(vovworld) – ໂດຍສືບຕໍ່ກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13, ວັນທີ 21/10, ສະພາແຫ່ງຊາດປຶກສາຫາລືຢູ່ໜ່ວຍກ່ຽວກັບສະພາບເສດຖະກິດ, ສັງຄົມປີ 2014 ແລະ ໜ້າທີ່ປີ 2015, ໝາກຜົນການປະຕິບັດງົບປະມານແຫ່ງລັດປີ 2014 ແລະ ແຜນງົບປະມານແຫ່ງລັດ ແລະ ວິທີຈັດແບ່ງງົບປະມານສູນກາງປີ 2015.
ເມື່ອປຶກສາຫາລືກ່ຽວກັບສະພາບການເສດຖະກິດສັງຄົມຂອງປະເທດຊາດ, ສະມາຊິກສະພາແຫ່ງຊາດ (ສສຊ) ຫລາຍທ່ານຕີລາຄາສູງບັນດາມາດຕະການຮັກສາເສດຖະກິດມະຫາພາກເປັນປົກກະຕິ ແລະ ຄວບຄຸມໄພເງິນເຟີ້ຂອງລັດຖະບານໃນໄລຍະຜ່ານມາ. ປີ 2011 ໄພເງິນເຟີ້ຢູ່ໃນລະດັບ 18,13%, ມາຮອດປະຈຸບັນຫລຸດລົງຍັງເຫລືອພຽງ 5%, ຍ້ອນເຫດນັ້ນອັດຕາດອກເບ້ຍທະນາຄານກໍຫລຸດລົງ. ທ່ານ ເຈີນຮ່ວາງເງິນ, ສສຊ ນະຄອນ ໂຮ່ຈິມີນ ຖືວ່າ: ລັດຖະບານ ຄວນສຸມໃສ່ຊຸກຍູ້ເສດຖະກິດພາຍໃນປະເທດ, ໃນນັ້ນ ສຸມໃສ່ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ.
ກ່ອນໜ້ານັ້ນ, ວັນທີ 20/10, ໃນບົດລາຍງານກ່ຽວກັບສະພາບເສດຖະກິດ, ສັງຄົມປີ 2014 ແລະ ໜ້າທີ່ປີ 2015 ໂດຍທ່ານນາຍົກລັດຖະມົນຕີ ຫງວຽນເຕີນຢຸງ ສະເໜີຕໍ່ສະພາແຫ່ງຊາດຊີ້ແຈ້ງວ່າ: ລັດຖະບານສືບຕໍ່ປະຕິບັດແຜນຮ່າງສັງລວມສ້າງໂຄງປະກອບພື້ນຖານເສດຖະກິດ ແລະ ໂຄງປະກອບຂະແໜງ, ຂົງເຂດຄືນໃໝ່. ປະຕິບັດການຫັນລັດວິສາຫະກິດຄືນໃໝ່ຢ່າງຮີບດ່ວນ ແລະ ແໜ້ນແຟ້ນ. ສຳເລັດແຜນການຫັນເປັນຫຸ້ນສ່ວນ ແລະ ຖອນທຶນນອກຂະແໜງ. ສືບຕໍ່ສ້າງໂຄງປະກອບບັນດາອົງການສິນເຊື່ອຄືນໃໝ່; ຍົກສູງຄວາມສາມາດດ້ານການເງິນ, ກຳລັງຄວາມສາມາດໃນການຄຸ້ມຄອງ ແລະ ຄຸນນະພາບສິນເຊື່ອ… ສ້າງລະບອບ, ກົນໄກນະໂຍບາຍໃຫ້ສົມບູບແບບ; ປະຕິບັດບັນດາກົດເກນຂອງເສດຖະກິດການຕະຫຼາດຢ່າງຄົບຖ້ວນ, ໂດຍສະເພາະແມ່ນໃນການຄຸ້ມຄອງລາຄາ, ຈັດແບ່ງແຫຼ່ງກຳລັງ, ການແກ່ງແຍ່ງຢ່າງສະເໝີພາບ, ກະຈາງແຈ້ງ… ແລະກໍ່ໃນວັນທີ 20/10, ສະພາແຫ່ງຊາດກໍ່ໄດ້ຮັບຟັງບົດລາຍງານລວບລວມຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ, ໃບສະເໜີ ແລະ ບົດລາຍການກວດກາກ່ຽວກັບວຽກງານປ້ອງກັນ, ຕ້ານການສໍ້ລາດບັງຫຼວງ.