ສິ້ນສຸດປີ 2016, ເຊິ່ງແມ່ນປີທີ່ປະຊາຊົນ ແລະ ວິສາຫະກິດເລີ່ມທຸລະກິດ, ແຜນນະໂຍບາຍສ້າງລັດຖະບານໃຫ້ມີຄວາມສັດຊື່ບໍລິສຸດ, ສ້າງສັນ ໄດ້ສະແດງໃຫ້ເຫັນຢ່າງຈະແຈ້ງ ແລະ ມີໝາກຜົນຢ່າງຕັ້ງໜ້າ. ປີ 2017, ລັດຖະບານຫວຽດນາມສືບຕໍ່ຜັນຂະຫຍາຍແຜນນະໂຍບາຍນີ້ ໂດຍຜ່ານການປະຕິບັດດວ້ຍຫົວຂໍ້ທີ່ກວ້າງກວ່າ, ກວມລວມໃນທຸກຂົງເຂດ, ນັ້ນແມ່ນ “ເພີ່ມທະວີລະບຽບວິໄນ, ຍົກສູງນ້ຳໃຈຮັບຜິດຊອບ, ແຂ່ງຂັນກັນຢ່າງມີຫົວຄິດປະດິດສ້າງ, ພັດທະນາໄວ ແລະ ຍືນຍົງ ”. ນີ້ແມ່ນບາດກ້າວຕໍ່ໄປສຳຄັນທີ່ສຸດ ເພື່ອປະຕິບັດຄວາມມຸ່ງຫວັງສ້າງລັດຖະບານໃຫ້ມີຄວາມສັດຊື່ບໍລິສຸດ, ສ້າງສັນ ເຊິ່ງຜູ້ນຳລັດຖະບານໄດ້ວາງອອກ.
ກອງປະຊຸມສະໄໝສາມັນປະຈຳເດືອນຂອງລັດຖະບານ
|
ສ້າງລັດຖະບານໃຫ້ມີຄວາມສັດຊື່ບໍລິສຸດແມ່ນມີຄວາມໝາຍເຊັ່ນ ດຽວກັນກັບສ້າງລັດຖະບານເຄື່ອນໄຫວຢ່າງມີປະສິດທິຜົນ, ລັດຖະບານທີ່ມີການເວົ້າໄປຄຽງຄູ່ກັບການກະທຳ, ມີຄວາມສຳພັນກັນຢ່າງແໜ້ນແຟ້ນລະຫວ່າງສະມາຊິກດ້ວຍກັນ ແລະ ກັບທົ່ວລະບົບ ເພື່ອມີກົນໄກເຄື່ອນໄຫວທີ່ເປັນເອກະພາບ. ລັດຖະບານທີ່ມີຄວາມສັດຊື່ບໍລິສຸດ ກໍ່ແມ່ນລັດຖະບານບໍ່ມີການສໍ້ລາດບັງຫຼວງ, ຖືວຽກງານຂອງລັດເປັນສຳຄັນ, ສຸດຈິດສຸດໃຈເພື່ອຜົນປະໂຫຍດຂອງປະເທດຊາດ.
ລັດຖະບານມີຄວາມສ້າງສັນໃນການພັດທະນາ ແມ່ນລັດຖະບານທີ່ມີການສ້າງບັນດາເງື່ອນໄຂສະດວກໃຫ້ແກ່ວິສາຫະກິດ ແລະ ພື້ນຖານເສດຖະກິດຕະຫຼາດເຄື່ອນໄຫວຢ່າງສະດວກສະບາຍ. ເພື່ອໃຫ້ໄດ້ຄືແນວນັ້ນ, ຕ້ອງປ່ຽນແປງກອບນະໂຍບາຍ, ບັນດາເງື່ອນໄຂພື້ນຖານໂຄງລ່າງ, ແຫຼ່ງຊັບພະຍາກອນມະນຸດ...
ສ້າງພະລັງແຮງນັບແຕ່ປີ 2016
ປີ 2016, ດ້ວຍການເລືອກເຝັ້ນໃຫ້ເປັນປີເລີ່ມທຸລະກິດ, ບັນດາຫາງສຽງໄດ້ເຫັນປະຈັກຕາການຫັນປ່ຽນຢ່າງຕັ້ງໜ້າ ຂອງລັດຖະບານໃນການປະຕິບັດແຜນນະໂຍບາຍສ້າງລັດຖະບານໃຫ້ມີຄວາມສັດຊື່ບໍລິສຸດ, ສ້າງສັນ, ມີການກະທຳ, ຮັບໃຊ້ປະຊາຊົນ ແລະ ວິສາຫະກິດ. ຕາມນັກຊ່ຽວຊານດ້ານເສດຖະກິດ ຟ້າມຈີລານ ແລ້ວ, ປະຊາຊົນ ແລະ ປະຊາຄົມວິສາຫະກິດຕີລາຄາດ້ານຈິດໃຈສູງທີ່ສຸດ, ພິເສດແມ່ນຂອງທ່ານນາຍົກລັດຖະມົນຕີນັບແຕ່ເມື່ອໄດ້ສາບານຕົວເຂົ້າດຳລົງຕຳແໜ່ງ ທ່ານໄດ້ມີສະຕິ ແລະ ມີຖະແຫຼງການຢ່າງຈະແຈ້ງທີ່ສຸດກ່ຽວກັບການສ້າງລັດຖະບານທີ່ມີຄວາມສ້າງສັນ, ລັດຖະບານມີຄວາມສັດຊື່ບໍລິສຸດ ຕ້ອງໄປພ້ອມກັບ 2 ປັດໃຈໃໝ່ເມື່ອທຽບໃສ່ລັດຖະບານຊຸດກ່ອນ ນັ້ນແມ່ນລັດຖະບານມີການກະທຳ ແລະ ລັດຖະບານຮັບໃຊ້. ສະແດງໃຫ້ເຫັນແຈ້ງທີ່ສຸດແມ່ນເລື່ອງທ່ານນາຍົກລັດຖະມົນຕີໄດ້ມີການພົບປະກັບປະຊາຄົມວິສາຫະກິດ, ພົບປະກັບປະຊາຊົນ ແລະ ບັນດາຊັ້ນຄົນອື່ນໃນສັງຄົມເປັນຫຼາຍຄັ້ງ. ທ່ານນາຍົກລັດຖະມົນຕີກໍ່ຂຸ້ນຂ້ຽວປະກາດໃຊ້ບັນດາໂຄງການກະທຳຢ່າງຈະແຈ້ງທີ່ສຸດໃຫ້ບັນດາກະຊວງ, ຂະແໜງການກໍ່ຄືບັນດາທ້ອງຖິ່ນເພື່ອປະຕິບັດຈິດໃຈສ້າງສັນ ສ້າງສະພາບແວດລ້ອມແຫ່ງການດຳເນີນທຸລະກິດທີ່ສະດວກໃຫ້ແກ່ການພັດທະນາຂອງວິສາຫະກິດຫວຽດນາມ.
