(vovworld) - ໂດຍຫ່າງຈາກນະຄອນຫລວງ ຮ່າໂນ້ຍໄປທາງທິດເຫນືອ ກວ່າ 50 ກິໂລແມັດ, ແຕ່ດົນນານມາແລ້ວ ບັກຢາງ (Bắc Giang)ໄດ້ເປັນທີ່ຮູ້ຈັກກັນດີວ່າແມ່ນເຂດດິນແດນທີ່ມີທັດສະນິຍະພາບສວຍງາມ ແລະ ປູຊະນີຍະສະຖານປະຫວັດສາດຫລາຍແຫ່ງ. ໃນໄລຍະມໍ່ໆມານີ້, UNESCO ໄດ້ຮັບຮອງແມ່ພິມດ້ວຍໄມ້ຂອງວັດ ຫວີງງຽມ (Vĩnh Nghiêm) ຢູ່ຕາແສງ ຈີອຽນ (Trí Yên) ເມືອງ ອຽນຢູ໋ງ (Yên Dũng ) ແຂວງ ບັກຢາງ ແມ່ນມໍລະດົກແຫ່ງຄວາມຊົງຈຳຂອງໂລກ ແລະ ເຂດປູຊະນີຍະສະຖານການລຸກຮືຂຶ້ນ ອຽນເທ້ ກໍໄດ້ຮັບການຮັບຮອງຈາກລັດຖະບານແມ່ນເຂດປູຊະນີຍະສະຖານລະດັບຊາດພິເສດ.
ງານບຸນ ອຽນຕື໋
ພາບ:internet
|
ໂດຍແມ່ນແຂວງຢູ່ເຂດພູດອຍພາກເຫນືອ ຫວຽດນາມ, ແຂວງ ບັກຢາງ ແມ່ນສະຖານທີ່ມີທິວທັດທຳມະຊາດສວຍງາມ ແລະ ເຂດປູຊະນີຍະສະຖານຫລາຍແຫ່ງ. ໃນນັ້ນ ພົ້ນເດັ່ນແມ່ນເຂດອະນຸລັກທຳມະຊາດ ໄຕອຽນຕື໋ (Tây Yên Tử) ດ້ວຍເນື້ອທີ່ປ່າທຳມະຊາດກວ່າ 2000 ເຮັກຕາ, ຕັ້ງຢູ່ເມືອງ ລຸກນາມ ແລະ ເຊີນດົ້ງ. ນອກຈາກ ແຫລ່ງຊັບພະຍາກອນປ່າດ້ວຍໄມ້ມີຄ່າຫາຍາກຫລາຍຊະນິດຄື: ໄມ້ແດງ, ໄມ້ໂລງເລງ, ຍົມ, ໄມ້ຈິກແລ້ວ, ຢູ່ທີ່ນີ້ຍັງມີສະຫມູນໄພຫລາຍຊະນິດອີກດ້ວຍ. ພິເສດ ຢູ່ ອຽນຕື໋ ມີທັດສະນິຍະພາບສວຍງາມຫລາຍແຫ່ງຄື: ນ້ຳຕົກຕາດ ຢອດ(thác Giót), ຫນອງວົວ, ຫນອງຕຽນ ແລະອື່ນໆ. ອຽນຕື໋ ຍັງແມ່ນສະຖານທີ່ດຶງດູດນັກທ່ອງທ່ຽວດ້ວຍລະບົບປູຊະນີຍະສະຖານທີ່ຕິດພັນກັບປະຫວັດສາດແຫ່ງການພັດທະນາຂອງ ພຸດທະສາສະໜາ ນິກາຍຈຸກເລິມ (Thiền Phái Trúc Lâm) ໂດຍແມ່ນພະເທບ ເຈີນເຍີນຕົງ (Trần Nhân Tông) ກໍ່ຕັ້ງແຕ່ສັດຕະວັດທີ 13. ໃນນັ້ນ ພົ້ນເດັ່ນແມ່ນວັດ ຫວີງງຽມ(Vĩnh Nghiêm) ຂຶ້ນກັບຕາແສງ ຈີອຽນ (Trí Yên) ເມືອງ ອຽນຢູ໋ງ (Yên Dũng). ນີ້ແມ່ນວັດເກົ່າແກ່ແຫ່ງຫນຶ່ງທີ່ໄດ້ຮັບການກໍ່ສ້າງກ່ອນນີ້ປະມານ 1000 ປີ. ໃນສະໄຫມເຈົ້າຊີວິດ ເຈີນ ແຕ່ສັດຕະວັດທີ 14 -15, ນີ້ແມ່ນສູນພຸດທະສາສະຫນາໃຫຍ່ກວ່າໝູ່ໃນທົ່ວປະເທດ. ປະຈຸບັນ ຢູ່ວັດ ຫວີງງຽມ ຍັງຄົງຮັກສາແມ່ພິມດ້ວຍໄມ້ຂອງ ພຸດທະສາສະໜາ ນິກາຍຈຸກເລິມ (Thiền Phái Trúc Lâm) ຊຶ່ງຫາກໍ່ໄດ້ຮັບການຮັບຮອງຈາກ UNESCO ວ່າແມ່ນມໍລະດົກເອກະສານໂລກ. ພະອາຈານ ທິກແທນວີ້ງ (Thích Thanh Vịnh) ເຈົ້າອະທິການວັດ ຫວີງງຽມ ໃຫ້ຮູ້ວ່າ:
“ແມ່ພິມດ້ວຍໄມ້ດັ່ງກ່າວໄດ້ຮັບການຄວັດໃນໄລຍະແຕ່ສັດຕະວັດທີ 14 ເມື່ອ ພຸດທະສາສະໜາ ນິກາຍຈຸກເລິມ (Thiền Phái Trúc Lâm) ໄດ້ຮັບການສ້າງຕັ້ງຂຶ້ນ. ບັນດາແມ່ພິມດ້ວຍໄມ້ນີ້ ສະແດງໃຫ້ເຫັນວ່າ ບົດບາດ ແລະ ແນວຄິດຂອງ ພຸດທະສາສະໜາ ນິກາຍຈຸກເລິມ (Thiền Phái Trúc Lâm) ແມ່ນມາຈາກຕ່າງປະເທດ”
ແຕ່ດົນນານມາແລ້ວ, ແຂວງ ບັກຢາງ ແມ່ນແຫ່ງທີ່ລືຊື່ດ້ວຍມູນເຊື້ອແຫ່ງການຕໍ່ສູ້ຕ້ານຈັກກະພັດຜູ້ຮຸກຮານ. ຢູ່ ບັກຢາງ ມີເຂດປູຊະນີຍະສະຖານປະຫວັດສາດ, ວັດທະນະທຳທີ່ຕິດພັນກັບປະຫວັດແຫ່ງການຕໍ່ສູ້, ສ້າງສາ ແລະ ປົກປັກຮັກສາປະເທດຊາດ. ໃນນັ້ນປູຊະນີຍະສະຖານທີ່ສວຍງາມ ແລະ ມີຊື່ສຽງກວ່າໝູ່ ແມ່ນກຳແພງເກົ່າ ເຊືອງຢາງ ໄດ້ຮັບການກໍ່ສ້າງແຕ່ສັດຕະວັດທີ 15. ນອກນັ້ນຍັງ ມີສຸສານ ດີງເຮືອງ ແມ່ນສະຖາປັດຕະຍະກຳຄວັດຫີນ ໄດ້ຮັບການກໍ່ສ້າງເມື່ອປີ 1727 ຢູ່ ຕາແສງ ຮ່ວາຮຽບ. ນີ້ແມ່ນສຸສານຂອງອາດຍາເຈົ້ານາຍຫລັງສະໄຫມເຈົ້າຊີວິດ ເລ. ນອກນັ້ນ ຍັງມີເຂດປູຊະນີຍະສະຖານອີກແຫ່ງຫນຶ່ງຕ້ອງເວົ້າເຖິງ ນັ້ນແມ່ນເຂດປູຊະນີຍະສະຖານກ່ຽວກັບການລຸກຮືຂຶ້ນຂອງຊາວກະສິກອນ ອຽນເທ ໃນການຕໍ່ຕ້ານຕ້ານພວກລ່າເມືອງຂຶ້ນຝລັ່ງ (1884 -1913) ເຊິ່ງລວມມີລະບົບກຳແພງ, ປ້ອມ, ຫໍພິພິດທະພັນ… ເຂດປູຊະນີຍະສະຖານແຫ່ງນີ້ຖືກຈັດອັນດັບແມ່ນເຂດປູຊະນີຍະສະຖານລະດັບຊາດພິເສດຈາກລັດຖະບານ. ຢູ່ ບັກຢາງ ບໍ່ພຽງແຕ່ມີເຂດປູຊະນີຍະສະຖານປະຫວັດສາດເທົ່ານັ້ນ ຫາກຍັງມີທິວທັດທຳມະຊາດສວຍງາມຫລາຍແຫ່ງອີກດ້ວຍ. ຢູ່ບໍລິເວນເມືອງ ລຸກງ້ານ ມີຫນອງ ເກີມເຊີນ ດ້ວຍເນື້ອທີ່ກວ່າ 2.500 ເຮັກຕາ ຕັ້ງຢູ່ໃຈກາງເຂດພູທີ່ສະຫລັບສັບຊ້ອນກັນ.
