(vovworld)- ທ່ານ Mike Pence, ຮອງປະທານາທິບໍດີ ອາເມລິກາ ຫາກໍ່ໄປປະຕິບັດງານຢູ່ ເອີລົບ ເປັນຄັ້ງທຳອິດໃນຖານະຕຳແຫນ່ງໃຫມ່ ໃນສະພາບການເອີລົບ ຂາດຄວາມສະຫງົບຕໍ່ຄຳຖະແຫລງຂອງປະທານາທິບໍດີ ອາເມລິກາ Donald Trump ຫວ່າງແລ້ວນີ້. ເຖິງຢ່າງໃດກໍຕາມ, ສະພາບການມີຄວາມສະຫງົບຊົ່ວຄາວ ເມື່ອໝາກຜົນຢ້ຽມຢາມເອີລົບຂອງ ທ່ານ Mike Pence ໄດ້ຊີ້ແຈ້ງຫລັກໝັ້ນສ່ວນໃດຫນຶ່ງຂອງ ເອີລົບ ຍັງຄົງແມ່ນ “ຄູ່ຮ່ວມມືທີ່ຂາດບໍ່ໄດ້” ຂອງ ອາເມລິກາ, ລົບລ້າງບັນດາຄວາມສົງໃສຂອງ ເອີລົບ ກ່ຽວກັບນະໂຍບາຍການຕ່າງປະເທດພາຍໃຕ້ອຳນາດການປົກຄອງຂອງ ປະທານາທິບໍດີ ອາເມລິກາ Donald Trump.
ທ່ານປະທານາທິບໍດີ ອາເມລິກາ Donald Trump ກ່າວຄຳເຫັນທີ່
ການປະຊຸມຂ່າວຢູ່ ວໍຊິງຕັນ DC
ພາບ:AFP/TTXVN
|
ຄວາມບໍ່ລົງລອຍກັນໃນການພົວພັນລະຫວ່າງ EU, NATO ກັບ ອາເມລິກາ ຮ້າຍແຮງຂຶ້ນ ພາຍຫລັງ ປະທານາທິບໍດີ ອາເມລິກາ Donald Trump ຍົກອອກບັນດາຄຳຖະແຫລງເມື່ອເດືອນ 1/2017 ວ່າ: NATO ໄດ້ຕົກເຂົ້າສູ່ໄລຍະຫລ້າຫລັງແລ້ວ ແລະ ບັນດາປະເທດ ເອີລົບ ບໍ່ແບກຫາບແຫລ່ງລາຍຈ່າຍໃຫ້ກຸ່ມ. ທ່ານ ປະທານາທິບໍດີ ອາເມລິກາ Donald Trump ກໍຕຳຫນິຕິຕຽນທ່ານນາງປະທານາທິບໍດີ ເຢຍລະມັນ Angela Merkel ຍ້ອນນະໂຍບາຍເຂົ້າເມືອງສະດວກສະບາຍທີ່ສຸດ, ເຮັດໃຫ້ຫລາຍປະເທດເອີລົບ ຕ້ອງປະເຊີນຫນ້າກັບຄວາມສ່ຽງກໍ່ການຮ້າຍຈາກອົງການລັດອິດສະລາມຂະຫນານນາມເອງ (IS). ເປັນຫນ້າສົນໃຈ, ທ່ານ ປະທານາທິບໍດີ ອາເມລິກາ Donald Trump ຖືວ່າ : “ Brexit ແມ່ນສິ່ງດີເລີດ” ແລະ ຂໍ້ຕົກລົງດ້ານການຄ້າລະຫວ່າງ ສະຫະພາບເອີລົບ - ອັງກິດ ຈະ “ເປັນສິ່ງທີ່ດີໃຫ້ທັງສອງຝ່າຍ”. ບັນດາຄຳຖະແຫລງຂອງທ່ານ ປະທານາທິບໍດີ ອາເມລິກາ Donald Trump ຖືກຄັດຄ້ານຢ່າງແຮງຈາກຫລາຍປະເທດຂຶ້ນກັບ EU, ເຮັດໃຫ້ ເອີລົບ ມີຄວາມວິຕົກກັງວົນຕໍ່ຄຳໝັ້ນສັນຍາຂອງ ອາເມລິກາ ໃນພາກພື້ນ.
