ບັນດາເຮືອບິນຂົນສົ່ງເຄື່ອງໜູນຊ່ວຍມະນຸດສະທຳສາກົນ ຢູ່ສະໜາມບິນ al-Arish ຂອງ ອີຢິບ (ພາບ: VOV)

ຕອນເຊົ້າວັນທີ 23 ພະຈິກ, ວົງການເຈົ້າໜ້າທີ່ ອິດສະຣາແອັນ ໃຫ້ຮູ້ວ່າ ການປະທະກັນຢູ່ເຂດ ກາຊາ ແລະ ເລື່ອງຂະບວນການ ອິດສະລາມ ຮາມາດສ ປ່ອຍຕົວປະກັນ ຈະບໍ່ດຳເນີນກ່ອນວັນທີ 24 ພະຈິກ, ເຖິງແມ່ນວ່າ ສອງຝ່າຍໄດ້ເປັນເອກະສັນຕໍ່ຄຳສັ່ງຢຸດຍິງຊົ່ວຄາວເພື່ອຈຸດປະສົງມະນຸດສະທຳແລ້ວກໍຕາມ. ຖະແຫຼງການນີ້ໄດ້ຍົກອອກມາພາຍຫຼັງທີ່ ທ່ານ Tzachi Hanegbi ທີ່ປຶກສາດ້ານຄວາມໝັ້ນຄົງແຫ່ງຊາດ ອິດສະຣາແອັນ ໄດ້ຢັ້ງຢືນໃນຕອນຄ່ຳວັນທີ 22 ພະຈິກ ວ່າ ການປ່ອຍເປັນອິດສະຫຼະຕົວປະກັນທີ່ຖືກ ຮາມາດສ ກັກຂັງ ນັບແຕ່ເກີດການປະທະກັນໃນວັນທີ 7 ຕຸລາ ນັ້ນ ຈະບໍ່ໄດ້ດຳເນີນກ່ອນຈຸດເວລາດັ່ງກ່າວ, ແຕ່ຈະປະຕິບັດຕາມແຜນການທີ່ສອງຝ່າຍໄດ້ຕົກລົງກັນໄວ້ໃນເບື້ອງຕົ້ນ. ທ່ານຊີ້ແຈ້ງວ່າ ບັນດາການພົບປະກ່ຽວກັບເລື່ອງປ່ອຍຕົວປະກັນ ພວມໄດ້ຊຸກຍູ້ ແລະ ດຳເນີນໄປເລື້ອຍໆ.

          ຕາມຂໍ້ຕົກລົງລະຫວ່າງ ອິດສະຣາແອັນ ແລະ ຮາມາດສ ແລ້ວ, ສອງຝ່າຍຈະຢຸດຕິການປະທະກັນຢູ່ເຂດ ກາຊາ ພາຍໃນ 4 ວັນ ເພື່ອສ້າງເງື່ອນໄຂແກ່ການເຄື່ອນໄຫວໜູນຊ່ວຍມະນຸດສະທຳ. ໃນໄລຍະຢຸດຍິງ, ຝ່າຍ ຮາມາດສ ຈະປ່ອຍຕົວປະກັນ ເປັນອິດສະຫຼະຢ່າງໜ້ອຍສຸດ 50 ຄົນ ໃນຈຳນວນທັງໝົດ 240 ຄົນ. ໃນຂະນະນັ້ນ, ອິດສະຣາແອັນ ກໍຈະປ່ອຍນັກໂທດ ຊາວປາແລັດສະຕິນ 150 ຄົນ, ໃນນັ້ນ ມີເດັກນ້ອຍ ແລະ ແມ່ຍິງຫຼາຍຄົນ. ຂໍ້ຕົກລົງດັ່ງກ່າວ ໂດຍລັດຖະບານ ອິດສະຣາແອັນ ຮັບຮອງເອົາ ດ້ວຍຈຳນວນບັດເຫັນດີສ່ວນໃຫຍ່.