ງານບຸນທີ່ຟົດຟື້ນມ່ວນຊື່ນ,ມີສີສັນວັດທະນະທຳຫຼາກຫຼາຍ. ນັ້ນແມ່ນຄຳໃຫ້ ສັງເກດຂອງນັກ ທ່ອງທ່ຽວບໍ່ວ່າຄົນໃດເມື່ອເຂົ້າຮ່ວມ ງານ Festival ເຫ້ວ. Festival ເຫ້ວ ໄດ້ກາຍເປັນເຄື່ອງໝາຍການຄ້າທາງດ້ານວັດທະນະທຳທີ່ມີຕໍ່ແຂກທ່ອງທ່ຽວ, ນັກສິລະປີນຕ່າງປະເທດ. Festival ເຫ້ວປີ 2014 ໄດ້ດຶງດູດ 68 ຄະນະສິລະປະກອນສາກົນທີ່ມີຈາກ 5 ທະວີບໃນໂລກ, ຊຶ່ງໄດ້ເຊື່ອມຕົວເຂົ້າກັບບັນຍາກາດງານບຸນຢູ່ເຂດດິນກຸ່ງເກົ່າເຫ້ວ, ອັນໄດ້ເຮັດໃຫ້ເຫ້ວກາຍເປັນແຫ່ງເຕົ້າໂຮມບັນດາພື້ນຖານວັດທະນະທຳ.
ລາຍການສະແດງສິລະປະເປີດສາກງານ Festival ເຫ້ວປີ 2014
(ພາບ:http://www.sggp.org.vn)
|
ງານ Festival ເຫ້ວປີ 2014 ຖືກດຳເນີນເປັນເວລາ 9 ວັນຄືແຕ່ວັນທີ 12/4 ຫາວັນທີ 20/4 ໂດຍມີການເຂົ້າຮ່ວມຂອງ 68 ຄະນະສິລະປະກອນສາກົນ, ໃນນັ້ນມີຫຼາຍຄະນະສິລະປະກອນລະດັບສາກົນຄື ຄະນະສິລະປະກອນ Bati – Holic ທີ່ມາຈາກໂຕກຽວປະເທດຍີປຸ່ນ; ຄະນະສິລະປະພື້ນເມືອງ Gugak ແຫ່ງຊາດຂອງ ສ.ເກົາຫຼີ, ກອງຟ້ອນ ບາເລພື້ນເມືອງ Guadalaajara... ຊຶ່ງໄດ້ສະແດງຮັບໃຊ້ຜູ້ຊົມບັນດາວາດຟ້ອນພື້ນເມືອງ, ຈັ່ງຫວະເຕັ້ນລຳທີ່ເປັນເອກະລັກສະເພາະຂອງແຕ່ລະເຜົ່າ ພ້ອມກັບການຂັບລຳພື້ນເມືອງ. ນັກຟ້ອນ Cristian Andress, ສັງກັດຄະນະສິລະປະກອນ Los Andes ມາຈາກຈີເລເປີດເຜີຍວ່າ :
“ ພວກຂ້າພະເຈົ້າສະແດງບັນດາລາຍການສິລະປະວັດທະນະທຳຂອງພວກຂ້າພະເຈົ້າ, ບັນດາວາດຟ້ອນພື້ນເມືອງ, ຈັ່ງຫວະເຕັ້ນຂອງພວກຂ້າພະເຈົ້າ, ດັ່ງນັ້ນ ພວກເພື່ອນສາມາດເຫັນປະຈັກຕາພວກຂ້າພະເຈົ້າເຕັ້ນຄືແນວໃດ. ພວກຂ້າພະເຈົ້າຈະພະຍາຍາມຈົນສຸດຄວາມສາມາດຂອງຕົນເພື່ອສະແດງຮັບໃຊ້ຜູ້ຊົມຫວຽດນາມຊຶ່ງໄດ້ສະຫງວນຄວາມຮັກແພງໃຫ້ແກ່ພວກຂ້າພະເຈົ້າ. ປີນີ້ມີຫຼາຍພື້ນຖານວັດທະນະທຳທີ່ມາຈາກບັນດາປະເທດອາເມລິກາລາຕິນຄື ຄະນະສິລະປະກອນຈີເລ ພວກຂ້າພະເຈົ້າ, ຄະນະສິລະປະກອນໂກລົມໂບ... ຜ່ານງານ Festival ພວກຂ້າພະເຈົ້າໄດ້ມີໂອກາດເພີ່ມຄວາມຮູ້ກ່ຽວກັບຄະນະສິລະປະກອນອື່ນໆ”
ໃນຂະນະນັ້ນ, ຄະນະສິລະປະຂັບແຈວແຂວງຟູ້ເຖາະ ໄດ້ແນະນຳບັນດາ ທຳນອງເພງ ຂັບຊວານ ຊຶ່ງແມ່ນປະເພດສິລະປະໄດ້ຮັບການຢັ້ງຢືນຈາກ UNESCO ແມ່ນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດ. ທ່ານ ໂງມິນຕ້ວານ ຫົວໜ້າຄະນະສິລະປະຂັບແຈວ ແຂວງ ຟູ້ເຖາະ ໃຫ້ຮູ້ວ່າ :