ກ່ອນຫນ້ານັ້ນ ໃນໄລຍະຫາສຽງເລືອກຕັ້ງ, ທ່ານ Donald Trump ໄດ້ຕຳຫນິຕິຕຽນຫລາຍຄັ້ງຕໍ່ເລື່ອງຫລາຍປະເທດ NATO ບໍ່ປະກອບລະດັບລາຍຈ່າຍການທະຫານຢ່າງພຽງພໍຄືໃນຄຳໝັ້ນສັນຍາ, ໃນຂະນະນັ້ນ ອາເມລິກາ ປະກອບລາຍຈ່າຍເປັນສ່ວນໃຫຍ່ໃຫ້ແກ່ສຳພັນທະມິດນີ້. ຊ່້ຳບໍ່ໜຳ ທ່ານ Donald Trump ຍັງນາບຂູ່ວ່າຈະພິຈາລະນາຄືນສາຍພົວພັນລະຫວ່າງ ອາເມລິກາ ແລະກຸ່ມນີ້.
EU ແມ່ນຄູ່ຮ່ວມມືທີ່ຂາດບໍ່ໄດ້ຂອງອາເມລິກາ
ໄລ່ມາຮອດຈຸດເວລານີ້, ທ່ານ Mike Pence, ຮອງປະທານາທິບໍດີ ອາເມລິກາ ແມ່ນເຈົ້າຫນ້າທີ່ຂັ້ນສູງສຸດໃນອຳນາດການປົກຄອງຂອງທ່ານ Donald Trump ໄປຢ້ຽມຢາມເອີລົບ. ຮ່ວມເດີນທາງກັບທ່ານ Mike Pence ມີລັດຖະມົນຕີຫລັກແຫລ່ງ 3 ທ່ານຄື: ລັດຖະມົນຕີການຕ່າງປະເທດ ອາເມລິກາ Rex Tillerson, ລັດຖະມົນຕີກະຊວງປ້ອງກັນປະເທດ ອາເມລິກາ James Mattis, ລັດຖະມົນຕີກະຊວງປ້ອງກັນຄວາມສະຫງົບພາຍໃນ John Kelly.
ໃນການຢ້ຽມຢາມຄັ້ງນີ້, ທ່ານຮອງປະທານາທິບໍດີ Mike Pence ເຂົ້າຮ່ວມກອງປະຊຸມປ້ອງກັນຄວາມສະຫງົບຢູ່ Munich (ເຢຍລະມັນ), ຖັດມາແມ່ນຢ້ຽມຢາມ ບຣຸກແຊນ ປະເທດແບນຊີກ, ຊື່ງແມ່ນສະຖານທີ່ມີສຳນັກງານຂອງ ສະຫະພາບເອີລົບ ແລະ NATO. ເລື່ອງຢັ້ງຢືນຫລັກໝັ້ນຂອງ EU ແມ່ນຄູ່ຮ່ວມມືທີ່ຂາດບໍ່ໄດ້ຂອງ ອາເມລິກາ ໂດຍທ່ານຮອງປະທານາທິບໍດີ Mike Pence ປະກາດທີ່ເວທີປາໄສຂອງກອງປະຊຸມປ້ອງກັນຄວາມສະຫງົບ Munich ກໍຄືໃນການເຈລະຈາ, ການພົບປະກັບການນຳສະຫະພາບເອີລົບ. ທ່ານຊີ້ແຈ້ງວ່າ ອາເມລິກາ ຖືເປັນສຳຄັນ ແລະ ສືບຕໍ່ຮັກສາບັນດາຄຳໝັ້ນສັນຍາຮັບປະກັນຄວາມໝັ້ນຄົງກ່ອນນີ້ກັບ ເອີລົບ. ອາເມລິກາ ຈະແບ່ງປັນກັບເອີລົບບັນດາຄຸນຄ່າເສລີ, ປະຊາທິປະໄຕ, ຍຸຕິທຳ ແລະ ອຳນາດນິຕິບັນຍັດ. ທ່ານຮອງປະທານາທິບໍດີ Mike Pence ຍັງເນັ້ນຫນັກວ່າ ເຖິງວ່າຍັງມີຄວາມບໍ່ລົງລອຍກັນ ແຕ່ສອງຝ່າຍ ໄດ້ມີມໍລະດົກຮ່ວມ, ບັນດາຄຸນຄ່າຮ່ວມ ແລະ ຍິ່ງກວ່ານັ້ນມີເຈດຈຳນົງດຽວໃນການຊຸກຍູ້ພື້ນຖານສັນຕິພາບ ແລະ ຄວາມວັດທະນາຖາວອນຂອງທັງສອງຝັ່ງມະຫາສະມຸດອັດລັງຕີກ. ດ້ວຍຄຳຢັ້ງຢືນວ່າ “ຊາຕະກຳຂອງ ອາເມລິກາ ແລະ ເອີລົບ ຍາມໃດກໍຄຽງຄູ່ກັນ, ຄວາມຫຍຸ້ງຍາກຂອງ ເອີລົບ ກໍແມ່ນຄວາມຫຍຸ້ງຍາກຂອງ ອາເມລິກາ”, ວໍຊີງຕັນ ໄດ້ຊ່ວຍໃຫ້ບັນດາປະເທດ ເອີລົບເຂົ້າຮ່ວມກອງປະຊຸມ Munich ຫລຸດຜ່ອນຄວາມວິຕົກກັງວົນກວ່າ.
