(VOVWORLD) -ປີ 2017 ເປັນຂີດໝາຍແຫ່ງໄລຍະທາງ 50 ປີແຫ່ງການສ້າງຕັ້ງ ແລະ ພັດທະນາຂອງ ອາຊຽນ, ປະຈຸບັນ ແມ່ນປະຊາຄົມ ອາຊຽນ. ດ້ວຍພາກພື້ນທີ່ມີຄວາມແຕກຕ່າງກັນກ່ຽວກັບດ້ານການເມືອງ, ລະດັບການພັດທະນາ ແລະ ວັດທະນະທຳເປັນຫລາຍຮູບຫລາຍແບບຄື ຢູ່ ອາຊຽນ, ບັນດາຜົນງານຊື່ງກຸ່ມ ອາຊຽນ ບັນລຸໄດ້ໃນ 50 ປີຜ່ານມາ ໄດ້ຮັບຖືວ່າ ແມ່ນຜົນງານດີເລີດ. ກ້າວເຂົ້າສູ່ປີທີ 51, ຕໍ່ຫນ້າການຫັນປ່ຽນພູມສາດການເມືອງນັບມື້ນັບແຮງຢູ່ພາກພື້ນ ແລະ ໂລກ, ອາຊຽນ ສືບຕໍ່ເສີມຂະຫຍາຍຈິດໃຈວັດທະນະທຳໃນການເຈລະຈາ, ການປຶກສາຫາລືຄວາມເຫັນດີເຫັນພ້ອມໃນວິທີການ ອາຊຽນ, ສ້າງວິໄສທັດ ອາຊຽນ ພັດທະນາແບບຍືນຍົງ, ກວມລວມ.
50 ປີຜ່ານມາ, ອາຊຽນ ໄດ້ກ້າວໄປເຖິງ ປະຊາຄົມເຊື່ອມໂຍງຢ່າງເລິກເຊິ່ງກວ້າງຂວາງ ແລະ ມີລັກສະນະແກ້ງແຍ້ງສູງ, ຄວາມສາມັກຄີຂອງປະຊາຊົນໃນ 10 ປະເທດ ອາຊີຕາເວັນອອກສ່ຽງໃຕ້ ມີຄວາມຮັບຜິດຊອບກ່ຽວກັບສັງຄົມ. ພ້ອມກັບການສ້າງຕັ້ງປະຊາຄົມ, ອາຊຽນ ໄດ້ສ້າງວິໄສທັດຮອດປີ 2025 ມຸ່ງໄປເຖິງພາກພື້ນສ້າງຄວາມເຂັ້ມແຂງດ້ວຍຕົນເອງ, ໂດຍອີງໃສ່ກົດໝາຍ ແລະ ຖືປະຊາຊົນເປັນໃຈກາງ, ສວມບົດບາດນັບມື້ນັບໃຫຍ່ໃນການແກ້ໄຂບັນດາບັນຫາພາກພື້ນ ແລະ ທົ່ວໂລກ. ອາດຈະເວົ້າໄດ້ວ່າ ນີ້ແມ່ນຂີດໝາຍສຳຄັນທີ່ສຸດໃນປະຫວັດສາດແຫ່ງການສ້າງຕັ້ງອາຊຽນ ໃນ 50 ປີຜ່ານມາ.
ຮັບຮູ້ໄດ້ສິ່ງທ້າທາຍໃນເສັ້ນທາງເຊື່ອມໂຍງ
ວິໄສທັດຮອດປີ 2025 ໄດ້ເປີດຫລາຍກາລະໂອກາດໃຫ້ແກ່ປະຊາຄົມ ອາຊຽນ ພັດທະນາຮອບດ້ານ, ເຊື່ອມໂຍງຢ່າງເລິກເຊິ່ງກວ້າງຂວາງກວ່າເພື່ອມີຄວາມສາມາດສ້າງຄວາມເຂັ້ມແຂງດ້ວຍຕົນເອງຢ່າງໃຫຍ່ຫລວງກວ່າ ແລະ ມີຜົນສະທ້ອນຢູ່ພາກພື້ນ ແລະ ທົ່ວໂລກໃຫຍ່ກວ່າ. ເຖິງຢ່າງໃດກໍຕາມ, ເພື່ອກຳແຫນ້ນໄດ້ກາລະໂອກາດນັ້ນ ອາຊຽນ ຕ້ອງຜ່ານຜ່າສິ່ງທ້າທາຍຫລາຍຢ່າງ. ເມື່ອອາຊຽນ ສ້າງປະຊາຄົມ ໂດຍອີງໃສ່ກົດໝາຍນັ້ນ ລະບົບກົດໝາຍຂອງບັນດາປະເທດຍັງມີຄວາມແຕກຕ່າງກັນຫລາຍ. ສິ່ງດດັ່ງກ່າວສ່ວນຫນຶ່ງຈຳກັດການປະຕິບັດບັນດາຄຳໝັ້ນສັນຍາ ແລະ ຂໍ້ຕົກລົງລວມ. ເມື່ອຊີ້ອອກບັນດາສິ່ງທ້າທາຍຊື່ງ ອາຊຽນ ປະສົບ, ທ່ານ ເລເລືອງມີງ ອະດີດເລຂາທິການໃຫຍ່ ອາຊຽນ ຖືວ່າ:
“ລາຍຮັບສະເລ່ຍໃສ່ຫົວຄົນຂອງປະເທດຮັ່ງມີກວ່າໝູ່ໃນອາຊຽນ ແມ່ນສູງກວ່າທົບ 43 ເທົ່າເມື່ອທຽບໃສ່ລາຍຮັບສະເລ່ຍຂອງປະຊາຊົນຢູ່ປະເທດທຸກຍາກ. ລະດັບຄວາມຮູ້ຂອງປະຊາຊົນຢູ່ບັນດາປະເທດອາຊຽນກໍ່ຄືວິສາຫະກິດອາຊຽນ ຍັງຈຳກັດຢູ່. ອາຊຽນ ສືບຕໍ່ນະໂຍບາຍອີງໃສ່ລັດທິພາກພື້ນເປີດ, ສະຫນັບສະຫນູນໂລກາພິວັດ, ຫັນເປັນການຄ້າເສລີ ແຕ່ໃນໂລກພວມມີທ່າອ່ຽງຕ້ານສະພາບໂລກາພິວັດ, ອາລັກຂາການຄ້າ, ພິເສດ ທ່າອ່ຽງປະກົດອອກຢູ່ບັນດາປະເທດເສດຖະກິດໃຫຍ່ ແມ່ນຄູ່ຮ່ວມມືກັບອາຊຽນ. ແລະ ນີ້ແມ່ນສິ່ງທ້າທາຍຂອງອາຊຽນ ໃນການສ້າງປະຊາຄົມພັດທະນາກວມລວມ.”
ຄຽງຄູ່ກັນນັ້ນ ບັນດາການຜັນແປຢ່າງສັບສົນໃນພາກພື້ນ, ເປັນຕົ້ນແມ່ນບັນດາການກະທຳພຽງລຳພັງຝ່າຍດຽວລະເມີດກົດໝາຍສາກົນຢູ່ ທະເລຕາເວັນອອກ ມີໄພນາບຂູ່ຕໍ່ຄວາມສາມັກຄີຂອງ ອາຊຽນ, ກໍ່ຂາດສະຖຽນລະພາບຢູ່ພາກພື້ນ.
ຄວາມມານະພະຍາຍາມຫັນ “ວິໄສທັດຮອດປີ 2025”ໃຫ້ປະກົດຜົນເປັນຈິງ
ປະຈຸບັນ, ອາຊຽນ ພວມໃນໄລຍະພັດທະນາໃຫມ່. ເພື່ອຫັນ “ວິໄສທັດຮອດປີ 2025” ໃຫ້ປະກົດຜົນເປັນຈິງ, ອາຊຽນ ພວມມານະພະຍາຍາມຜ່ານຜ່າບັນດາສິ່ງທ້າທາຍ ແລະ ບັນດາບົດຮຽນທີ່ປະສົບຜົນສຳເລັດໃນ 50 ປີຜ່ານມາ ຈະຊ່ວຍອາຊຽນ ສືບຕໍ່ເຊື່ອມໂຍງສຳເລັດຜົນໃນອະນາຄົດ.
ຕາມນັ້ນແລ້ວ, ອາຊຽນ ສືບຕໍ່ສ້າງສຳເລັດປະຊາຄົມອາຊຽນທີ່ມີຄວາມສະຫນິດຕິດພັນ, ເຂັ້ມແຂງ ແລະ ພັດທະນາຢ່າງວັດທະນາຖາວອນ. ນີ້ແມ່ນຜົນປະໂຫຍດຍຸດທະສາດຍາວນານຂອງປະເທດສະມາຊິກທັງໝົດໃນອາຊຽນ, ຮຽກຮ້ອງຕ້ອງມີຄວາມຮັບຜິດຊອບການປະກອບສ່ວນຂອງບັນດາປະເທດສະມາຊິກອາຊຽນໃນການເພີ່ມທະວີຄວາມສາມັກຄີ, ຄວາມເປັນເອກະພາບ ແລະ ການຮ່ວມສຳພັນພາຍໃນກຸ່ມຢ່າງບໍ່ຢຸດຢັ້ງ. ທ່ານ ເລເລືອງມີງ ອະດີດເລຂາທິການໃຫຍ່ອາຊຽນ ເວົ້າວ່າ:
“ເພື່ອຜ່ານຜ່າບັນດາສິ່ງທ້າທາຍນັ້ນ, ບັນດາປະເທດ ອາຊຽນ ຄວນຍູ້ແຮງວິວັດການເຮັດໃຫ້ບັນດາລະບົບກົດໝາຍແຫ່ງຊາດຢ່າງກົມກ່ຽວ, ສ້າງຄວາມດຸ່ນດ່ຽງລະຫວ່າງບັນດາຜົນປະໂຫຍດໃນຕໍ່ຫນ້າ, ໄລຍະສັ້ນຂອງບັນດາປະເທດ ແລະ ຜົນປະໂຫຍດລວມ, ຜົນປະໂຫຍດຍາວນານຂອງທັງວົງຄະນາຍາດ, ເພີ່ມທະວີວັດທະນະທຳການປະຕິບັດ. ລະດົມ ແລະ ນຳໃຊ້ບັນດາແຫລ່ງກຳລັງພາຍໃນກຸ່ມ ແລະ ຈາກບັນດາຄູ່ຮ່ວມມື ເພື່ອຜັນຂະຫຍາຍບັນດາມາດຕະການໂຄງການຢ່າງມີປະສິດທິຜົນ, ຮັດແຄບຊ່ອງຫວ່າງການພັດທະນາ.”