“ງານ Festival ແມ່ນໂອກາດທີ່ດີເພື່ອໃຫ້ພວກເຮົາໄດ້ສຳພັດກັບບັນດາພື້ນຖານວັດທະນະທຳທີ່ເປັນເອກະລັກສະເພາະໃນໂລກ ກໍຄືເຂດກຸ່ງເກົ່າເຫ້ວ. ພວກຂ້າພະເຈົ້າແລກປ່ຽນ, ຖອດຖອນບົດຮຽນໄດ້ຫຼາຍຢ່າງເພາະຢູ່ແຕ່ລະປະເທດຫຼື ຄະນະສິລະປະກອນແຕ່ລະຄະນະ ກໍມີຈຸດທີ່ເປັນເອກະລັກສະເພາະຫຼາຍຢ່າງ; ທັງນີ້ກໍເພື່ອຊ່ວຍໃຫ້ພວກຂ້າພະເຈົ້າຊອກຮູ້ກ່ຽວກັບບັນດາສີສັນວັດທະ ນະທຳບັນດາເຜົ່າໃນແຕ່ລະປະເທດ, ວິທີການອະນຸລັກຮັກສາບັນດາຄຸນຄ່າ ມໍລະດົກວັດທະນະທຳບໍ່ມີຮູບຮ່າງຢູ່ບ້ານເກີດເມືອງນອນຂອງຕົນ ”
ລາຍການສະແດງຕີກອງຂອງຄະນະສິລະປະກອນ Bati Holic
|
ຖ້າຫາກເວທີ່ສະແດງສິລະປະພື້ນເມືອງ ແນະນຳນຳບັນດາສຽງຂັບລຳວາດຟ້ອນທີ່ເປັນເອກະລັກສະເພາະຂອງແຕ່ລະປະເທດນັ້ນ, ເວທີ່ສະແດງຍຸກປະຈຸບັນພັດນຳກະແສລົມທີ່ເຕັມໄປດ້ວຍພະລັງຊີວິດເຂົ້າໃນບັນຍາກາດຂອງງານ Festival ເຫ້ວ. ນັກສິລະປີນ Greta Kelly ຊາວອົດສະຕາລີເປີດເຜີຍວ່າ :
“ ມາຢ້ຽມຢາມຫວຽດນາມ ແລະ ເຂົ້າຮ່ວມງານ Festival ເຫ້ວ, ພວກຂ້າພະເຈົ້າເລືອກເຟັ້ນໄດ້ຫຼາຍບົດດົນຕີທີ່ມີສີສັນອາຊີ ແລະ ບົດເພງໜຶ່ງຂອງຫວຽດນາມທີ່ມີຊື່ວ່າ : ຫຼີເງື້ອໂອໝາຍເຖິງມ້າດຳ ທີ່ເປັນໜ້າຈັບອົກຂັບໃຈ ຊຶ່ງໄດ້ເຄີຍຂັບຮ້ອງມາແຕ່ປີ 1970. ຂ້າພະເຈົ້າຊົມຊອບ ແລະ ມີຄວາມປະທັບໃຈທີ່ສຸດສຳລັບດົນຕີພື້ນເມືອງຫວຽດນາມ ” .
ທີ່ງານ Festival ຄັ້ງທຳອິດຊຶ່ງຖືກຈັດຂຶ້ນໃນປີ 2000, Festival ເຫ້ວມີການເຂົ້າຮ່ວມຂອງກວ່າ 30 ຄະນະສິລະປະກອນຂອງຫວຽດນາມ ແລະ ຝະລັ່ງ. ພາຍຫຼັງ ງານ Festival 7 ຄັ້ງ, ຕົວເລກນີ້ໄດ້ເພີ່ມຂຶ້ນທົບ 2 ເທົ່າ. ຕາມທ່ານ Valeriu Arteni ເອກອັກຄະລັດຖະທູດ ຣູມານີປະຈຳຫວຽດນາມແລ້ວ, ສິ່ງນີ້ໄດ້ຢັ້ງຢືນວ່າ ງານ Festival ເຫ້ວໄດ້ສ້າງກຳລັງດຶງດູດເພື່ອມິດສາກົນ, ພ້ອມທັງສະແດງໃຫ້ເຫັນນະໂຍບາຍຫັນເປັນຫຼາຍຮູບຫຼາຍສີ ແລະ ຫຼາຍຝ່າຍຂອງຫວຽດ ນາມ ຊຶ່ງບໍ່ພຽງແຕ່ໃນຂົງເຂດການເມືອງເທົ່ານັ້ນ, ຫາກຍັງໃນຂົງເຂດວັດທະນະທຳອີກດ້ວຍ. ທ່ານ Valeriu Arteni ເອກອັກຄະລັດຖະທູດ ຣູມານີປະຈຳຫວຽດນາມ ເວົ້າວ່າ :
“ ການເຂົ້າຮ່ວມຂອງບັນດາ ຄະນະສິລະປະກອນທີ່ມາຈາກຫຼາຍປະເທດຄັ້ງນີ້, ກໍແມ່ນລະດັບສະຖີຕິ. ສິ່ງນີ້ເປັນການຢັ້ງຢືນການພັວພັນດ້ານວັດທະນະທຳລະຫວ່າງຫວຽດນາມກັບບັນດາປະເທດໃນໂລກໄດ້ພັດທະນາຢ່າງແຂງແຮງ ແລະວັດທະນະທຳຂອງຫວຽດນາມໄດ້ຖືກເຜີຍແຜ່ອອກສູ່ຫຼາຍປະເທດໃນໂລກ”
ຜ່ານການຈັດຕັ້ງແຕ່ລະຄັ້ງ, ງານ Festival ເຫ້ວນັບມື້ນັບກາຍເປັນເວທີ່ສະແດງທີ່ຈັບໃຈ ແລະ ດູດດື່ມທີ່ມີຕໍ່ບັນດາຄະນະສິລະປະກອນສາກົນ, ຮອດເລລາເລີກລາຈາກກັນ, ໃຜໆກໍ່ລ້ວນແຕ່ຄິດຮອດຄິດເຖິງສິ່ງທີ່ປະທັບໃຈດ້ວຍບັນດາລາຍການສະແດງສິລະປະທີ່ເປັນເອກະລັກສະເພາະຂອງບັນດາປະເທດ.