ដំណើរទស្សនកិច្ចជាផ្លូវការនៅប្រទេសឡាវរបស់លោកប្រធានរដ្ឋ Vo Van Thuong ប្រព្រឹត្តទៅក្នុងរយៈពេល ២ ថ្ងៃ (ថ្ងៃទី ១០ និងទី ១១ ខែមេសា)។ នេះជាដំណើរទស្សនកិច្ចនៅឯបរទេសលើកដំបូងរបស់លោកចាប់តាំងពីឡើងកាន់តំណែងជាប្រធានរដ្ឋ។

ទំនាក់ទំនងវៀតណាម-ឡាវកំពុងមានសន្ទុះអភិវឌ្ឍដ៏ល្អប្រសើរ

ទំនាក់ទំនងរវាងវៀតណាមនិងឡាវ គឺជាទំនាក់ទំនងពិសេស។ ការដែលមេដឹកនាំជាន់ខ្ពស់នៃប្រទេសទាំងពីរតែងតែជ្រើសរើសប្រទេសមិត្តជាប្រទេសដំបូងគេដើម្បីទៅបំពេញទស្សនកិច្ចបន្ទាប់ពីចូលកាន់តំណែងជាអ្នកដឹកនាំបានក្លាយជាទំនៀមទម្លាប់ ជាប្រពៃណីដ៏ល្អប្រសើរ ដែលបង្ហាញពីមនោសញ្ចេតនាពិសេសរវាងបងប្អូនដ៏ជិតស្និទ្ធនិងស្មោះត្រង់របស់គ្នា។

ដំណើរទស្សនកិច្ចរបស់លោកប្រធានរដ្ឋ Vo Van Thuong ត្រូវបានធ្វើឡើងត្រឹមតែរយៈពេលខ្លីមួយប៉ុណ្ណោះ បន្ទាប់ពីលោកត្រូវបានរដ្ឋសភា នីតិកាលទី១៥ បោះឆ្នោតជ្រើសតាំងជាប្រធានរដ្ឋនៃសាធារណរដ្ឋសង្គមនិយមវៀតណាម នៅថ្ងៃទី២ ខែមីនា ឆ្នាំ២០២៣។ យោងតាមឯកអគ្គរដ្ឋទូត
វៀតណាមប្រចាំនៅឡាវ លោក Nguyen Ba Hung ប្រការនេះបង្ហាញជាថ្មីម្តងទៀតថា ថ្នាក់ដឹកនាំបក្ស រដ្ឋវៀតណាមមានមនោសញ្ចេតនិងយកចិត្តទុកដាក់ពិសេសចំពោះឡាវ ដែលបង្ហាញពីការប្តេជ្ញាចិត្ត និងការសន្យាមុតមាំរបស់ថ្នាក់ដឹកនាំប្រទេសទាំងពីរក្នុងការពូនជ្រុំទំនាក់ទំនងមិត្តភាពមហិការ សាមគ្គីភាពពិសេស និងកិច្ចសហប្រតិបត្តិការគ្រប់ជ្រុងជ្រោយរវាងវៀតណាមនិងឡាវ ហើយអភិវឌ្ឍន៍ដោយឥតឈប់ឈរឡើងកំពស់ថ្មី។

ឯកអគ្គរដ្ឋទូតវៀតណាមប្រចាំនៅឡាវ លោក Nguyen Ba Hung។ (រូបថត៖ VOV)

ជាការកត់សម្គាល់ ដំណើរទស្សនកិច្ចជាផ្លូវការរបស់លោកប្រធានរដ្ឋ Vo Van Thuong បានធ្វើឡើងនៅមុនពេលបុណ្យចូលឆ្នាំថ្មី ប៊ុនភីម៉ៃ របស់ប្រជាជនឡាវបងប្អូន។ ដូច្នេះដំណើរទស្សនកិច្ចនេះនាំមកនូវសារដ៏ពិសេសមួយ។ ឯកអគ្គរដ្ឋទូតវៀតណាមប្រចាំនៅឡាវ លោក Nguyen Ba Hung បានឲ្យដឹងថា៖

“ដូចប្រិយមិត្តបានដឹងហើយថា អ្នកណាក៏សប្បាយចិត្តនិងមានសុភមង្គលខ្លាំងណាស់ នៅពេលដែលមុនចូលឆ្នាំថ្មី មានបងប្អូន មិត្តភក្តិមកសួរសុខទុក្ខ នាំមកនូវមនោសញ្ចេតនាដ៏ជិតស្និទ្ធ កក់ក្តៅ និងការគាំទ្រដ៏ថ្លៃថ្លា។ ដំណើរទស្សនកិច្ចនេះគឺដូចជាសេចក្ដីជូនពររាប់លាន ពីប្រជាជនវៀតណាមផ្ញើរទៅកាន់ប្រជាជនបណ្ដាជនជាតិឡាវជាបងប្អូន សុំឲ្យគេចូលឆ្នាំថ្មីជួបតែសំណាងល្អ សម្រេចបាននូវសមិទ្ធផលថ្មីកាន់តែធំធេង; ប្រទេសឡាវកាន់តែអភិវឌ្ឍន៍ប្រកបដោយវិបុលភាព ប្រជាជនកាន់តែរីកចម្រើន និងសុភមង្គល”។

នាបច្ចុប្បន្ននេះ ទំនាក់ទំនងវៀតណាម-ឡាវកំពុងមានសន្ទុះអភិវឌ្ឍដ៏ល្អប្រសើរ កិច្ចព្រមព្រៀងរបស់ថ្នាក់ដឹកនាំជាន់ខ្ពស់នៃបក្សទាំងពីរ និងរដ្ឋទាំងពីរ ហើយកិច្ចព្រមព្រៀងសហប្រតិបត្តិការទ្វេភាគីកំពុងត្រូវបានប្រទេសទាំងពីរដាក់ឲ្យដំណើរការយ៉ាងសកម្ម និងសម្រេចបាននូវលទ្ធផលសំខាន់ៗលើគ្រប់វិស័យ។ ក្នុងរយៈពេលកន្លងមក វៀតណាមនិងឡាវបានសហការប្រកបដោយប្រសិទ្ធភាពលើគ្រប់វិស័យ ដូចជាកិច្ចសហប្រតិបត្តិការក្នុងការបង្ការទប់ស្កាត់ជំងឺកូវីដ-១៩ កិច្ចសហប្រតិបត្តិការលើវិស័យការពារជាតិ សន្តិសុខបន្តត្រូវបានពង្រឹង។

ជាពិសេស កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគបន្តត្រូវបានរក្សាយ៉ាងល្អប្រសើរ។ វៀតណាមបានវិនិយោគលើគម្រោងដែលនៅមានសុពលភាពជិត ២៤០ គម្រោងនៅក្នុងប្រទេសឡាវ ជាមួយនឹងដើមទុនសរុបជិត ៥,៤ ពាន់លានដុល្លារអាមេរិក ដែលជាប់ចំណាត់ថ្នាក់លេខ ៣ ក្នុងចំណោមប្រទេស និងដែនដីដែលវិនិយោគនៅឡាវ។ កាលពីឆ្នាំមុន ទំហំពាណិជ្ជកម្មទ្វេភាគីសម្រេចបានជិត ១,៧ ពាន់លានដុល្លារអាមេរិក កើនឡើងជាង ២៥% បើធៀបនឹងឆ្នាំមុននោះ។

ភាគីទាំងពីរក៏បានប្រារព្ធពិធីបើកការដ្ឋាន សម្ពោធ និងប្រគល់គម្រោងមួយចំនួន ដែលប្រើប្រាស់ទុនជំនួយរបស់រដ្ឋាភិបាលវៀតណាម ដល់រដ្ឋាភិបាលឡាវ ដូចជា៖ បើកការដ្ឋានគម្រោងមជ្ឈមណ្ឌលសេវាកម្មបច្ចេកទេសកសិកម្មខេត្ត Xaysomboun; បើកសម្ពោធរោងចក្រកែច្នៃកសិផលនិងឱសថខេត្ត Xaysomboun; អនុវត្តន៍យ៉ាងសកម្មនូវគម្រោងសាងសង់ព្រលានយន្តហោះ NongKhang ហើយគ្រោងនឹងសម្រេចនៅឆ្នាំនេះ។

ក្រសួងអប់រំនៃប្រទេសទាំងពីរបានចេញផ្សាយគម្រោងសហប្រតិបត្តិការវិស័យអប់រំរវាងវៀតណាមនិងឡាវដំណាក់កាល ២០២១-២០៣០។ កាលពីឆ្នាំមុន វៀតណាមបានផ្តល់ឲ្យឡាវនូវអាហារូបករណ៍មកសិក្សានៅវៀតណាមជិត ១២០០ កញ្ចប់ ដែលធ្វើឲ្យចំនួននិស្សិតឡាវមកសិក្សានៅវៀតណាមសរុបឡើងប្រមាណ ១៤០០០នាក់។

