(vovworld) – ຕອນບ່າຍວັນທີ 21/05, ບັນດາສະມາຊິກສະພາແຫ່ງຊາດໄດ້ປຶກສາຫລືກ່ຽວກັບຮ່າງກົດໝາຍວ່າດ້ວຍພັນທະການທະຫານ (ສະບັບປັບປຸງ). ກົດໝາຍວ່າດ້ວຍພັນທະການທະຫານ ເຊິ່ງສະພາແຫ່ງຊາດຫວຽດນາມ ຊຸດທີ 7 ຮັບຮອງເອົາ ທີ່ກອງປະຊຸມສະໄໝສາມັນເທື່ອທີ 2 ເມື່ອວັນທີ 30/12/1981 ແລະ ໄດ້ຮັບການປັບປຸງ, ເພີ່ມເຕີມໃນປີ 1990, 1994 ແລະ 2005. ແຕ່ວ່າ, ກົດໝາຍວ່າດ້ວຍພັນທະການທະຫານ ໄດ້ມີບັນດາຂໍ້ຕິດຂັດ, ຍັງບໍ່ທັນເໝາະສົມກັບສະພາບຕົວຈິງ. ຄຳເຫັນສ່ວນຫຼາຍໄດ້ຖືວ່າ, ຄວນຮັກສາເກ່ັນອາຍຸເຂົ້າເປັນທະຫານຄືກົດໝາຍພວມປະກາດໃຊ້ ແມ່ນ 18 – 27 ປີ. ມີບາງຄຳເຫັນສະເໜີ ບໍ່ກຳນົດການເຂົ້າເປັນທະຫານສຳລັບນັກສຶກສາມະຫາວິທະຍາໄລ ທີ່ພວມຮໍ່າຮຽນໃນບັນດາໂຮງຮຽນທີ່ຂຶ້ນກັບລະບົບສຶກສາຂອງລັດ.
ແລະກໍ່ໃນຕອນເຊົ້າວັນດ່ຽວກັນ, ບັນດາສະມາຊິກສະພາແຫ່ງຊາດ ໄດ້ປຶກສາຫາລືຢູ່ຫໍປະຊຸມກ່ຽວກັບຮ່າງກົດໝາຍວ່າດ້ວຍແນວໂຮມປະເທດຊາດຫວຽດນາມ (ສະບັບປັບປຸງ). ຮ່າງກົດໝາຍຄັ້ງນີ້ ໄດ້ເພີ່ມເຕີມ, ເຮັດແຈ້ງບົດບາດ, ທີ່ຕັ້ງ, ພາລະໜ້າທີ່, ສິດ ແລະ ໜ້າທີ່ຮັບຜິດຊອບ, ລະບົບອົງການຈັດຕັ້ງ ແລະ ການເຄື່ອນໄຫວຂອງແນວໂຮມປະເທດຊາດຫວຽດນາມ ທຸກຂັ້ນ, ໂດຍສະເພາະແມ່ນເພີ່ມເຕີມ, ກຳນົດແຈ້ງການເຄື່ອນໄຫວຕິດຕາມກວດກາ ແລະ ການໄຈ້ແຍກຕີລາຄາສັງຄົມ, ຮັບປະກັນເໝາະສົມກັບຂໍ້ກຳນົດຂອງລັດຖະທຳມະນູນ ແລະ ສະພາບຕົວຈິງ. ທ່ານນາງ ເຈີ່ນທິຮົ່ງທັ໋ມ, ສະມາຊິກສະພາແຫ່ງຊາດນະຄອນເກີນເທີ ປະກອບຄຳເຫັນວ່າ.
“ກ່ຽວກັບການຈັດຕັ້ງຂອງແນວໂຮມປະເທດຊາດຫວຽດນາມ, ຂ້າພະເຈົ້າສະເໜີກຳນົດບົດບາດໜ້າທີ່, ສິດອຳນາດ ແລະ ເງື່ອນໄຂຮັບປະກັນໃຫ້ການເຄື່ອນໄຫວຂອງແນວໂຮມປະເທດຊາດຫວຽດນາມໃຫ້ລະອຽດກວ່າ, ໂດຍສະເພາະແມ່ນໃນການເຄື່ອນໄຫວຕິດຕາມກວດກາ ແລະ ການໄຈ້ແຍກຕີລາຄາສັງຄົມ. ຈາກນັ້ນ ເພື່ອໃຫ້ແນວໂຮມປະເທດຊາດຫວຽດນາມ ເປັນບ່ອນເຕົ້າໂຮມ, ກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເປັນຜູ້ຕາງໜ້າປົກປ້ອງສິດ ແລະ ຜົນປະໂຫຍດຖືກຕ້ອງກົດໝາຍ, ຊອບທຳຂອງປະຊາຊົນຢ່າງແທ້ຈິງ, ປະກອບສ່ວນກໍ່ສ້າງທັງລະບົບການເມືອງໃຫ້ໝັ້ນຄົງເຂັ້ມແຂງ ແລະ ມີປະສິດທິຜົນ”.
ແລະກໍ່ໃນຕອນເຊົ້າວັນດຽວກັນ, ທ່ານປະທານກຳມາທິການກົດໝາຍຂອງສະພາແຫ່ງຊາດ ຟານຈຸງລິ໋ ໄດ້ລາຍງານໃບສະເໜີກ່ຽວກັບຮ່າງກໍ່ສ້າງກົດໝາຍ, ລັດຖະບັນຍັດຂອງສະພາແຫ່ງຊາດປີ 2016. ທ່ານຫົວໜ້າຫ້ອງວ່າການສະພາແຫ່ງຊາດ ຫງວຽນແຮ້ງຟຸ໋ກ ລາຍງານໃບສະເໜີຮ່າງກົດໝາຍວ່າດ້ວຍການເຄື່ອນໄຫວຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນ.
ຕອນບ່າຍວັນດຽວກັນ, ບັນດາສະມາຊິກສະພາແຫ່ງຊາດ ປຶກສາຫາລືກ່ຽວກັບຮ່າງກົດໝາຍວ່າດ້ວຍພັນທະທະຫານ (ສະບັບປັບປຸງ).