ວິກິດການຄົນເຂົ້າເມືອງຢູ່ເອີລົບພວມຢູ່ໃນລະດັບຍອດສູງ ຂະນະທີ່ໃນແຕ່ລະວັນ ມີຊາວອົບພະຍົບນັບພັນຄົນໄດ້ຫຼັ່ງໄຫຼມາບໍລິເວນຊາຍແດນບັນດາປະເທດທີ່ຂຶ້ນກັບສະຫະພາບເອີລົບ EU . ການຂາດສະຖຽນລະພາບໄດ້ເລີ່ມປະກົດຂຶ້ນຂະນະທີ່ການປະທະກັນ ໃຊ້ຄວາມຮຸນແຮງໄດ້ເກີດຂຶ້ນຢ່າງລຽນຕິດ. ໃນຈຸດເວລານີ້, EU ຍັງພວມຖືກແບ່ງແຍກ ແລະ ມີຄວາມບໍ່ລົງລອຍກັນຢ່າງເລິກເຊິ່ງກ່ຽວກັບການຈັດແບ່ງຈຳນວນຄົນອົບພະຍົບ. ແຕ່ເປັນອັນຕະລາຍກ່ວານັ້ນ, ໄດ້ມີນັກຮົບນັບພັນຄົນຂອງອົງການກໍ່ການຮ້າຍ “ລັດອິດສະລາມ” ຂະໜານນາມເອງ IS ໄດ້ເຂົ້າເມືອງບັນດາປະເທດ EU ດ້ວຍການປອມຕົວເປັນຊາວອົບພະຍົບ, ອັນໄດ້ເຮັດໃຫ້ເອີລົບຢືນຢູ່ຕໍ່ໜ້າສິ່ງທ້າທາຍຢ່າງຮ້າຍແຮງທີ່ມີຕໍ່ຄວາມໝັ້ນຄົງ.
ກຳປັ່ນບັນທຸກຊາວອົບພະຍົບຈາກອາຟະລິກາພວມຊອກຫາວິທີເພື່ອເຂົ້າເມືອງເອີລົບ
(ພາບ: The Guardian) |
ບັນດາປະເທດເອີລົບພວມເຈັບຫົວຕໍ່ໜ້າກະແສຟອງຊາວອົບພະຍົບ ເພື່ອຊອກຫາມາດຕະການສະກັດກັ້ນໂສກນາດຕະກຳທີ່ອາດຈະເກີດຂຶ້ນຢູ່ທະເລ ແລະ ທະເລຊາຍໃນການອອກເດີນທາງຂອງປະຊາຊົນຢູ່ບາງປະເທດອາຟະລິກາ ທີ່ຫວັງຊອກຫາການດຳລົງຊີວິດທີ່ດີງາມກວ່າເກົ່າຢູ່ເອີລົບ. ພ້ອມກັນນັ້ນ, ຄວາມເປັນຫ່ວງຕໍ່ການແບກຫາບດ້ານເສດຖະກິດ, ສັງຄົມ, ກະແສຟອງຊາວອົບພະຍົບ ກໍພວມຍູ້ເອີລົບຢືນຢູ່ຕໍ່ໜ້າຄວາມວິຕົກກັງວົນກ່ຽວກັບຄວາມສະຫງົບ ຂະນະທີີ່ກຳລັງ “ລັດອິດສະລາມ” ຂະໜານນາມເອງ IS ສວຍໃຊ້ບັນຫານີ້ເພື່ອເຂົ້າເມືອງບັນດາປະເທດໃນພາກພື້ນ.
