ໂດຍຕັ້ງຢູ່ແຄມແມ່ນ້ຳ ຫຼວກ ຫ່າງຈາກນະຄອນຫາຍເຢືອງໄປທາງທິດຕາເວັນ ອອກສ່ຽງໃຕ້ປະມານ 30 ກິໂລແມດ, ເຂດດິນ ນິງຢາງ ໃນແຂວງຫາຍເຢືອງ ແມ່ນເຂດບ້ານນາທີ່ມີປະຫວັດສາດ ວັດທະນະທຳ ມາແຕ່ດົນນານ. ຄວາມອຸດົມ ສົມບູນ ແລະ ມີຫຼາຍຮູບຫຼາຍສີ ແມ່ນບໍ່ພຽງແຕ່ໃນດ້ານວັດທະນະທຳ ຈິດໃຈ ເທົ່ານັ້ນ, ຫາກຍັງນັບທັງບັນດາຜະລິດຕະພັນວັດທະນະທຳດ້ານວັດຖຸທີ່ລືຊື່ ໄດ້ຮັບສືບທອດກັນມາແຕ່ດົນນານ, ນັ້ນແມ່ນອາຊີບເຮັດເຂົ້າໜົມ ແບ້ງກາຍ ຊຶ່ງແມ່ນອາຫານພິເສດຕິດພັນກັບຊື່ຂອງໝູ່ບ້ານແຫ່ງນີ້.
ເຂົ້າໜົມ ແບ້ງກາຍ ຊຶ່ງແມ່ນອາຫານພິເສດຂອງນິງຢາງ
(ພາບ :baohaiduong)
|
ໂດຍຖືກຕັ້ງຢູ່ແຫ່ງທີ່ມີຄວາມສະດວກທາງດ້ານຄົມມະນາຄົມທາງບົກ ແລະ ທາງນ້ຳ, ນັບແຕ່ປາງກ່ອນ, ນິງຢາງ ແມ່ນເຂດດິນທີ່ອຸດົມຮ່ັງມີ, ມີທິວທັດທຳມະຊາດທີ່ໜ້າຈັບໃຈໃນແຂວງຫາຍເຢືອງ, ທັງເປັນແຫ່ງທີ່ມີຊັບສົມບັດອັນລ້ຳຄ່າດ້ວຍປູຊະນີຍະສະຖານປະຫວັດສາດວັດທະນະທຳນັບ 10 ແຫ່ງ. ຢູ່ ນິງຢາງມີວິຫານ, ວັດວາອາຮາມຫຼາຍແຫ່ງທີ່ມີມາກ່ອນນີ້ນັບຮ້ອຍປີເຊັ່ນ: ວັດຈົງ ຊຶ່ງແມ່ນວັດທີ່ມີບັນດາພະພູດທະຮູບອັນເປັນເອກະລັກສະເພາະ. ວິຫານບູຊາ ຄຸກເທື່ອຢຸ ຕັ້ງຢູ່ແຄມແມ່ນ້ຳຫຼວກ ແມ່ນກິດຈະກຳປູຊະນີຍະສະຖານທີ່ມີຂົວຫີນ, ເດີນສາລາ ແລະ ບັນດາພາບແກະຄວັດສະຫຼັກດ້ວຍຫີນໂງ່ນໃຫຍ່ຕັດຕໍ່ກັນ. ນີ້ແມ່ນກິດຈະກຳທີ່ມີຄວາມໝາຍປະຫວັດສາດ, ວັດທະນະທຳແນໃສ່ເຊີດຊູນັກວິລະຊົນແຫ່ງຊາດທີ່ມີຄຸນງາມຄວາມດີສ້າງພື້ນຖານໃຫ້ແກ່ພື້ນຖານເອກະລາດ, ເປັນເຈົ້າຕົນເອງຂອງຫວຽດນາມພາຍຫຼັງຖືກພວກສັກດີນາທາງທິດເໜືອເຂົ້າມາຮຸກຮານເປັນເວລາ 1000 ປີ. ທ້າວ ຫງວຽນແທງອານ ນັກທ່ອງທ່ຽວຮ່າໂນ້ຍຊາວຮ່າໂນ້ຍມາຢ້ຽມຊົມວິຫານບູຊາ ຄຸກເທື່ອຢຸ ເປີດເຜີຍວ່າ :
