(vovworld) - ກອງປະຊຸມໃຫຍ່ລັດຖະສະພາລະຫວ່າງຊາດໂລກຄັ້ງທີ 132 (IPU – 132) ຈະດຳເນີນຢ່າງເປັນທາງການຢູ່ຮ່າໂນ້ຍ ໃນ 2 ສັບປະດາຈະມາເຖິງ. ນີ້ແມ່ນເຫດການການທູດລັດຖະສະພາຂະໜາດໃຫຍ່, ດ້ວຍການເຂົ້າຮ່ວມຂອງຜູ້ແທນເກືອບ 2 ພັນຄົນ, ທັງແມ່ນໂອກາດເພື່ອໃຫ້ຫວຽດນາມປະກອບສຽງເວົ້າລວມເຂົ້າໃນລາຍການດຳເນີນງານ ເພື່ອການພັດທະນາຢ່າງໝັ້ນຄົງພາຍຫຼັງປີ 2015ຂອງໂລກ, ພ້ອມທັງເປັນຂີດໝາຍວິວັດແຫ່ງການເຊື່ອມໂຍງກັບໂລກຢ່າງຮອບດ້ານ, ເລິກເຊິ່ງ ແລະ ກວ້າງຂວາງຂອງຫວຽດນາມ. ມາຮອດປະຈຸບັນ, ຫວຽດນາມໄດ້ກຽມພ້ອມເພື່ອຈັດຕັ້ງເຫດການນີ້ໃຫ້ສຳເລັດແລ້ວ.
ພາບປະກອບ
ເພື່ອກະກຽມໃຫ້ IPU – 132, ຫວຽດນາມ ໄດ້ຄົ້ນຄ້ວາ, ເປັນເສນາທິການໃຫ້ຄະນະເລຂາ IPU, ສະເໜີບັນດາຫົວເລື່ອງປຶກສາຫາລື ແລະ ອອກມະຕິຢູ່ IPU – 132; ກະກຽມບັນດາເງື່ອນໄຂຈຳເປັນທາງດ້ານວັດຖຸ, ເຕັກນິກ, ຫ້ອງນອນ, ຖັນແຖວພະນັກງານຮັບໃຊ້ໃຫ້ແກ່ເຫດການສຳຄັນຍິ່ງນີ້.
ເນື້ອໃນລາຍການດຳເນີນງານແມ່ນອຸດົມສົມບູນ
ສິ່ງສຳຄັນກວ່າໝູ່ເພື່ອຮັບປະກັນໃຫ້ IPU – 132 ສຳເລັດຜົນແມ່ນເນື້ອໃນລາຍການດຳເນີນງານ. ຢູ່ IPU – 132 ຄາດວ່າຈະມີການປະຊຸມ 67 ຄັ້ງ, ການພົບປະສອງຝ່າຍ 66 ຄັ້ງ, ໃນນັ້ນມີວາລະປະຊຸມຄົບຄະນະ. ວາລະປະຊຸມຂອງບັນດາຄະນະກຳມະການປະຈຳ, ວາລະປະຊຸມຂອງສະມາຊິກສະພາແຫ່ງຊາດ (ສສຊ) ຍິງ, ວາລະປະຊຸມຂອງ ສສຊ ໜຸ່ມ. ດ້ວຍຫົວຂໍ້ວ່າ “ບັນດາຄາດໝາຍພັດທະນາຢ່າງໝັ້ນຄົງ: ຈາກຄຳເວົ້າເຖິງການກະທຳ“,IPU – 132 ຢູ່ຮ່າໂນ້ຍຊ້ອນແຝງສານທີ່ສຳຄັນກ່ຽວກັບສັນຕິພາບ, ປະຊາທິປະໄຕ, ຄວາມກ້າວໜ້າ ແລະ ຄວາມຍຸຕິທຳໃນສັງຄົມ. ເພື່ອກະກຽມໃຫ້ບັນດາເນື້ອໃນດັ່ງກ່າວ, ຫວຽດນາມໄດ້ສະເໜີຫຼາຍຫົວຂໍ້ປຶກສາຫາລື, ທີ່ເຕົ້າໂຮມເຂົ້າບັນດາບັນຫາໃຫຍ່ຂອງພາກພື້ນ ແລະ ສາກົນ ເຊິ່ງລັດຖະສະພາປະເທດຕ່າງໆມີຄວາມສົນໃຈ ແລະ ໄດ້ຮັບຄວາມເຫັນດີ ຈາກ IPU. ຫວຽດນາມກໍ່ໄດ້ປະກອບຄຳເຫັນໃຫ້ຮ່າງມະຕິເຊິ່ງຈະຮັບຮອງເອົາຢູ່ IPU – 132 ແລະ ຖະແຫຼງການຮ່າໂນ້ຍ, ເອກະສານນີ້ຈະໄດ້ຮັບໃຊ້ຄືດັ່ງເອກະສານທາງການຂອງ IPU ທີ່ຍື່ນຕໍ່ກອງປະຊຸມຂັ້ນສູງຫົວໜ້າບັນດາອົງການນິຕິບັນຍັດໃນເດືອນ 8/2015 ແລະ ເອກະສານສຳຄັນຂອງ IPU ທີ່ສົ່ງເຖິງສະພາ ສະຫະປະຊາຊາດໃນເດືອນ 9/2015. ທ່ານນາງຮອງປະທານສະພາແຫ່ງຊາດຫວຽດນາມ ຕ່ອງທິຟ໋ອງ, ຫົວໜ້າຄະນະຈັດຕັ້ງ IPU – 132, ໃຫ້ຮູ້ວ່າ:
“ປີ 2015 ແມ່ນຂີດໝາຍສຳຄັນໃນສະພາບການທີ່ປະຊາຄົມສາກົນສະຫຼຸບວິວັດແຫ່ງການປະຕິບັດບັນດາຄາດໝາຍພັດທະນາສະຫັດສະວັດຂອງ ສະຫະປະຊາຊາດ ແລະ ກະກຽມກ້າວເຂົ້າສູ່ໄລຍະຜັນຂະຫຍາຍບັນດາຄາດໝາຍພັດທະນາຢ່າງໝັ້ນຄົງ. ນັ້ນກໍ່ແມ່ນຈຸດເວລາທີ່ເໝາະສົມເພື່ອໃຫ້ບັນດາລັດຖະສະພາສະແດງໃຫ້ເຫັນບົດບາດ, ສຽງເວົ້າລວມ ແລະ ທັດສະນະຂອງຕົນ. ດັ່ງນັ້ນ, ຫວຽດນາມ ຈຶ່ງສະເໜີຫົວຂໍ້ປຶກສາຫາລືລວມຂອງ IPU – 132 ຢູ່ຮ່າໂນ້ຍ“.
ຮັບປະກັນຄວາມປອດໄພ ແລະ ພະລາທິການ
ກອງປະຊຸມໃຫຍ່ IPU – 132 ແມ່ນເຫດການການຕ່າງປະເທດທີ່ໃຫຍ່ທີ່ສຸດຂອງປະເທດ ນັບແຕ່ກ່ອນມາຮອດປະຈຸບັນກ່ຽວກັບຂອບຂະ
ໜາດ, ຈຳນວນຜູ້ແທນສາກົນ. ຄາດວ່າຈະມີປະທານລັດຖະສະພາ, ສະພາແຫ່ງຊາດ 34 ທ່ານ, ຮອງປະທານລັດຖະສະພາ/ສະພາແຫ່ງຊາດ 31 ທ່ານ ແລະ ປະທານປະເທດຮ່ວມສຳພັນ 2 ທ່ານເຂົ້າຮ່ວມ. ດັ່ງນັ້ນຫວຽດນາມ ເອົາໃຈໃສ່ທີ່ສຸດເຖິງຂົງເຂດຮັບປະກັນຄວາມປອດໄພ, ແລະ ຮັບປະກັນໃຫ້ເຫດການນີ້ສຳເລັດຜົນ. ບັນດາອະນຸກຳມະການສົມທົບກັບຄະນະເລຂາ IPU ເພື່ອວາງແຜນການກ່ຽວກັບການຮັບປະກັນຄວາມປອດໄພ, ພະລາທິການ, ການຕ່າງປະເທດ; ເພີ່ມທະວີການກວດກາວຽກງານປ້ອງກັນ, ຕ້ານໂລກລະບາດ, ຮັບປະກັນຄວາມປອດໄພ ແລະສຸຂະອະນາໄມຂອງອາຫານ. ກະກຽມພື້ນຖານດ້ານວັດຖຸ ແລະ ແຫຼ່ງຊັບພະຍາກອນມະນຸດຢ່າງພຽງພໍເພື່ອຮັບມືກັບທຸກສະຖານະການ. ກ່ຽວກັບວຽກງານຮັບປະກັນຄວາມປອດໄພໃຫ້ IPU – 132, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ, ເນັ້ນໜັກວ່າ:
“ຄຽງຂ້າງຮູບພາບສະໜິດສະໜົມ, ສຸພາບ, ວັດທະນະທຳແລ້ວ, ຄວາມປອດໄພກໍ່ປະກອບສ່ວນຮັບປະກັນໃຫ້ຄວາມສັນຕິພາບ,ມິດຕະ
ພາບແກ່ກອງປະຊຸມ. ພວກເຮົາຕ້ອງເຮັດບັນດາວຽກງານດັ່ງກ່າວໄດ້ດີ ເພື່ອຮັບປະກັນໃຫ້ບັນດາຜູ້ແທນເຂົ້າຮ່ວມກອງປະຊຸມ ເມື່ອດຳເນີນການພົບປະສອງຝ່າຍ ຫຼືໄປຢ້ຽມຢາມທ້ອງຖີ່ນຕ່າງໆ“
ພ້ອມກັບການຮັບປະກັນຄວາມປອດໄພ, ຄະນະຈັດຕັ້ງກໍ່ເລືອກເຟັ້ນນັກສຶກສາອາສາສະໝັກນັບຮ້ອຍຄົນທີ່ຮູ້ພາສາຕ່າງປະເທດ, ມີທັກສະ, ປະສົບການໃນການເຄື່ອນໄຫວອາສາສະໝັກເຂົ້າຮ່ວມການຮັບໃຊ້ IPU – 132. ບັນດານັກອາສາສະໝັກຈະຊ່ວຍຄະນະຈັດຕັ້ງຮັບໃຊ້ບັນດາຄະນະຜູ້ແທນ, ອານຸກຳມະການ ແລະ ໜ່ວຍຮັບໃຊ້ກອງປະຊຸມໃຫຍ່ IPU – 132. ນັກອາສາສະໝັກ ຫງວຽນແຢງຕວຽນ, ໃຫ້ຮູ້ວ່າ:
“ເພື່ອກະກຽມໃຫ້ IPU ຄັ້ງນີ້, ພວກນ້ອງໄດ້ຮັບການເຝິກອົບຮົມຫຼາຍຄັ້ງ, ໄດ້ຮັບເອກະສານທີ່ກ່ຽວຂ້ອງເຖິງ IPU – 132 ກໍ່ຄືໄດ້ຮັບການອົບຮົມຫຼາຍຄັ້ງຢູ່ສະໜາມບິນ, ໂຮງແຮມ. ນີ້ແມ່ນເຫດການໃຫຍ່ທຳອິດທີ່ນ້ອງເຂົ້າຮ່ວມການຮັບໃຊ້ໃຫ້ເທດຊາດເຊິ່ງມັນກ່ຽວຂ້ອງເຖິງພາບພົດຂອງປະເທດຊາດກໍ່ຄືສິດຜົນປະໂຫຍດຂອງປະເທດຊາດ ດັ່ງນັ້ນນ້ອງເຫັນວ່າຄວາມຮັບຜິດຊອບນີ້ແມ່ນໃຫຍ່ຫຼວງຫຼາຍ. ນ້ອງ ແລະ ພວກເພື່ອນອາສະສະໝັກ ພະຍາຍາມ ຮ່ຳຮຽນ, ຖອດຖອນບົດຮຽນກ່ຽວກັບວັດທະນະທຳ - ປະຫວັດສາດຂອງ ຫວຽດນາມ ແລະ ຮ່ຳຮຽນດ້ານພາສາເປັນຢ່າງດີ ເພື່ອສາມາດພົວພັນແລກປ່ຽນກັບເພື່ອນມິດສາກົນ ເຮັດໃຫ້ເຂົາເຈົ້າມີຄວາມເຂົ້າໃຈກ່ຽວກັບປະເທດຊາດ, ຊາວ ຫວຽດນາມ ກ່ວາອີກ.”