ພວກກໍ່ການຮ້າຍປອມຕົວເປັນຊາວອົບພະຍົບ
ຕາມບັນດາແຫຼ່ງຂ່າວສືບລາຊະການລັບສາກົນແລ້ວ, ໄລຍະມໍ່ໆມານີ້, ບັນດານັກຮົບຂອງອົງການກໍ່ການຮ້າຍ “ລັດອິດສະລາມ” ຂະໜານນາມເອງ IS ໄດ້ ປອມຕົວເປັນຊາວອົບພະຍົບເພື່ອເຂົ້າເມືອງບັນດາປະເທດ EU . ຕາມການປະເມີນແລ້ວ, ປະຈຸບັນມີນັກຮົບເຖິງ 4.000 ຄົນ ໄດ້ປະກົດຕົວຢູ່ບັນດາປະເທດ EU. ພວກເຂົາໄດ້ຂ້າມຊາຍແດນເຕິກກີ, ຫຼັງຈາກນັ້ນ ກໍໄດ້ຮັບການໜູນຊ່ວຍຈາກພວກຄ້າມະນຸດຊາວທ້ອງຖິ່ນເພື່ອເຊື່ອມຕົວເຂົ້າກັບຂະບວນຄົນອົບພະຍົບຢ່າງຜິດກົດໝາຍ. ຈຸດປະສົງຂອງ “ລັດອິດສະລາມ” ຂະໜານນາມເອງ IS ແມ່ນດຳເນີນການບຸກໂຈມຕີກໍ່ການຮ້າຍ ແລະ ສ້າງຕັ້ງ “ ລາຊະອານາຈັກອິດສະລາມ” ໃນທົ່ວໂລກ. ກອ່ນໜ້ານັ້ນ, IS ກໍເຄີຍນາບຂູ່ວ່າ ຈະເຮັດໃຫ້ເອີລົບເຕັມໄປດ້ວຍຊາວມຸດສະລິມອົບພະຍົບ ຫຼືຖະແຫຼງວ່າ ຈະເຮັດໃຫ້ຖະໜົນຫົນທາງ ປາຣີ ກາຍເປັນປ່າຊ້າເຕັມໄປດ້ວຍສົບຄົນຕາຍ.
ປະຈຸບັນ, IS ພວມຄວບຄຸມຫຼາຍບໍລິເວນໃຫຍ່ຂອງອີຣັກ ແລະ ຊີຣີ, ເປີດກ້ວາງການເຄື່ອນໄຫວໄປຍັງລີບີ ເມື່ອບັນດາກຸ່ມທີ່ເປັນປໍລະປັກຢູ່ປະເທດນີ້ເກີດການຂັດແຍ້ງ, ຍາດແຍ່ງສິດອຳນາດ. ແຕ່ດົນນານມາແລ້ວ, IS ໄດ້ມີເຈດຈຳນົງເປີດກ້ວາງເຄືອຂ່າຍການເຄື່ອນໄຫວຢູ່ເອີລົບ ແລະ ວິກິດການ ຊາວອົບພະຍົບທີ່ຊົ່ວຮ້າຍທີ່ສຸດນັບແຕ່ສົງຄາມໂລກຄັ້ງທີ 2 ເປັນຕົ້ນມານັ້ນ ກໍເປັນໂອກາດດີກວ່າໝູ່ເພື່ອໃຫ້ IS ເຂົ້າເມືອງບັນດາປະເທດ EU . ໃນຊຸມມື້ທີ່ຜ່ານມາ, ຊາວອົບພະຍົບນັບພັນຄົນໄດ້ຫຼັ່ງໄຫຼຈາກເຂດຊາຍແດນ ແຊກເບຍ ມາຍັງຮຸງກາຣີ, ແລ້ວກໍໄປຕໍ່ຮອດເຢຍລະມັນ, ໂອຕະລິດ, ແຟງລັງ. ໃນຈຳນວນນີ້, ກໍມີບຸກຄົນຫົວຮຸນແຮງຈຳນວນໜຶ່ງໄດ້ປຸກລຸກການເດີນຂະບວນປະທ້ວງ ຄັດຄ້ານອຳນາດການປົກຄອງປະຈຳຖິນ່. ໃນຂະບວນຄົນອົບພະຍົບເຫຼົ່ານີ້, ຕຳຫຼວດເອີລົບ ກໍຍາກທີ່ຈະຈຳແນກກ່ຽວກັບຜູ້ໃດແມ່ນ IS ແລະ ຜູ້ໃດແມ່ນ ຊາວອົບພະຍົບ. ເລື່ອງ IS ແຊກຊຶມເຂົ້າດິນແດນເອີລົບ ອາດຈະແມ່ນການລິເລີ່ມແກ່ການເຄື່ອນໄຫວໂຕ້ຕອບຕໍ່ການບຸກໂຈມຕີທາງອາກາດ ໂດຍອາເມລິກາ ແລະ ບັນດາປະເທດພັນທະມິດດຳເນີນແນໃສ່ IS ຢູ່ຕາເວັນອອກກາງ.
ເອີລົບຖືກແບ່ງແຍກຍ້ອນບັນຫາຄົນເຂົ້າເມືອງ
ເລື່ອງບັນດານັກຮົບ IS ປອມຕົວເປັນຊາວອົບພະຍົບ ໄດ້ເຮັດໃຫ້ຫຼາຍປະເທດເອີລົບ ເລັ່ງລັດຂໍ້ກຳນົດຮັບຊາວອົບພະຍົບ. ບັນດາປະເທດ EU ບໍ່ສາມາດຊອກຫາສຽງເວົ້າລວມໃນບັນຫານີ້. ຄວາມບໍ່ລົງລອຍກັນ ແລະ ການແບ່ງແຍກກ່ຽວກັບບັນຫາຊາວອົບພະຍົບ ແລະ ເຂົ້າເມືອງ ແມ່ນນັບມື້ນັບຮ້າຍແຮງໃນ EU.
ວັນທີ 9/9, ຄະນະກຳມະການເອີລົບ ໄດ້ປະກາດແຜນການຈັດແບ່ງຊາວອົບພະຍົບ 120.000 ຄົນຢູ່ບັນດາປະເທດ EU ຕາມຈຳນວນໂດຍບັງຄັບ. ລະອຽດຄື : ເຢຍລະມັນຮັບ ຊາວອົບພະຍົບກວ່າ 31.000 ຄົນ, ຝະລັ່ງຮັບຊາວອົບພະຍົບກວ່າ 24.000 ຄົນ ແລະ ແອດສປາຍຮັບຊາວອົບພະຍົບເກືອບ 15.000 ຄົນ. ໃນຂະນະນັ້ນ, ຫຼາຍປະເທດເອີລົບໄດ້ຄັດຄ້ານ ແລະ ຖືວ່າ ບໍ່ຄວນຈັດແບ່ງຈຳນວນ ຊາວອົບພະຍົບເຂົ້າເມືອງ ຫາກຄວນຮັບຊາວອົບພະຍົບດ້ວຍຄວາມສາມັກໃຈ.
ໃນຂະນະທີ່ບັນດາປະເທດ EU ຍັງພວມໂຕ້ຖຽງກັນກ່ຽວກັບການຈັບແບ່ງຊາວອົບພະຍົບເຂົ້າເມືອງ, ຂະບວນຄົນອົບພະຍົບຍັງຄົງພາກັນຫຼັ່ງໄຫຼມາຍັງເອີລົບ, ໃນນັ້ນມີທັງບັນດານັກຮົບ “ລັດອິດສະລາມ” ຂະໜານນາມເອງ IS ທີ່ປອມຕົວເປັນຊາວອົບພະຍົບ. ເລື່ອງກຳລັງ IS ປະກົດຕົວຢູ່ທົ່ວເອີລົບ ກໍປຽບເໝືນບັນດາລູກລະເບີດທີ່ຍັງບໍ່ທັນແຕກ ອັນໄດ້ນາບຂູ່ຕໍ່ຄວາມໝັ້ນຄົງຂອງທັງພາກພື້ນ.