សហករណ៍កាហ្វេ Bich Thao បច្ចុប្បន្នមានផ្ទៃដីដាំដុះកាហ្វេពិសេសជាង ៦០ ហិកតា (រូបថត៖ VOV)

សហករណ៍កាហ្វេ Bich  Thao មានទីតាំងស្ថិតនៅភូមិ Hoang Van Thu សង្កាត់ Hua La ទីក្រុង Son La ដោយបានបង្កើតឡើងក្នុងឆ្នាំ ២០១៧ រហូតមកដល់ពេលនេះ មានសមាជិកចំនួន ១១ នាក់ ដែលមានផ្ទៃដីដាំកាហ្វេសរុបជាង ៩០ ហិកតា។ ក្រៅពីសមាជិកពេញសិទ្ធិសំខាន់ៗ សហករណ៍ក៏បានទទួលយកសមាជិកចំនួន ៤០០ នាក់បន្ថែមទៀតចូលរួមក្នុងផលិតកម្មនិងកែច្នៃកាហ្វេលើផ្ទៃដីដាំដុះជិត ១.០០០ ហិកតាទៀតផង។

ដើម្បីលើកកម្ពស់នូវគុណភាពនិងតម្លៃផលិតផល សំដៅឆ្លើយតបទៅនឹងតម្រូវការទីផ្សារ សហករណ៍បានវិនិយោគលើប្រព័ន្ធឧបករណ៍និងម៉ាស៊ីនទំនើបសម្រាប់ផលិតកម្មនិងកែច្នៃ ដូចជា៖ ម៉ាស៊ីនលីងនិងគិនកាហ្វេ ម៉ាស៊ីនបែងចែកម៉ាកកាហ្វេតាមពណ៌និងផ្ទះកញ្ចក់សម្រាប់ការផលិតនិងកែច្នៃកាហ្វេលាយទឹកឃ្មុំ ឬតែស៊ីរូធ្វើពីសំបកកាហ្វេជាដើម។  តាមនោះ ខេត្តបានកសាងម៉ាកយីហោផលិតផល និងកសាងកេរ្ត៍ឈ្មោះការហ្វេ Bich Thao  ដើម្បីនាំម៉ាកកាហ្វេពិសេសមួយប្រភេទនេះរបស់ខេត្ត Son La ជូនដល់អតិថិជន។  លោក Nguyen Xuan Thao នាយកសហករណ៍កាហ្វេ Bich Thao បានឲ្យដឹងថា៖ “ដំបូងឡើយ ប្រជាជនដាំដុះកាហ្វេក៏ជួបប្រទះនឹងការលំបាកមិនតិចឡើយ ប៉ុន្តែបន្ទាប់ពីឆ្លងកាត់វគ្គបណ្តុះបណ្តាលរបស់មន្ទីរ សាខា ស្រុកនិងទីក្រុងជាទូទៅ ប្រជាជនបានយល់ដឹងថា ផលិតផល OCOP នាំមកនូវផលប្រយោជន៍ជាក់ស្តែងដល់អ្នកដាំដុះ និងអ្នកកែច្នៃ រួមទាំងនាំមកជូនអតិថិជននូវផលិតផលដែលមានគុណភាពខ្ពស់និងមានគុណភាពល្អប្រសើរទៀតផង”។

ដោយបានប្រើប្រាស់វិទ្យាសាស្ត្រនិងបច្ចេកវិទ្យាទំនើបក្នុងដំណាក់កាលផលិតកម្មនីមួយៗ បច្ចុប្បន្ននេះ សហករណ៍កំពុងអនុវត្តគំរូដាំកាហ្វេពិសេសលើផ្ទៃដីចំនួន ៦០ ហិកតា ដែលផលិតតាមទិសដៅសរីរាង្គ ហើយត្រូវបានទទួលស្គាល់ថាផលិតតាមស្តង់ដារ VietGAP។ នេះជាប្រភេទពូជកាហ្វេ THA1 ដែលមានទិន្នផលនិងគុណភាពខ្ពស់ ជាពិសេសសម្រាប់កែច្នៃកាហ្វេដើម្បីនាំចេញផងដែរ”។

លោកស្រី Nguyen Thi Bac សមាជិកនៃសហករណ៍បានឲ្យដឹងថា បើប្រៀបធៀបនឹងតម្លៃកាហ្វេធម្មតាដែលកែច្នៃតាមបែបប្រពៃណីនោះ គឺប្រភេទកាហ្វេពិសេសថ្មីនេះមានគុណភាពខ្ពស់ជាង ហើយតម្លៃសេដ្ឋកិច្ចក៏កើនឡើងពី៣ ដល់៤ ដងដែរ សូម្បីតែ ផលិតផលតែស៊ីរូធ្វើពីសំបក់កាហ្វេក៏មានតម្លៃខ្ពស់ រហូតដល់ ៤៥០,០០០ ដុង/១ គីឡូក្រាមដែរ។

