ປະທານາທິບໍດີ Barack Obama ເຂົ້າຮ່ວມການເລືອກຕັ້ງກ່ອນກຳນົດເວລາຢູ່ Illinois ໃນວັນທີ 20/10
(ພາບ: Reuters)
(vovworld) - ວັນທີ 4/11, ຜູ້ມີສິດເລືອກຕັ້ງອາເມລິກາ ກວ່າ 100 ລ້ານຄົນໄດ້ໄປປ່ອນບັດເລືອກຕັ້ງຜູ້ຕາງໜ້າຢູ່ຫໍສະພາແຫ່ງຊາດສະຫະລັດ. ເຖິງວ່າບໍ່ມີລັກສະນະຕັດສິນກໍ່ຕາມ, ແຕ່ຜົນການເລືອກຕັ້ງກາງສະໄໝຄັ້ງນີ້ມີຜົນສະທ້ອນເຖິງການເລືອກຕັ້ງປະທານາທິບໍດີອາເມລິກາໃນ 2 ປີຈະມາເຖິງ. ບັນດານັກສັງເກດການດ້ານການເມືອງຖືວ່າ, ໃນ 2 ປີ ທ້າຍອາຍຸການຂອງຕົນ. ປະທານາທິບໍດີ Barack Obama ຈະປະສົບກັບຄວາມຫຍຸ້ງຍາກຫຼາຍຢ່າງ.
ນີ້ແມ່ນການເລືອກຕັ້ງກາງສະໄໝ, ເພາະວ່າມັນຖືກຈັດຕັ້ງໃນກາງອາຍຸການ 4 ປີ ຂອງປະທານາທິບໍດີ, ເຖິງວ່າບັດເລືອກຕັ້ງແມ່ນເລືອກທີ່ນັ່ງໃນສະພາແຫ່ງຊາດ (ສສຊ) ນັບທັງສະພາຕຳ່ ແລະ ສະພາສູງ ແລະ ທີ່ນັ່ງຂອງຜູ້ວ່າການລັດຈຳນວນໜຶ່ງ. ໃນສະພາແຫ່ງຊາດ, ສະມາຊິກສະພາຕຳ່ທັງໝົດ 435 ທ່ານ, ລ້ວນແຕ່ຕ້ອງປະເຊີນໜ້າກັບຜູ້ມີສິດເລືອກຕັ້ງ, 2 ປີ/ເທື່ອໜຶ່ງກໍ່ຕາມ. ແຕ່ມີພຽງ 1/3 ໃນຈຳນວນ 100 ທີ່ນັ່ງໃນສະພາສູງ ແມ່ນຕ້ອງອອກສະໝັກເລືອກຕັ້ງໃນແຕ່ລະເທື່ອ. ປີນີ້, ມີ 37 ທີ່ນັ່ງໃນສະພາສູງ ໄດ້ຮັບການອອກສະໝັກເລືອກຕັ້ງ ແລະ ມີ 37 ທີ່ນັ່ງຜູ້ວ່າການລັດ ແມ່ນເພື່ອໃຫ້ຜູ້ສະໝັກເລືອກຕັ້ງປ່ອນບັດ.
ເປັນຫຍັງການເລືອກຕັ້ງກາງສະໄໝມີຄວາມສຳຄັນ ?
