ເຂດໝູ່ເກາະນາມຢູ ຂຶ້ນກັບແຂວງກຽນຢາງ ຫ່າງຈາກນະຄອນແຣກຢາ ໄປທາງທິດຕາເວັນຕົກ 52 ໄມທະເລ (ປະມານ 90 ກມ) . ນາມຢູ ພວມກາຍເປັນສະຖານທີ່ທ່ອງທ່ຽງທີ່ດຶງດູດໃຈນັກທ່ອງທ່ຽວພາຍໃນ ແລະ ຕ່າງປະເທດ. ໃນລາຍການທ່ອງທ່ຽວຫວຽດນາມ ພາກນີ້, ເຊີນທ່ານພ້ອມກັບນັກຂ່າວຫວີງຟອງ ໄປຢ້ຽມຢາມເຂດໝູ່ເກາະນາມຢູ ຢູ່ແຂວງກຽນຢາງ ທາງພາກໃຕ້ຫວຽດນາມ
(ເຂດໝູ່ເກາະນາມຢູ )
ເພື່ອໄປເກາະນາມຢູ, ແຂກທ່ອງທ່ຽວຕ້ອງຂີ່ເຮືອຈາກແຣກຢາ ແຂວງກຽນຢາງ ໃນເວລາປະມານ 5 ຊົ່ວໂມງຈຶ່ງຈະມາຮອດໝູ່ເກາະທີ່ຫົກເຫື້ອເປົ່າຫວ່າງແຫ່ງນີ້. ເກາະຮ່ອນເລີ້ນ ແມ່ນເກາະແຫ່ງໃຫ່ຍກ່ວາໝູ່ ແລະ ສູງກ່ວາໝູ່ຢູ່ທີ່ນີ້ ທັງແມ່ນແຫ່ງທຳອິດຊຶ່ງແຂກທ່ອງທ່ຽວມັກມາຢ້ຽມຢາມ. ເສັ້ນທາງຂຶ້ນຈອມພູສູງ 300 ມ ເມື່ອທຽບກັບໜ້ານ້ຳທະເລຖຶກປູຢ່າງດ້ວຍລວງຍາວ 2,5 ກມ, ແມ່ນເສັ້ນທາງຄົດລ້ຽວ, ມີບາງຕອນຢູ່ລະຫວ່າງກາງຈອມພູຕ່າງໆທີ່ເຕັມໄປດ້ວຍແສງແດດ, ແຕ່ມີບາງຕອນພັດຢູ່ໃຕ້ຮົ່ມໄມ້ປ່າທີ່ເຢັນສະບາຍ. ຖ້າຢືນຢູ່ເທິງຈອມພູ, ແຂກທ່ອງທ່ຽວສາມາດມອງເຫັນທິວທັດເຂດໝູ່ເກາະນາມຢູທັງໝົດ ດ້ວຍເກາະນ້ອຍ 21 ແຫ່ງຕັ້ງຢູ່ອ້ອມເກາະຮ່ອນເລີ້ນ ແລະ ຢື່ນຢູ່ບ່ອນສູງສຸດຂອງເກາະ, ແຂກທ່ອງທ່ຽວກໍສາມາດເຫັນໄດ້ທົ່ວເຂດເທດສະບານອານເຊີນດ້ວຍເຮືອນປະມານ 300 ແຫ່ງນອນໃນຕີນພູ ແລະ ຢູ່ລຽບຕາມເຂດຝັ່ງທະເລທີ່ມີລວງຍາວເກືອບ 2 ກມ. ຢູ່ທາງທິດຕາເວັນຕົກແມ່ນ ບາຍງື້ ດ້ວຍບັນດາຫຼັງຄາຢູ່ໃຕ້ແຖວຕົ້ນໝາກພ້າວທີ່ຂຽວອຸ່ມທູ່ມ. ເອື້ອຍເຈີ່ນທິມາຍແອງ ແຂກທ່ອງທ່ຽວມາຈາກນະຄອນໂຮ່ຈິມິນ ໃຫ້ຮູ້ວ່າ:
“ຂ້າພະເຈົ້າເຫັນວ່າ ເກາະນາມຢູ ຍັງຮັກສາຄວາມງາມແບບທຳມະຊາດໄວ້ໄດ້. ທີວທັດທຳມະຊາດສວຍງາມ ແລະ ສະຫງົບງຽບທີ່ສຸດ ຂ້າພະເຈົ້າໄດ້ພົບປະກັບຊາວທ້ອງຖິ່ນໃນເກາະ, ເຂົາແມ່ນເປັນຄົນໃຈດີ ແລະ ຮັກແພງແຂກ“
ນອກຈາກເກາະຮ່ອນເລີ້ນ, ແຂກທ່ອງທ່ຽວຍັງສາມາດໄປຢ້ຽມຢາມເກາະແຫ່ງອື່ນຢູ່ອ້ອມແອ້ມຄືເກາະຮ່ອນໂນ່ມງາວຍ, ຮ່ອນໂນ່ມເຢືອ, ຮ່ອນໂນ່ມຈອງ, ຮ່ອນເຢີມ, ຮ່ອນຮ່າງ, ຮ້ອນໂມກ, ຮ່ອນແຈ, ຮ່ອນຍ່ານ ໃນທາງທິດເໜືອ. ນອກຈາກຄວາມງາມແບບທຳມະຊາດແລ້ວ, ບັນດາເກາະເຫຼົ່ານີ້ຍັງມີແກ້ງຫີນງາມປຽບເໝືອນຮູບແກະສະຫຼັກໂດຍຄື້ນຟອງທະເລ ແລະ ທຳມະຊາດສ້າງຂຶ້ນມາເປັນເວລານັບໝື່ນໆປີກ່ອນ. ເມື່ອມາຢ້ຽມຢາມເກາະນາມຢູ, ແຂກທ່ອງທ່ຽວເຄີຍພັກຢູ່ເກາະຮ່ອນງາງ ໃຈກາງຕາແສງນາມຢູ ຫລື ຮ່ອນເມົາ ເພາະວ່າຢູ່ນີ້ມີເຮືອນພັກ, ໂຮງແຮມ ແລະ ຮ້ານກິນດື່ມຫຼາຍແຫ່ງ. ເກາະຮ່ອນເມົາ ກ້ວາງປະມານ 200 ແຮັກຕາ ແລະ ໃນເກາະມີບ້ານຊາວປະມົງນ້ອຍແຫ່ງໜຶ່ງດ້ວຍເຮືອນປະມານ 100 ຫຼັງ ແລະ ມີບັນດາຫາດຊາຍທະເລທີ່ສວຍງາມທີ່ສຸດ.
ຮອດຍາມຄ່ຳຄືນຢູ່ເກາະນາມຢູ ມີຄວາມຄຶກຄົມໜາແໜ້ນພໍສົມຄວນດ້ວຍເຮືອນັບພັນລຳອອກສູ່ທະເລເພື່ອຕຶກປາມຶກ… ໃນຈຸດເວລານີ້, ທະເລທີ່ກ້ວາງໃຫ່ຍໄພສານຄືວ່າ ໄດ້ຮັບການປະດັບປະດາດ້ວຍດອກໄຟນັບໝື່ນດອກ ສ້າງເປັນຮູບພາບທີ່ສວຍງາມແບບມະຫັດສະຈັນ, ມາຢ້ຽມຢາມເກາະນາມຢູ, ແຂກທ່ອງທ່ຽວຍັງໄດ້ຮັບປະທານອາຫານທະເລທີ່ແຊບນົວຫຼາຍເຍື່ອງ, ແຕ່ລະເຍື່ອງລ້ວນແຕ່ມີລົດຊາດສະເພາະຄື: ປາມຶກ, ຫອຍ, ຫອຍແຄງ…ເອື້ອຍ ຮ່ວາງຫວູລິນ ແຂກທ່ອງທ່ຽວມາຈາກຮ່າໂນ້ຍ ແບ່ງປັນວ່າ:
“ຂ້າພະເຈົ້າພ້ອມດ້ວຍຄອບຄົວໄດ້ມາພັກຜ່ອນຢູ່ທີ່ນີ້. ເຖິງວ່າເງື່ອນໄຂດ້ານວັດຖຸຢູ່ເກາະຍັງຂາດເຂີນກໍຕາມ, ແຕ່ອາຫານຢູ່ໃນເກາະພັດແຊບທີ່ສຸດ, ບັນຍາກາດໂປ່ງໃສ ແລະ ສະຫງົບງຽບ. ເກາະແຕ່ລະແຫ່ງມີຄວາມງາມແຕກຕ່າງກັນ, ແຖວຕົ້ນໝາກພ້າວ, ແກ້ງຫີນຢູ່ທີ່ນີ້ໄດ້ສ້າງຄວາມດູດດື່ມທີ່ສຸດ. ມັນເຮັດໃຫ້ພວກຂ້າພະເຈົ້າຢາກກັບມາຢ້ຽມຢາມແຫ່ງນີ້ຕື່ມອີກ“
ຈາກເຂດເກາະທີ່ເປົ່າຫວ່າງ, ປະຈຸບັນ, ນາມຢູ ໄດ້ກາຍເປັນເຂດໝູ່ເກາະທີ່ອຸດົມສົມບູນ, ຮັ່ງມີ, ສວຍງາມ ແລະ ນັບມື້ນັບດຶງດູດແຂກທ່ອງທ່ຽວມາຢ້ຽມຢາມເປັນຈຳນວນຫຼວງຫຼາຍ. ທ່ານຫງວຽນທາຍຫວຽດ ຮອງປະທານຄະນະກຳມະການປະຊາຊົນຕາແສງອານເຊີນ ໃຫ້ຮູ້ວ່າ:
“ແຂກທ່ອງທ່ຽວມາຢ້ຽມຢາມນາມຢູ ສ່ວນຫຼາຍແມ່ນມັກອາບນ້ຳທະເລ, ຫາປາ, ຕຶກປາມຶກ ແລະ ຮັບປະທານອາຫານທະເລປະເພດຕ່າງໆ. ພວກຂ້າພະເຈົ້າມີຄວາມເອົາໃຈໃສ່ທີ່ສຸດຕໍ່ການພັດທະນາການທ່ອງທ່ຽວໃນເກາະ. ປະຈຸບັນ, ພວກຂ້າພະເຈົ້າພວມຂົນຂວາຍປະຊາຊົນລົງທຶນກໍ່ສ້າງພື້ນຖານໂຄງລ່າງຄື: ກໍ່ສ້າງໂຮງແຮມ, ເຮືອນພັກ ແລະ ບັນດາເຂດບໍລິການອາຫານການກິນ…ເພື່ອຮັບໃຊ້ໃຫ້ແກ່ແຂກທ່ອງທ່ຽວ“
ເພື່ອນຈົ່ງມາຢ້ຽມຢາມໝູ່ເກາະນາມຢູ ເທື່ອໜຶ່ງ ເພື່ອສຳພັດກັບທັດສະນີຍະພາບ ແລະ ຮັບປະທານອາຫານທະເລຢູ່ແຫ່ງນີ້. ປະຊາຊົນໃນໝູ່ເກາະນາມຢູ ຍາມໃດກໍຍິນດີຕ້ອນຮັບເພື່ອນ ແລະ ພ້ອມແລ້ວທີ່ຈະເປັນຜູ້ນຳທ່ຽວເພື່ອຊ່ວຍໃຫ້ເພື່ອນຄົ້ນພົບໝູ່ເກາະແຫ່ງນີ້. ເຖິງວ່າເງື່ອນໄຂການກິນຢູ່ໃນເກາະຍັງຂາດເຂີນກໍ່ຕາມ ແຕ່ເພື່ອນຈະໄດ້ເຈືອຈານເຂົ້າກັບທຳມະຊາດ ກໍຄືຊາວປະມົງໃນເກາະນາມຢູ ແຫ່ງນີ້.