(vovworld)- ຮ່າງເອກະສານຍື່ນສະເຫນີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກກອມມູນິດຫວຽດນາມ(ກອງປະຊຸມໃຫຍ່ຄັ້ງທີ XII ຂອງພັກ) ໄດ້ເນັ້ນຫນັກຢ່າງແຮງເຖິງຈຸດໝາຍຂອງການຕ່າງປະເທດໃນໄລຍະ 5 ປີຈະມາເຖິງ ແມ່ນ “ຮັບປະກັນຜົນປະໂຫຍດຂອງປະເທດຊາດຢ່າງສຸດຂີດ ບົນຫລັກການພື້ນຖານຂອງກົດໝາຍສາກົນ, ສະເຫມີພາບ ແລະ ຕ່າງຝ່າຍຕ່າງມີຜົນປະໂຫຍດ”. ຈຸດໝາຍນີ້ຖືກຍົກອອກມາໂດຍອີງໃສ່ບັນດາບົດຮຽນທີ່ຖອດຖອນໄດ້ໃນ 30 ປີແຫ່ງການປ່ຽນແປງໃຫມ່, ສອດຄ່ອງກັບສະຖານະການ ແລະສະພາບການໃຫມ່. ບົດຂຽນຂອງນັກຂ່າວ ເຮືອງຢາງ ກ່ຽວກັບການທົບທວນຄືນບັນດາໝາກຜົນການຕ່າງປະເທດ ຊື່ງຫວຽດນາມບັນລຸໄດ້ໃນ 5 ປີຜ່ານມາ ກໍຄືຄວາມໝາຍຂອງການເຊີດຊູຜົນປະໂຫຍດຂອງ ປະເທດຊາດໃນການຮ່ວມມືກັບສາກົນ.
ໃນໄລຍະ 5 ປີຜ່ານມາ, ຫວຽດນາມ ໄດ້ຜັນຂະຫຍາຍບັນດາການເຄື່ອນໄຫວການຕ່າງປະເທດສອງຝ່າຍ ແລະ ຫລາຍຝ່າຍຢ່າງຄົບຊຸດ ແລະ ຮອບດ້ານໂດຍອີງໃສ່ການສົມທົບກັນຢ່າງແຫນ້ນແຟ້ນລະຫວ່າງການພົວພັນກັບຕ່າງປະເທດຂອງພັກ, ການທູດຂອງລັດ, ການພົວພັນກັບຕ່າງປະເທດຂອງສະພາແຫ່ງຊາດ ແລະ ການພົວພັນກັບຕ່າງປະເທດຂອງປະຊາຊົນ.
ກອງປະຊຸມໃຫຍ່ຄັ້ງທີ XI ຂອງພັກກອມມູນິດຫວຽດນາມ
ພາບ:laocai.vn
|
ການເຄື່ອນໄຫວການຕ່າງປະເທດໃນ 5 ປີຜ່ານມາ ປະກອບສ່ວນຍົກສູງທີ່ຕັ້ງບົດບາດຂອງປະເທດຊາດ
ໃນໄລຍະ 5 ປີຜ່ານມາ, ຫວຽດນາມ ໄດ້ສຳເລັດການສ້າງຂອບເຂດການພົວພັນຄູ່ຮ່ວມມືກັບເກືອບປະເທດທີ່ມີຜົນສະທ້ອນໃຫຍ່ເຖິງພາກພື້ນ ແລະ ໃນໂລກ. ຫວຽດນາມ ໄດ້ສ້າງການພົວພັນຄູ່ຮ່ວມມືຍຸດທະສາດກັບ 8 ປະເທດ, ຍົກການພົວພັນກັບ 2 ປະເທດຂຶ້ນສູ່ລະດັບຄູ່ຮ່ວມມືຍຸດທະສາດຮອບດ້ານ ຫລື ເລິກເຊິ່ງກວ້າງຂວາງ, ສ້າງການພົວພັນຄູ່ຮ່ວມມືຮອບດ້ານກັບ 3 ປະເທດ. ພິເສດ ໃນ 5 ປີຜ່ານມາ, ຫວຽດນາມໄດ້ເຊື່ອມໂຍງເຂົ້າກັບພື້ນຖານເສດຖະກິດພາກພື້ນ ແລະ ໂລກຢ່າງເລິກເຊິ່ງ ແລະ ຮອບດ້ານກວ່າ ຄື: ສຳເລັດ 3 ສັນຍາການຄ້າເສລີສອງຝ່າຍ (FTA) ລຸ້ນໃຫມ່ ກັບສເກົາຫລີ, ພັນທະມິດເສດຖະກິດ ອາຊີ - ເອີລົບ ແລະ ສະຫະພາບເອີລົບ. ສຳລັບປະຊາຄົມເສດຖະກິດ ອາຊຽນ (AEC), ຫວຽດນາມ ຕັ້ງຫນ້າຜັນຂະຫຍາຍບັນດາມາດຕະການບຸລິມະສິດ ເພື່ອປະຕິບັດແຜນການສັງລວມກ່ຽວກັບການສ້າງ AEC. ເດືອນ 10/2015, ຫວຽດນາມ ພ້ອມກັບບັນດາປະເທດສະມາຊິກ ສິ້ນສຸດການເຈລະຈາສັນຍາຄູ່ຮ່ວມມືຂ້າມປາຊີຟີກ(TPP).
ສຳລັບບັນດາບັນຫາສັບສົນ, ໃນນັ້ນ ມີບັນຫາທະເລຕາເວັນອອກ, ຫວຽດນາມ ມີຫລາຍແຜນນະໂຍບາຍ, ມາດຕະການແກ້ໄຂ, ສ້າງຄວາມເຫັນດີເຫັນພ້ອມຢ່າງສູງໃນທົ່ວພັກ, ທົ່ວປວງຊົນ ແລະ ໄດ້ຮັບການສະຫນັບສະຫນູນຈາກສາກົນ. ບັນລຸໄດ້ບັນດາໝາກຜົນດັ່ງກ່າວ ຍ້ອນ ຫວຽດນາມ ຢືດໝັ້ນຈຸດໝາຍການຕ່າງປະເທດ “ເພື່ອຜົນປະໂຫຍດຂອງປະເທດຊາດ ເພື່ອປະເທດຫວຽດນາມ ສັງຄົມນິຍົມ ຮັ່ງມີເຂັ້ມແຂງ”. ຈຸດໝາຍນີ້ຈະໄດ້ສືບທອດໃນອາຍຸການ ຊຸດທີ 12 ບົນພື້ນຖານສູງກວ່າ. ທີ່ການພົບປະກັບບັນດາຄະນະທູຕານຸທູດ ກ່ອນດຳເນີນ ກອງປະຊຸມໃຫຍ່ຄັ້ງທີ XII ຂອງພັກ, ທ່ານ ຮ່ວາງບີງກວນ, ຫົວຫນ້າຄະນະພົວພັນຕ່າງປະເທດສູນກາງ ເນັ້ນຫນັກວ່າ:
“ກ່ຽວກັບແຜນນະໂຍບາຍ, ແນວທາງການຕ່າງປະເທດ, ຮ່າງບົດລາຍງານການເມືອງຂອງພັກກອມມູນິດຫວຽດນາມ ໄດ້ເນັ້ນຫນັກວ່າ: ຈຸດໝາຍຂອງການພົວພັນຕ່າງປະເທດແມ່ນຮັບປະກັນຜົນປະໂຫຍດ ຂອງປະເທດຊາດຢ່າງສຸດຂີດ ບົນບັນດາຫລັກການພື້ນຖານຂອງກົດໝາຍສາກົນ, ມີຄວາມສະເຫມີພາບ ແລະ ຕ່າງຝ່າຍຕ່າງມີຜົນປະໂຫຍດ, ປະຕິບັດແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ການຮ່ວມມື ແລະ ພັດທະນາ, ການພົວພັນກັບຕ່າງປະເທດແມ່ນຫລາຍຮູບຫລາຍແບບ ແລະ ຫລາຍຝ່າຍ, ເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນ, ເປັນເພື່ອນມິດ, ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ແມ່ນສະມາຊິກມີຄວາມຮັບຜິດຊອບຂອງປະຊາຄົມສາກົນ. ການເຄື່ອນໄຫວການຕ່າງປະເທດ ເພື່ອຮັບໃຊ້ຈຸດໝາຍຮັກສາສະພາບແວດລ້ອມສັນຕິພາບ, ສະຖຽນລະພາບ, ຍາດແຍ່ງບັນດາແຫລ່ງກຳລັງຈາກພາຍນອກຢ່າງສຸດຂີດເພື່ອພັດທະນາປະເທດຊາດ.”