“ຄັ້ງນີ້ ລັດຖະບານບໍ່ພຽງແຕ່ຍົກອອກໂຄງການເຄື່ອນໄຫວໃນໄລຍະ 1 ປີ ເທົ່ານັ້ນ ຫາກຍັງຍົກອອກໂຄງການກະທຳໄລຍະ 5 ປີອີກດ້ວຍ ເພື່ອສ້າງລັດຖະບານທີ່ມີຄວາມສ້າງສັນ, ມີສະພາບແວດລ້ອມແຫ່ງການດຳເນີນທຸລະກິດມີລັກສະນະປະຕິຮູບ, ມີຄວາມແຕກຕ່າງເມື່ອສົມທຽບໃສ່ກ່ອນນີ້.ຈິດໃຈດັ່ງກ່າວຂອງທ່ານນາຍົກລັດຖະມົນຕີໄດ້ຮັບຄວາມເຫັນດີເຫັນພ້ອມ, ສະໜັບສະໜູນຈາກບັນດາທ່ານຮອງນາຍົກລັດຖະມົນຕີ. ບາງກະຊວງ, ຂະແໜງການກໍ່ມີການຫັນປ່ຽນສ່ວນໃດໜຶ່ງ”
ຫັນແຜນນະໂຍບາຍສ້າງລັດຖະບານທີ່ມີຄວາມສ້າງສັນໃຫ້ປະກົດຜົນເປັນຈິງຍັງສະແດງອອກໃນເລື່ອງປັບປຸງການປະກາດໃຊ້ບັນດາເອກະສານລຸ່ມ ກົດໝາຍເພື່ອສ້າງກຳລັງໜູນໃຫ້ແກ່ການພັດທະນາ. ທ່ານ ຫວູມາວ ອະດີດຫົວໜ້າກຳມາທິການ ການຕ່າງປະເທດສະພາແຫ່ງຊາດ, ຕີລາຄາວ່າ:
“ລັດຖະບານຊີ້ນຳຢ່າງເດັດດ່ຽວ, ໃກ້ຊິດຕິດແທດຢ່າງເລິກເຊິ່ງກັບຮາກຖານ ແລະ ເຮັດໃຫ້ປະຊາຊົນມີຄວາມໝັ້ນໃຈ, ເປັນຕົ້ນແມ່ນສຳລັບບັນດາວິສາຫະກິດ. ລັດຖະບານກໍ່ສະແດງໃຫ້ເຫັນຢ່າງຈະແຈ້ງກ່ຽວກັບສະຕິຖືກົດໝາຍເປັນສຳຄັນ ເມື່ອທ່ານນາຍົກລັດຖະມົນຕີສະເໜີໃຫ້ເບິ່ງຄືນບັນດາຈົດໝາຍລັດຖະການ, ຮຽກຮ້ອງໃຫ້ຫຼຸດຜ່ອນຈົດໝາຍລັດຖະການລົງ. ນີ້ແມ່ນແນວຄວາມຄິດທີ່ດີ, ຕໍ່ຈາກນັ້ນແມ່ນລັດຖະບານສະເໜີໃຫ້ສະພາແຫ່ງຊາດຖືເປັນສຳຄັນກວ່າ, ຊ່ວຍລັດຖະບານປັບປຸງລະບົບກົດໝາຍໃຫ້ສົມບູນແບບ ເພື່ອໃຫ້ລັດຖະບານມີພື້ນຖານໃນການບໍລິຫານ ”
ເປັນເຈົ້າການກວ່າໃນປີ 2017
ໝາກຜົນໃນເບື້ອງຕົ້ນພາຍຫຼັງ 9 ເດືອນທີ່ປະຕິບັດແຜນນະໂຍບາຍລັດຖະບານສັດຊື່ບໍລິສຸດ, ສ້າງສັນ, ມີການກະທຳ, ຮັບໃຊ້ໄດ້ຮັບການຕີລາຄາສູງຈາກຫາງສຽງ. ສິ່ງດັ່ງກ່າວນີ້ແມ່ນກຳລັງໜູນເພື່ອໃຫ້ລັດຖະບານສືບຕໍ່ຜັນຂະຫຍາຍແຜນນະໂຍບາຍດັ່ງກ່າວໃນໄລຍະຈະມາເຖິງ. ສ້າງພະລັງແຮງໃຫ້ເພື່ອນຮ່ວມງານແລະ ທັງກົງຈັກອຳນາດການປົກຄອງ 63 ແຂວງ, ນະຄອນທີ່ວາລະປະຊຸມທ້າຍປີ 2016, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີບັນດາສະມາຊິກຕ້ອງມີຄວາມຕັດສິນໃຈດ້ານການເມືອງ, ມີຄວາມມຸ່ງຫວັງເພື່ອນຳປະເທດຊາດພັດທະນາໃນໄລຍະໃໝ່.