“ ຂ້າພະເຈົ້າໄດ້ໄປຫຼາຍແຫ່ງ, ແຕ່ອາດເວົ້າໄດ້ວ່າ ຢູ່ ນິງຢາງມີທິວທັດທຳມະຊາດສວຍງາມທີ່ໜ້າຈັບໃຈ. ຍາກທີ່ຈະຫາໄດ້ຢູ່ແຫ່ງໃດ ພັດມີທິວທັດທຳມະຊາດແລະ ຊີວິດຂອງມະນຸດພັດມີຄວາມກົມກ່ຽວຄືຢູ່ແຫ່ງນີ້. ຂ້າພະເຈົ້າມັກໄປຮ່ວມງານບຸນຢູ່ນີ້ທີ່ສຸດ, ໂດຍສະເພາະແມ່ນເມື່ອໄດ້ຮັບຊົມການແຂ່ງຂັນໝາກກະໂພກດິນ, ຊຶ່ງເປັນການປຸກລຸກມູນເຊື້ອຕ້ານສັດຕູຜູ້ຮຸກຮານຂອງປູຍ່າຕາຍາຍແຕ່ປາງກ່ອນ ແລະ ເບິ່ງຄືວ່ານີ້ແມ່ນການລະຫຼິ້ນພື້ນເມືອງທີ່ມີມາແຕ່ດົນນານກ່ວາໝູ່ຢູ່ຫວຽດນາມ ”
ວິຫານແຈງ ຫຼືເອີ້ນວ່າ ວິຫານ ຕວນແຈງ ໃນເມືອງນິງຢາງ ແຂວງຫາຍເຢືອງ
|
ຢູ່ ນິງຢາງມີປູຊະນີຍະສະຖານປະຫວັດສາດວັດທະນະທຳຈິດວິນຍານ, ນັ້ນແມ່ນວິຫານແຈງ ທີ່ຂຶ້ນກັບບ້ານ ແຈງຊວຽນ ຕາແສງ ດົງເຕີມ. ວິຫານແຈງ ກ່ອນນີ້ຖືກປຸກສ້າງຢູ່ແຄມແມ່ນ້ຳແຈງ. ຜ່ານຫຼາຍສະຕະວັດ, ວິຫານແຈງໄດ້ຮັບການປຸກສ້າງຄືນໃໝ່ປະກອບດ້ວຍ 3 ຫຼັງ, ແຕ່ລະຫຼັງລວມມີ 7 ຫ້ອງ, ລວມທັງໝົດແມ່ນ 21 ຫ້ອງ. ການອອກແບບສະຖາປັດຕະຍະກຳແມ່ນເຮັດຕາມແບບສະໄໝລາດຊະວົງ ເລ ແລະ ລາດຊະວົງ ຫງວຽນ. ໃນວິຫານແຈງ ກໍຍັງເກັບຮັກສາວັດຖຸບູຮານຈຳນວນໜຶ່ງທີ່ມີຄຸນຄ່າທາງດ້ານສິລະປະຄື ຮູບຫຼໍ່ທອງ ເຈົ້າເສນາ ຕວນແຈງ(ໝາຍເຖິງຜູ້ຄຸ້ມຄອງແມ່ນ້ຳແຈງ) ທີ່ມີນ້ຳໜັກ 200 ກິໂລ, ຮູບແກະຄວັດສະຫຼັກຫີນ ເຈົ້າອາມາດໃນລາດຊະວັງ 4 ອົງ. ທ່ານ ຫງວຽນແທ່ງຫວ້ານ ພະນັກງານຂະແໜງວັດທະນະທຳ ຖະແຫຼງຂ່າວເມືອງ ນິງຢາງ ໃຫ້ຮູ້ວ່າ :
