ທ່ານນາງປະທານສະພາແຫ່ງຊາດ ຫງວຽນທິກີມເງິນ
ກ່າວຄຳເຫັນທີ່ພິທີປະກາດ
(vovworld) - ຕອນເຊົ້າວັນທີ 29/08 ຢູ່ ຮ່າໂນ້ຍ, ຄະນະປະຈຳຄະນະກຳມະການສູນກາງແນວໂຮມປະເທດຊາດ ຫວຽດນາມ ສົມທົບກັບສະຫະພັນບັນດາສະມາຄົມວິທະຍາສາດ ແລະ ເຕັກນິກ ຫວຽດນາມ, ກະຊວງວິທະຍາສາດ ແລະ ເຕັກໂນໂລຢີ ແລະ ບັນດາກະຊວງ, ຂະແໜງການທີ່ກ່ຽວຂ້ອງຈັດຕັ້ງພິທີປະກາດ ແລະ ພິມຈຳໜ່າຍປື້ມຄຳຫົວຄິດປະດິດສ້າງ ຫວຽດນາມ ປີ 2016. ປື້ມຄຳຫົວຄິດປະດິດສ້າງ ຫວຽດນາມ ປີ 2016 ຖືກຄັດເລືອກ ແລະ ປະກາດ 71 ກິດຈະກຳທີ່ມີຫົວຄິດປະດິດສ້າງດ້ານວິທະຍາສາດ, ເຕັກໂນໂລຢີຈາກ 186 ກິດຈະກຳໂດຍບັນດາກະຊວງ, ຄະນະ, ຂະແໜງການ, ບັນດາອົງການສະມາຊິກຂອງແນວໂຮມຢູ່ຂັ້ນສູນກາງ ແລະ ຄະນະກຳມະການປະຊາຊົນບັນດາແຂວງ, ນະຄອນຂຶ້ນກັບສູນກາງແນະນຳ. ກ່າວຄຳເຫັນທີ່ພິທີປະກາດ, ທ່ານນາງປະທານສະພາແຫ່ງຊາດ ຫງວຽນທິກີມເງິນ ເນັ້ນໜັກວ່າ: ການຄັດເລືອກ ແລະ ປະກາດປື້ມຫົວຄິດປະດິດສ້າງ ຫວຽດນາມ 2016 ແມ່ນວຽກງານທີ່ມີຫົວຄິດປະດິດສ້າງ, ທັນການ ເພື່ອປຸກລະດົມ ແລະ ເຊີດຊູບັນດານັກວິທະຍາສາດ ແລະ ນັກປະດິດສ້າງ. ທ່ານນາງປະທານສະພາແຫ່ງຊາດ ຫງວຽນທິກີມເງິນ ໃຫ້ຮູ້ວ່າ:
“ຂ້າພະເຈົ້າສະເໜີບັນດາສະຫາຍສືບຕໍ່ເອົາໃຈໃສ່, ສົ່ງເສີມການຄົ້ນຫາ, ປະດິດສ້າງບັນດາກິດຈະກຳວິທະຍາສາດ ແລະ ເຕັກໂນໂລຢີ, ປຸກລະດົມທຸກຂັ້ນ, ທຸກຂະແໜງ, ປະຊາຊົນທຸກຊັ້ນວັນນະ, ຊາວ ຫວຽດນາມ ອາໄສຢູ່ຕ່າງປະເທດ ຕອບສະໜອງການເຂົ້າຮ່ວມຂະບວນການແຂ່ງຂັນປະດິດສ້າງ, ຄົ້ນຄວ້າການໜູນໃຊ້ວິທະຍາສາດ ແລະ ເຕັກໂນໂລຢີ, ເພື່ອຈາກນັ້ນ ຄັດເລືອກກິດຈະກຳ, ມາດຕະການປະດິດສ້າງດ້ານວິທະຍາສາດ ແລະ ເຕັກໂນໂລຢີ ເພື່ອເຮັດໃຫ້ປື້ມຄຳຫົວຄິດປະດິດສ້າງ ຫວຽດນາມ ຂອງພວກເຮົາອຸດົມສົມບູນ ເພື່ອປະກາດຢ່າງກ້ວາງຂວາງໃນທົ່ວສັງຄົມ.”