កិច្ចប្រជុំនេះក៏មានគោលបំណងសម្រេចការឯកភាពគ្នាលើលទ្ធផលជាក់ស្តែង មុនកិច្ចប្រជុំកំពូលរវាងប្រធានរដ្ឋចិន លោក Xi Jinping និងប្រធានាធិបតីអាមេរិក លោក Donald Trump នៅទីក្រុងវ៉ាស៊ីនតោន ដែលគ្រោងនឹងប្រព្រឹត្តទៅនៅថ្ងៃទី ២៤ ខែកញ្ញា។

ថ្លែងទៅកាន់អ្នកយកព័ត៌មានបន្ទាប់ពីកិច្ចប្រជុំជាមួយឧបនាយករដ្ឋមន្ត្រីចិន លោក He Lifeng រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បាន​ឱ្យដឹងថា៖ «​យើង​ទើបតែមានកិច្ចប្រជុំដ៏ជោគជ័យជាមួយភាគីចិនស្តីពីពាណិជ្ជកម្ម និងបញ្ញាសិប្បនិម្មិត ដោយបន្តកិច្ចការដែលមិនទាន់បានបញ្ចប់ពីកិច្ច​ប្រជុំ​នៅទីក្រុងប៉េកាំង។ ប្រការដែលយើងបានពិភាក្សា គឺការបង្កើតយន្តការមួយ ដែលហៅថា កិច្ចសន្ទនាអាមេរិក-ចិន ស្តីពីបញ្ញាសិប្បនិម្មិត។ យើងបានយល់ព្រមជួបគ្នាម្តងទៀត។ សហរដ្ឋអាមេរិកបានស្នើឱ្យបង្កើតយន្តការជូនដំណឹងរវាងប្រទេសទាំងពីរ ខណៈពេលដែលកំពុងធ្វើការឆ្ពោះទៅរកចក្ខុវិស័យរួមលើគោលដៅនិងការគំរាមកំហែងរួម។»​​

ជំនួបនេះគឺស្រដៀងគ្នាទៅនឹងកិច្ចប្រជុំកាលពីខែឧសភា នៅពេលដែលលោក Bessent និងលោក He Lifeng បានធ្វើការចរចានៅទីក្រុងសេអ៊ូល តែ​ប៉ុន្មានថ្ងៃមុនពេល​មេដឹកនាំសហរដ្ឋអាមេរិក និងចិនជួបគ្នានៅទីក្រុងប៉េកាំង។ នៅក្នុងកិច្ចប្រជុំនោះ មេដឹកនាំទាំងពីរបានយល់ព្រមបង្កើតយន្តការសន្ទនាអន្តររដ្ឋាភិបាលស្តីពី AI៕