“ບົດບາດໜ້າທີ່ແມ່ນສຳຄັນທີ່ສຸດ ແລະ ວຽກທຳອິດທີ່ພວກເຮົາມັກເຮັດແມ່ນການຄຸ້ມຄອງສັງຄົມ, ການປ້ອງກັນຊາດປ້ອງກັນຄວາມສະຫງົບ, ການພົວພັນຕ່າງປະເທດ. ແຕ່ພວກເຮົາຕ້ອງເວົ້າເຖິງວຽກທີ່ 2 ແມ່ນສ້າງອຳນາດການປົກຄອງ, ສ້າງລັດຖະບານໃຫ້ມີຄວາມສ້າງສັນ, ມີຄວາມສັດຊື່ບໍລິສຸດ, ມີການກະທຳ, ຮັບໃຊ້ປະຊາຊົນ ແລະ ວິສາຫະກິດ.ພວກເຮົາຕ້ອງເປັນເຈົ້າການກວ່າ, ຕ້ອງເຮັດໃຫ້ດີກວ່າກ່ຽວກັບວຽກງານທີ່ 2 ນີ້ຈຶ່ງສະໜິດຕິດພັນກັບປະຊາຊົນໄດ້”
ໃນເງື່ອນໄຂປີ 2017 ນີ້ແມ່ນມີຄວາມຫຍຸ້ງຍາກຫຼາຍຢ່າງ ສະນັ້ນຜູ້ນຳໜ້າລັດຖະບານຈຶ່ງໄດ້ກຳນົດ ຖ້າຫາກບໍ່ມີການປ່ຽນແປງໃໝ່, ບໍ່ມີການປະຕິຮູບ ຫວຽດນາມຈະປະສົບກັບກຳລັງຂີດຂວາງໃຫຍ່ຫຼວງທີ່ສຸດໃນການປະຕິບັດບັນດາຄາດໝາຍທີ່ໄດ້ວາງອອກ.
“ພວກເຮົາມີຄວາມເປັນເອກະພາບຕໍ່ຫົວຂໍ້ປີ 2017 ນັ້ນແມ່ນ ເພີ່ມທະວີປະຕິບັດລະບຽບວິໄນ, ຍົກສູງນ້ຳໃຈຮັບຜິດຊອບ, ແຂ່ງຂັນກັນຢ່າງມີຫົວຄິດປະດິດສ້າງ, ພັດທະນາໄວ ແລະ ຍືນຍົງ. ຄັ້ງນີ້ພວກເຮົາຕ້ອງມີຫົວຄິດປະດິດສ້າງ, ມີການແຂ່ງຂັນກັນ ຍ້ອນລະດັບການພັດທະນາຂອງຫວຽດນາມຍັງຕ່ຳຢູ່ເມື່ອທຽບໃສ່ພາກພື້ນ ແລະ ໂລກ. ນີ້ແມ່ນບາດກ້າວຕໍ່ໄປ ສຳຄັນທີ່ສຸດໃນການປະຕິບັດ ແລະ ເສີມຂຂະຫຍາຍປະສິດທິຜົນແຜນນະໂຍບາຍສ້າງລັດຖະບານໃຫ້ມີຄວາມສັດຊື່ບໍລິສຸດ, ມີຄວາມສ້າງສັນ, ມີການກະທຳ, ຮັບໃຊ້ປະຊາຊົນ ແລະ ວິສາຫະກິດ. ພວກເຮົາຕ້ອງມີຄວາມຕັດສິນໃຈດ້ານການເມືອງ, ມີຄວາມມຸ່ງຫວັງ ເພື່ອນຳປະເທດພັດທະນາໃນໄລຍະໃໝ່ ”
ຫັນແຜນນະໂຍບາຍນີ້ໃຫ້ເປັນລະອຽດ ພ້ອມກັບວຽກຮັກສາມະຫາພາກໃຫ້ເປັນປົກກະຕິ, ຄວບຄຸມໄພເງິນເຟີ້ໃຫ້ຢູ່ໃນລະດັບ 4 %, ສູ້ຊົນບັນລຸ GDP ໃຫ້ໄດ້ 6,7 % , ທ່ານນາຍົກລັດຖະມົນຕີຮຽກຮ້ອງບັນດາກະຊວງ, ຂະແໜງການ, ທ້ອງຖິ່ນສືບຕໍ່ສຸມໃສ່ແກ້ໄຂລະບອບລະບຽບການ, ນະໂຍບາຍ.
“ເມື່ອພົບເຫັນບັນດາຂໍ້ກຳນົດທີ່ມີລັກສະນະຜູກມັດ, ກົດໜ່ວງທ່ວງດຶງຕໍ່ການພັດທະນາຂອງປະເທດຊາດ ຕ້ອງສະເໜີຕໍ່ລັດຖະບານ, ນາຍົກລັດຖະມົນຕີໂດຍໄວ. ແຕ່ລະຂະແໜງການ, ແຕ່ລະຂົງເຂດຕ້ອງແກ້ໄຂບັນຫານີ້ແຕ່ຫົວທີ. ວຽກງານຫຍັງທີ່ຢູ່ໃນຂອບເຂດສິດອຳນາດຂອງລັດຖະບານ, ນາຍົກລັດຖະມົນຕີ, ບັນດາກະຊວງ, ຂະແໜງການ ຕ້ອງເຮັດໃນທັນຕີ. ວຽກງານຫຍັງທີ່ຕ້ອງການລາຍງານຕໍ່ຂັ້ນທີ່ມີສິດອຳນາດຄືສະພາແຫ່ງຊາດ, ຄະນະບໍລິຫານງານສູນກາງພັກຄອມມູນິດຫວຽດນາມ ກໍ່ຄວນລາຍງານໃນທັນທີ ”
ກ່ຽວກັບການປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ທ່ານນາຍົກລັດຖະມົນຕີເນັ້ນໜັກວ່າ:
“ຄາດໝາຍຂອງພວກເຮົາແມ່ນສູ້ຊົນຍົກສູງອັນດັບສາກົນກ່ຽວກັບສະພາບແວດລ້ອມແຫ່ງການລົງທຶນດຳເນີນທຸລະກິດ, ກຳລັງຄວາມສາມາດແກ້ງແຍ້ງ, ໃນນັ້ນພິເສດແມ່ນປ່ຽນແປງໃໝ່ຢ່າງມີຫົວຄິດປະດິດສ້າງ ແລະ ພັດທະນາແບບຍືນຍົງ. ບັນດາກະຊວງ, ຂະແໜງການຄົ້ນຄວ້າ, ພິຈາລະນາບັນດາມາດຕະການ ເພື່ອສົ່ງເສີມກວ່າ 3,5 ລ້ານຄອບຄົວທີ່ເຮັດທຸລະກິດສ່ວນຕົວໃນປະຈຸບັນ, ມີມາດຕະການຍົກລະດັບເປັນວິສາຫະກິດ, ເປັນຕົ້ນແມ່ນນະໂຍບາຍກ່ຽວກັບອາກອນ. ບັນດາກະຊວງ, ຂະແໜງການ ພິເສດແມ່ນບັນດາທ້ອງຖິ່ນຕ້ອງຍູ້ແຮງການປະຕິຮູບລະບຽບການບໍລິຫານ, ມີມາດຕະການຢ່າງລະອຽດ ເພື່ອບັນລຸແຕ່ລະຕົວເລກດັດຊະນີໃນປະມວນຕົວເລກຄາດໝາຍຕີລາຄາກຳລັງຄວາມສາມາດແກ້ງແຍ້ງຂັ້ນແຂວງ ແລະ ປະຕິຮູບການບໍລິຫານ. ພວກເຮົາຕ້ອງເຄື່ອນໄຫວທົ່ວທັງລະບົບ ”
ຄວາມມານະພະຍາຍາມໃນການສ້າງລັດຖະບານສັດຊື່ບໍລິສຸດ, ສ້າງສັນແມ່ນວິວັດທະນາການໜຶ່ງ. ບັນດາໜ້າທີ່ ເຊິ່ງລັດຖະບານ ແລະ ບັນດາທ້ອງຖິ່ນຕັດສິນໃຈຜັນຂະຫຍາຍໃນປີ 2017 ແມ່ນບາດກ້າວເດີນສຳຄັນໃນວິວັດທະນາການນັ້ນ, ປະກອບສ່ວນຮັດແຄບວິວັດການປະຕິບັດການຫັນປະເທດຊາດເປັນປະເທດອຸດສາຫະກຳ ແລະ ທັນສະໄໜ, ປະຕິບັດຄວາມມຸ່ງມາດປາຖະໜາພັດທະນາປະເທດຊາດ.