ຮັບປະກັນຜົນປະໂຫຍດປະເທດຊາດຢ່າງສຸດຂີດ ແມ່ນຄຳຮຽກຮ້ອງສຳລັບວຽກງານການຕ່າງປະເທດໃນ 5 ປີຈະມາເຖິງ
ທ່ານ ບຸ່ຍຮົ່ງຟຸກ, ອະດີດເອກອັກຄະລັດຖະທູດ ຫວຽດນາມ ປະຈຳຈີນ ຖືວ່າ: ຮ່າງເອກະສານ ກອງປະຊຸມໃຫຍ່ຄັ້ງທີ XII ຂອງພັກ ໄດ້ຍົກອອກບັນຫາຈຳນວນຫນຶ່ງທີ່ເລິກເຊິ່ງ, ມີຄວາມໝາຍ. ນັ້ນແມ່ນຮັບປະກັນຜົນປະໂຫຍດຂອງປະເທດຊາດ ຢ່າງສຸດຂີດ ທັງແມ່ນຈຸດໝາຍ, ທັງແມ່ນຄວາມຮຽກຮ້ອງຕ້ອງການສຳລັບວຽກງານການຕ່າງປະເທດໃນ 5 ປີຈະມາເຖິງ. ທັດສະນະນີ້ແມ່ນເຊື່ອມຊຶມແນວຄິດໂຮ່ຈິມີນໃນບັນຫາຊົນຊາດ ແລະ ເໝາະສົມກັບສະພາບການປະຈຸບັນ.
“ປະເທດຊາດພວມຢືນຢູ່ຕໍ່ຫນ້າ 2 ຫນ້າທີ່ໃຫຍ່ສຸດ, ມີລັກສະນະຍຸດທະສາດ. ນັ້ນແມ່ນຕ້ອງພັດທະນາປະເທດຊາດໃຫ້ນັບມື້ນັບຮັ່ງມີເຂັ້ມແຂງ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປົວແປງ. ທີສອງ ແມ່ນປົກປັກຮັກສາເອກະລາດ, ອະທິປະໄຕ, ທ້ອນໂຮມປະເທດຊາດເປັນເອກະພາບໃນສະພາບການທະເລຕາເວັນອອກພວມສັບສົນ, ຍາກທີ່ຄາດຄະເນໄດ້. ຂ້າພະເຈົ້າຖືວ່າ ພວກເຮົາຖືຜົນປະໂຫຍດ ຂອງປະເທດຊາດ ເປັນສິ່ງສຳຄັນກວ່າໝູ່ ເພາະວ່າ ປະຈຸບັນ ບັນດາປະເທດໃນໂລກລ້ວນແຕ່ປະຕິບັດຄືແນວນັ້ນ. ນັ້ນກໍແມ່ນບົດຮຽນຊື່ງພັກກອມມູນິດຫວຽດນາມ ຖອດຖອນມາໄດ້ໃນ 30 ປີແຫ່ງການປະຕິບັດກິດຈະການປ່ຽນແປງໃຫມ່.”