ໃນຂະນະນັ້ນ, ເມື່ອເຕື້ອງເຖິງການພົວພັນກັບ NATO, ທ່ານຮອງປະທານາທິບໍດີ Mike Pence ກໍ່ໄດ້ເນັ້ນຫນັກເຖິງຄຳໝັ້ນສັນຍາບໍ່ມີຫຍັງປ່ຽນແທນໄດ້ຂອງອາເມລິກາ ສຳລັບ NATO. ທ່ານ ຮອງປະທານາທິບໍດີ Mike Pence ຕີລາຄາວ່າ ອົງການນີ້ແມ່ນປະຖົມປັດໄຈ ຮັບປະກັນໃຫ້ໂລກມີຄວາມປອດໄພກວ່າ ແລະ ສວມບົດບາດສຳຄັນໃຫ້ພື້ນຖານສັນຕິພາບ ແລະ ຄວາມວັດທະນາຖາວອນຂອງໂລກ.
ບໍ່ພຽງແຕ່ແມ່ນບັນດາຄຳໝັ້ນສັນຍາສະຫນັບສະຫນູນ NATO ເທົ່ານັ້ນ, ທ່ານຮອງປະທານາທິບໍດີ Mike Pence ຍັງຍົກອອກສານຈຳນວນຫນຶ່ງເພື່ອເລັ່ງໃສ່ ລັດເຊຍ, ໃນສະພາບການຫລາຍປະເທດ ເອີລົບ ມີຄວາມວິຕົກກັງວົນວ່າ ອາເມລິກາ ອາດຈະຫລຸດຜ່ອນຫລັກໝັ້ນກັບລັດເຊຍ. ທ່ານຮອງປະທານາທິບໍດີ Mike Pence ຖະແຫລງວ່າ ອາເມລິກາ ຈະບັງຄັບໃຫ້ລັດເຊຍ ຕ້ອງມີຄວາມຮັບຜິດຊອບກ່ຽວກັບບັນຫາ ຢູແກຼນ, ຮຽກຮ້ອງລັດເຊຍ ຕ້ອງເຄົາລົບຂໍ້ຕົກລົງສັນຕິພາບ Mink ຊື່ງໄດ້ຮັບການລົງນາມເມື່ອປີ 2015 ແລະ ຢຸດຕິສະພາບການໃຊ້ຄວາມຮຸນແຮງຢູ່ພາກຕາເວັນອອກຂອງ ຢູແກຼນ.
ປະຕິກິລິຍາຈາກ ເອີລົບ
ຄຳຖະແຫລງວ່າ ອາເມລິກາ ຈະສືບຕໍ່ຮ່ວມເດີນທາງພ້ອມກັບ NATO ແລະ ເອີລົບ ຂອງທ່ານຮອງປະທານາທິບໍດີ Mike Pence ສ່ວນຫນຶ່ງໄດ້ເຮັດໃຫ້ການນຳບັນດາປະເທດ ເອີລົບ ມີຄວາມພຶງພໍໃຈສ່ວນໃດຫນຶ່ງ. ຕອບຄືນຄຳຮຽກຮ້ອງຂອງ ອາເມລິກາ ກ່ຽວກັບເລື່ອງບັນດາປະເທດສຳພັນທະມິດຄວນມີການແບ່ງປັນຢ່າງຍຸຕິທຳໃນການແບກຫາບຄວາມຮັບຜິດຊອບລວມຂອງ NATO, ທີ່ກອງປະຊຸມປ້ອງກັນຄວາມສະຫງົບ Munich, ທ່ານນາງນາຍົກລັດຖະມົນຕີ ເຢຍລະມັນ Angela Merkel ໄດ້ຢືນຢັນວ່າ: ລັດຖະບານປະເທດນີ້ ຈະເຮັດທຸກສິ່ງທຸກຢ່າງເພື່ອຕອບສະຫນອງຄາດໝາຍລາຍຈ່າຍ 2% ຍອດ GDP ໃຫ້ແກ່ການປ້ອງກັນຊາດຮອດປີ 2024. ທ່ານນາງ Angela Merkel ກໍຮຽກຮ້ອງບັນດາປະເທດພ້ອມກັນຮັບມືກັບບັນດາການນາບຂູ່ທົ່ວໂລກ ແລະ ຖືວ່າ ເອີລົບ ຍັງມີຄວາມຕ້ອງການອາເມລິກາໃນການຕໍ່ສູ້ຕ້ານການກໍ່ການຮ້າຍຢູ່.
