(vovworld) - ຫວຽດນາມ ມີຝັ່ງທະເລຍາວຢຽດກວ່າ 3.200 ກິໂລແມດ, ມີຫາດຊາຍທະເລທີ່ສວຍງາມແລະຂື້ນຊື່ລືນາມຫລາຍແຫ່ງ ພ້ອມກັບເກາະໃຫຍ່ນ້ອຍນັບພັນແຫ່ງ. ດ້ວຍເງື່ອນໄຂທຳມະຊາດທີ່ອຸດົມສົມບຸນຄືດັ່ງກ່າວ, ຫວຽດນາມ ໄດ້ກາຍເປັນປະເທດທີ່ມີຄວາມສາມາດບົ່ມຊ້ອນໃນການພັດທະນາການທ່ອງທ່ຽວທະເລເມື່ອທຽບໃສ່ບັນດາປະເທດອື່ນໆໃນພາກພື້ນ ແລະ ໃນໂລກ. ການທ່ອງທ່ຽວທະເລໄດ້ດຶງດູດນັກທ່ອງທ່ຽວສາກົນມາຢ້ຽມຢາມຫວຽດນາມ ເປັນຈຳນວນຫລວງຫລາຍ. ເພື່ອເຮັດໃຫ້ການທ່ອງທ່ຽວທະເລກາຍເປັນຜະລິດຕະພັນພິເສດສະເພາະຂອງຂະແຫນງທ່ອງທ່ຽວຫວຽດນາມ, ຂະແຫນງທ່ອງທ່ຽວໄດ້ສ້າງຜະລິດຕະພັນທີ່ຕິດພັນກັບທະເລຫລາຍຢ່າງ.
ອ່າວຮ້າລອງ
ພາບ: internet |
ປະຈຸບັນບັນດາສະຖານທີ່ທ່ອງທ່ຽວຢູ່ ຫວຽດນາມ ທີ່ພວມດຶງດູດນັກທ່ອງທ່ຽວ ມີ: ອ່າວຮ້າລອງ ຢູ່ແຂວງ ກວ໋າງນີງ, ກາດບ່າ ນະຄອນ ຫາຍຟ່ອງ, ເກື໋ອຫລໍ່ ແຂວງ ເງ້ອານ, ຍາຈາງ ແຂວງ ແຄງຮ່ວາ, ໝູຍແນ ນະຄອນ ຟານທຽດ, ກົນດ໋າວ ແຂວງ ບ່າເຣ້ຍ ຫວູງເຕົາ, ຟຸູກວັກ - ກຽນຢາງ… ບັນດາສະຖານທີ່ເຫລົ່ານັ້ນ ມີທ່າແຮງກ່ຽວກັບການທ່ອງທ່ຽວທະເລ. ເມື່ອມາຢ້ຽມຢາມ ຫວຽດນາມ, ສະຖານທີ່ທຳອິດທີ່ນັກທ່ອງທ່ຽວເຄີຍມາຢ້ຽມຢາມນັ້ນແມ່ນ ອ່າວຮ້າລອງ. ໃນເມື່ອກ່ອນ, ເມື່ອມາຫວຽດນາມ, ໄປຢ້ຽມຢາມ ອ່າວຮ້າລອງ ນັກທ່ອງທ່ຽວເຄີຍຂີ່ຍົນ ແຕ່ໃນຊຸມປີມໍ່ໆມານີ້ ເຂົາເຈົ້າພັດມາຢາມດ້ວຍທາງທະເລ. ທ່ານ ຫວູຢູຍຫວູ໋ ຮອງຜູ້ອຳນວຍການບໍລິສັດທ່ອງທ່ຽວ Saigontourist ໃຫ້ຮູ້ວ່າ:
“ອ່າວຮ້າລອງ ແມ່ນຫນຶ່ງໃນບັນດາອ່າວຖືກຈັດເຂົ້າບັນຊີລາຍຊື່ອ່າວທີ່ສວຍງາມກວ່າໝູ່, ແມ່ນສິ່ງມະຫັດສະຈັນທຳມະຊາດຂອງໂລກ. ຍ້ອນເຫດນັ້ນ, ບັນດາບໍລິສັດຂົນສົ່ງນັກທ່ອງທ່ຽວດ້ວຍກຳປັ່ນໄດ້ກຳນົດວ່າ ອ່າວຮ້າລອງ ແມ່ນໜຶ່ງໃນບັນດາສະຖານທີ່ໄດ້ສ້າງຄວາມດຶງດູດນັກທ່ອງທ່ຽວ. ນອກນັ້ນ ປະຈຸບັນ ບັນດາຮາກຖານບໍລິການຢູ່ທີ່ນີ້ກໍ່ສາມາດຕອບສະຫນອງໄດ້ຄວາມຕ້ອງການເພື່ອຮອງຮັບກຳປັ່ນໃຫຍ່ມາຢ້ຽມຢາມອ່າວຮ້າລອງ.”
