(vovworld)-ກອງປະຊຸມຄັ້ງທີ 11 ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ອັດລົງເມື່ອວັນທີ 7/5 ຢູ່ ຮ່າໂນ້ຍ ພາຍຫລັງເຮັດວຽກມາເປັນເວລາ 4 ວັນ. ທີ່ກອງປະຊຸມຄັ້ງນີ້ ດ້ວຍຈິດໃຈປະຊາທິປະໄຕ, ເສີມຂະຫຍາຍຄວາມສາມາດປະດິດສ້າງ, ຈີນຕະນາການເອກະລາດຢ່າງສູງສຸດ, ສະແດງໃຫ້ເຫັນຄວາມຮັບຜິດຊອບດ້ານການເມືອງຂອງຜູ້ແທນແຕ່ລະຄົນຕໍ່ພັກ, ປະຊາຊົນ ແລະ ປະເທດຊາດ, ຄະນະບໍລິຫານງານສູນກາງພັກ ໄດ້ຄົ້ນຄ້ວາ, ປຶກສາຫາລືບັນດາບັນຫາຢ່າງເລິກເຊິ່ງ, ລະອຽດ ຕາມໂຄງການດຳເນີນງານ, ໃນນັ້ນ ເອົາໃຈໃສ່ເປັນພິເສດເຖິງວຽກງານບຸກຄະລາກອນ ແລະ ເຂົ້າຮ່ວມການສ້າງ, ຕົກລົງແນວທາງ, ຫນ້າທີ່ການເມືອງຂອງພັກໃນອາຍຸການກອງປະຊຸມໃຫຍ່ຂອງພັກຊຸດທີ 12. ໃນລາຍການສະຖານະການການເມືອງພາກນີ້ ພວກເຮົາຄັດສະເຫນີເນື້ອໃນດັ່ງກ່າວໃນບົດກ່າວປາໄສອັດກອງປະຊຸມຄັ້ງທີ 11 ຄະນະບໍລິຫານງານສູນກາງພັກກອມມູນິດຫວຽດນາມ ຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກ ຫງວຽນຟູຈ້ອງ.
ທ່ານເລຂາທິການໃຫຍ່ ຫງວຽນຟູຈ້ອງ
ພາບ:tinmoi.com
|
ໃນບົດກ່າວປາໄສອັດກອງປະຊຸມ, ທ່ານ ເລຂາທິການໃຫຍ່ ຫງວຽນຟູຈ້ອງ ໄດ້ເນັ້ນຫນັກເຖິງຈິດໃຈ ຖືພະນັກງານ ແລະ ວຽກງານພະນັກງານ ແມ່ນ “ກົກເຄົ້າຂອງທຸກວຽກງານ”, ຄະນະບໍລິຫານງານສູນກາງພັກ ໄດ້ປຶກສາຫາລືຢ່າງລະອຽດ, ປະກອບສ່ວນຫລາຍຄຳເຫັນຢ່າງສຸດຈິດສຸດໃຈ, ກົງໄປກົງມາ ແລະ ເປັນເອກະພາບສູງ ຕໍບົດລາຍງານຂອງກົມການເມືອງທີ່ຍື່ນສະເຫນີຕໍ່ກອງປະຊຸມກ່ຽວກັບຄວາມສຳຄັນຂອງວຽກງານກະກຽມບຸກຄະລາກອນກອງປະຊຸມໃຫຍ່ຄັ້ງທີ 12 ຂອງພັກ.
ທ່ານ ເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງ: ໃນສະພາບການໂລກ ແລະ ພາຍໃນປະເທດ ສືບຕໍ່ມີບັນດາການຜັນແປຢ່າງສັບສົນ, ຍາກທີ່ຄາດຄະເນໄດ້, ຄະນະບໍລິຫານງານສູນກາງພັກຊຸດທີ 12 ຕ້ອງເປັນໝູ່ຄະນະທີ່ເຂັ້ມແຂງ, ສາມັກຄີ, ເປັນເອກະພາບຢ່າງແຫນ້ນແຟ້ນ, ມີຄຸນນະທາດດ້ານການເມືອງຢ່າງໝັ້ນແກ່ນ, ມີຄຸນສົມບັດປອດໃສ, ຢຶດໝັ້ນຈຸດໝາຍເອກະລາດຊົນຊາດ ແລະ ສັງຄົມນິຍົມ, ມີວິໄສທັດຍຸດທະສາດ, ພູມປັນຍາ, ປ່ຽນໃຫມ່ຈີນຕະນາການ, ມີຫົວຄິດປະດິດສ້າງ, ເຈດຈຳນົງຕໍ່ສູ້, ມີລະບຽບວິໄນຢ່າງເຄັ່ງຄັດ, ຮັບຟັງຄຳເຫັນປະກອບ, ຕຳຫນິຕິຊົມຕົນເອງ ແລະ ຕຳຫນິຕິຊົມເພືີ່ອນສະຫາຍຢ່າງເຂັ້ມງວດ, ເຕົ້າໂຮມຄວາມສາມັກຄີ, ເປັນເອກະພາບໃນທົ່ວພັກ, ສະຫນິດຕິດພັນຢ່າງແຫນ້ນແຟ້ນກັບປະຊາຊົນ, ມີອິດທິພົນຊື່ສຽງ, ກຳລັງຄວາມສາມາດຊີ້ນຳນຳພາປະເທດຊາດໃນໄລຍະພັດທະນາໃຫມ່. ບົນພື້ນຖານນັ້ນ, ທ່ານເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງວ່າ:
“ສູນກາງພັກເປັນເອກະພາບວ່າ: ເລື່ອງກຳນົດມາດຕະຖານກຳມະການຄະນະບໍລິຫານງານສູນກາງພັກຊຸດທີ 12 ຕ້ອງມີນ້ຳໃຈຮັກຊາດຢ່າງເລິກເຊິ່ງ, ມີຄຸນນະທາດການເມືອງຢ່າງໝັ້ນຄົງ, ຢືດໝັ້ນຈຸດໝາຍເອກະລາດຊົນຊາດ ແລະ ສັງຄົມນິຍົມ, ຈົ່ງຮັກພັກດີຕໍ່ລັດທິມາກເລນີນ ແນວຄິດໂຮ່ຈິມີນ, ໂຄງການການເມືອງ, ແນວທາງຂອງພັກ, ລັດຖະທຳມະນູນຂອງລັດ ແລະ ຜົນປະໂຫຍດຂອງຊາດ.”
ທ່ານ ເລຂາທິການໃຫຍ່ ຫງວຽນຟູຈ້ອງ ເນັ້ນຫນັກເປັນພິເສດເຖິງບຸກຄະລາກອນ ຄະນະບໍລິຫານງານສູນກາງພັກຊຸດທີ 12 ຕ້ອງແມ່ນຜູ້ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນ, ມີຄຸນສົມບັດ ແລະ ແບບແຜນການດຳລົງຊີວິດດີ, ມີຄວາມຮັບຜິດຊອບສູງ, ສຸດຈິດສຸດໃຈຕໍ່ວຽກງານ, ເພື່ອຜົນປະໂຫຍດລວມຂອງພັກຂອງປະເທດຊາດ, ບໍ່ມີການກະທຳສໍ້ລາດບັງຫລວງ, ອາຍາສິດ, ບໍ່ສວຍໂອກາດ, ມັກໃຫຍ່ໄຝ່ສູງຈາກສິດອຳນາດ ແລະ ເດັດດ່ຽວຕໍ່ສູ້ຕ້ານບັນດາປະກົດການຫຍໍ້ທໍ້, ອາດຍາສິດ, ສໍ້ລາດບັງຫລວງ, ບໍ່ປະໃຫ້ຄອບຄົວ, ຍາດຕິພິ່ນ້ອງສວຍໃຊ້ສິດອຳນາດເພື່ອຫາຜົນປະໂຫຍດສ່ວນຕົວ.
ທ່ານ ເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າ: ວຽກງານບຸກຄະລາກອນຂອງຄະນະບໍລິຫານງານສູນກາງພັກຊຸດທີ 12 ມີຄວາມໝາຍພິເສດເຖິງຊາຕະກຳຂອງພັກ, ຂອງຊາດ ແລະ ພື້ນຖານພັດທະນາຂອງປະເທດຊາດ. ທ່ານ ເລຂາທິການໃຫຍ່ ຫງວຽນຟູຈ້ອງ ສະເຫນີ: ກຳມະການກົມການເມືອງ, ຄະນະເລຂາອາຍຸການຈະມາເຖິງ ຕ້ອງແມ່ນຜູ້ມີວິໄສທັດ, ຈີນຕະນາການຍຸດທະສາດ, ມີລະດັບຄວາມຮູ້ກ່ຽວກັບທິດສະດີການເມືອງຢ່າງເລິກເຊິ່ງ, ຮູ້ຄົ້ນພົບ ແລະ ນຳໃຊ້ຜູ້ມີຄຸນສົມບັດ, ມີຄວາມເກັ່ງກ້າສາມາດ.
