(vovworld) – ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກກອມມູນິດຫວຽດນາມ ດຳເນີນຢູ່ຮ່າໂນ້ຍ ໄດ້ຮັບຄວາມເອົາໃຈໃສ່ຈາກປະຊາຊົນທົ່ວປະເທດ. ມີຫຼາຍຄຳເຫັນຂອງປະຊາຊົນສະແດງໃຫ້ເຫັນຄວາມເຫັນດີເຫັນພ້ອມກັບບົດລາຍງານຕີລາຄາການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກໃນອາຍຸການຜ່ານມາ ແລະ ໄລຍະ 30 ປີແຫ່ງການປ່ຽນໃໝ່ຂອງປະເທດຊາດ ເຊິ່ງບັນດາຜູ້ແທນສະເໜີທີ່ກອງປະຊຸມໃຫຍ່. ທ່ານປະລິຍາເອກ ຫງວຽນກ໋ວກຢຸງ, ຫົວໜ້າສະຖາບັນການເມືອງ - ການປົກຄອງເຂດທົ່ງພຽງແມ່ນນ້ຳຂອງທາງພາກໃຕ້ຫວຽດນາມ, ຍົກຄຳເຫັນວ່າ.
“ເອກະສານກອງປະຊຸມໃຫຍ່ຄັ້ງທີ 12 ຂອງພັກ ມີ 2 – 3 ບັນຫາທີ່ຂ້າພະເຈົ້າພໍໃຈທີ່ສຸດກອງປະຊຸມໃຫຍ່ບໍ່ພຽງແຕ່ຕີລາຄາອາຍຸການ 5 ປີຜ່ານມາເທົ່ານັ້ນ ຫາກຍັງຫວນຄືນໄລຍະ 30 ປີແຫ່ງການປ່ຽນໃໝ່ອີກດ້ວຍ. ສະນັ້ນ, ເຖິງວ່າແມ່ນເອກະສານຂອງກອງປະຊຸມໃຫຍ່ອາຍຸການ 5 ປີກໍ່ຕາມ, ແຕ່ມັນໄດ້ຕີລາຄານັບທັງວິວັດການປ່ຽນໃໝ່ຂອງປະເທດຊາດ, ດ້ວຍບັນດາບົດຮຽນໃຫຍ່. ແລະຫົວຂໍ້ຂອງກອງປະຊຸມໃຫຍ່ໄດ້ກຳນົດໜ້າທີ່ ແລະ ທິດທາງຂອງທັງປະເທດຢ່າງຈະແຈ້ງ. ໃນເອກະສານກອງປະຊຸມໃຫຍ່ຄັ້ງທີ XII ຂອງພັກ, ຂ້າພະເຈົ້າພໍໃຈຕໍ່ 2 ບັນຫາຄື: ທີ່ໜຶ່ງ, ກອງປະຊຸມໃຫຍ່ກຳນົດການປ່ຽນໃໝ່ຮູບແບບການເຕີບໂຕດ້ານເສດຖະກິດ, ນີ້ແມ່ນບັນຫາໃຫຍ່ຂອງປະເທດຊາດ. ທີ່ 2, ແມ່ນພັກເຮົາພວມວາງອອກບັນຫາຍູ້ແຮງສະມັດຕະພາບປັດໃຈລວບລວມ TFP ໃນ % ຂອງການເຕີບໂຕ GDP. ຂ້າພະເຈົ້າຖືວ່າ ນັ້ນແມ່ນການຕັ້ງບັນຫາຖືກຕ້ອງກັບທິດທາງທັນສະໄໝໃນປະຈຸບັນ”.
ກ່ຽວກັບບັນດາເນື້ອໃນ, ລັດຖະນະໂຍບາຍເຊິ່ງພັກໄດ້ວາງອອກໃນໄລຍະຈະມາເຖິງເພື່ອພັດທະນາປະເທດຊາດ ໃນໄລຍະເຊື່ອມໂຍງ, ທ່ານນາງ ຫງວຽນທິບິກທຸຍ, ຮອງປະທານສະຫະພັນແຮງງານນະຄອນໂຮ່ຈິມິນ, ສະເໜີວ່າ.
“ພວກຂ້າພະເຈົ້າປາດຖະໜາວ່າ, ພັກສືບຕໍ່ກໍ່ສ້າງຊົນຊັ້ນກຳມະກອນຫວຽດນາມ ເພື່ອຍູ້ແຮງໄລຍະຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ. ຊົນຊັ້ນກຳມະກອນຫວຽດນາມ ຕ້ອງມີລະດັບຄວາມຮູ້ສູງ, ໄດ້ຮັບການກໍ່ສ້າງ, ມີວີຊາສະເພາະໃນທຸກຂົງເຂດ, ອາຊີບ ແລະ ພິເສດແມ່ນມີຄຸນນະທາດດ້ານການເມືອງທີ່ໝັ້ນຄົງ, ນຳໃຊ້ວິທະຍາສາດເຕັກໂນໂລຊີທີ່ກ້າວໜ້າເຂົ້າໃນການອອກແຮງງານທຳການຜະລິດ. ຈຳເປັນຕ້ອງກຳນົດທິດປ່ຽນໃໝ່ກ່ຽວກັບການຈັດຕັ້ງ ແລະ ເຄື່ອນໄຫວຂອງລະບົບການເມືອງ ໃນນັ້ນມີອົງການຈັດຕັ້ງກຳມະບານ ຍົກສູງຄຸນນະພາບການເຄື່ອນໄຫວຂອງກຳມະບານຂັ້ນຮາກຖານ ແລະ ກຳມະບານຫວຽດນາມ ເວົ້າລວມແມ່ນຕ້ອງໝັ້ນຄົງເຂັ້ມແຂງ, ເພື່ອຕອບສະໜອງສະພາບການໃໝ່, ພິເສດແມ່ນເມື່ອພວກເຮົາເຂົ້າຮ່ວມສັນຍາການຄ້າຂ້າມປາຊີຟິກ”.