ປະທານປະເທດເຈີນດ້າຍກວາງເຈລະຈາກັບປະທານາທິບໍດີສະຫະພາບມຽນມາ Htin Kyaw
.jpg)
(ທ່ານປະທານປະເທດເຈີນດ້າຍກວາງເຈລະຈາກັບ
ທ່ານປະທານາທິບໍດີສະຫະພາບມຽນມາ Htin Kyaw)
(vovworld) - ຕອນບ່າຍວັນທີ 26/10, ພາຍຫຼັງພິທີຕ້ອນຮັບທ່ານປະທານາທິບໍດີສະຫະພາບມຽນມາ Htin Kyaw ຢ່າງເປັນທາງການ, ຢູ່ສຳນັກງານປະທານປະເທດ, ທ່ານປະທານປະເທດຫວຽດນາມ ເຈີນດ້າຍກວາງ ແລະ ທ່ານປະທານາທິບໍດີສະຫະພາບ Htin Kyaw ໄດ້ດຳເນີນການເຈລະຈາ.
ທີ່ການເຈລະຈາ, ການນຳ 2 ທ່ານໄດ້ສະແດງໃຫ້ເຫັນຄວາມເພິ່ງພໍໃຈຕໍ່ການພັດທະນາການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານຂອງ 2 ປະເທດໃນ 40 ກວ່າປີຜ່ານມາ. ການຮ່ວມມືດ້ານການເມືອງໄດ້ມີຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈທີ່ສຳຄັນດ້ວຍເລື່ອງ 2 ຝ່າຍໄດ້ແລກປ່ຽນບັນດາການຢ້ຽມຢາມ ແລະ ການພົບປະຂັ້ນສູງ. ການພົວພັນດ້ານເສດຖະກິດ, ການຄ້າ, ການລົງທຶນໄດ້ຮັບການພັດທະນາຢ່າງໝັ້ນຄົງເຂັ້ມແຂງ. 2 ຝ່າຍໄດ້ແບ່ງປັນທັດສະນະ, ຜົນປະໂຫຍດລວມກ່ຽວກັບສັນຕິພາບ, ຄວາມປອດໄພໃນພາກພື້ຶ້ນ ແລະ ຢືນຢັນຄຳໝັ້ນສັນຍາເພີ່ມທະວີການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບລະຫວ່າງ 2 ປະເທດ. 2 ປະເທດເຫັນດີຊຸກຍູ້ການພົບປະແລກປ່ຽນປະຊາຊົນ ແລະ ຍູ້ແຮງການຮ່ວມມືດ້ານວັດທະນະທຳ, ທ່ອງທ່ຽວ ແລະ ເຊື່ອໝັ້ນວ່າ ຄວາມເຂົ້າອົກເຂົ້າໃຈ ແລະ ແບ່ງປັນບັນດາຄຸນຄ່າວັດທະນະທຳລະຫວ່າງ 2 ປະເທດຈະແມ່ນພື້ນຖານຢ່າງໝັ້ນຄົງໃຫ້ຄວາມໄວ້ເນື້ອເຊື່ອໃຈ, ສະໜິດຕິດພັນຢ່າງຍາວນານລະຫວ່າງ 2 ຊາດ. ນອກຈາກການຮ່ວມມື 2 ຝ່າຍ, 2 ຝ່າຍໄດ້ສຸມໃສ່ແລກປ່ຽນບັນດາບັນຫາພາກພື້ນ ແລະ ສາກົນ ທີ່ຕ່າງຝ່າຍຕ່າງມີຄວາມສົນໃຈ. 2 ຝ່າຍໃຫ້ຄຳໝັ້ນສັນຍາສົມທົບກັບປະເທດອື່ນໆໃນອາຊຽນ ເພື່ອຊຸກຍູ້ຄວາມມານະພະຍາຍາມສ້າງປະຊາຄົມອາຊຽນ ຜ່ານການຜັນຂະຫຍາຍຢ່າງມີປະສິດທິຜົນ, ຄົບຖ້ວນວິໄສທັດປະຊາຄົມອາຊຽນ 2025 ແລະ ຊຸກຍູ້ບົດບາດແກ່ນກາງຂອງອາຊຽນ ໃນການສ້າງໂຄງປະກອບໃນພາກພື້ນ…
ກ່ຽວກັບບັນຫາທະເລຕາເວັນອອກ, 2 ຝ່າຍໃຫ້ຄຳໝັ້ນສັນຍາຮັກສາ ແລະ ຊຸກຍູ້ສັນຕິພາບ, ຄວາມໝັ້ນຄົງ, ສະຖຽນລະພາບ, ຄວາມປອດໄພ ແລະ ການເດີນທະເລຢ່າງເສລີ, ກໍຄືການຄ້າບໍ່ຖືກຂັດຂວາງໃນພາກພື້ນ, ພິເສດແມ່ນຢູ່ທະເລຕາເວັນອອກ; ຮຽກຮ້ອງໃຫ້ຝ່າຍຕ່າງໆຈົງລະງັບໃຈ, ບໍ່ນາບຂູ່ນຳໃຊ້ອາວຸດ ຫຼື ນຳໃຊ້ອາວຸດ, ເຄົາລົບບັນດາວິວັດທະນາການທາງການທູດ, ກົດໝາຍ, ແກ້ໄຂການຂັດແຍ້ງກັນໂດຍສັນຕິວິທີ, ບົນພື້ນຖານບັນດາຫຼັກການພື້ນຖານຂອງກົດໝາຍສາກົນ.