(vovworld) – ສະພາແຫ່ງຊາດ ກຳປູເຈຍ ໄດ້ກ່າວຕຳນິຕິຕຽນຢ່າງຮຸນແຮງຖະແຫຼງການຂອງຜູ້ນຳຝ່າຍຄ້ານ Sam Rainsy ເຊິ່ງຖືວ່າ: ສະພາແຫ່ງຊາດ ກຳປູເຈຍ ຊຸດທີ 5 ບໍ່ສະແດງໃຫ້ເຫັນຄວາມມຸ່ງມາດປາດຖະໜາຂອງປະຊາຊົນ, ພ້ອມທັງຢືນຢັນການເຄື່ອນໄຫວຂອງທ່ານ Sam Rainsy ສົ່ງຜົນຮ້າຍຢ່າງໜັກໜ່ວງເຖິງບົດບາດອັນສູງສົ່ງຂອງພະບາດສົບເດັດພະເຈົ້າມະຫາຊີວິດ Norodom Sihamoni. ຄຳຕຳນິຕິຕຽນດັ່ງກ່າວຂອງສະພາແຫ່ງຊາດ ໄດ້ຍົກອອກມາພາຍຫຼັງທີ່ທ່ານ Sam Rainsy, ປະທານພັກກູ້ຊາດ ກຳປູເຈຍ (CNRP) ສົ່ງຈົດໝາຍເຖິງພະບາດສົບເດັດພະເຈົ້າມະຫາຊີວິດ Norodom Sihamoni ໃນວັນທີ 2/4, ໃນນັ້ນໃຫ້ຮູ້ວ່າ: ປະຈຸບັນ, ສະພາແຫ່ງຊາດ ກຳປູເຈຍແມ່ນຜິດກົດໝາຍ, ບໍ່ເປັນຕົວແທນໃຫ້ແກ່ຄວາມມຸ່ງມາດປາດຖະໜາຂອງປະຊາຊົນ ກຳປູເຈຍ ຍ້ອນມີພຽງແຕ່ເຕົ້າໂຮມບັນດາຜູ້ຕາງໜ້າຂອງພັກປະຊາຊົນ ກຳປູເຈຍ (CPP).
ຖະແຫຼງການເມື່ອວັນທີ 4/4 ຂອງສະພາແຫ່ງຊາດ ກຳປູເຈຍ ເນັ້ນໜັກວ່າ: ສະພາແຫ່ງຊາດຊຸດທີ 5 ແມ່ນໝາກຜົນການຮວບຮວມຄວາມມຸ່ງມາດປາດຖະໜາຂອງຜູ້ມີສິດເລືອກຕັ້ງ ກຳປູເຈຍ ຜ່ານການປ່ອນບັດໂດຍປະຊາທິປະໄຕ ແລະ ເສລີພາບ. ການເຄື່ອນໄຫວຂອງສະພາແຫ່ງຊາດຊຸດທີ 5 ແມ່ນສອດຄ່ອງກັບລັດຖະທຳມະນູນ ແລະ ກົດໝາຍຂອງ ກຳປູເຈຍ ປະຈຸບັນ. ໃນຂະນະນັ້ນ, ສະມາຊິກສະພາແຫ່ງຊາດ 55 ທ່ານສັງກັດ CNRP ໄດ້ປະຕິເສດບົດບາດ ແລະ ຄວາມຮັບຜິດຊອບເຊິ່ງຜູ້ມີສິດເລືອກຕັ້ງລໍຄອຍ.