“ເດັດຂາດບໍ່ເລືອກຕັ້ງຜູ້ທີ່ມີຄຸນນະທາດດ້ານການເມືອງບໍ່ໝັ້ນຄົງ, ບໍ່ຢືດໝັ້ນຕໍ່ແນວທາງ, ທັດສະນະຂອງພັກ, ມີປະກົດການສວຍໃຊ້ດ້ານການເມືອງ, ເວົ້າ ແລະ ກະທຳໄປຝືນກັບໂຄງການການເມືອງ, ແນວທາງ, ຫລັກການຂອງພັກມັກໃຫຍ່ໄຝ່ສູງຈາກສິດອຳນາດ, ບໍ່ກ້າຕໍ່ສູ້ເພື່ອປົກປ້ອງຄວາມຖືກຕ້ອງ, ລະເມີດຫລັກການປະຊາທິປະໄຕ…..ເຂົ້າໃນຄະນະບໍລິຫານງານສູນກາງພັກ”
ເພື່ອບັນລຸຈຸດໝາຍ, ຄຳຮຽກຮ້ອງຕ້ອງການດັ່ງກ່າວ, ທ່ານ ເລຂາທິການໃຫຍ່ ຫງວຽນຟູຈ້ອງ ເນັ້ນຫນັກເປັນພິເສດເຖິງຄວາມຮັບຜິດຊອບສູງຂອງແຕ່ລະບຸກຄົນ ແລະ ອົງການ, ຕ້ອງເປັນແບບຢ່າງໃນການປະຕິບັດບັນດາຫລັກການ, ກົດລະບຽບ, ຂໍ້ກຳນົດຂອງພັກ, ຕ້ອງຖືພາລະກິດລວມຂອງພັກ, ຂອງຊາດແມ່ນສຳຄັນກວ່າໝູ່.
“ຄວາມຫຍຸ້ງຍາກ, ສິ່ງທ້າທາຍຍັງຫລາຍຢູ່, ເປັນຕົ້ນໃນສະພາບການສາກົນ ແລະ ພາກພື້ນ ພວມຜັນແປໄປຢ່າງສັບສົນ, ວ່ອງໄວ. ສະນັ້ນ ເພື່ອສາມາດປະຕິບັດຈຸດໝາຍ, ຫນ້າທີ່ຂອງປີ 2015 ໃຫ້ສຳເລັດ, ກ້າວໄປເຖິງກອງປະຊຸມໃຫຍ່ຄັ້ງທີ 12 ຂອງພັກ, ຮຽກຮ້ອງບັນດາສະຫາຍໃນສູນກາງພັກ ຕ້ອງຍົກສູງນ້ຳໃຈຄວາມຮັບຜິດຊອບຕໍ່ພັກ, ປະຊາຊົນ ແລະ ປະເທດຊາດ, ສຸມໃສ່ຊີ້ນຳນຳພາ, ປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ, ບັນດາມະຕິຂອງສູນກາງເປັນຢ່າງດີ.”
ສະຫລຸບກອງປະຊຸມ, ທ່ານ ເລຂາທິການໃຫຍ່ ຫງວຽນຟູຈ້ອງ ຮຽກຮ້ອງທົ່ວພັກ, ທົ່ວປະຊາຊົນ ແລະ ທົ່ວກອງທັບ ເພີ່ມທະວີຄວາມສາມັກຄີ, ເປັນເອກະພາບແນວຄິດ ແລະ ການກະທຳ, ມານະພະຍາຍາມສູ້ຊົນຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ປະຕິບັດຫນ້າທີ່ພັດທະນາເສດຖະກິດສັງຄົມປີ 2015 ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກຢ່າງມີໄຊ, ປະຕິບັດກອງປະຊຸມໃຫຍ່ອົງຄະນະພັກທຸກຂັ້ນສຳເລັດຜົນ, ກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ.