(vovworld) - ການສ້າງຄາດໝາຍ Bogor ກ່ຽວກັບຫັນການຄ້າ ແລະ ການລົງທຶນເປັນເສລີໃຫ້ສຳເລັດແມ່ນໜຶ່ງໃນບັນດາຄວາມເອົາໃຈໃສ່ແຖວໜ້າຂອງບັນດາພື້ນຖານເສດຖະກິດສະມາຊິກ APEC. ທີ່ກອງປະຊຸມບັນດາເຈົ້າໜ້າທີ່ ອາວຸໂສ APEC 2017 ຄັ້ງທີ 1 (SOM 1) ແລະ ກອງປະຊຸມຕ່າງໆທີ່ກ່ຽວຂ້ອງ, ຢູ່ນະຄອນ ຍາຈາງ, ແຂວງແຄ໋ງຮ່ວາ, ບັນດາຜູ້ແທນໄດ້ສະແດງໃຫ້ເຫັນຄວາມເອົາໃຈໃສ່ເຖິງບັນຫານີ້ ແລະ ມີບັນດາວາລະປຶກສາຫາລືຢ່າງເຂັ້ມງວດ, ພ້ອມທັງໄດ້ສະແດງຄວາມປາດຖະໜາວ່າປີ APEC 2017 ຈະຍົກອອກຂໍ້ສະເໜີ, ຂໍ້ລິເລີ່ມຫຼາຍຢ່າງເພື່ອຊຸກຍູ້ວິວັດທະນາການນີ້.
(ພາບປະກອບຈາກ: Trần Việt/TTXVN)
|
ຍັງມີເວລາພຽງ 3 ປີອີກ, ໝາຍຄວາມວ່າໃນປີ 2020, APEC ຈະຕ້ອງສ້າງຄາດໝາຍ Bogor ເຊິ່ງບັນດາພື້ນຖານເສດຖະກິດສະມາຊິກໄດ້ເຫັນດີເປັນເອກະສັນແຕ່ປີ 1994 ໃຫ້ສຳເລັດ. ຕາມນັ້ນແລ້ວ, APEC ໄດ້ຮັບກຳນົດອາດຈະກາຍເປັນເຂດເສລີ ແລະ ເປີດປະຕູດ້ານການຄ້າ ແລະ ການລົງທຶນໃນອະນາຄົດ. ຄາດໝາຍ Bogor ໄດ້ວາງອອກວິວັດທະນາການສຳລັບບັນດາສະມາຊິກພັດທະນາແມ່ນເຖິງປີ 2010 ແລະ ສຳລັບບັນດາສະມາຊິກພວມພັດທະນາແມ່ນເຖິງປີ 2020.
ສິ່ງທ້າທາຍເຊິ່ງຄາດໝາຍ Bogor ຕ້ອງປະເຊີນໜ້າ
ປະຈຸບັນ, ຄາດໝາຍ Bogor ໄດ້ສຳເລັດໄລຍະທຳອິດແລ້ວ. ແຕ່ເຖິງຢ່າງໃດກໍ່ຕາມ, ໄລຍະຫຼັງຂອງຄາດໝາຍນີ້ພວມປະສົບກັບຄວາມຫຍຸ້ງຍາກຫຼາຍຢ່າງ. ທີ່ໜຶ່ງແມ່ນຍ້ອນລັກສະນະຫຼາຍຮູບຫຼາຍແບບ ແລະ ສັບສົນຂອງພາກພື້ນສຳລັບບັນດາປະເທດມີໂຄງປະກອບເສດຖະກິດກໍ່ຄືມີລະດັບການພັດທະນາທີ່ແຕກຕ່າງກັນທີ່ສຸດ. ດັ່ງນັ້ນ, ບັນດາບຸລິມະສິດພັດທະນາເສດຖະກິດກໍ່ຄືວິທີເຕື້ອງເຖິງບັນດາຂົງເຂດການຮ່ວມມືຂອງບັນດາປະເທດສະມາຊິກກໍ່ແຕກຕ່າງກັນ. ທີສອງແມ່ນ, ຍ້ອນລັກສະນະບໍ່ບັງຄັບຂອງບັນດາຄຳໝັ້ນສັນຍານັ້ນ ດັ່ງນັ້ນ ໃນວິວັດແຫ່ງການປະຕິບັດການຫັນການຄ້າ ແລະ ການຮ່ວມມື, ການຮ່ວມມືດ້ານເຕັກນິກເປັນເສລີ, ຈະເກີດບັນດາຄວາມຫຍຸ້ງຍາກ ແລະ ຄວາມບໍ່ລົງລອຍກັນ. ສຸດທ້າຍແມ່ນບັນດາປັດໄຈປອດເສດຖະກິດຄື: ດ້ານວັດທະນະທຳ, ປະຫວັດສາດ, ສິ່ງແວດລ້ອມ, ຄວາມໝັ້ນຄົງ… ກໍ່ຈະສົ່ງຜົນກະທົບໃດໜຶ່ງເຖິງການຮ່ວມມືດ້ານເສດຖະກິດລະຫວ່າງບັນດາສະມາຊິກ ກໍ່ຄືວິວັດແຫ່ງການຫັນການຄ້າ ແລະ ການລົງທຶນຢູ່ພາກພື້ນເປັນເສລີ. ທ່ານປະລິຍາເອກ Alan Bolard, ຜູ້ອຳນວຍການຄະນະເລຂາ APEC ສາກົນໃຫ້ຮູ້ວ່າ: ວິວັດທະນາການປະຕິບັດຄາດໝາຍ Bogor ພວມຊັກຊ້າລົງ. ແຕ່ເຖິງຢ່າງໃດກໍ່ຕາມ, ທ່ານ Alan ກໍ່ຢັ້ງຢືນວ່າ: ເຖິງວ່າຍັງມີສິ່ງທ້າທາຍຫຼາຍຢ່າງກໍ່ຕາມ, ແຕ່ APEC ຈະບໍ່ປະລະຄວາມຕັດສິນໃຈປະຕິບັດຄາດໝາຍ Bogor ໃຫ້ຖືກຕາມກຳນົດເວລາ:
“ໃນຫຼາຍປີມານີ້, ວິວັດທະນາການປະຕິບັດຄາດໝາຍ Bogor ປະສົບກັບຄວາມຫຍຸ້ງຍາກພໍສົມຄວນ ແລະ ມີສັນຍານຊັກຊ້າລົງ. ແຕ່ເຖິງຢ່າງໃດກໍ່ຕາມ, ນີ້ແມ່ນຄາດໝາຍແຖວໜ້າຂອງ APEC, ດ້ວຍຄວາມເຫັນດີເຫັນພ້ອມຂອງບັນດາພື້ນຖານເສດຖະກິດສະມາຊິກມຸ່ງໄປເຖິງສະພາບແວດລ້ອມການຄ້າເສລີ ແລະ ເປີດປະຕູ. ດັ່ງນັ້ນ, APEC ພວມມານະພະຍາຍາມຈົນສຸດຄວາມສາມາດເພື່ອປະຕິຮູບລະບອບ, ກົນໄກ, ການຮ່ວມມືຊາຍແດນ… ເພື່ອໃຫ້ຄາດໝາຍນີ້ປະສົບຜົນສຳເລັດ ເຖິງວ່າຍັງມີຫຼາຍບັນຫາກ່ຽວກັບວິຊາສະເພາະຈຳເປັນຕ້ອງນຳມາປຶກສາຫາລື.”
ປະລິຍາເອກ Alan ຫວັງວ່າບັນດາກອງປະຊຸມໃນຂອບເຂດປີ APEC 2017 ຢູ່ຫວຽດນາມ, ບັນດາສະມາຊິກຂອງ APEC ຈະຍົກອອກຫຼາຍຂໍ້ລິເລີ່ມ, ມາດຕະການຕັ້ງໜ້າ, ປະກອບສ່ວນຍູ້ໄວວິວັດການປະຕິບັດຄາດໝາຍ Bogor ໃຫ້ສຳເລັດ.
APEC 2017 ມຸ່ງໄປເຖິງຊຸກຍູ້ຄາດໝາຍ Bogor
ເຖິງວ່າ, ຄາດໝາຍ Bogor ບໍ່ແມ່ນຈຸດສຸມຂອງປີ APEC 2017 ເຊິ່ງ ຫວຽດນາມ ເປັນປະເທດເຈົ້າພາບກໍ່ຕາມ, ແຕ່ບຸລິມະສິດ 4 ຢ່າງເຊິ່ງ ຫວຽດນາມ ສະເໜີ ກໍ່ມີເນື້ອແທ້ສ້າງຄວາມສະດວກໃຫ້ແກ່ດ້ານການຄ້າ ແລະ ການລົງທຶນ, ຮັດແຄບຊ່ອງຫວ່າງການພັດທະນາລະຫວ່າງບັນດາພື້ນຖານເສດຖະກິດສະມາຊິກ, ສ້າງກຳລັງໜູນເພື່ອໃຫ້ບັນດາພື້ນຖານເສດຖະກິດມີຈຸດເລີ່ມຕົ້ນຕ່ຳ ມີການເຕີບໂຕໝັ້ນຄົງກ່ວາ. ນັກຊ່ຽວຊານດ້ານເສດຖະກິດ ຫວໍຈີ໋ແທ່ງ, ຖືວ່າ: ບັນດາບຸລິມະສິດຂອງ ຫວຽດນາມ ໃນປີ 2017 ໄດ້ຮັບຕີລາຄາວ່າມີຫົວຄິດປະດິດສ້າງ, ຍ້ອນວ່າໄດ້ເຮັດໃຫ້ເລື່ອງນຳບັນດານະໂຍບາຍຂອງ APEC ລົງສູ່ວິສາຫະກິດແຕ່ລະແຫ່ງ, ປະຊາຊົນແຕ່ລະຄົນປະກົດຜົນເປັນຈິງ:
“ຫວຽດນາມ ຢາກຫັນຄາດໝາຍນີ້ເປັນລະອຽດຢູ່ໃນ 2 ລະດັບ: ນັ້ນແມ່ນແນວຄວາມຄິດ, ນະໂຍບາຍ, ການຮ່ວມມື ແລະ ການແບ່ງປັນ. ອັນທີສອງ ເຊິ່ງເປັນສິ່ງສຳຄັນທີ່ສຸດຂອງ APEC ນັ້ນແມ່ນການເຄືຶ່ອນໄຫວຂອງຕະຫຼາດ, ການເຄື່ອນໄຫວຂອງສັງຄົມ, ການເຄື່ອນໄຫວຂອງວິສາຫະກິດ, ຕິດພັນກັບສະພາບຕົວຈິງທີ່ພວມເກີດຂຶ້ນເຮັດແນວໃດເພື່ອໃຫ້ຄວາມຂະຫຍັນຂັນເຄື່ອນຂອງ APEC, ພຶດຕິກຳຕົວຈິງ ແລະ ກາລະໂອກາດນັ້ນຕິດພັນກັບປະຊາຊົນແຕ່ລະຄົນ, ວິສາຫະກິດແຕ່ລະແຫ່ງ.”
ໃນການຕອບສຳພາດຕໍ່ສື່ມວນຊົນເມື່ອຕົ້ນປີນີ້, ທ່ານ ຟ້າມບີ່ງມີງ, ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ກໍ່ເນັ້ນໜັກວ່າ:
“ສຳລັບຄາດໝາຍ Bogor, ຫວຽດນາມ ເປັນປະເທດເຈົ້າພາບ APEC ໃນໄລຍະຕັດສິນຊີ້ຂາດ, ນັ້ນແມ່ນຄາດໝາຍ Bogor ກ່ຽວກັບການຫັນການຄ້າ, ການລົງທຶນເປັນເສລີໃຫ້ສຳເລັດໃນປີ 2020. ສິ່ງສຳຄັນກ່ວານັ້ນແມ່ນຢູ່ APEC 2017, ພວກເຮົາຈະພ້ອມກັບບັນດາປະເທດສະມາຊິກສ້າງວິໄສທັດຫຼັງປີ 2020, ໝາຍຄວາມວ່າ ກ້າວເຂົ້າສູ່ທົດສະວັດທີ 4, ນັບແຕ່ APEC ໄດ້ຮັບການສ້າງຕັ້ງເມື່ອປີ 1989 ມາຮອດປະຈຸບັນ. ປະຕິບັດຄາດໝາຍ Bogor ໄດ້ແລ້ວ, ສິ່ງໃດຈະເກີດຂຶ້ນພາຍຫຼັງ Bogor?”
ປີ APEC 2017 ຫາກໍ່ເລີ່ມຕົ້ນ, ຍັງມີວາລະປຶກສາຫາລື, ການເຈລະຈາຫຼາຍຄັ້ງກ່ຽວກັບອະນາຄົດແຫ່ງການພັດທະນາຂອງ APEC ຈະດຳເນີນໃນປີນີ້. ດ້ວຍຄວາມເຫັນດີເຫັນພ້ອມ ແລະ ຄວາມຕັດສິນໃຈຂອງບັນດາການນຳ APEC ແລະ ໃນຖານະເປັນປະເທດເຈົ້າພາບ, ຫວຽດນາມ ກໍ່ເຮັດຈົນສຸດຄວາມສາມາດຂອງຕົນເພື່ອພ້ອມກັບບັນດາປະເທດສະມາຊິກຊຸກຍູ້ການສ້າງບັນດາຄາດໝາຍ Bogor ກ່ຽວກັບການຫັນການຄ້າ, ແລະ ການລົງທຶນເປັນເສລີໃຫ້ສຳເລັດໃນປີ 2020, ຮ່ວມແຮງຮ່ວມໃຈສ້າງວິໄສທັດການຮ່ວມສຳພັນພາກພື້ນໃນໄລຍະພັດທະນາໃໝ່. ນີ້ແມ່ນພື້ນຖານສຳຄັນເພື່ອພ້ອມກັນສ້າງການພົວພັນຄູ່ຮ່ວມມື ອາຊີ - ປາຊີຟິກ ເພື່ອການພັດທະນາແບບຍືນຍົງ ແລະ ກວມລວມໃນສະຕະວັດທີ 21.