(vovworld) – “ສິດພື້ນຖານກ່ຽວກັບການສຳພັດກັບການບໍລິການສາທາລະນະສຸກ: ບົດບາດຂອງສະພາແຫ່ງຊາດໃນການແກ້ໄຂບັນດາສິ່ງທ້າທາຍທີ່ສຳຄັນ ເພື່ອຮັບປະກັນສຸຂະພາບໃຫ້ແມ່ຍິງ ແລະ ເດັກນ້ອຍ”. ນັ້ນແມ່ນຫົວຂໍ້ໄດ້ນຳມາປຶກສາຫາລືທີ່ກອງປະຊຸມຂອງຄະນະປະຈຳກ່ຽວກັບປະຊາທິປະໄຕ ແລະ ສິດທິມະນຸດ, ຖືກດຳເນີນໄປໃນວັນທີ 31/03, ຢູ່ຮ່າໂນ້ຍ, ໂດຍນອນໃນຂອບເຂດບັນດາການເຄື່ອນໄຫວຂອງກອງປະຊຸມໃຫຍ່ສະຫະພັນລັດຖະສະພາສາກົນ ຄັ້ງທີ 132 (IPU 132). ນີ້ກໍ່ແມ່ນເນື້ອໃນທີ່ໄດ້ຮັບການຮັບຮອງເອົາໃນມະຕິ 126 ຂອງ IPU ເມື່ອປີ 2012. ວາລະປຶກສາຫາລືໄດ້ສຸມໃສ່ເຮັດແຈ້ງບົດບາດຂອງລັດຖະສະພາໃນການແກ້ໄຂບັນດາສິ່ງທ້າທາຍໂດຍພື້ນຖານ ແນໃສ່ຮັບປະກັນການສົ່ງເສີມສຸຂະພາບໃຫ້ແມ່ຍິງ ແລະ ເດັກນ້ອຍ. ບັນດາຜູ້ແທນໄດ້ເນັ້ນໜັກເຖິງຄວາມສຳຄັນຂອງການຍູ້ແຮງດ້ານໂຄສະນາສື່ສານ, ລະດົມແຫຼ່ງການເງິນ ແລະ ເລື່ອງຍົກອອກບັນດາຂໍ້ກຳນົດລະອຽດກ່ຽວກັບການສົ່ງເສີມສຸຂະພາບໃຫ້ແມ່ຍິງ ແລະ ເດັກນ້ອຍ. ທ່ານນາງ Libby Davies, ສະມາຊິກສະພາແຫ່ງຊາດ ການາດາ, ເນັ້ນໜັກວ່າ.
“ດ້ວຍບົດບາດເປັນສະມາຊິກລັດຖະສະພາ, ພວກເຮົາຕ້ອງເຂົ້າໃຈໄດ້ຄວາມສຳຄັນຂອງການສົ່ງເສີມສຸຂະພາບໃຫ້ແມ່ຍິງ ແລະ ເດັກນ້ອຍ, ຈາກນັ້ນ ຍົກອອກຄຳສະເໜີ ແລະ ຫັນເປັນກົດໝາຍ. ຂ້າພະເຈົ້າຫວັງວ່າ, ບັນດາສະມາຊິກລັດຖະສະພາ IPU ຈະສືບຕໍ່ເຮັດວຽກຢ່າງຕັ້ງໜ້າ ເພື່ອໃຫ້ແມ່ຍິງ ແລະ ເດັກນ້ອຍໃນທົ່ວໂລກ, ພິເສດແມ່ນກຸຸ່ມຖືກສ່ຽງໄພສູງກວ່າເພິ່ນ ໄດ້ຮັບການສົ່ງເສີມສຸຂະພາບເປັນຢ່າງດີທີ່ສຸດ”.
ເພື່ອຊຸກຍູ້ການຜັນຂະຫຍາຍມະຕິ 126 ຂອງ IPU, ທີ່ວາລະປະຊຸມ, ຄະນະຜູ້ແທນຫວຽດນາມ ສະເໜີໃຫ້ລັດຖະສະພາບັນດາປະເທດ ເອົາໃຈໃສ່ເຖິງການປະກາດໄຊ້, ປັບປຸງ, ເພີ່ມເຕີມເອກະສານກ່ຽວຂ້ອງເຖິງວຽກງານສົ່ງເສີມສຸຂະພາບ, ໂດຍສະເພາະແມ່ນໃນການສົ່ງເສີມສຸຂະພາບໃຫ້ຜູ້ເປັນແມ່ ແລະ ເດັກນ້ອຍ, ພ້ອມທັງຍູ້ແຮງການຕິດຕາມກວດກາການຈັດຕັ້ງປະຕິບັດບັນດາເອກະສານກົດໝາຍ ແລະ ປະກາດມາດຕະການແກ້ໄຂນະໂຍບາຍສັງລວມ ເພື່ອຊຸກຍູ້ການສົ່ງເສີມສຸຂະພາບຮອບດ້ານສຳລັບຜູ້ເປັນແມ່ ແລະ ເດັກນ້ອຍ.
ແລະກໍ່ໃນວັນດຽວກັນ, ຄະນະປະຈຳການກ່ຽວກັບສັນຕິພາບ ແລະ ຄວາມປອດໄພສາກົນ, ຄະນະປະຈຳກ່ຽວກັບການພັດທະນາຢ່າງໝັ້ນຄົງ, ການເງິນ ແລະ ການຄ້າ, ຄາດວ່າຈະຮັບຮອງເອົາມະຕິກ່ຽວກັບສົງຄາມອີນເຕີແນັດ ແລະ ການຄຸ້ມຄອງແຫຼ່ງນ້ຳ ກ່ອນທີ່ຈະຍື່ນສະເໜີຕໍ່ກອງປະຊຸມຄົບຄະນະຂອງ IPU.