ໃນສະພາບສັນຕິພາບ, ຄວາມໝັ້ນຄົງ ແລະ ຜືນແຜ່ນດິນອັນຄົບຖ້ວນຂອງຫລາຍປະເທດໃນໂລກພວມຖືກນາບຂູ່, ມີຂົງເຂດຮ່ວມມືສຳຄັນທີ່ສຸດໃນນະໂຍບາຍການຕ່າງປະເທດລວມຂອງຫວຽດນາມ ນັ້ນແມ່ນການຮ່ວມມືດ້ານປ້ອງກັນປະເທດ. ພົນຈັດຕະວາ ຫວູຕຽນຈ້ອງ, ຫົວຫນ້າສະຖາບັນການພົວພັນກັບສາກົນກ່ຽວກັບການປ້ອງກັນຊາດ ໃຫ້ຮູ້ວ່າ: ວຽກງານພົວພັນກັບຕ່າງປະເທດໃນການປ້ອງກັນຊາດໄດ້ປະຕິບັດຢ່າງສະເຫມີຕົ້ນສະເໝີປາຍ ແຜນນະໂຍບາຍຂອງພັກ ແລະ ລັດ “ເປັນເພື່ອນມິດ, ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈຂອງທຸກປະເທດໃນປະຊາຄົມໂລກ”. ຫວຽດນາມ ມີແຜນນະໂຍບາຍຮ່ວມມືປ້ອງກັນຊາດ - ການທະຫານ ກັບທຸກປະເທດບ້ານໃກ້ເຮືອນຄຽງ, ບັນດາປະເທດໃຫຍ່, ບັນດາປະເທດທີ່ເປັນມູນເຊື້ອ, ພິເສດແມ່ນບັນດາປະເທດໃນອາຊຽນ. ພົນຈັດຕະວາ ຫງວຽນຕຽນຈ້ອງ ເວົ້າວ່າ:
“ພວກເຮົາຮ່ວມມືເພື່ອເພີ່ມທະວີກຳລັງຄວາມສາມາດປ້ອງກັນຊາດ - ການທະຫານ ເພື່ອປົກປັກຮັກສາອະທິປະໄຕ, ເອກະລາດ ແລະ ຜືນແຜ່ນດິນອັນຄົບຖ້ວນຂອງປະເທດຊາດ, ບົນຫລັກການ ແມ່ນຮັກສາສະພາບແວດລ້ອມສັນຕິພາບ, ຮັບປະກັນສັນຕິພາບ, ສະຖຽນລະພາບ ເພື່ອພັດທະນາປະເທດຊາດ ພ້ອມທັງປະກອບສ່ວນໃຫ້ສະພາບແວດລ້ອມສັນຕິພາບລວມຂອງພາກພື້ນ, ສ້າງພາກພື້ນ ອາຊີຕາເວັນອອກສ່ຽງໃຕ້ ກໍຄື ອາຊີ ປາຊີຟີກ ຈະເລີນຮຸ່ງເຮືອງ ແລະ ທຸກປະເທດກໍລ້ວນແຕ່ໄດ້ຮັບຜົນປະໂຫຍດ.”
ດ້ວຍແຜນນະໂຍບາຍຮ່ວມມືຢ່າງຖືກຕ້ອງຂອງຕົນ, ນະໂຍບາຍການຕ່າງປະເທດຂອງຫວຽດນາມ ໄດ້ປະກອບສ່ວນສຳຄັນເຂົ້າໃນການຮັກສາສະພາບສັນຕິພາບ, ສະຖຽນລະພາບ, ມີຄວາມສະດວກໃຫ້ແກ່ການພັດທະນາ, ປະກອບສ່ວນຢ່າງຕັ້ງຫນ້າເຂົ້າໃນການປະຕິບັດບັນດາເປົ້າໝາຍພັດທະນາເສດຖະກິດສັງຄົມ ແລະ ປົກປັກຮັກສາອະທິປະໄຕຜືນແຜ່ນດິນ, ເຂດທະເລໝູ່ເກາະ, ປົກປັກຮັກສາຄວາມໝັ້ນຄົງຂອງປະເທດຊາດ.