ກ່ອນອື່ນໝົດ, ການເລືອກຕັ້ງກາງສະໄໝ ແມ່ນການຊ່ວງເສັງທີ່ມີລັກສະນະເປັນຕາຍ, ດ້ວຍນະໂຍບາຍຂອງພັກຕ່າງໆໃນການເລືອກຕັ້ງປະທານາທິບໍດີ ແລະ ສະພາແຫ່ງຊາດໃນ 2 ປີຕໍ່ໜ້າ. ໂດຍອີງໃສ່ຜົນຂອງການເລືອກຕັ້ງ, ບັນດາຜູ້ອອກສະໝັກເລືອກຕັ້ງຂອງສອງພັກຄື: ພັກສາທາລະນະ ແລະ ພັກປະຊາທິປະໄຕ ທີ່ໄດ້ຮັບສະເໜີອອກສະໝັກຮັບເລືອກຕັ້ງເພື່ອກາຍເປັນຜູ້ນຳຂອງປະເທດນັ້ນ ຈະຕ້ອງພິຈາລະນາຫຼັກໝັ້ນ, ທັດສະນະດ້ານການເມືອງຂອງຕົນ, ກໍ່ຄືປັບປຸງແນວທາງເຄື່ອນໄຫວ, ແຜນການອອກສະໝັກເລືອກຕັ້ງ ເພື່ອສົມກັບຄວາມມຸ່ງຫວັງຂອງປະຊາຊົນ. ຜົນຂອງການເລືອກຕັ້ງຜູ້ວ່າການລັດ ຢູ່ລັດຈຳນວນໜຶ່ງກໍ່ຕົກລົງລາຍຊື່ບັນດາຜູ້ອອກສະໝັກເລືອກຕັ້ງທີ່ສາມາດອອກສະໝັກເລືອກຕັ້ງເປັນປະທານາທິບໍດີໄດ້.
ປະຈຸບັນ, ພັກປະຊາທິປະໄຕກວມອັດຕາສ່ວນຫຼາຍໃນສະພາສູງ ດ້ວຍ 53 ທີ່ນັ່ງ, ເມື່ອທຽບໃສ່ 45 ທີ່ນັ່ງຂອງພັກສາທາລະນະ ແລະ 2 ທີ່ນັ່ງເປັນເອກະລາດ. ສ່ວນຢູ່ສະພາຕຳ່, ພັກສາທາລະນະ ພັດກວມອັດຕາສ່ວນຫຼາຍດ້ວຍ 233 ທີ່ນັ່ງ ເມື່ອທຽບໃສ່ 199 ທີ່ນັ່ງຂອງພັກປະຊາທິປະໄຕ. ທັງສອງພັກລ້ວນແຕ່ຫວັງຈະໄດ້ຮັບອັດຕາສ່ວນຫຼາຍໃນການເລືອກຕັ້ງຄັ້ງນີ້. ເພາະວ່າພັກໃດໄດ້ຮັບບັດສະໜັບສະໜູນຈາກຜູ້ມີສິດເລືອກຕັ້ງຫຼາຍກວ່າ, ພັກນັ້ນຈະມີສິດຄວບຄຸມທັງສະພາຕຳ່ ແລະ ສະພາສູງ, ເປັນຜູ້ຊີ້ນຳນຳພາທັງອຳນາດບໍລິຫານ, ທັງອຳນາດນິຕິບັນຍັດໂດຍກົງ.
ຕັ້ງຄວາມເຊື່ອໝັ້ນຕໍ່ພັກສາທາລະນະ ຫຼືພັກປະຊາທິປະໄຕ
ນີ້ແມ່ນຄວາມເປັນຫ່ວງກັງວົນຂອງຜູ້ມີສິດເລືອກຕັ້ງເກືອບທັງໝົດໃນການເລືອກຕັ້ງຄັ້ງນີ້. ເພາະວ່າສະພາແຫ່ງຊາດຊຸດທີ 113 ໃນປະຈຸບັນ ໄດ້ຮັບຕຳໜິຕິຕຽນວ່າ ເຄື່ອນໄຫວບໍ່ມີປະສິດທິຜົນທີ່ສຸດໃນປະຫວັດສາດ. ທ່າຟື້ນຟູຂອງພື້ນຖານເສດຖະກິດໃຫຍ່ກວ່າໝູ່ຂອງໂລກຍັງຄົງດຳເນີນໄປຢ່າງຊັກຊ້າ. ຕະຫຼາດແຮງງານ, ເຖິງວ່າໄດ້ຮັບການປັບປຸງແລ້ວກໍ່ຕາມ, ແຕ່ອັດຕາສ່ວນຜູ້ຫວ່າງງານໄລ່ຮອດເດືອນ 10 ຍັງຢູ່ໃນລະດັບສູງຢູ່ ແມ່ນ 5,9% ເມື່ອທຽບໃສ່ຄາດໝາຍ 5% ເຊິ່ງທະນາຄານສະສົມສະຫະລັດອາເມລິກາ (FED) ໄດ້ວາງອອກ.
ສະພາບການເມືອງໃນໄລຍະ 6 ປີ ທີ່ທ່ານ Barack Obama ເປັນປະທານາທິບໍດີ, ຍາມໃດກໍ່ຕົກຢູ່ໃນສະພາບຍາກທີ່ຈະແກ້ໄຂບັນດາບັນຫາຄື: ການໃຊ້ຈ່າຍງົບປະມານ, ການປະຕິຮູບກົດໝາຍວ່າດ້ວຍເຂົ້າອາໄສ, ການຄວບຄຸມປືນ, ລູກປືນ, ການປະຕິຮູບລະບົບປະກັນໄພ ແລະ ສົ່ງເສີມສຸຂະພາບ…ເຖິງວ່າໄດ້ຮັບຜົນງານໃນການປະຕິບັດຄຳໝັ້ນສັນຍາຖອນທະຫານອອກຈາກສະໜາມຮົບອີຣັກ ແລະ ອາບການິສະຖານກໍ່ຕາມ, ແຕ່ປະເທດອາເມລິກາ, ພາຍໃຕ້ການຊີ້ນຳນຳພາຂອງປະທານາທິບໍດີ Barack Obama, ພັດຕ້ອງປະເຊີນໜ້າກັບບັ້ນຮົບຕ້ານຄືນກຸ່ມປະກອບອາວຸດ ລັດອິດສະລາມ (IS) ຢູ່ອີຣັກ ແລະ ຊີຣີ, ເຊິ່ງບໍ່ທັນຮູ້ຈະແກ່ຍາວຮອດເວລາໃດ. ຂະບວນການ “ລະດູບານໃໝ່ອາຣັບ“ ທີ່ສົ່ງຜົນສະທ້ອນເຖິງບັນດາປະເທດຕາເວັນອອກກາງ ແລະ ອາຟະລິກາເໜືອ, ຄິດວ່າຈະນຳມາເຊິ່ງພື້ນຖານປະຊາທິປະໄຕຢ່າງແທ້ຈິງ, ແຕ່ມາຮອດປະຈຸບັນ, ບັນດາປະເທດເຫຼົ່ານັ້ນຍັງຄົງຢູ່ໃນສະພາບສັບສົນຢູ່. ວິວັດທະນາການສັນຕິພາບລະຫວ່າງປາແລດສະຕີນ ແລະ ອິດສະຣາແອນ ບໍ່ມີຄວາມຄືບໜ້າ, ຊຳ້ບໍ່ໜຳພັດຕົກຢູ່ໃນສະພາບບໍ່ມີທາງອອກ. ການພົວພັນລະຫວ່າງອາເມລິກາ ແລະ ລັດເຊຍໃນປະຈຸບັນມີໄພຈະກັບຄືນສູ່ໄລຍະສົງຄາມເຢັນ. ຄຽງຄູ່ກັນນັ້ນ, ອາເມລິກາຕ້ອງຈ່າຍຊັບສິນເງິນທອງ ກໍ່ຄືຊັບພະຍາກອນມະນຸດໃຫ້ແກ່ໂລກພະຍາດ Ebola ທີ່ພວມແຜ່ລະບາດເຂົ້າປະເທດນີ້ຫຼາຍອີກ.