“ ຕາມການເຫຼືອມໃສຂອງທ້ອງຖິ່ນ, ວິຫານ ຕວນແຈງ ແມ່ນບູຊາເຈົ້າແມ່ນ້ຳ, ເພາະວ່າ ກ່ອນນີ້, ຢູ່ແມ່ນ້ຳຕອນໄຫຼຜ່ານ ນິງຢາງ, ກະແສນ້ຳໄຫຼເຄີຍສ້າງເປັນຈຸດນ້ຳວົນ, ເຮືອກຳປັ່ນແລ່ນໄປມາເຄີຍຖືກປີ້ນຂວ້ຳ, ດັ່ງນັ້ນ ເຂົາເຈົ້າຖືວ່າ ເຈົ້າແມ່ນ້ຳອຸກໃຈ. ດັ່ງນັ້ນເມື່ອວິຫານໄດ້ຮັບການປຸກສ້າງຂຶ້ນນັ້ນ, ທຸກໆຄົນຕ່າງກໍນຳເຄື່ອງຂອງມາຖະຫວາຍບູຊາວິງວອນ ແລະ ຄວາມໂຊກດີໄດ້ມາສູ່ເຂົາເຈົ້າ. ດັ່ງນັ້ນວິຫານແຫ່ງນີ້ໄດ້ຮັບຖືວ່າມີຄວາມສັກສິດທີ່ສຸດ . ການບູຊາເຈົ້າເສນາ ຕວນແຈງ ແມ່ນໄດ້ສະແດງໃຫ້ເຫັນການເຫຼື້ອມໃສບູຊາເຈົ້ານ້ຳ ຍັງຄົງຝັງເລິກໃນແນວຄິດຈິດໃຈຂອງຊາວທ້ອງຖິ່ນ”
ປີໜຶ່ງ, ຢູ່ ວິຫານ ຕວນແຈງ ຈັດງານບຸນ 2 ຄັ້ງ, ຄັ້ງທີ 1 ແມ່ນຖືກດຳເນີນແຕ່ ວັນທີ 10 ຫາວັນທີ 20 ເດືອນ 2 ໄລ່ຕາມຈັນທະປະຕິທິນ. ສ່ວນຄັ້ງທີ 2 ແມ່ນຖືກດຳເນີນແຕ່ ວັນທີ 10 ຫາວັນທີ 20 ເດືອນ 8 ໄລ່ຕາມຈັນທະປະຕິທິນ. ງານບຸນວິຫານ ຕວນແຈງ ໂດຍແມ່ນອຳນາດການປົກຄອງເປັນຜູ້ຈັດຕັ້ງ ຊຶ່ງລວມມີບັນດາພິທີກຳອັນສົມກຽດ ດ້ວຍບັນດາກອງທຳພິທີບູຊາ ນຸງຊຸດອາພອນທີ່ສວຍງາມ. ປະມານ 10 ປີມານີ້, ປະຊາຊົນທັງຢູ່ພາຍໃນ ແລະ ຕ່າງແຂວງໄດ້ເຂົ້າຮ່ວມງານບຸນນັບມື້ນັບຫຼາຍຂຶ້ນ, ອັນໄດ້ສ້າງບັນຍາກາດຟົດຟື້ນມ່ວນຊື່ນໃນຕະຫຼອດເວລາຈັດງານບຸນ.
ການຟື້ນຟູງານບຸນປະເພນີຢູ່ ນິງຢາງ ໄດ້ຕອບສະໜອງຄວາມມຸງມາດປາດຖະໜາຂອງຊາວທ້ອງຖິ່ນ. ການປະຕິສັງຂອນຍົກລະດັບບັນດາປູຊະນີຍະ ສະຖານ ກໍໄດ້ເປັນການປະກອບສ່ວນນຳ ນິງຢາງກາຍເປັນສະຖານທີ່ທ່ອງທ່ຽວວັດທະນະທຳຈິດວິນຍານ ແລະ ດຶງດູດແຂກທ່ອງທ່ຽວມາຢ້ຽມຢາມເຂດບ້ານນາທີ່ເຕັມໄປດ້ວຍມູນເຊື້ອວັດທະນະທຳນີ້ນັບມື້ນັບຫຼາຍຂຶ້ນ.