ຢູ່ ຮ້າລອງ, ນອກຈາກໄດ້ໄປຢ້ຽມຢາມທັດສະນີຍະພາບ, ຮັບປະທານສິນທະເລແລ້ວ, ນັກທ່ອງທ່ຽວຍັງໄດ້ເຫັນປະຈັກຕາການດຳລົງຊີວິດຂອງຊາວປະມົງເມື່ອເຂົ້າຮ່ວມບັນດາລາຍການທ່ອງທ່ຽວວົງຄະນາຍາດ ຫລື ລາຍການທ່ອງທ່ຽວກຸສົນອີກດ້ວຍ. ເພາະວ່າ ຮູບການທ່ອງທ່ຽວນີ້ ໄດ້ສ້າງເງື່ອນໄຂໃຫ້ນັກທ່ອງທ່ຽວມີໂອກາດຊ່ວຍເຫລືອຜູ້ທຸກຍາກໂດຍກົງ ຫາກບໍ່ແມ່ນສະຫນັບສະຫນູນດ້ວຍວັດຖຸ. ສ່ວນຢູ່ເກາະງອກ - ກາດບ່າ, ນັກທ່ອງທ່ຽວຍັງໄດ້ເຂົ້າຮ່ວມລາຍການພະຈົນໄພ. ໂດຍກຳໄດ້ຄວາມຕ້ອງການຂອງນັກທ່ອງທ່ຽວ ກໍຄືຢາກສ້າງຜະລິດຕະພັນທ່ອງທ່ຽວໃຫມ່ຕື່ມອີກ, ຍາມໃດບັນດາບໍລິສັດທ່ອງທ່ຽວກໍເອົາໃຈໃສ່ເຖິງການສ້າງລາຍການທ່ອງທ່ຽວໃຫມ່. ທ່ານ ເລແມ້ນກຽນ ຜູ້ອຳນວຍການບໍລິສັດທ່ອງທ່ຽວ ແກແຊນ ກາດບ່າ ໃຫ້ຮູ້ວ່າ:
“ພວກຂ້າພະເຈົ້າກໍ່ໄດ້ສ້າງຜະລິດຕະພັນທ່ອງທ່ຽວໃຫມ່ຕື່ມອີກ ນັ້ນແມ່ນທ່ອງທ່ຽວຄົ້ນຫາ ແລະ ພະຈົນໄພ, ດຳນ້ຳ. ສົມທົບກັບການຢ້ຽມຢາມຖ້ຳບາງແຫ່ງດ້ວຍເຮືອນ້ອຍ Kaya.”
ກົນດ໋າວ ຂຶ້ນກັບແຂວງ ບ່າເຣ້ຍ ຫວູ໋ງເຕົາ ປະຈຸບັນກໍແມ່ນສະຖານທີ່ດຶງດູດນັກທ່ອງທ່ຽວຢູ່ພາຍໃນ ແລະ ຕ່າງປະເທດ ເປັນຈຳນວນຫລວງຫລາຍ. ນອກຈາກລາຍການທ່ອງທ່ຽວດ້ານຈິດວິນຍານ ແລ້ວ, ທ່ອງທ່ຽວທະເລ ຢູ່ ກົນດ໋າວ ໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ. ດ້ວຍແຄມທະເລຍາວພຽງ 2 ກິໂລແມັດເທົ່ານັ້ນ, ແຕ່ພັດມີຫາດຊາຍທະເລທີ່ສວຍງາມແບບທຳມະຊາດນັບສີບແຫ່ງ , ນ້ຳທະເລຂຽວສະອາດ ພ້ອມດ້ວຍຫິນປະກາລັງມີສີສັນຫລາກຫລາຍນັ້ນ ຍາມໃດກໍສ້າງຄວາມດູດດື່ມໃຫ້ແກ່ນັກທ່ອງທ່ຽວ. ບັນດາໂຮງແຮມຢູ່ ກົນດ໋າວ ລ້ວນແຕ່ຕັ້ງຢູ່ພາຍໃຕ້ຮົ່ມໄມ້ ແລະ ຫັນໜ້າອອກສູ່ທະເລ ທ່ານ ຮູ່ນວັນຮືງ ຫົວຫນ້າພະແນກທ່ອງທ່ຽວຊີວະພາບ ແລະ ສຶກສາສິ່ງແວດລ້ອມ ທີ່ຂຶ້ນກັບປ່າສະຫງວນແຫ່ງຊາດ ກົນດ໋າວ ໃຫ້ຮູ້ວ່າ:
“ນັກທ່ອງທ່ຽວມັກເຂົ້າຮ່ວມລາຍການທ່ອງທ່ຽວຊີວະພາບ, ເພື່ອຢ້ຽມຢາມບັນດາເກາະ, ບ່ອນເຕົ່າແຜ່ພັນ ແລະ ໄດ້ລອຍນ້ຳ, ດຳນ້ຳ ເພື່ອມອງເຫັນຫິນປະກາລັງ. ນີ້ແມ່ນຮູບການທ່ອງທ່ຽວ ເຊິ່ງນັກທ່ອງທ່ຽວນິຍົມຫລາຍກວ່າໝູ່. ແນ່ນອນວ່າໃນໄລຍະຈະມາເຖິງ ນັກທ່ອງທ່ຽວຈະມາຢາມກົນດ໋າວ ນັບມື້ນັບຫລາຍ. ເພື່ອຮັບໃຊ້ຄວາມຕ້ອງການຂອງນັກທ່ອງທ່ຽວ, ຈຳເປັນຕ້ອງລົງທຶນກໍ່ສ້າງພື້ນຖານໂຄງລ່າງຢູ່ບັນດາເກາະເພື່ອໃຫ້ນັກທ່ອງທ່ຽວພັກຜ່ອນບຳລຸງສຸຂະພາບ.”
ຍາຈາງ ແຂວງ ແຄງຮ່ວາ
ພາບ: internet |
ທ່ອງທ່ຽວທະເລຍັງຄົງແມ່ນລາຍການທ່ອງທ່ຽວຈຸດສຸມເພື່ອໃຫ້ບັນດາບໍລິສັດທ່ອງທ່ຽວຂຸດຄົ້ນ. ອ້າຍ ລ້າຍວັນກວັນພະນັກງານບໍລິສັດທ່ອງທ່ຽວ ຮ່າໂນ້ຍ ໃຫ້ຮູ້ວ່າ:
“ຈຳນວນນັກທ່ອງທ່ຽວເຂົ້າຮ່ວມລາຍການທ່ອງທ່ຽວຕິດພັນກັບທະເລ ກວມປະມານ 75%. ໃນລະດູຮ້ອນແຕ່ວັນທີ 30/04 - 02/9 ມີເຖິງ 95% ລາຍການທ່ອງທ່ຽວທະເລ, ນອກນັ້ນນັ້ນນັກທ່ອງທ່ຽວຍັງຢາກໄປຢ້ຽມຢາມລະບົບຖ້ຳ. ເມື່ອໄປຢ້ຽມຢາມພາກກາງ, ນັກທ່ອງທ່ຽວມັກເຂົ້າຮ່ວມບັນດາລາຍການທ່ອງທ່ຽວທະເລ, ເພາະວ່າບັນດາຫາດຊາຍທະເລຢູ່ພາກກາງສວຍງາມ ແລະ ການບໍລິການກໍດີກວ່າ. ຕົວຢ່າງຄື: ລະບົບໂຮງແຮມ, ຮ້ານອາຫານຮັບໃຊ້ນັກທ່ອງທ່ຽວດີທີ່ສຸດ, ລາຄາກໍເໝາະສົມ. ພິເສດ ຢູ່ເຂດນີ້ ມີແສງແດດຕະຫລອດປີ ສະນັ້ນ ນັກທ່ອງທ່ຽວສາມາດໄປພັກຜ່ອນບຳລຸງຂະພາບໃນທຸກເວລາໄດ້ ”
ປະຈຸບັນ ຈຳນວນນັກທ່ອງທ່ຽວຈາກ ເອີລົບ ມາຢ້ຽມຢາມ ຫວຽດນາມ ສ່ວນຫລາຍນິຍົມໄປທ່ອງທ່ຽວທະເລຈາກພາກກາງຕະຫລອດຮອດພາກໃຕ້. ໝາຍຄວາມວ່າ ຈາກ ຍາຈາງ ຕະຫລອດຮອດ ຟານທຽດ. ພິເສດ ຍາງຈາງ ແລະ ຟານທຽດ ແມ່ນເຂດທະເລສອງແຫ່ງທີ່ໄດ້ຮັບຄວາມນິຍົມທີ່ສຸດຈາກຊາວເອີລົບ. ໃນບັນດາລາຍການທ່ອງທ່ຽວ, ລາຍການທ່ອງທ່ຽວທະເລຂອງ ຫວຽດນາມ ຍາມໃດກໍແມ່ນການເລືອກເຟັ້ນຕົ້ນຕໍຂອງນັກທ່ອງທ່ຽວ.