“ពូជកាហ្វេថ្មីនេះ គឺជាពូជគ្រាប់ធំ ពោលគឺគ្រាប់ធំផងនិងមានគុណភាពល្អជាងមុនផង ដូច្នេះ ទើបខ្ញុំចូលរួមផ្លាស់ប្តូរការដាំដុះនេះ។ ខ្ញុំនឹងខិតខំថែទាំចំការនឹងចាំមើល ប្រសិន បើឆ្នាំក្រោយ ចំការនេះផ្តល់ទិន្នផលល្អ ខ្ញុំនឹងបំផ្លាញពូជចាស់ទាំងអស់ ហើយដាំពូជថ្មីទាំងស្រុងជំនួសវិញ”។

មិនត្រឹមតែប៉ុណ្ណោះ សហករណ៍កាហ្វេ Bich Thao ថែមទាំងបន្តពង្រីកទំហំផលិតកម្មរួមបញ្ចូលទាំងលើកកម្ពស់បច្ចេកវិទ្យាកែច្នៃកាហ្វេទៀតផង។ ម្យ៉ាងវិញទៀត សហករណ៍បានជំរុញការកែលម្អពូជកាហ្វេថ្មីដើម្បីជំនួសពូជកាហ្វេបែបប្រពៃណីនិងសហការជាមួយអង្គការ អាជីវកម្ម និងគ្រួសារនានាក្នុងផលិតកម្ម កែច្នៃនិងលក់ផលិតផល។

សហករណ៍បានវិនិយោគលើឧបករណ៍និងម៉ាស៊ីនទំនើបៗ ជាច្រើនសម្រាប់ការផលិតនិងកែច្នៃកាហ្វេ (រូបថត៖ VOV)

លោក Nguyen Xuan Thao បានឲ្យដឹងថែមទៀតថា ការសហការគ្នាដើម្បីផលិតកម្មនិងការប្រើប្រាស់ផលិតផលរវាងសមាជិកដែលចូលរួមក្នុងផលិតកម្មនិងសហករណ៍បានដំណើរការដោយស៊ីចង្វាក់គ្នាអស់រយៈពេលជាច្រើនឆ្នាំមកហើយ។ សមាជិកនៃសហករបានបង្កើតផ្នត់គំនិតនៃផលិតកម្មកសិកម្មដែលមានគុណភាពខ្ពស់ កន្លែងខ្លះបានដាំប្រភេទកាហ្វេ THA1 ដោយរួមបញ្ចូលក្នុងចំការកាហ្វេបែបប្រពៃណី ប៉ុន្តែការលំបាកធំបំផុតនៅពេលនេះគឺមិនមានថវិកាគ្រប់គ្រាន់សម្រាប់ជួយឧបត្ថម្ភដល់គ្រួសារក្នុងការដាំពូជកាហ្វេពិសេសថ្មីនេះទេ។

“សហករណ៍បានស្នើដល់មន្ទីរ សាខានិងគណៈកម្មាធិការប្រជាជនខេត្ត គណៈកម្មាធិការប្រជាជនទីក្រុង ដើម្បីអាចជួយឧបត្ថម្ភបងប្អូនកសិករអំពីពូជមួយចំណែក ពោលគឺ ឱ្យកសិករដាំពូជកាហ្វេថ្មី THA1 ដើម្បីនាំមកនូវផលប្រយោជន៍មានស្ថេរភាពសម្រាប់អ្នកដាំកាហ្វេ”។

ការផ្លាស់ប្តូរផ្នត់គំនិតក្នុងផលិតកម្មកសិកម្ម ដោយផ្តោតលើការអភិវឌ្ឍត្រឹមត្រូវ ពីផលិតកម្មផលិតផលទៅជាការកែច្នៃដើម្បីកែលម្អខ្សែផលិតផលកាហ្វេរបស់សហករណ៍បានរួមចំណែកបង្កើនប្រាក់ចំណូលសរុបរបស់សហករណ៍កាហ្វេ Bich Thao ដែលក្នុងមួយឆ្នាំ ទទួលបានជាង ៤០ ពាន់លានដុង។

ការដែលសហករណ៍បានខិតខំប្រឹងប្រែងក្នុងការកសាងម៉ាកយីហោ ធានានូវល័ក្ខខ័ណ្ឌសម្រាប់ការពិនិត្យដើម្បីទទួលស្គាល់ស្តង់ដារផ្កាយ ៥ ថ្នាក់ជាតិ បានបង្ហាញពីផ្នត់គំនិតផលិតកម្មកសិកម្មយ៉ាងមានរបៀបរាបរយនិងបំណងប្រាថ្នា អះអាងពីម៉ាកយីហោនិងគុណភាពរបស់កាហ្វេនៅតំបន់ព្រៃភ្នំ Son La ជាមួយនឹងទីផ្សារធំ មិនត្រឹមតែក្នុងប្រទេសប៉ុណ្ណោះទេ ថែមទាំងនៅតាមទីផ្សារអន្តរជាតិទៀតផង៕