បង្កើតកម្លាំងចលករថ្មីសម្រាប់ទំនាក់ទំនងទ្វេភាគី

ដំណើរទស្សនកិច្ចរបស់ប្រធានរដ្ឋ លោក Vo Van Thuong ធ្វើឡើងក្នុងបរិបទដែលបក្សកុម្មុយ
និស្តវៀតណាម បក្សប្រជាជនបដិវត្តន៍ឡាវ និងប្រទេសទាំងពីរកំពុងអនុវត្តន៍សេចក្តីសម្រេចចិត្តនៃមហាសន្និបាតបក្សនីមួយៗ ព្រមទាំងអនុវត្តន៍ផែនការអភិវឌ្ឍន៍សេដ្ឋកិច្ចសង្គមនៃប្រទេសនីមួយៗ ជាពិសេសការស្ដារសេដ្ឋកិច្ចឡើងវិញក្រោយពីជំងឺរាតត្បាត COVID-19 ហើយប្រទេសទាំងពីរទទួលបានសមិទ្ធិផលសំខាន់ៗ។

ដូច្នេះហើយ ដំណើរទស្សនកិច្ចនេះ គឺជាឱកាសសម្រាប់ ប្រធានរដ្ឋវៀតណាមលោក Vo Van Thuong និងអគ្គលេខាបក្ស ប្រធានរដ្ឋឡាវលោក Thongloun Sisoulith រួមជាមួយថ្នាក់ដឹកនាំផ្សេងទៀតរបស់ឡាវ ផ្លាស់ប្តូរ និងឯកភាពលើទិសដៅ គោលជំហរ និងវិធានការធំៗ ដើម្បីជំរុញទំនាក់ទំនងសហប្រតិបត្តិការគ្រប់ជ្រុងជ្រោយរវាងប្រទេសទាំងពីរក្នុងឆ្នាំនេះ និងឆ្នាំបន្ទាប់ៗឲ្យកាន់តែស៊ីជម្រៅ និងមានប្រសិទ្ធភាព; ផ្លាស់ប្តូរអំពីស្ថានភាពក្នុងតំបន់និងពិភពលោកនាពេលថ្មីៗនេះ ការសម្របសម្រួលរវាងប្រទេសទាំងពីរនៅវេទិកាអន្តរជាតិ ហើយក្នុងការដោះស្រាយបញ្ហាតំបន់និងអន្តរជាតិពាក់ព័ន្ធនានាផងដែរ។ ឯកអគ្គរដ្ឋទូតវៀតណាមប្រចាំនៅឡាវ លោក Nguyen Ba Hung បានសង្កត់ធ្ងន់ថា៖

“អាចបញ្ជាក់បានថា ដំណើរទស្សនកិច្ចរបស់លោកប្រធានរដ្ឋ Vo Van Thuong នៅប្រទេសឡាវលើកនេះគឺមានអត្ថន័យសំខាន់ណាស់ ហើយនឹងបង្កើតកម្លាំងចលករដ៏ខ្លាំងក្លាសម្រាប់ពង្រឹងប្រសិទ្ធភាព និងនិរន្តរភាពនៃកិច្ចសហប្រតិបត្តិការរវាងប្រទេសទាំងពីរ រួមចំណែកធ្វើឱ្យទំនាក់ទំនងវៀតណាម-ឡាវក្លាយជាកត្តាវិជ្ជមាន រួមចំណែកដល់ការពង្រឹងសន្តិភាព សន្តិសុខ ស្ថិរភាព និងកិច្ចសហប្រតិបត្តិការនៅអាស៊ី និងពិភពលោក”។

ទំនាក់ទំនងវៀតណាម-ឡាវ គឺជាទំនាក់ទំនងពិសេស។ ជាមួយនឹងដំណើរទស្សនកិច្ចនៅឡាវរបស់ប្រធានរដ្ឋ លោក Vo Van Thuong ប្រទេសទាំងពីរនឹងបន្តប្រកៀកស្មាជាមួយគ្នាអភិវឌ្ឍន៍យ៉ាងខ្លាំងមាំមួន ពង្រឹងនិងពង្រីកប្រសិទ្ធភាពនៃទំនាក់ទំនងពិសេសវៀតណាម-ឡាវ រួមចំណែកទំនាក់ទំនងទ្វេភាគីឱ្យអភិវឌ្ឍន៍ឡើងដល់កំពស់ថ្មី៕