ແມ່ພິມດ້ວຍໄມ້
ພາບ:internet
|
ບັກຢາງ ແມ່ນສະຖານທີ່ປະສົມປະສານລະຫວ່າງວັດທະນະທຳ ຫວຽດເດີມ ແລະ ວັດທະນະທຳເຜົ່າໄຕ, ນຸ່ງ. ບັນດາບ້ານຂອງຊາວເຜົ່າໄຕ, ນຸ່ງ, ທ໋າຍ, ຢາວ,ຊານຢິວ, ຊານໄຈ, ຊາວຈີນ … ດຳລົງຊີວິດຢູ່ໃນບໍລິເວນນີ້ຍັງຄົງຮັກສາໄດ້ສີສັນວັດທະນະທຳ, ຮີດຄອງປະເພນີເປັນເອກະລັກສະເພາະໄວ້ຢູ່. ນີ້ກໍແມ່ນຄວາມສາມາດບົ່ມຊ້ອນທີ່ສ້າງຄວາມດຶງດູດນັກທ່ອງທ່ຽວມາຢ້ຽມຢາມເຂດດິນແດນແຫ່ງນີ້. ທ່ານນາງ ຮ່ວາງທິຮວາ, ຫົວຫນ້າພະແນກວັດທະນະທຳ ກິລາ ແລະ ການທ່ອງທ່ຽວ ແຂວງ ບັກຢາງ ໃຫ້ຮູ້ວ່າ:
“ປະຈຸບັນ ວຽກງານທີ່ພວກຂ້າພະເຈົ້າພວມປະຕິບັດ ນັ້ນແມ່ນວາງແຜນພັດທະນາການທ່ອງທ່ຽວຂອງແຂວງ ບັກຢາງຮອດປີ 2020, ໃນນັ້ນ ພວກຂ້າພະເຈົ້າພວມສ້າງແຜນຮ່າງຮອດປີ 2014 ບັກຢາງ ແມ່ນແຂວງເປັນເຈົ້າພາບຈັດຕັ້ງປີທ່ອງທ່ຽວແຫ່ງຊາດ. ດ້ວຍບັນດາຄວາມສາມາດບົ່ມຊ້ອນດ້ານທັດສະນິຍະພາບທຳມະຊາດ, ເຂດປູຊະນີຍະສະຖານປະຫວັດສາດ, ວັດທະນະທຳ …. ແຂວງ ບັກຢາງຈະມີເງື່ອນໄຂເພື່ອພັດທະນາການທ່ອງທ່ຽວກວ່າອີກ.”
ປະຈຸບັນ ແຂວງ ບັກຢາງ ແມ່ນທ້ອງຖິ່ນມີງານບຸນທີ່ເຂັ້ມຂົ້ນໄປດ້ວຍສີສັນຊາດ ແລະ ເຂດພາກ. ຊາວ ບັກຢາງ ມີຄວາມເອກອ້າງທະນົງໃຈແມ່ນແຫ່ງກຳເນີດທຳນອງເພງກວານຫໍ້ພື້ນເມືອງ ດ້ວຍໝູ່ບ້ານເກົ່າແຄມແມ່ນ້ຳ 23 ແຫ່ງ ປະຊາຊົນຢູ່ທີ່ນີ້ ລ້ວນແຕ່ຮູ້ຈັກຂັບກວານຫໍ້. ຢູ່ ບັກຢາງ ມີອາຫານພິເສດຂອງທ້ອງຖິ່ນ 9 ປະເພດຄື: ໝາກລີນຈີ່ເມືອງລຸກງ້ານ, ເຫລົ້າ ລ່າງເວີນ, ນ້ຳເຜີ້ງ ລຸກງ້ານ, ເຫລົ້າກຽນແທ່ນ, ເຂົ້າຫນຽວ ພີ່ດ່ຽນ ແລະອື່ນໆ. ດ້ວຍທິວທັດທຳມະຊາດສວຍງາມຫລາຍແຫ່ງ, ຄວາມງາມຂອງຫນອງນ້ຳ ພ້ອມກັບວັດທະນະທຳທີ່ເປັນເອກະລັກສະເພາະຂອງບັນດາເຜົ່າຢູ່ທີ່ນີ້, ໄດ້ສ້າງຄວາມດຶງດູດນັກທ່ອງທ່ຽວມາຢ້ຽມຢາມ ບັກຢາງ ເຂດດີນທີ່ເຂັ້ມຂົ້ນໄປດ້ວຍມູນເຊື້ອຢູ່ທິດເໜືອຂອງເມືອງຫຼວງທັງລອງ.