vovworld - ວັນທີ 5/4, ຢູ່ບຣຸກແຊນປະເທດແບນຊິກ, ສະຫະພາບເອີລົບ(EU) ແລະ ສະຫະປະຊາຊາດຈະເປັນເຈົ້າພາບຈັດກອງປະຊຸມກ່ຽວກັບອະນາຄົດຂອງຊີຣີ. ກອງປະຊຸມຈະແກ່ຍາວເປັນເວລາ 2 ວັນຊຶ່ງສຸມໃສ່ປຶກສາຫາລືບັນດາມາດຕະການໜູນຊ່ວຍມະນຸດສະທຳກໍຄືວິວັດການມອບໂອນດ້ານການເມືອງ ແລະ ສ້າງສາປະເທດຊີຣີຄືນໃໝ່. ພາຍຫຼັງເກີດສົງຄາມກາງເມືອງເປັນເວລາກ່ວາ 6 ປີ, ຊີຣີພວມຢືນຢູ່ຕໍ່ໜ້າບັນດາກາລະໂອກາດເພື່ອສ້າງສາລັດຖະບານໄລຍະຂ້າມຜ່ານ, ໃນນັ້ນມີຜູ້ຕາງໜ້າຂອງຄົບທຸກພັກຝ່າຍຢູ່ນີ້. ແຕ່ເຖິງຢ່າງໃດກໍຕາມ, ວຽກງານສ້າງສາປະເທດຊາດຄືນໃໝ່ຍັງປະສົບກັບຄວາມລຳບາກ ແລະ ສິ່ງທ້າທາຍຫຼາຍປະການ.
ທ່ານເອກອັກຄະລັດຖະທູດອາເມລິກາປະຈຳສະຫະປະຊາຊາດ Nikki Haley
(ພາບ: Reuters)
ສົງຄາມກາງເມືອງທີ່ແກ່ຍາວເປັນເວລາກ່ວາ 6 ປີທີ່ຜ່ານມາ ໄດ້ທຳລາຍຊີວິດຂອງກ່ວາ 400.000 ຄົນ ແລະ ເຮັດໃຫ້ນັບລ້ານຄົນຕ້ອງໄປອົບພະຍົບຢູ່ຕ່າງປະເທດ, ອັນໄດ້ກໍ່ວິກິດການຊາວອົບພະຍົບທີ່ຮ້າຍແຮງທີ່ສຸດຢູ່ເອີລົບ. ກວ່າ 1 ປີທີ່ຜ່ານມາ, ໄດ້ມີການເຈລະຈາຫຼາຍຄັ້ງລະຫວ່າງລັດຖະບານຊີຣີກັບບັນດາກຸ່ມຝ່າຍຄ້ານໂດຍສະຫະປະຊາຊາດປົກປ້ອງ ແລະ ໃນມໍ່ໆມານີ້ ແມ່ນຮອບເຈລະຈາທີ່ຈັດຂຶ້ນຢູ່ Astana ປະເທດກາຊັກສຖານເມື່ອວັນທີ 15/3 ແຕ່ກໍລ້ວນແຕ່ຍັງບໍ່ທັນໄປສູ່ເປົ້າໝາຍປາຍທາງ. ສາຍເຫດແມ່ນຍ້ອນບັນດາຝ່າຍ ຍັງບໍ່ທັນຊອກຫາໄດ້ສຽງເວົ້າລວມໃຫ້ແກ່ການມອບໂອນດ້ານການເມືອງກໍຄືວິທີແກ້ໄຂແມ່ນຍັງມີຄວາມແຕກຕ່າງກັນລະຫວ່າງບັນດາປະເທດໃຫຍ່.
ວິທີແກ້ໄຂໃໝ່ຂອງວົງຄະນະຍາດສາກົນກ່ຽວກັບຊີຣີ
ເຖິງຢ່າງໃດກໍຕາມ, ວິກິດການຊີຣີພວມມີສັນຍານໄດ້ຮັບການປົວແປງທີ່ຕັ້ງໜ້າຂະນະທີ່ມີການປ່ຽນແປງຫຼາຍພໍສົມຄວນກ່ຽວກັບວິທີແກ້ໄຂຂອງປະຊາຄົມໂລກ ສະຫະພາບເອີລົບ(EU) ໄດ້ປະກາດເມື່ອວັນທີ 14/3 ກ່ຽບກັບແຜນການທີ່ມີຄວາມມັກໃຫຍ່ໃຝ່ສູງ ແນໃສ່ຫນູນຊ່ວຍວິວັດການສ້າງສາປະເທດຊີຣີຄືນໃໝ່. ຕາມນັ້ນແລ້ວ, ສະຫະພາບເອີລົບ(EU) ຖືວ່າ ຊີຣີຕ້ອງການມີ “ ພື້ນຖານສັນຕິພາບດ້ວຍການມອບໂອນ ” ໂດຍປະຊາຄົມໂລກ ປົກປ້ອງ, ແທນທີ່ສົງຄາມກາງເມືອງທີ່ແກ່ຍາວເປັນເວລາ 6 ປີ ອັນໄດ້ເຮັດໃຫ້ກວ່າ 320.000 ຄົນຖືກເສຍຊີວິດ. ສະຫະພາບເອີລົບ(EU) ຈະສວມບົດບາດນຳໜ້າໃນໄລຍະຫຼັງການປະທະກັນຢູ່ຊີຣີ ແລະ ບຣຸກແຊນພ້ອມແລ້ວທີ່ຈະກະທຳໃນທັນທີ່ ຂະນະທີ່ “ວິວັດ ການມອບໂອນດ້ານການເມືອງຢ່າງແທ້ຈິງ” ຖືກດຳເນີນຢູ່ຊີຣີ.
ໃນຂະນະນັ້ນ, ຫຼັກໝັ້ນຂອງອາເມລິກາກ່ຽວກັບຊີຣີ ຍັງມີການຫັນປ່ຽນຢ່າງແຂງແຮງ. ໃນການກະທຳຄັ້ງຫຼ້າສຸດ ເມື່ອວັນທີ 31/3 ທີ່ຜ່ານມາ, ທ່ານເອກອັກຄະລັດຖະທູດອາເມລິກາປະຈຳສະຫະປະຊາຊາດ Nikki Haley ໄດ້ຍອມຮັບວ່າ ທ່ານບໍ່ຖືເລື່ອງລາອອກຈາກຕຳແໜ່ງຂອງປະທານາທິບໍດີຊີຣີ Al Assad ແມ່ນບຸລິມະສິດແຖວໜ້າໃນການເຈລະຈາອີກແລ້ວ ແລະ ວໍຊິງຕັນຢາກປະຕິບັດຫຼາຍມາດຕະການເພື່ອແນໃສ່ສ້າງການຫັນປ່ຽນອັນດີງາມໃຫ້ແກ່ຊາວຊີຣີ. ທ່ານເອກອັກຄະລັດຖະທູດອາເມລິກາປະຈຳ ສະຫະປະຊາຊາດ Nikki Haley ເນັ້ນໜັກວ່າ ອະນາຄົດຂອງຊີຣີຈະໂດຍແມ່ນຊາວຊີຣີເປັນຜູ້ຕັດສິນ. ນີ້ອາດຈະໄດ້ຮັບຖືວ່າ ແມ່ນການປ່ຽນແປງຫຼາຍພໍສົມຄວນໃນນະໂຍບາຍຕາເວັນອອກກາງຂອງ ປະທານາທິບໍດີອາເມລິກາ Donald Trump ເມື່ອທຽບໃສ່ປະທານາທິບໍດີສະໄໝກ່ອນ ທ່ານ Barak Obama . ຕາມບັນດານັກໄຈ້ແຍກແລ້ວ, ເລື່ອງເປັນຄັ້ງທຳອິດທີ່ອາເມລິກາເຜີຍໃຫ້ຮູ້ຫຼັກໝັ້ນກ່ຽວກັບບັນຫາຊີຣີນັ້ນ ອາດຈະພາໄປເຖິງການປ່ຽນແປງອັນໃຫຍ່ຫຼວງໃນເວທີການເມືອງຢູ່ຊີຣີ.
ທ່ານ ປະທານາທິບໍດີ ຊີຣີ Bashar al-Assad
(ພາບ: Reuters)
ໄລຍະທາງສ້າງສາ ຊີຣີ ຄືນໃໝ່ຍັງປະສົບກັບຄວາມຫຍຸ້ງຍາກຫລາຍຢ່າງ
ເປັນທີ່ຈະແຈ້ງແລ້ວວ່າ ເລື່ອງ ອາເມລິກາ, ເອີລົບ ປ່ຽນແປງຫລັກໝັ້ນກ່ຽວກັບ ຊີຣີ ໃນໄລຍະຜ່ານມາ ໄດ້ນຳມາເຊິ່ງສັນຍານຕັ້ງໜ້າໃຫ້ແກ່ສັນຕິພາບຢູ່ປະເທດຕາເວັນອອກກາງນີ້. ປະຊາຄົມໂລກ ອາດຈະມີຄວາມຫວັງຕໍ່ແຜນການສັນຕິພາບໃຫ້ແກ່ ຊີຣີ ໂດຍສະຫະປະຊາຊາດເປັນກາງ, ໃນນັ້ນ ທ່ານ al – Assad ຈະສືບຕໍ່ເຂົ້າຮ່ວມວິວັດການມອບໂອນສິດອຳນາດ ເມື່ອລະບອບຊົ່ວຄາວໄດ້ຮັບການສ້າງຕັ້ງ.
ເຖິງຢ່າງໃດກໍ່ຕາມ, ເພື່ອໃຫ້ ຊີຣີ ມີພື້ນຖານສັນຕິພາບ ແລະ ສະຖຽນລະພາບຢ່າງແທ້ຈິງນັ້ນ ແມ່ນສິ່ງທີ່ບໍ່ງ່າຍດາຍ “ເພື່ອປະຕິບັດໄດ້ໂດຍໄວ” ເມື່ອການແຊກແຊງເຂົ້າ ຊີຣີ ຂອງບັນດາຝ່າຍຍັງຄົງຊ້ອນແຝງປັດໃຈທີ່ຍາກຈະຄາດຄະເນໄດ້ລ່ວງໜ້າ. ດ້ວຍນະໂຍບາຍບຸລິມະສິດຕ້ານກໍ່ການຮ້າຍ, ໃນສະເພາະໜ້າ ອຳນາດການປົກຄອງຂອງປະທານາທິບໍດີ Trump ອາດຈະພິຈາລະນາເຖິງຄວາມສາມາດສົມທົບກັບ ລັດເຊຍ ກ່ຽວກັບດ້ານການທະຫານ, ແຕ່ໃນຍາວນານ, ອາເມລິກາ ກຳນົດ ຊີຣີ ຍັງຄົງແມ່ນບໍລິເວນສຳຄັນສຳລັບບັນດາຜົນປະໂຫຍດດ້ານຄວາມສະຫງົບປອດໄພຂອງ ວໍຊິງຕັນ ຢູ່ ຕາເວັນອອກກາງ, ເພາະສະນັ້ນ ຈະບໍ່ຍອມປະລະ ຫຼື ຢືນຢູ່ນອກການເຂົ້າຮ່ວມກັບ ລັດເຊຍ ຢ່າງງ່າຍດາຍ. ສ່ວນ ອີຢູ, ນັບແຕ່ກ່ອນມາຮອດປະຈຸບັນ ຊຶ່ງເຄີຍມີບົດບາດທີ່ອ່ອນແອໃນສົງຄາມກາງເມືອງຢູ່ ຊີຣີ ນັ້ນ, ປະຈຸບັນພັດຫ້າວຫັນເຂົ້າຮ່ວມແກ້ໄຂບັນຫາ ຊີຣີ ແລະ ຫວັງຢາກເປັນກຳລັງສ້າງສາສັນຕິພາບໃຫ້ແກ່ ຊີຣີ. ດ້ວຍຄຳຖະແຫຼງທີ່ເປີດແງ່ຫວັງໃຫ້ມີພື້ນຖານສັນຕິພາບໂດຍມອບໂອນ, ອີຢູ ເກືອບຄືວ່າ ບໍ່ຄຳນຶງເຖິງບົດບາດຂອງ ລັດເຊຍ ດ້ວຍບົດບາດເປັນຜູ້ນຳໜ້າໃນການສູ້ຮົບຕ້ານກໍ່ການຮ້າຍ IS ຢູ່ ຊີຣີ ແລະ ສິ່ງດັ່ງກ່າວ ອາດຈະຖືກ ມົດສະກູ ແລະ ບັນດາຝ່າຍປົກປ້ອງອື່ນ ສຳລັບການສູ້ຮົບຢູ່ ຊີຣີ ຄື ອີຣານ, ຕວກກີ, ອາຮັບເບຍ ຊະອຸດິ…ຈະຍອມຮັບຢ່າງງ່າຍດາຍຫຼືບໍ? ພ້ອມກັນນັ້ນ ອະນາຄົດໃນເວທີການເມືອງຢູ່ ຊີຣີ ຈະສືບຕໍ່ຖືກຄອບງຳ, ມີຜົນກະທົບໂດຍກົງຈາກບັນດາປັດໃຈອື່ນໆຄື: ຫຼັກໝັ້ນແຂງກະດ້າງຂອງຝ່າຍຄ້ານກ່ຽວກັບບົດບາດຂອງທ່ານ al – Assad, ບັນດາການປະທະກັນປີນຂັ້ນໄດລະຫວ່າງຊາວມຸດສະລິມນິກາຍ Shiite ແລະ Sunni ຊຶ່ງຕົວແທນແມ່ນປະເທດ ອີຣານ ແລະ ອາຣັບເບຍ ຊະອຸດິ, ນະໂຍບາຍຂອງ ຕວກກີ ສຳລັບກຸ່ມຊາວ Kurd, ກຳລັງຮັບການມອບໝາຍຕົ້ນຕໍຂອງ ອາເມລິກາ ຢູ່ ຊີຣີ…
ບັນດາສິ່ງດັ່ງກ່າວ ລ້ວນແຕ່ໄດ້ຮັບການຮັບຮູ້ຈາກນັກໄຈ້ແຍກວ່າ ແມ່ນບັນດາສິ່ງ ກີດຂວາງວິວັດທະນາການສ້າງສາ ຊີຣີ ຄືນໃໝ່. ອະນາຄົດຂອງ ຊີຣີ ໂດຍຊາວ ຊີຣີ ຕັດສິນ. ແຕ່ເພື່ອໃຫ້ສິ່ງດັ່ງກ່າວ ປະກົດຜົນເປັນຈິງ ຄວນມີການຮ່ວມມືແບບບໍ່ຄຳນຶງ ເຖິງຜົນປະໂຫຍດຂອງບັນດາຝ່າຍທັງຢູ່ພາຍໃນ ແລະ ນອກພາກພື້ນ. ການສ້າງສາ ຊີຣີ ຄືນໃໝ່ ພາຍຫລັງຕົກເຂົ້າໃນສະພາບສົງຄາມກາງເມືອງ ເປັນເວລາ 6 ປີແນ່ນອນວ່າ ຈະປະສົບກັບຄວາມຫຍຸ້ງຍາກ, ລຳບາກນາໆປະການ./.