(vovworld) - ຕາມປະເພນີແລ້ວ, ຢູ່ ຫວຽດນາມ, ເດືອນຈຽງໄລ່ຕາມຈັນທະປະຕິທິນ ແມ່ນເດືອນແຫ່ງງານບຸນ ແມ່ນຍາມທີ່ທຸກຄົນໄປວັດວາອາຮາມເພື່ອທຳບຸນກຸສົນພາວະນາສິ່ງທີ່ດີງາມ, ຂໍໂຊກລາບ... ເພາະວ່າ ໃນຕະຫລອດປີທີ່ຂ້ອງຄາກັບວຽກງານຫລາຍ ສະນັ້ນ ຫລາຍຄົນຈຶ່ງພ້ອມກັບໝູ່ເພື່ອນ, ຍາດຕິພີ່ນ້ອງເລືອກເຟັ້ນບັນດາສະຖານທີ່ແຫ່ງຈິດວິນຍານເພື່ອໄປພາວະນາຂໍໃຫ້ປີໃຫມ່ມີໂຊກມີໄຊ ແລະ ຢູ່ເຢັນເປັນສຸກ. ຍ້ອນເຫດນັ້ນ ບັນດາລາຍການທ່ອງທ່ຽວຍາມຕົ້ນລະດູບານໃຫມ່ສ່ວນຫລາຍ ລ້ວນແຕ່ມູ້ງໄປເຖິງບັນດາສະຖານທີ່ແຫ່ງຈິດວິນຍານຄື: ອຽນຕຶ້ ແຂວງ ກວ໋າງນິນ, ວັດເຈີນ ແຂວງ ນາມດີ້ງ, ວັດເຮືອງ ນະຄອນຮ່າໂນ້ຍ ແລະອື່ນໆ.
ໃນຄວາມນຶກຄິດຂອງຊາວຫວຽດນາມ, ພາຍຫລັງຕ້ອນຮັບບຸນປີໃຫມ່ປະຈຳຊາດ ແມ່ນເລີ່ມຕົ້ນເດືອນໄປນະມັດສະການ. ທຸກຄົນລ້ວນແຕ່ຍາດເວລາ ເພື່ອໄປວັດວາອາຮາມ ພາວະນາສິ່ງທີ່ດີໃຫ້ແກ່ຕົນເອງ, ໃຫ້ແກ່ຄອບຄົວ ທັງເປັນການພັກຜ່ອນຢ່ອນອາລົມອີກດ້ວຍ. ປະຈຸບັນ ບໍລິສັດ Saigontouris ໄດ້ສ້າງກວ່າ 10 ລາຍການໄປນະມັດສະການ,ງານບຸນໃນໄລຍະສັ້ນ ແລະ ມື້ເລີ່ມຕົ້ນການເດີນທາງແມ່ນຕາມຄວາມຕ້ອງການຂອງນັກທ່ອງທ່ຽວ, ບັນດາລາຍການທ່ອງທ່ຽວຈິດວິນຍານຢູ່ພາກເຫນືອໃນໄລຍະສັ້ນ ເຊິ່ງເລີ່ມຕົ້ນຈາກຮ່າໂນ້ຍໄປຍັງບັນດາສະຖານທີ່ທ່ອງທ່ຽວທີ່ເປັນເອກະລັກສະເພາະດ້ວຍບັນດາງານບຸນໃນລະດູບານໃຫມ່ທີ່ລືຊື່ຄື: ງານບຸນວັດເຮືອງ, ງານບຸນວິຫານຮຸ່ງ, ງານບຸນອຽນຕື້, ງານບຸນ ບ່າຈົວຄໍ, ງານບຸນຕະຫລາດວ່ຽງ, ງານບຸນ ຟູໄຢ່. ສະເພາະບັນດາລາຍການທ່ອງທ່ຽວ ທີ່ເລີ່ມຕົ້ນຈາກນະຄອນໂຮ່ຈິມີນ ແມ່ນອຸດົມສົມບູນ ດ້ວຍສະຖານທີ່ທ່ອງທ່ຽວຢູ່ທັງສາມພາກ: ເຫນືອ, ກາງ ແລະ ໃຕ້ ເພື່ອໃຫ້ນັກທ່ອງສາມາດ ເລືອກເຟັ້ນລາຍການທ່ອງທ່ຽວໄດ້ຕາມໃຈມັກ.
ເພື່ອໃຫ້ບັນດາລາຍການທ່ອງທ່ຽວຈິດວິນຍານໃນໄລຍະຕົ້ນປີອຸດົມສົມບູນ, ບໍລິສັດ Viettravel ກໍໄດ້ສ້າງບັນດາລາຍການໄປນະມັດສະການຢູ່ພາກເຫນືອທີ່ດູດດື່ມນັກທ່ອງທ່ຽວ. ຄື ລາຍການທ່ອງທ່ຽວ ຮ່າໂນ້ຍ, ອ່າວຮ້າລອງ, ວັດບ້າຍດີນ, ເຂດທ່ອງທ່ຽວຊິວະພາບ ຈ່າງອານ ໃນເວລາ 4 ວັນ. ດ້ວຍລາຄາ 8.799.000 ດົ່ງ ຫລື ລາຍການທ່ອງທ່ຽວ ຮ່າໂນ້ຍ ອຽນຕຶ້ ຮ້າລອງ ຊາປາ ໃນເວລາ 6 ວັນ ດ້ວຍລາຄາ 10.100.000 ດົ່ງ.
ເຖິງຢ່າງໃດກໍຕາມ, ປະຈຸບັນ ພາຫະນະການສັນຈອນໄປມາກໍມີຄວາມສະດວກຫລາຍແລ້ວ ສະນັ້ນ ປະຊາຊົນຫລາຍຄົນກໍຈັດຕ້ັງເອງ, ອາດຈະໄປຕາມຫນ່ວຍ ຫລື ຕາມອົງການ, ຄອບຄົວ ຫລື ໝູ່ເພື່ອນ ເພື່ອໄປນະມັດສະການຢູ່ສະຖານທີ່ຈິດວິນຍານ. ຫນ່ວຍທ່ອງທ່ຽວຂອງປ້າ ຕືເຕີມດຶກ ມາຈາກຮ່າໂນ້ຍ ໃຫ້ຮູ້ວ່າ ໄລຍະຕົ້ນປີ ແມ່ນໄປນະມັດສະການວັດເຮືອງ ແລ້ວກັບເມືອອຽນຕຶ້. ປ້າດືກໃຫ້ຮູ້ວ່າ:
“ລາຍການທ່ອງທ່ຽວແຫ່ງຈິດວິນຍານນີ້ສາມາດຈັດຕັ້ງເອງ. ໃນລາຍການນີ້ເຄີຍໄປນະມັດສະການທຽນວ້ຽນ, ວັດດົ່ງ ແລ້ວໄປວັດ ຫວ່າງ ເຊິ່ງຖືກຖືວ່າແມ່ນເຂດປູສະນີຍະສະຖານຈິດວິນຍານຂອງນະຄອນ ອວງບີ້. ລາຍການທ່ອງທ່ຽວແບບນີ້ບໍ່ແມ່ນປີໃດພວກຂ້າພະເຈົ້າກໍໄປ, ແຕ່ໄປເທື່ອໃດກໍຮູ້ສຶກປະທັບໃຈ, ເຫັນວ່າທຸກຄົນສະແຫວງຫາພຸດທະສາສະຫນາ.”
ງານບຸນຕີກາວັດເຈີນຢູ່ແຂວງ ນາມດີ້ນ ກໍແມ່ນສະຖານທີ່ດຶງດູດນັກທ່ອງທ່ຽວທີ່ມາຈາກທຸກສາລະທິດເປັນຈຳນວນຫລວງຫລາຍ. ປີນີ້ນະຄອນ ນາມດີ້ນ ໄດ້ປະຕິບັດວຽກງານໂຄສະນາງານບຸນນີ້ຜ່ານພາຫະນະສື່ມວນຊົນໂດຍໄວ, ສິ່ງດັ່ງກ່າວກໍເຮັດໃຫ້ຈຳນວນນັກທ່ອງທ່ຽວທີ່ພາກັນມາວັດເຈີນໃນມື້ຕີກາບໍ່ຄັບຄາໜ້າແໜ້ນຄືຊຸມປີກ່ອນອີກ. ລຸງເຢືອງດີ່ນທຽດ ມາຈາກຮ່າໂນ້ຍໃຫ້ຮູ້ວ່າ:
“ປີນີ້ ການຈັດຕັ້ງງານບຸນແມ່ນດີຫລາຍ, ມີຄວາມເປັນລະບຽບຮຽບຮ້ອຍ, ຮັບປະກັນຄວາມປອດໄພ . ພໍ່ແມ່ປະຊາຊົນມາເຂົ້່າຮ່ວມງານບຸນລ້ວນແຕ່ມີຄວາມ ເບິກບານມ່ວນຊື່ນ.”
ນອກຈາກເຂດໃຈກາງສາສະຫນາແຫ່ງໃຫຍ່ຢູ່ພາກເຫນືອແລ້ວ, ພາກກາງ ແລະ ພາກໃຕ້ກໍແມ່ນສະຖານທີ່ຊຶ່ງນັກທ່ອງທ່ຽວຢູ່ພາກເຫນືອຢາກໄປຄົ້ນຫາ. ທ່ານ ເລວັນຮູ່ງ ຜູ້ອຳນວຍການບໍລິສັດຫຸ້ນສ່ວນທ່ອງທ່ຽວ ແທນນຽນ (ຊາວຫນຸ່ມ)ນະຄອນ ໂຮ່ຈິມີນໃຫ້ຮູ້ວ່າ:
“ລາຍການທ່ອງທ່ຽວຂອງບໍລິສັດ ແມ່ນໄປຟານທຽດ, ນີງຈື້, ເຈົາດົກ ຮ່າຕຽນ ຟູກວກ, ດາລາດ ເຫ້ວ ຮ່າໂນ້ຍ, ຍາຈາງ ດ່າລາດ. ລາຍການກໍເຊັນດຽວກັນກັບຊຸມປີກ່ອນ ແຕ່ສະຖານທີ່ທ່ອງທ່ຽວມີການເພີ່ມເຕີມ, ມີການປ່ຽນແປງ. ລາຍການໄປທ່ອງທ່ຽວໄລຍະຕົ້ນປີໃຫມ່ ນັກທ່ອງທ່ຽວເຄີຍນຸ່ງເຄື່ອງງາມ, ສະນັ້ນ ລາຍການທ່ອງທ່ຽວຍາມນີ້ແມ່ນຕ່າງກັບລາຍການທ່ອງທ່ຽວຍາມລະດູຮ້ອນ.”
ໄປນະມັດສະການວັດເຮືອງ (ພາບ:vietnamplus.vn)
ຕາມບັນດາບໍລິສັດທ່ອງທ່ຽວພາຍໃນປະເທດແລ້ວ, ຄາດວ່າ ຄວາມຕ້ອງການໄປທ່ອງທ່ຽວໃນຕົ້ນປີໃຫມ່ 2012 ຂອງນັກທ່ອງທ່ຽວ ແມ່ນເພີ່ມຂຶ້ນແຕ່ 25 - 30%. ຈຳນວນນັກທ່ອງທ່ຽວເພີ່ມຂຶ້ນຢ່າງກະໂດດຂັ້ນໃນໄລຍະດຳເນີນງານບຸນອັນໄດ້ສະແດງໃຫ້ເຫັນວ່າ ຄວາມສາມາດກະຕຸກຊຸກຍູ້ຄວາມຕ້ອງການໄປທ່ອງທ່ຽວດ້ວຍບັນດາການເຄື່ອນໄຫວດັ່ງກ່າວແມ່ນໃຫຍ່ຫລວງ. ບັນດາລາຍການຍາມຕົ້ນລະດູບານໃຫມ່ ຍາມໃດກໍມີນັກທ່ອງທ່ຽວສັ່ງຈອງເຕັມໝົດ, ນີ້ແມ່ນກາລະໂອກາດເພື່ອດຶງດູດນັກທ່ອງທ່ຽວກໍຄືແນະນຳບັນດາສະຖານທີ່ທ່ອງທ່ຽວອັນດູດດື່ມຢູ່ທຸກແຖບຖິ່ນຂອງປະເທດຊາດ.
ລານແອງ