ການທ້າທາຍສຳລັບປະທານາທິບໍດີ Barack Obama
ໃນສະພາບການດັ່ງກ່າວ, ວົງການນັກໄຈ້ແຍກຄາດຄະເນວ່າ, ພັກສາທາລະນະອາດຈະຍາດໄດ້ໄຊຊະນະໃນການເລືອກຕັ້ງກາງສະໄໝ, ຍ້ອນຜູ້ມີສິດເລືອກຕັ້ງສ່ວນໜຶ່ງສະແດງຄວາມເສຍຫວັງຕໍ່ບັນດາລັດຖະນະໂຍບາຍຂອງອຳນາດການປົກຄອງ. ຕາມຜົນແຫ່ງການຢັ່ງຫາງສຽງກ່ອນການເລືອກຕັ້ງແລ້ວ, 50% ຈຳນວນຜູ້ມີສິດເລືອກຕັ້ງສະໜັບສະໜູນພັກສາທາລະນະ ແລະ 44% ແມ່ນສະໜັບສະໜູນພັກປະຊາທິປະໄຕ. ກາລະໂອກາດໄດ້ຮັບໄຊຊະນະຂອງພັກສາທາລະນະຢູ່ສະພາສູງໃນປະຈຸບັນແມ່ນ 62,3%, ໃນຂະນະນັ້ນ, ກາລະໂອກາດຂອງພັກປະຊາທິປະໄຕບັນລຸພຽງ 37.7%. ຖ້າຫາກວ່າສິ່ງດັ່ງກ່າວປະກົດຜົນເປັນຈິງ, ປະທານາທິບໍດີ ພັກປະຊາທິປະໄຕ Barack Obama ຈະປະສົບກັບຄວາມຫຍຸ້ງຍາກຫຼາຍຢ່າງໃນໄລຍະ 2 ປີສຸດທ້າຍຂອງອາຍຸການ.
ປະຫວັດດ້ານການເມືອງຂອງອາເມລິກາສະແດງໃຫ້ເຫັນວ່າ, ການເລືອກຕັ້ງກາງສະໄໝ ແມ່ນການເລືອກຕັ້ງເຊິ່ງປະຊາຊົນໃຊ້ບັດເລືອກຕັ້ງເພື່ອສະແດງທັດສະນະຂອງຕົນທີ່ມີຕໍ່ປະທານາທິບໍດີ ແລະ ພັກຂອງປະທານາທິບໍດີ. ຂອບເຂດການເຄື່ອນໄຫວຂອງອຳນາດການປົກຄອງປະທານາທິບໍດີ Barack Obama ພວມຕົກຢູ່ໃນກຳມືຂອງຜູ້ມີສິດເລືອກຕັ້ງ. ສະພາຕຳ່ຍັງຄົງຂຶ້ນກັບຝ່າຍສາທາລະນະ. ກົງກັນຂ້າມ, ສະພາສູງເຊິ່ງປະຈຸບັນພວມຂຶ້ນກັບຝ່າຍປະຊາທິປະໄຕນັ້ນ, ກຳລັງມີໄພຫັນໄປສູ່ພັກຝ່າຍຄ້ານ. ປະຈຸບັນບໍ່ທັນຮູ້ໝາກຜົນແມ່ນຄືແນວໃດ, ແຕ່ວົງການນັກສັງເກດການຖືວ່າ, ອາຍຸການທີ່ຍັງເຫຼືອຂອງປະທານາທິບໍດີ Barack Obama ຈະສິ້ນສຸດລົງໃນຄວາມຫຍຸ້ງຍາກ. ມີຮ່າງກົດໝາຍສຳຄັນຫຼາຍສະບັບອາດຈະບໍ່ປະກົດຜົນເປັນຈິງ. ຜູ້ມີສິດເລືອກຕັ້ງສະໜັບສະໜູນພັກສາທາລະນະສາມາດໃຊ້ບັດເລືອກຕັ້ງຂອງຕົນເພື່ອຊ່ວຍພັກນີ້ຮັກສາທີ່ຕັ້ງຢູ່ສະພາສູງຢ່າງໝັ້ນຄົງ, ແລະ ເປີດສາກໃຫ້ຄາດໝາຍຍາດໄດ້ທີ່ນັ່ງປະທານາທິບໍດີເພື່ອຊີ້ນຳນຳພາອຳນາດບໍລິຫານໃນປີ 2016.