នៅថ្ងៃទី ៦ ខែវិច្ឆិកា ឆ្នាំ ២៩៧៩ រោងចក្រថាមពលវារីអគ្គិសនីហ័រប៊ិញបានចាប់ផ្តើមសាងសង់ជាផ្លូវការនៅលើទន្លេដា - ទន្លេដែលមានចរន្តទឹកដ៏ខ្លាំងក្លាបំផុតនៅអាស៊ីអាគ្នេយ៍។
រយៈពេលជាង ៣០ ឆ្នាំបន្ទាប់ពីការសម្ពោធ រោងចក្រថាមពលវារីអគ្គិសនីក្រោមដីធំជាងគេបំផុតនៅអាស៊ីអាគ្នេយ៍ក្នុងសតវត្សរ៍ទី ២០ នៅតែឈរជើងយ៉ាងរឹងមាំនៅលើទន្លេដា។
សំណង់នេះមិនត្រឹមតែផ្គត់ផ្គង់អគ្គិសនីប៉ុណ្ណោះទេ ថែមទាំងដើរតួនាទីយ៉ាងសំខាន់ក្នុងការគ្រប់គ្រងទឹកជំនន់សម្រាប់តំបន់ខាងក្រោមទន្លេ ផ្គត់ផ្គង់ទឹកស្រោចស្រពដល់ផ្ទៃដីដាំដុះជាង ៧០% នៅតំបន់ដីសណ្តរភាគខាងជើង និងកែលម្អការដឹកជញ្ជូនតាមផ្លូវទឹក។
នៅថ្ងៃទី ២៥ ខែឧសភា ឆ្នាំ ២០២១ រោងចក្រថាមពលវារីអគ្គិសនីហ័រប៊ិញបានឈានដល់ដំណាក់កាលសំខាន់មួយនៃការផលិតអគ្គិសនីចំនួន ២៥០ ពាន់លានគីឡូវ៉ាត់ម៉ោង ដែលជាទិន្នផលដ៏ធំបំផុតនៅអាស៊ីអាគ្នេយ៍នៅពេលនោះ ដែលរួមចំណែកយ៉ាងសំខាន់ក្នុងការធានាសន្តិសុខថាមពលជាតិ។
នៅច្រកចូលផ្លូវរូងក្រោមដីដែលនាំទៅដល់រោងចក្រ គឺជាសាររបស់លោកប្រធានហូជីមិញថា «អស់ពីចិត្ត ពីថ្លើម បម្រើមាតុភូមិ និងប្រជាជន»។
រោងចក្រក្រោមដីស្ថិតក្នុងភ្នំមួយ ដែលបំពាក់ឧបករណ៍សំខាន់ៗទាំងអស់ រួមមានម៉ាស៊ីនភ្លើងចំនួន ៨ក្រុម ម៉ាស៊ីនបំលែងថាមពល និងរចនាសម្ព័ន្ធគាំទ្រផ្សេងៗទៀត។ ម៉ាស៊ីនភ្លើងចំនួន ៨ ក្រុម មានសមត្ថភាពសរុបចំនួន ១.៩២០ មេហ្គាវ៉ាត់ ដែលក្រុមនីមួយៗមានសមត្ថភាពចំនួន ២៤០ មេហ្គាវ៉ាត់។
ជារៀងរាល់ថ្ងៃ ភ្ញៀវទេសចរជាច្រើនមកពីទូទាំងប្រទេសបានមកទស្សនា “សំណង់សតវត្សរ៍” នេះ។
ផ្ទះប្រពៃណីរបស់រោងចក្រថាមពលវារីអគ្គិសនីហ័រប៊ិញ គឺជាកន្លែងដែលដាក់តាំងបង្ហាញវត្ថុបុរាណ ឯកសារ និងរូបភាពប្រវត្តិសាស្ត្រអំពីដំណើរការសាងសង់រោងចក្រថាមពលវារីអគ្គិសនីហ័រប៊ិញ។
គ្រឿងចក្រដែលប្រើប្រាស់ក្នុងការសាងសង់រោងចក្រថាមពលវារីអគ្គិសនីហ័រប៊ិញកាលពីជិត ៥០ ឆ្នាំមុន ត្រូវបានដាក់តាំងបង្ហាញនៅផ្ទះប្រពៃណី។
ជាពិសេស នៅទីនេះកំពុងរក្សាទុក "សំបុត្រនៃសតវត្សរ៍" ដែលនឹងត្រូវបានបើកនៅឆ្នាំ ២១០០។ ផ្លាក់សញ្ញាដែកដែលចារឹកជាភាសាវៀតណាម និងរុស្ស៊ីសរសេរថា៖ «នេះជាកន្លែងរក្សាទុកសំបុត្ររបស់អ្នកសាងសង់រោងចក្រថាមពលវារីអគ្គិសនីហ័រប៊ិញ ផ្ញើរជូនមនុស្សជំនាន់ក្រោយ»។
លើសពីគម្រោងឧស្សាហកម្មសុទ្ធសាធ រោងចក្រថាមពលវារីអគ្គិសនីហ័រប៊ិញគឺជានិមិត្តរូបនៃស្មារតីធ្វើពលកម្ម ការលះបង់ និងសាមគ្គីភាពអន្តរជាតិ។ ក្នុងអំឡុងពេលសាងសង់រោងចក្រថាមពលវារីអគ្គិសនីហ័រប៊ិញ កម្មាភិបាល វិស្វករ និងកម្មករចំនួន ១៦៨ នាក់បានពលីជីវិត រួមទាំងកម្មាភិបាលបច្ចេកទេសសូវៀតចំនួន ១១ នាក់។ នៅលើទំនប់វារីអគ្គិសនី មានវិមានមួយត្រូវបានសាងសង់ឡើងដើម្បីរំលឹកដល់ការចូលរួមចំណែករបស់អ្នកដែលបានពលីកម្មក្នុងអំឡុងពេលសាងសង់គម្រោង។
នៅក្នុងខែមករា ឆ្នាំ២០២១ ក្រុមហ៊ុនអគ្គិសនីវៀតណាម (EVN) បានចាប់ផ្តើមគម្រោងពង្រីករោងចក្រវារីអគ្គិសនីហ័រប៊ិញ នៅច្រាំងខាងស្តាំនៃទំនប់ដែលមានស្រាប់ ដោយបន្ថែមក្រុមម៉ាស៊ីនភ្លើងចំនួន ២ បន្ថែមទៀត ដោយសមត្ថភាពសរុប ៤៨០មេហ្គាវ៉ាត់។ នេះគឺជាគម្រោងពង្រីកវារីអគ្គិសនីដ៏ធំបំផុតនៅវៀតណាម ដែលរួមចំណែកដល់ការបង្កើនសមត្ថភាពសរុបរបស់រោងចក្រវារីអគ្គិសនីហ័រប៊ិញដល់ជាង ២.៤០០ មេហ្គាវ៉ាត់ ដើម្បីធានាសន្តិសុខថាមពលជាតិ។
ដំណើរការសាងសង់រោងចក្រថាមពលវារីអគ្គិសនីហ័រប៊ិញ៖
- ថ្ងៃទី៦ ខែវិច្ឆិកា ឆ្នាំ១៩៧៩៖ ការសម្អាតដីធ្លីនៅលើច្រាំងទន្លេ
- ថ្ងៃទី១២ ខែមករា ឆ្នាំ១៩៨៣៖ ការសាងសង់ទំនប់លើទន្លេដា ដំណាក់កាលទី ១
- ថ្ងៃទី៩ ខែមករា ឆ្នាំ១៩៨៦៖ ការសាងសង់ទំនប់លើទន្លេដា ដំណាក់កាលទី ២
- ថ្ងៃទី៣០ ខែធ្នូ ឆ្នាំ១៩៨៨៖ ក្រុមម៉ាស៊ីនភ្លើងលេខ ១ ភ្ជាប់ទៅនឹងបណ្តាញអគ្គិសនីជាតិ។
- ថ្ងៃទី៤ ខែមេសា ឆ្នាំ១៩៩៤៖ ក្រុមម៉ាស៊ីនភ្លើងលេខ ៨ ភ្ជាប់ទៅនឹងបណ្តាញអគ្គិសនីជាតិ។
- ថ្ងៃទី២០ ខែធ្នូ ឆ្នាំ១៩៩៤៖ រោងចក្រថាមពលវារីអគ្គិសនីហ័រប៊ិញត្រូវបានសម្ពោធជាផ្លូវការ។
កម្មាភិបាល និងកម្មករជាង ៣០.០០០ នាក់; ទាហានវិស្វកម្ម ៥.០០០ នាក់ និងកម្មាភិបាលគ្រប់គ្រង ១.០០០ នាក់ អ្នកជំនាញសូវៀត ៧៥០ នាក់បានចូលរួមក្នុងការសាងសង់រោងចក្រថាមពលវារីអគ្គិសនីហ័រប៊ិញ៕