ພ້ອມກັນນັ້ນ ເພື່ອຮັບປະກັນສັນຕິພາບ, ສະຖຽນລະພາບໃນພາກພື້ນ, ອາຊຽນ ເປັນເຈົ້າການຍູ້ແຮງການຮ່ວມມື, ສ້າງບັນດາມາດຖານ, ກົນໄກ ແລະ ເຄື່ອງມືຢ່າງມີປະສິດທິຜົນເພື່ອປະເຊີນຫນ້າກັບສິ່ງທ້າທາຍ, ສະກັດກັ້ນການປະທະກັນ ແລະ ແກ້ໄຂບັນດາຄວາມຂັດແຍ້ງໃຫ້ເໝາະສົມກັບກົດໝາຍສາກົນ. ຄຽງຄູ່ກັບການຊຸກຍູ້ບັນດາກົນໄກຮ່ວມມືທີ່ມີຢູ່ແລ້ວຄື: ເວທີປາໄສພາກພື້ນ ອາຊຽນ (ARF), ກອງປະຊຸມສຸດຍອດ ອາຊີຕາເວັນອອກ (EAS), ອາຊຽນ + 3, ADMM+, ອາຊຽນ ຊຸກຍູ້ການເຈລະຈາກັບຈີນ ເພື່ອສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ຢ່າງແທດຈິງ ແລະ ມີຜົນສັກສິດດ້ານນິຕິກຳ, ຊ່ວຍຫລຸດຜ່ອນຄວາມເຄັ່ງຕຶງກ່ຽວຂ້ອງເຖິງຄວາມຂັດແຍ້ງອະທິປະໄຕຢູ່ທະເລຕາເວັນອອກ.
ຫວຽດນາມ ໃຫ້ບຸລິມະສິດສູງສຸດໃນການຮ່ວມມື ອາຊຽນ
ໃນກວ່າ 22 ປີຜ່ານມາ, ເຖິງວ່າເຂົ້າເປັນສະມາຊິກ ອາຊຽນ ບໍ່ດົນນານຄືຫລາຍປະເທດອື່ນກໍຕາມ ແຕ່ຫວຽດນາມ ໄດ້ມານະພະຍາຍາມສຸດຄວາມສາມາດຂອງຕົນ, ເຂົ້າຮ່ວມດ້ວຍຈິດໃຈເປັນເຈົ້າການ, ຕັ້ງຫນ້າ ແລະ ມີຄວາມຮັບຜິດຊອບ, ປະກອບສ່ວນຮັກສາ ແລະ ຊຸກຍູ້ຄວາມເປັນລະບຽບຮຽບຮ້ອຍຢູ່ ອາຊີຕາເວັນອອກ- ອາຊີໃຕ້ ໂດຍອີງໃສ່ບັນດາຫລັກການຂອງພາກພື້ນ ແລະ ສອດຄ່ອງກັບກົດໝາຍສາກົນ. ຍາມໃດຫວຽດນາມກໍ່ຖື ອາຊຽນ ແມ່ນຊາຍຄາລວມ, ໃຫ້ບຸລິມະສິດສູງສຸດໃນການພົວພັນກັບບັນດາປະເທດສະມາຊິກ, ສະຫນິດຕິດພັນຜົນປະໂຫຍດແຫ່ງຊາດຂອງຫວຽດນາມ ໃຫ້ກົມກ່ຽວກັບຜົນປະໂຫຍດຂອງທັງພາກພື້ນ ແລະ ກຳນົດທິດໃນໄລຍະຈະມາເຖີງກໍ່ຄືແນວນັ້ນ.
ການຮ່ວມມື, ຮ່ວມສຳພັນ ອາຊຽນ ແມ່ນການບຸລິມະສິດແຖວຫນ້າ ແລະ ແມ່ນການເລືອກເຟັ້ນຍຸດທະສາດຂອງຫວຽດນາມ ແລະ ຫວຽດນາມ ຈະພ້ອມກັບບັນດາປະເທດສະມາຊິກຫັນຄາດໝາຍອັນສູງສົ່ງຂອງປະຊາຄົມ ອາຊຽນ ໃຫ້ປະກົດຜົນເປັນຈິງ, ນັ້ນແມ່ນ ປະຊາຄົມວັດທະນາຖາວອນ, ເປັນເອກະພາບໃນຫລາຍຮູບແບບ.