ເຖິງວ່າມີຄວາມພຶງພໍໃຈ ຕໍ່ຫລັກໝັ້ນຂອງ ອາເມລິກາ ກ່ຽວກັບເອີລົບ ແລະ NATO ກໍຕາມ ແຕ່ມີເຈົ້າຫນ້າເອີລົບ ຫລາຍທ່ານ ຍັງຄົງເນັ້ນຫນັກວ່າ: ອາເມລິກາ ຕ້ອງປະຕິບັດຄຳໝັ້ນສັນຍາທີ່ໄດ້ປະກາດ. ປະທານສະພາເອີລົບ Donald Tusk ຖືວ່າ : ອາເມລິກາ ແລະ ເອີລົບ ຄວນປະຕິບັດທຸກສິ່ງທີ່ຕົນໄດ້ໃຫ້ຄຳໝັ້ນສັນຍາ, ພ້ອມທັງເນັ້ນຫນັກເຖິງຄວາມຈິງວ່າ ໂລກຈະຕົກເຂົ້າສູ່ສະພາບຊົ່ວຮ້າຍ ຖ້າຫາກ ເອີລົບຖືກແບ່ງແຍກ. ທ່ານ Tusk ກໍ່ຮູ້ສຶກເສຍດາຍ ຍ້ອນມີຫລາຍສິ່ງທີ່ເກີດຂຶ້ນໃນສອງສາມເດືອນຜ່ານມາ ເພື່ອອາດຈະຖືວ່າ ທຸກສິ່ງທຸກຢ່າງຍັງຈົບງາມຄືມີຢູ່ແລ້ວ.”. ໃນຂະນະນັ້ນ ປະທານຄະນະກຳມະການເອີລົບ Jean Claude Juncker ຍັງຖະແຫລງວ່າ ປະເທດອາເມລິກາ ຢາກໃຫ້ ເອີລົບມີຄວາມເຂັ້ມແຂງ ແລະ ເປັນເອກະພາບໃນທຸກບັນຫາ, ເປັນຕົ້ນໃນຂົງເຂດປ້ອງກັນຊາດ. ທ່ານ Juncker ເນັ້ນຫນັກເປັນພິເສດວ່າ ປະຈຸບັນ ບໍ່ແມ່ນຈຸດເວລາເພື່ອແບ່ງແຍກເອີລົບ.
ບັນດາປະເທດ ເອີລົບ ແລະ NATO ເຄີຍລໍຖ້າການໄປປະຕິບັດງານ ຮອງປະທານາທິບໍດີ Mike Pence, ປະຈຸບັນ ມີຄວາມອຸ່ນອ່ຽນໃຈກວ່າຕໍ່ນະໂຍບາຍການຕ່າງປະເທດຂອງ ທຳນຽບຂາວ. ເຖິງວ່າ ຍັງບໍ່ທັນຟື້ນຟູການພົວພັນອັນດີງາມຄືກ່ອນນີ້ກໍຕາມ ແຕ່ ອາເມລິກາ ແລະ EU ໄດ້ຫຍັບມໍ່ໃກ້ກັນກວ່າສ່ວນໃດສ່ວນຫນຶ່ງ, ຫັນຄຳໝັ້ນສັນຍາຄູ່ຮ່ວມມືທີ່ຂາດບໍ່ໄດ້ຂອງກັນໃນຫລາຍຂົງເຂດໃຫ້ປະກົດຜົນເປັນຈິງເທື່ອລະກ້າວ.