ເລື່ອງສະພາແຫ່ງຊາດ ຫວຽດນາມ ກະກຽມຢ່າງຕັ້ງໜ້າເພື່ອຈັດຕັ້ງ IPU ຄັ້ງທີ 132 ສະແດງໃຫ້ເຫັນການເຂົ້າຮ່ວມຢ່າງມີຄວາມຮັບຜິດຊອບຂອງສະພາແຫ່ງຊາດ ຫວຽດນາມ ໃນບັນດາການເຄື່ອນໄຫວຂອງ IPU, ບັນດາການເຄື່ອນໄຫວຂອງປະຊາຄົມໂລກ. ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງ, ຢືນຢັນວ່າ:
“ສະຫະພັນລັດຖະສະພາ ໄດ້ມີຄວາມໄວ້ເນື້ອເຊື່ອໃຈມອບສິດໃຫ້ແກ່ ສະພາແຫ່ງຊາດ ຫວຽດນາມ ເປັນເຈົ້າພາບຈັດຕັ້ງກອງປະຊຸມໃຫຍ່ລັດຖະສະພາລະຫວ່າງຊາດໂລກ IPU – 132 ຢູ່ ຮ່າໂນ້ຍ. ສະພາແຫ່ງຊາດ ແລະ ລັດຖະບານ ຫວຽດນາມ ໄດ້ຕັ້ງໜ້າຜັນຂະຫຍາຍວຽກງານກະກຽມຢ່າງຄົບຊຸດ. ຂ້າພະເຈົ້າເຊື່ອໝັ້ນວ່າ: IPU 132 ຈະບັນລຸຜົນສຳເລັດຢ່າງຈົບງາມ. ນີ້ກໍ່ແມ່ນກາລະໂອກາດເພື່ອໃຫ້ພວກເຮົາປະກອບສຽງເວົ້າຂອງຕົນເຂົ້າໃນໂຄງການດຳເນີນງານພັດທະນາແບບຍືນຍົງຫຼັງປີ 2015 ຂອງໂລກ, ພ້ອມທັງເປັນຂີດໝາຍການເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງກ້ວາງຂວາງຂອງ ຫວຽດນາມ”
ເລື່ອງຈັດຕັ້ງ IPU 132 ສຳເລັດຜົນຈະເຮັດໃຫ້ບົດບາດ, ສຽງເວົ້າຂອງ ຫວຽດນາມ ສຳລັບປະຊາຄົມໂລກເລິກເຊິ່ງກ່ວາອີກ. ນີ້ກໍ່ແມ່ນໂອກາດເພື່ອໃຫ້ ຫວຽດນາມ ສະແດງໃຫ້ບັນດາລັດຖະສະພາໃນໂລກເຫັນແຈ້ງທີ່ຕັ້ງ ແລະ ບົດບາດຂອງສະພາແຫ່ງຊາດ ຫວຽດນາມ ໃນຊີວິດທາງດ້ານການເມືອງ ແລະ ສັງຄົມຂອງປະເທດຊາດ, ເຊິ່ງແມ່ນສະພາແຫ່ງຊາດ ທີ່ຂະຫຍັນຂັນເຄື່ອນ, ມີຫົວຄິດປະດິດສ້າງ ແລະ ປ່ຽນໃໝ່ຢ່າງບໍ່ຢຸດຢັ້ງ./.