ທ່ານ ຟ້າມບິ່ງມິງ, ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ຫວຽດນາມ
ກ່າວຄວາມເຫັນໃນພິທີສະເຫຼີມສະຫຼອງ
(ພາບ:vnanet.vn)
(vovworld) - ເນືອງໃນໂອກາດສະເຫຼີມສະຫຼອງ 70 ປີ ແຫ່ງວັນສ້າງຕັ້ງຂະແໜງການທູດຫວຽດນາມ, ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງຈົດໝາຍອວຍພອນເຖິງທ່ານ ຟ້າມບິ່ງມິງ, ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ. ໃນຈົດໝາຍ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ທອງລຸນສີສຸລິດ ໄດ້ຕີລາຄາສູງການປະກອບສ່ວນຂອງຂະແໜງການທູດຫວຽດນາມ ໃນພາລະກິດປົກປັກຮັກສາ, ສ້າງສາ ແລະ ພັດທະນາປະເທດຫວຽດນາມ ກໍ່ຄືໃນການສ້າງອິດທິພົນຊື່ສຽງ, ຍົກສູງ ແລະ ເຮັດໃຫ້ທີ່ຕັ້ງຂອງຫວຽດນາມ ພົ້ນເດັ່ນຂຶ້ນໃນເວທີສາກົນ ແລະ ພາກພື້ນ, ນຳມາເຊິ່ງຜົນປະໂຫຍດອັນແທດຈິງໃຫ້ປະຊາຊົນຫວຽດນາມ, ປະກອບສ່ວນຢ່າງຕັ້ງໜ້າເຂົ້າໃນການສ້າງສັນຕິພາບ, ສະຖຽນລະພາບ ແລະ ການເຊື່ອມໂຍງພັດທະນາໃນພາກພື້ນ ແລະ ໃນໂລກ. ທ່ານຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ທອງລຸນສີສຸລິດ ກໍ່ຕີລາຄາສູງການຮ່ວມມືຂອງຂະແໜງການທູດສອງປະເທດລາວ - ຫວຽດນາມ ໃນວຽກງານສົມທົບກັນ, ແລກປ່ຽນບົດຮຽນ ແລະ ຄວາມເຫັນ, ສະໜັບສະໜູນ, ຊ່ວຍເຫຼືອເຊິ່ງກັນ ແລະ ກັນ; ພ້ອມທັງສະແດງຄວາມຂອບອົກຂອບໃຈກະຊວງການຕ່າງປະເທດຫວຽດນາມ ໃນໄລຍະຜ່ານມາຍາມໃດກໍ່ໃຫ້ການຊ່ວຍເຫຼືອລາວຢ່າງມີປະສິດທິຜົນ ແລະ ທັນການ.