີງ ເທົ່ານັ້ນ ຫາກຍັງແມ່ນຂອງບັນດາເຜົ່າສ່ວນຫນ້ອຍຢູ່ຫວຽດນາມ ອີກດ້ວຍຄື: ເຜົ່າເມື່ອງ, ເຜົ່າໄຕ, ເຜົ່ານຸ່ງ, ເຜົ່າຢ້າວ, ເປັນການສະແດງໃຫ້ເຫັນການພົວພັນແລກປ່ຽນດ້ານວັດທະນະທຳ, ການພົວພັນຢ່າງສະເຫມີພາບ, ສະຫນິດຕິດພັນລະຫວ່າງບັນດາເຜົ່າຢູ່ຫວຽດນາມ. ສາດສະດາຈານ ໂດດຶກທິ້ງ ໃຫ້ຮູ້ວ່າ: ອູ່ຂອງການເຫລື້ອມໃສບູຊາ ພະແມ່ ຢູ່ເຂດທົ່ງພຽງພາກເຫນືອ ນັ້ນແມ່ນຢູ່ແຂວງ ນາມດີ້ງ, ແຂວງ ແທງຮວາ, ແຂວງນີງບີງ.
ພິທີເຂົ້າຊົງຂອງຊາວຫວຽດນາມ
ພາບ:internet
|
ທ່ານຫງວຽນວັນຕຽນ, ຜູ້ເຄີຍເຂົ້າຮ່ວມພິທີເຂົ້າຊົງຖືວ່າ: ການບູຊາພະແມ່ແມ່ນການເຫລື້ອມໃສທີ່ເປັນເອກະລັກສະເພາະ ແລະ ມີຄວາມກ້າວຫນ້າ. ກຳລັງແຮງ ແລະ ຄວາມໝາຍຂອງການເຫລື້ອມໃສບູຊາພະແມ່ ແມ່ນການຕອບສະຫນອງຄວາມຕ້ອງການ ແລະ ຄວາມມຸ້ງຫວັງຂອງຊີວິດປະຈຳວັນຂອງມະນຸດ, ພາວະນາຄວາມຢູ່ເຢັນເປັນສຸກ, ມີໂຊກມີໄຊ.
“ການບູຊະພະແມ່ແມ່ນການບອກສອນໃຫ້ຄົນເຮົາຕ້ອງມີຄຸນສົມບັດດີ, ສະແດງຄວາມຮູ້ບຸນຄຸນເຖິງປູ່ຍ່າຕາຍາຍ, ພໍ່ແມ່, ແມ່ເຖົ້າພໍ່ເຖົ້າ. ສະເພາະການບູຊາບັນດາວິລະຊົນຂອງຊາດ, ໝາຍຄວາມວ່າ ດຳລົງຊີວິດເພື່ອປະຊາຊົນ ແລະ ເສຍສະຫລະຊີວິດກໍເພື່ອປະຊາຊົນ ເພື່ອປະເທດຊາດ. ການບູຊານີ້ແມ່ນພາວະນາສິ່ງທີ່ມະນຸດມຸ້ງໄປເຖິງ ນັ້ນແມ່ນ ພາວະນາຂໍໃຫ້ມີສຸຂະພາບເຂັ້ມແຂງ, ຄອບຄົວມີຄວາມສະຫງົບສຸກ, ຄ້າຂາຍດີ, ມີໂຊກລາບ, ມີຖານະຕຳແໜ່ງ.”
ແຕ່ດົນນານມາແລ້ວ, ຊາວຫວຽດນາມ ໄດ້ມີທັດສະນະວ່າ ທຸກໆປະກົດການໃນທຳມະຊາດຄື: ໄພແຫ້ງແລ້ງ ຫລື ໄພນ້ຳຖ້ວມ, ດິນແດນຖືກແຕກແຫງໄຫມ້ຫລືດິນສັນດອນ, ຕົ້ນໄມ້ໃບຫຍ້າ, ສັດສາວາສິ່ງພັດທະນາຫລືຖືກຫ່ຽວແຫ້ງກໍລ້ວນແຕ່ນອນໃນສິດຂອງພະແມ່.ສະນັ້ນ ຖ້າຫາກໄດ້ຮັບການປົກປ້ອງ, ອຸ້ມຊູຈາກພະແມ່ຄືດັ່ງຜູ້ເປັນແມ່, ຊີວິດຂອງ ມະນຸດຈະໄດ້ຮັບປະກັນກວ່າ. ນີ້ແມ່ນທັດສະນະພິເສດຂອງຊາດຫວຽດນາມ ຫາກບໍ່ມີຢູ່ປະເທດໃດ. ນັ້ນກໍແມ່ນຄຸນຄ່າຕົ້ນຕໍ, ພົ້ນເດັ່ນຂອງການເຫລື້ອມໃສບູຊາພະແມ່. ທ່ານ ຫງວຽນຕຽນຢູງ, ນັກຄົ້ນຄ້ວາດ້ານວັດທະນະທຳການເຫລື້ອມໃສ ໃຫ້ຮູ້ວ່າ:
“ເມື່ອຊົມພິທີເຂົ້າຊົງ ພວກເຮົາຈະເຫັນໄດ້ຫລາຍຄຸນຄ່າຂອງສິລະປະ, ນັ້ນແມ່ນສິລະ ດົນຕີ, ການຟ້ອນລຳທຳເພງ, ຕີມວຍ,ແກະຄວັດສະຫລັກ ອາຫານການກິນ, ຊຸດອາພອນ. ການເຫລື້ອມໃສນີ້ແມ່ນການເພີ່ງພາດ້ານຈິດວິນຍານຂອງແຕ່ລະຄົນ, ຝັງເລິກໃນຊີວິດປະຈຳວັນຂອງປະຊາຊົນ. ການເຫຼື້ອມໃສນີ້ໄດ້ບອກສອນໃຫ້ຄົນເຮົາດຳລົງຊີວິດດີກ່ວາ, ມີຄວາມສະໜິດສະໜົມກ່ວາ. ພາວະນາໃຫ້ປະເທດຊາດມີຄວາມສະຫງົບປອດໄພ, ດິນຟ້າອາກາດເອື້ອຍອຳນວຍຄວາມສະດວກ ແລະ ປະຊາຊົນມີຄວາມຢູ່ເຢັນເປັນສຸກ.”
ການເຫລື້ອມໃສບູຊາພະແມ່ 3 ພະນາງ ຂອງຫວຽດນາມ ໄດ້ນຳມາບັນດາຄຸນຄ່າທົ່ວໂລກ ຍ້ອນບັນດາຄຸນຄ່າດ້ານປະຫວັດສາດ ແລະ ສີສັນວັດທະນະທຳຂອງຊາວຫວຽດນາມ. ຜ່ານນີ້ ຊາວຫວຽດນາມ ໄດ້ສະແດງໃຫ້ເຫັນທັດສະນະຂອງຕົນກ່ຽວກັບປະຫວັດສາດ, ມໍລະດົກວັດທະນະທຳ, ບົດບາດຂອງເພດໄວ ແລະ ສີສັນຊາດ. ການເຫລື້ອມໃສບູຊາພະແມ່ 3 ພະນາງ ຕອບສະຫນອງໄດ້ຄວາມຕ້ອງການ ແລະ ຄວາມມຸ້ງຫວັງຂອງຊີວິດດ້ານຈິດໃຈຂອງຊາວຫວຽດນາມ.